ᤀᤥᤒᤍᤡᤕᤠ 1 - LIFOTNT

ᤀᤥᤒᤍᤡᤕᤠᤖᤧ ᤏᤡᤛᤢᤒᤠ ᤛᤢᤑᤥ

¹ ᤀᤣᤍᤥᤔᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤄᤱᤅᤡᤴ ᤀᤥᤒᤍᤡᤕᤠᤀᤥ ᤁᤧᤖᤧ— ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ᤜᤠᤱᤗᤠᤀᤡᤱᤒᤠᤎᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤐᤠ᤺ᤵᤔᤠᤖᤧ ᤗᤠᤃᤡ ᤔᤧᤒᤠᤱᤄᤢ ᤔᤧᤍᤣᤛᤢᤀᤠᤱ ᤘᤕᤧᤖᤥ. “ᤐᤥᤃᤧᤶᤔᤧ᤹ᤀᤥ. ᤀᤠᤏᤡ᤹ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤐᤣᤃᤡᤖᤥ॥”

² “ᤀᤥᤔᤧᤳᤋᤧ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤂᤧᤏᤧ᤹ ᤛᤠ᤹ᤖᤡᤰ ᤆᤢᤰᤛᤠ ᤆᤥ᤺ᤰᤏᤧᤖᤥ ᤁᤧᤖᤧᤰᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤜᤡᤏᤠ᤺ᤶ ᤁᤧᤶᤔᤧᤳᤗᤥ॥

³ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥᤒᤠ ᤕᤶᤒᤠ ᤁᤧᤜᤧᤴᤇᤡᤱᤔᤧᤸᤗᤧ ᤂᤧᤏᤧ᤹ ᤀᤡᤱᤗᤧᤰᤁᤥ ᤁᤧᤎᤠᤛᤧᤀᤠᤱ ᤁᤧᤘᤠ᤹ᤖᤥ॥ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤒᤠ᤺ᤳᤋᤢᤖᤥ. ‘ᤀᤠᤱᤃᤠ᤹ ᤕᤠᤰᤐᤣ᤹ᤜᤠ᤹ᤖᤧ ᤁᤢᤓᤡ᤺ᤵᤔᤠᤜᤠ᤹ᤀᤥ ᤜᤧᤰᤁᤩᤠᤱ ᤆᤴᤈᤶᤒᤠᤍᤧᤴᤜᤠ᤹ᤀᤥ ᤁᤧᤕᤢᤱᤒᤠᤀᤠᤖᤥ ᤜᤠ᤺ᤳᤗᤧ ᤀᤠᤱᤃᤠ᤹ ᤕᤥ ᤂᤠᤶᤒᤠᤱᤅᤥ ᤔᤢᤳᤌᤠᤔᤠ ᤛᤢᤰᤁᤠᤒᤣ᥅’

⁴ ᤁᤖ ᤁᤰᤁᤑᤡ᤺ᤰᤔᤠᤜᤠ᤹ ᤁᤢᤀᤡᤛᤡᤰ ᤌᤠ᤺ᤱ ᤁᤧᤒᤧᤛᤠᤱ ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤜᤠ᤹ ᤗᤢᤶᤔᤥ ᤜᤠᤵ ᤁᤧᤈᤥᤃᤢᤛᤠᤱ ᤀᤠᤱᤃᤠ᤹ ᤂᤧᤏᤧ᤹ ᤂᤧᤵᤔᤥᤗᤠᤶᤒᤠ ᤕᤥ ᤔᤰᤌᤠᤏᤧᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

