ᤂᤠᤏᤡ᤺ᤳ 4 - LIFOTNTᤗᤧᤒᤡ ᤌᤠ᤺ᤰᤁᤥᤒᤠ ᤁᤜᤠᤋ ᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 2 “ᤗᤧᤒᤡ᤺ᤸᤗᤧ ᤁᤢᤎᤠ᤺ᤰ ᤗᤢᤶᤔᤥᤗᤠᤶᤒᤠ ᤁᤜᤠᤋᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤏᤡᤖᤧᤛᤧ᤹॥ 3 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤍᤠᤒᤠ ᤂᤧᤴ ᤛᤢᤶᤒᤥᤱᤅᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤕᤧᤶᤒᤡᤳᤇᤠᤜᤠ᤹ ᤁᤧᤖᤧᤰ ᤏᤡᤖᤧᤛᤧ᤹॥ 4 “ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤛᤠ᤹ᤖᤡᤰ ᤛᤣᤛᤣᤒᤠ ᤆᤡᤃᤰᤘᤠ ᤐᤠ᤺ᤴᤜᤠ᤹ ᤁᤜᤠᤋᤡᤜᤠ᤹ᤖᤧ ᤂᤢᤴᤇᤡ᤹ ᤀᤥᤔᤧᤵᤔᤠ ᤕᤠ᤺ᤶᤒᤰᤗᤥ॥ 5 ᤛᤠ᤺ᤱᤃᤠᤜᤡᤶᤜᤠ᤹ ᤋᤃᤡ ᤆᤵᤔᤠ ᤋᤣ᤹ᤔᤧᤸᤗᤧ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤧᤗᤠ᤺ᤳᤗ ᤜᤧᤰᤁᤩᤠᤱ ᤁᤢᤎᤣ᤺ᤰᤔᤠ ᤑᤥ᤺ᤴᤍᤠᤴ ᤔᤧᤎᤠᤛᤢᤀᤠᤱ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤀᤠᤶᤓᤠ ᤂᤧᤸᤗᤧ ᤔᤧᤍᤧᤵᤋᤢᤖ॥ 6 ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤛᤶᤎᤠᤱ ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰᤁᤡᤸᤗᤧ ᤔᤧᤍᤧᤵᤋᤢᤖ. ᤂᤧᤒᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤁᤧᤖᤧᤰ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤆᤡᤖᤡᤰᤁᤡᤸᤗᤧ ᤔᤧᤄᤠᤵᤋᤢᤖ॥ ᤁᤢᤏᤢᤵᤔᤥ. ᤂᤧᤱᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤁᤢᤕᤠᤰᤏᤠᤀᤥ ᤔᤧᤕᤠᤰᤋᤢᤖ॥ 7 “ᤂᤧᤱᤜᤠ᤹ᤖᤧ ᤛᤣᤛᤣ ᤂᤖᤧ᤺ᤱ ᤏᤧᤔᤠ ᤆᤵᤋᤧᤴᤏᤡᤸᤗᤧ ᤁᤢᤛᤶᤎᤠᤱ ᤗᤳᤇᤠ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤆᤡᤖᤡᤰ ᤌᤡᤰ ᤔᤧᤓᤧᤛᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤆᤧᤳᤌᤩᤠᤜᤠ᤹. ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤜᤠ᤹. ᤇᤧ᤺ᤱᤃᤩᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤕᤠᤱᤔᤠ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤔᤧᤕᤢᤰᤂᤢᤖ. ᤂᤧᤒᤩᤠᤱ ᤂᤧᤵᤔᤥ ᤀᤠᤓᤧᤸᤗᤧᤛᤠᤱ ᤁᤧᤏᤧᤒᤠ ᤂᤖᤧ᤺ᤱᤅᤡᤴ ᤂᤧᤸᤗᤧ ᤁᤢᤛᤶᤎᤠᤱ ᤔᤧᤏᤧᤛ᤻ᤛᤢᤖ॥ 8 ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤛᤶᤎᤠᤱ ᤜᤧ᤺ᤳᤋᤠᤱᤒᤠ ᤆᤡᤖᤡᤰᤁᤡᤸᤗᤧᤴ ᤔᤧᤓᤧᤛᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤘᤖ᤺ᤱᤅᤥᤒᤠ ᤌᤰᤛᤠ ᤜᤥᤖᤡᤰᤁᤡᤴ ᤔᤧᤓᤳᤇᤢᤖ. ᤂᤧᤒᤩᤠᤱ ᤆᤵᤋᤧᤴᤏᤡᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤁᤢᤕᤠᤰᤏᤠᤀᤥ ᤔᤧᤕᤠᤰᤋᤢᤖ॥ 