⁵ “ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤗᤥ᥄ ᤁᤧᤄᤢ᤺ᤵᤐᤠ ᤂᤢ᤺ᤴᤍᤪᤡᤰᤐᤠᤜᤠ᤹ ᤂᤧᤏᤧ᤹ᤀᤥ ᤔᤧᤍᤠ᤺ᤸᤗᤧ. ᤛᤧᤴᤍᤡᤰ ᤑᤠ᤺ᤴᤍᤠᤜᤠ᤹ ᤂᤧᤏᤧ᤹ᤀᤥ ᤔᤧᤍᤠ᤺ᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥᤒᤠᤖᤰ ᤔᤧᤍᤣ᤹ᤖᤢᤖᤥ॥ ᤕᤠ᤺ᤸᤗᤣᤰᤜᤠ᤹ ᤔᤧᤍᤠᤀᤠᤱ ᤂᤧᤏᤧ᤹ ᤁᤢᤈᤧᤸᤗᤧᤰᤛᤣ᤹ ᤀᤡᤰᤁᤥ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ᤜᤠ᤹ ᤔᤧᤍᤢᤒᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤈᤧᤳ ᤀᤠᤈᤧ᤺ᤳᤁ ᤔᤧᤓᤳᤇᤢ ᤔᤧᤎᤖᤥ॥

⁶ ᤁᤖ ᤀᤣᤛᤠᤘᤖᤧ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤒᤣ᥄ ᤂᤢᤏᤧ᤹ ᤆᤡᤰᤂᤢ ᤁᤳᤋᤢᤒᤠ ᤆᤡᤃᤰᤘᤠᤜᤠ᤹ ᤀᤠᤓᤣᤗ᤹ᤖᤡᤰ ᤔᤧᤍᤣ᤹ᤖᤢ ᤔᤧᤒᤡᤖᤢᤒᤣ᥄

⁷ “ᤂᤧᤏᤧ᤹ ᤁᤧᤖᤧᤰ ᤁᤧᤴᤍᤣ᤺ᤱ ᤁᤧᤴᤈᤢᤶ ᤗᤠᤈᤣ᤹ᤜᤠ᤹ᤖᤧ ᤂᤧᤏᤧ᤹ ᤀᤡ᤺ᤴᤍᤥᤀᤥ ᤌᤠᤖᤡᤰ ᤁᤧᤶᤏᤠᤳ ᤁᤧᤶᤍᤣᤖᤥ. ᤂᤧᤏᤧ᤹ ᤁᤧᤈᤢᤶ ᤁᤧᤍᤧᤱᤜᤠ᤹ᤖᤧ ᤀᤡᤱᤗᤧᤰᤁᤥ ᤁᤧᤶᤎᤠᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤜᤡᤜᤥᤳ ᤌᤧᤜᤥᤳ ᤁᤧᤶᤔᤧᤳᤗᤥ॥ ᤂᤧᤏᤧ᤹ ᤁᤧᤄᤖᤧ᤺ᤱ ᤁᤧᤈᤠᤒᤠᤜᤠ᤹ᤖᤧᤀᤣ ᤁᤧᤗᤠᤃᤡ ᤆᤧᤴ ᤔᤧᤃᤧᤛᤢᤖᤥ. ᤁᤖ ᤁᤴ ᤐᤠ᤺ᤴᤏᤡᤴ ᤂᤧᤏᤧ᤹ ᤌᤣᤀᤠᤱ ᤏᤡᤱᤘᤠ᤹ ᤁᤧᤱᤄᤥᤛᤢᤴᤗᤥ॥

⁸ ᤂᤧᤸᤗᤧ ᤕᤠ᤺ᤴᤍᤡᤰ ᤀᤣᤍᤥᤔᤖᤧ ᤛᤡᤰᤁᤢᤶᤛᤠᤒᤠ ᤁᤢᤔᤏᤠᤜᤠ᤹ ᤜᤧᤰᤁᤩᤠᤱ ᤀᤣᤛᤠᤘᤖᤧ ᤁᤢᤃᤥ᤺ᤰᤔᤠᤀᤥᤒᤠ ᤂᤠᤛᤡᤱ ᤁᤧᤏᤡ᤺ᤵᤐᤠ ᤔᤏᤠᤜᤠ᤹ ᤌᤣ ᤀᤠᤱᤃᤠ᤹ ᤔᤧᤔᤧᤱᤅᤠᤛᤡᤱᤅᤠᤴᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