9 “ᤂᤧᤱᤜᤠ᤹ᤖᤧ ᤜᤡ᤺ᤰᤁᤥ᤺ᤶᤒᤠ ᤆᤡᤖᤡᤰᤁᤡᤴ ᤔᤧᤕᤠᤱᤛᤡᤱᤅᤠᤱ ᤛᤣᤔᤡᤕᤢᤱᤍᤧᤴ. ᤂᤧᤸᤗᤧ ᤁᤢᤜᤠ᤺ᤶᤔᤠ ᤛᤣᤔᤡᤜᤠ᤹ ᤏᤢ ᤛᤣᤔᤡ ᤜᤠ᤺ᤶᤔᤠ ᤂᤡ᤺ᤸᤗᤧ ᤁᤢᤄᤰᤔᤠ ᤏᤧ᤹ᤕᤠᤜᤠ᤹. ᤔᤠᤰᤛᤢ᤺ᤴᤍᤠ᤺ᤸᤗᤧ ᤁᤢᤍᤠ᤺ᤰᤔᤧᤴ ᤜᤧᤰᤁᤩᤠᤱ ᤁᤧᤖᤧᤰ ᤏᤡ᤺ᤱᤃᤣ᤹ ᤕᤠᤱᤔᤠ ᤂᤵᤐᤩᤠᤜᤠ᤹ ᤔᤧᤍᤧᤵᤋᤢᤖ॥ 10 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤛᤣᤔᤡ ᤕᤢᤱᤍᤧᤴᤏᤡᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠ ᤆᤡᤃᤰᤘᤠᤜᤠ᤹ᤀᤠᤱ ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰᤁᤡᤸᤗᤧ ᤔᤧᤃᤡᤳᤋᤢᤀᤠᤱ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤅᤥ ᤔᤧᤓᤳᤇᤢᤖ॥ 11 “ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤆᤡᤖᤡᤰᤁᤡᤴ ᤔᤧᤓᤧᤛᤢᤖ ᤜᤧᤰᤁᤩᤠᤱ ᤘᤖ᤺ᤱᤅᤥ ᤁᤧᤕᤠᤰᤐᤠ ᤌᤰᤛᤠ᤺ᤸᤗᤧᤴ ᤏᤢᤒᤠ ᤛᤠᤜᤥᤖᤡᤰᤁᤡᤸᤗᤧ ᤔᤧᤍᤧᤵᤋᤢᤖ. ᤂᤧᤒᤩᤠᤱ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤕᤠᤰᤔᤠᤍᤧᤴᤏᤥ ᤔᤧᤎᤧᤰᤋᤢᤖ॥ 12 “ᤛᤣᤛᤣᤍᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤔᤠ ᤁᤧᤖᤧᤰ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠᤔᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤂᤧᤱᤜᤠ᤹ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤆᤡᤖᤡᤰᤁᤥ ᤔᤧᤏᤧᤛ᤻ᤛᤢᤖ ᤂᤧᤒᤩᤠᤱ ᤘᤖ᤺ᤱᤅᤥ ᤁᤧᤕᤠᤰᤐᤠ ᤌᤰᤛᤠ᤺ᤸᤗᤧᤴ ᤏᤢᤒᤠ ᤛᤠᤜᤥᤖᤡᤰᤁᤡᤸᤗᤧ ᤔᤧᤒᤴᤇᤢᤖ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤒᤱᤔᤠ ᤋᤰᤗᤠᤱᤜᤠ᤹ᤖᤧ ᤁᤢᤛᤶᤎᤠᤱ ᤔᤧᤓᤳᤇᤢᤖ॥ 13 “ᤂᤧᤱᤜᤠ᤹ᤖᤧ ᤁᤠᤛᤠ᤺ᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤗᤠᤶ ᤂᤠᤵᤐᤢ᤺ᤴ ᤔᤧᤗ᤺ᤳᤋᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤐᤖᤠᤴᤗᤠ ᤆᤠ᤺ᤶᤒᤠ ᤆᤡᤖᤡᤰᤁᤡᤴ ᤔᤧᤓᤧᤛᤢᤖ॥ 14 ᤂᤧᤸᤗᤧ ᤁᤢᤛᤶᤎᤠᤱ ᤂᤧᤱᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤆᤥ᤺ᤰᤔᤧᤸᤗᤧ ᤕᤠᤱᤔᤏᤠᤒᤠ ᤁᤧᤖᤧᤰ ᤂᤵᤐᤩᤠᤜᤠ᤹. ᤀᤡᤃᤪ ᤔᤡ ᤏᤧᤔᤠ ᤛᤠᤱᤋᤧᤖᤧ᤺ᤱᤜᤠ᤹. ᤛᤠ ᤀᤢ᤺ᤱᤔᤠ ᤛᤢᤶᤈᤢᤗᤡᤜᤠ᤹. ᤋᤠᤒᤡᤸᤗᤥᤜᤠ᤹. ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤁᤧᤖᤧᤰ ᤛᤠᤔᤠ ᤆᤡᤃᤰᤘᤠᤜᤠ᤹ ᤔᤧᤕᤢᤰᤂᤢᤖ. ᤂᤧᤒᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤂᤧᤱᤜᤠ᤹ᤖᤧ ᤘᤖ᤺ᤱᤅᤥᤒᤠ ᤌᤰᤛᤠ ᤜᤥᤖᤡᤰᤁᤡᤴ ᤔᤧᤓᤧᤛᤢᤀᤠᤱ ᤂᤧᤸᤗᤧ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤁᤢᤕᤠᤰᤔᤠᤍᤧᤴᤏᤥ ᤔᤧᤗᤡ᤺ᤰᤂᤢᤖ॥ 