⁹ “ᤋᤣᤔᤠᤏᤀᤣ. ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ ᤕᤱᤔᤠ ᤁᤡᤔᤠᤀᤥ ᤔᤧᤎᤠᤖᤥ. ᤜᤧᤰᤁᤩᤠᤱ ᤀᤣᤛᤠᤘᤖᤧ ᤁᤢᤃᤥ᤺ᤰᤔᤠᤜᤠ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤧᤳᤇᤡᤱᤔᤥ ᤔᤧᤎᤠᤀᤠᤱ ᤔᤧᤛᤧᤖᤢᤛᤡᤖᤥ॥”

ᤀᤣᤍᤥᤶᤔᤥ ᤐᤥ᤺ᤰᤂᤧᤒᤠ ᤂᤢᤶᤍᤡᤱᤅᤡᤸᤗᤧ ᤁᤢᤒᤢᤱ

¹⁰ “ᤂᤧᤏᤧ᤹ ᤀᤠᤵᤑᤣᤰ ᤁᤧᤴᤛᤠ᤹ ᤕᤠᤁᤢᤒᤖᤧ ᤁᤢᤍᤰᤗᤧᤱᤘᤠᤀᤥ ᤁᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤛᤡᤖᤡᤱᤔᤔᤥ ᤁᤧᤎᤠᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤍᤠᤍᤡᤱᤗᤧ ᤗᤠᤃᤡ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤗᤥ॥

¹¹ ᤂᤧᤏᤧ᤹ ᤔᤠ᤺ᤱᤄᤠ ᤁᤧᤕᤧᤶᤛᤡᤱᤅᤠᤱ ᤁᤧᤕᤧᤒᤧᤒᤠ ᤕᤧᤴᤏᤥ. ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤖᤥ॥ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤂᤢᤏᤧ᤹ ᤁᤢᤗᤠᤶᤎᤣ᤺ᤳᤜᤠ᤹ᤀᤥᤗᤠᤶ ᤔᤧᤗᤠᤛᤧᤀᤠᤱ ᤕᤖᤢᤛᤗᤧᤔᤖᤧ ᤗᤠᤃᤡ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤸᤗᤧ ᤂᤧᤏᤧ᤹ ᤂᤧᤱᤜᤠ᤹ ᤜᤧᤰᤋᤱᤒᤠᤀᤣ ᤁᤧᤈᤥᤃᤧᤀᤠᤱ ᤁᤧᤘᤕᤧᤖᤥ॥

¹² “ᤂᤧᤏᤧ᤹ ᤀᤠᤵᤑᤣᤰ ᤁᤧᤴᤛᤠ᤹ᤖᤧ ᤁᤢᤍ᤹ᤕᤠᤴ ᤑᤧᤖᤧᤒᤠ ᤕᤧᤴᤏᤥ ᤂᤧᤏᤧ᤹ ᤛ᤺ᤵᤔᤠᤀᤠᤱ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ. ᤕᤜᤢᤍᤠᤒᤠ ᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤔᤧᤃᤧᤒᤠ ᤕᤧᤴᤏᤥ ᤂᤧᤏᤧ᤹ ᤛ᤺ᤵᤔᤠᤀᤠᤱ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ. ᤂᤧᤱᤜᤠ᤹ᤖᤧ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢᤒᤠ ᤕᤧᤴᤏᤥ ᤂᤧᤏᤧ᤹ ᤕᤶᤒᤠᤀᤠᤱ ᤜᤧᤴᤇᤡᤱᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ॥

¹³ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤕᤧᤳᤋᤢᤰᤂᤣ ᤔᤧᤍᤢᤔᤢᤒᤠ ᤕᤧᤴᤏᤥ. ᤂᤧᤏᤧ᤹ ᤂᤢᤴᤇᤡ᤹ ᤗᤠᤶᤎᤣ᤺ᤳᤜᤠ᤹ᤀᤥᤗᤠᤶ ᤗᤠ᤺ᤵᤔᤠ ᤔᤧᤴᤏᤢ᤹ᤔᤏᤠ ᤘᤕᤧᤖᤥ. ᤂᤧᤱᤜᤠ᤹ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣ ᤔᤧᤈᤩᤧᤒᤠ ᤕᤧᤴᤏᤥ ᤂᤧᤏᤧ᤹ ᤂᤧᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠᤛᤡ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ. ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤔᤧᤎᤩᤧᤒᤠ ᤕᤧᤴᤏᤥ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤛᤡ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ॥

¹⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤄᤧᤳᤇᤡᤱᤒᤠ ᤔᤏᤠᤜᤠ᤹ ᤋᤧᤶᤔᤠᤛᤡᤖᤧ ᤗᤠᤃᤡ ᤗᤠᤶᤍᤥᤀᤥ ᤂᤧᤱᤜᤠ᤹ ᤜᤠᤱᤔᤠᤛᤡᤀᤠᤱ ᤕᤢᤱᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢᤒᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤜᤡᤱᤒᤠ ᤔᤏᤠᤜᤠ᤹ ᤋᤧᤶᤔᤠᤛᤡᤀᤠᤱ ᤏᤡᤱᤔᤡ ᤜᤢᤰᤁᤥ ᤌᤠᤔᤠᤛᤡ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ॥”

ᤀᤡᤰᤛᤠᤀᤥᤒᤠ ᤛᤢᤘᤠᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤛᤧᤴ ᤆᤥᤃᤢᤛᤡ

¹⁵ “ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤁᤢᤕᤧᤴᤏᤡᤴ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥ ᤀᤣᤍᤥᤔᤀᤣ. ᤂᤧᤏᤧ᤹ ᤀᤡᤛᤪᤠᤀᤡᤗᤧᤴ ᤀᤠᤰᤂᤣ ᤁᤧᤔᤧᤳᤋᤢᤀᤠᤱ ᤘᤕᤧ. ᤂᤧᤏᤧ᤹ᤀᤠᤱ ᤜᤠᤒᤠ ᤜᤧᤰᤁᤣᤀᤣ ᤁᤧᤶᤔᤧᤳᤗᤥ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤂᤧᤏᤧ᤹ᤀᤥᤀᤣ ᤏᤢ᤺ᤱᤍᤠᤖᤥ॥

¹⁶ ᤀᤠᤱᤃᤠ᤹ ᤀᤠᤛᤣᤛᤣ ᤁᤥ᤺ᤰᤔᤠᤀᤥ ᤁᤧᤎᤢᤅᤢᤀᤠᤱ ᤘᤕᤧᤒᤠ ᤜᤧᤰᤁᤣ. ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤸᤗᤧᤴ ᤂᤥᤷᤕᤠᤀᤥ ᤂᤧᤏᤧ᤹ ᤏᤢ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤁᤧᤎᤢᤅᤢᤶᤗᤥ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤔᤧᤶᤒᤥᤱᤅᤣ ᤌᤠᤖᤡᤰ ᤆᤰᤔᤧᤸᤗ᤹ᤀᤣ ᤜᤠᤒᤠ ᤁᤧᤎᤢᤅᤢᤶᤔᤠᤱ ᤁᤧᤒᤳᤇᤡᤖᤥ॥

¹⁷ “ᤁᤖ ᤛᤡᤕᤥᤏ ᤁᤥ᤺ᤰᤔᤠᤀᤥᤃ ᤛᤧ᤺ᤵᤛᤡᤱᤔᤠᤍᤧᤴ ᤐᤥᤱᤗᤥ. ᤂᤧᤴ ᤗᤳᤇᤠ ᤛᤣᤛᤣᤒᤠᤍᤧᤴ ᤐᤥᤱᤅᤠᤱ ᤕᤢᤱᤗᤥ॥ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤕᤢᤰᤜᤠ᤹ ᤂᤧᤱᤜᤠ᤹ᤖᤧ ᤀᤠᤵᤑᤣᤰ ᤕᤢᤰ ᤔᤧᤈᤥᤃᤢᤖᤥ॥

¹⁸ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤜᤠ᤹ ᤔᤡ ᤔᤧᤒᤥᤱᤗᤥ ᤜᤧᤰᤁᤩᤠᤱ ᤕᤥᤛᤣᤑᤖᤧ ᤁᤢᤜᤡᤶᤛᤕᤱᤜᤠ᤹ ᤔᤡᤖᤠᤰ ᤔᤧᤒᤥᤱᤗᤥ॥ ᤂᤶᤓᤩᤠᤱ ᤀᤣᤛᤠᤘᤖᤧ ᤁᤢᤜᤡᤶᤛᤕᤱᤜᤠ᤹ᤃ ᤁᤧᤜᤣᤒᤠ ᤕᤠ᤺ᤴᤛᤢᤱ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤣᤛᤠᤘᤖᤧ ᤁᤢᤜᤡᤶᤛᤕᤱᤜᤠ᤹ ᤔᤡᤔᤧᤎᤡᤰᤂᤢᤛᤡᤖᤥ॥ ᤂᤧᤒᤩᤠᤱ ᤂᤧᤱᤜᤠ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ ᤀᤣᤛᤠᤘᤖᤧ ᤁᤢᤜᤡᤶᤛᤕᤱᤗᤠᤶ ᤜᤠ᤺ᤳᤋᤠᤱ ᤁᤢᤜᤡᤱᤘᤧᤳ ᤔᤧᤴᤍᤠᤱᤏᤧᤴᤗᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

¹⁹ “ᤏᤣᤃᤣᤒᤒᤠ ᤔᤏᤠᤜᤠ᤹ᤖᤧ ᤀᤣᤛᤠᤘᤖᤧ ᤁᤢᤃᤥ᤺ᤰᤔᤠᤜᤠ᤹ ᤔᤧᤕᤢᤰᤋᤢᤖᤥ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤜᤠ᤹ᤖᤧ ᤁᤢᤛᤡᤃᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤔᤧᤕᤢᤰᤋᤢᤖᤥ॥ ᤂᤧᤱᤜᤠ᤹ᤖᤧ ᤀᤣᤑᤪᤠᤀᤡᤔ ᤏᤢ ᤛᤠᤔᤖᤡᤕᤠᤒᤠ ᤋᤧᤱᤃᤵᤜᤠ᤹ᤀᤠᤱ ᤔᤧᤕᤢᤰᤋᤢᤖᤥ. ᤒᤣᤏᤩᤠᤔᤡᤏᤖᤧ ᤃᤡᤗᤠᤍ ᤗᤠᤈᤣᤴ ᤕᤢᤰᤋᤢᤖᤥ॥

²⁰ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤏᤠᤏ ᤗᤠᤈᤣᤴ ᤌᤥ ᤛᤠᤖᤐᤋ ᤌᤠᤖᤡᤰ ᤔᤧᤕᤢᤰᤋᤢᤖᤥ॥ ᤕᤖᤢᤛᤗᤧᤔᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤛᤐᤠᤖᤠᤍᤀᤥ ᤁᤧᤘᤠ᤹ᤒᤠᤜᤠ᤹ᤖᤧᤃ ᤏᤣᤃᤣᤒᤒᤠ ᤕᤧᤰᤕᤰᤜᤠ᤹ ᤔᤧᤕᤢᤰᤋᤢᤖᤥ॥

²¹ ᤀᤣᤛᤠᤘᤖᤧ ᤁᤢᤃᤥ᤺ᤰᤔᤠᤜᤠ᤹ ᤕᤢᤰᤔᤠᤖᤧ ᤗᤠᤃᤡ ᤌᤱ ᤁᤧᤏᤠ᤺ᤶᤒᤠᤜᤠ᤹ ᤛᤡᤕᤥᤏ ᤁᤥ᤺ᤰᤔᤠᤀᤥ ᤔᤧᤎᤥ᤺ᤰᤛᤡᤱᤗᤥ ᤜᤧᤰᤁᤩᤠᤱ ᤜᤠᤱᤈᤢᤶᤔᤡᤱᤃ ᤕᤜᤘᤣ ᤍᤠᤱᤒᤠᤸᤗᤧᤴ ᤐᤥᤱᤗᤥ॥”