15 “ᤛᤠ᤺ᤱᤃᤠᤜᤡᤶᤜᤠ᤹ ᤋᤃᤡ ᤆᤵᤔᤠ ᤕᤧᤶ ᤐᤥᤱᤅᤡᤸᤗᤧ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤛᤣᤛᤣᤍᤧᤴᤏᤥᤒᤠ ᤁᤧᤖᤧᤰ ᤛᤢᤳᤌᤥ ᤛᤠᤔᤠ ᤆᤡᤃᤰᤘᤠᤜᤠ᤹ ᤔᤧᤍᤧᤵᤋᤢ ᤔᤧᤛᤢᤖᤢᤀᤠᤱ ᤂᤧᤱᤜᤠ᤹ ᤁᤢᤒᤱᤛᤧ ᤁᤜᤠᤋᤡᤜᤠ᤹ ᤔᤧᤍᤠᤖ॥ ᤁᤖ ᤂᤧᤱᤜᤠ᤹ᤖᤧ ᤛᤣᤛᤣᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤴᤇᤢᤛᤢᤴᤗ. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤜᤍ᤹ ᤔᤧᤛ᤻ᤛᤡ᤹᤺॥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤁᤜᤠᤋᤡᤜᤠ᤹ᤖᤧ ᤔᤧᤒᤰᤂᤢᤖ॥ 16 “ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤸᤗᤧ ᤁᤢᤗᤰᤐᤧᤴᤏᤥ ᤜᤢᤰᤛᤢᤵᤔᤏᤠᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—ᤛᤣᤔᤡ ᤜᤠ᤺ᤶᤔᤠᤖᤧ ᤗᤠᤃᤡ ᤏᤡ᤺ᤱᤃᤣ᤹. ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ. ᤌᤡᤰᤕᤠ᤺ᤴᤎᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ. ᤔᤠᤱᤌᤥ᤺ᤰᤏᤠ ᤐᤡᤔᤠ ᤏᤡ᤺ᤱᤃᤣ᤹—ᤁᤧᤖᤧᤰ ᤛᤣᤛᤣᤍᤧᤴᤏᤡᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤂᤰᤐᤧᤳ ᤛᤠᤔᤠᤐᤢᤔᤠᤜᤠ᤹॥” 17 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 18 “ᤁᤜᤠᤋᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤗᤧᤒᤡᤜᤠ᤹ᤖᤧ ᤔᤧᤔᤧᤰᤂᤢᤛᤡᤖ ᤔᤧᤈᤥᤃᤧᤛᤧᤴᤏᤧ᤹॥ 19 ᤂᤧᤱᤜᤠ᤹ ᤛᤠ᤹ᤖᤡᤰ ᤛᤣᤛᤣᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤣᤛᤠᤱ ᤔᤧᤍᤠ᤺ᤸᤗᤧ ᤔᤧᤴᤇᤡᤏᤧᤴᤗ ᤑᤠ᤹ᤀᤠᤱ ᤁᤴ ᤂᤢᤴᤇᤡ᤹ ᤗᤠᤃᤡ ᤆᤥᤃᤧᤛᤧ᤹—ᤜᤠᤖᤢᤏ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤛᤣᤛᤣᤍᤧᤴᤏᤥ ᤔᤧᤒᤣ᤺ᤰᤗ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤠ᤺ᤶᤒᤰ ᤏᤢ ᤌᤧᤔᤠ ᤌᤧᤔᤠᤜᤠ᤹ ᤐᤱᤔᤠ ᤐᤥᤱ᤹ ᤔᤢᤖᤠᤔᤧᤳᤋᤧᤛᤧ᤹॥ 20 ᤁᤖ ᤁᤜᤠᤋᤡᤜᤠ᤹ ᤛᤣᤛᤣᤒᤠ ᤐᤠ᤺ᤴᤜᤠ᤹ ᤀᤥᤔᤧᤳᤇᤧ ᤛᤵᤑᤠ ᤌᤡᤰᤗᤧ ᤗᤠᤃᤡ ᤛᤡᤃᤠᤱ ᤔᤧᤴᤗᤠ᤺ᤳᤏᤧᤴᤗ. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤔᤧᤛᤡᤖᤥ॥” ᤗᤧᤒᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ 21 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 22 “ᤃᤣᤷᤛᤥᤏᤡ ᤛᤢᤘᤠᤱᤜᤠ᤹ᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱ ᤏᤢ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤁᤢᤀᤡᤛᤡᤰ ᤏᤡᤖᤧᤛᤧ᤹॥ 23 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤍᤠᤒᤠ ᤛᤢᤶᤒᤥᤱ ᤋᤱᤒᤣᤀᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰᤐᤠ ᤕᤧᤶᤒᤡᤳᤇᤠᤜᤠ᤹ ᤁᤧᤖᤧᤰ ᤏᤡᤖᤧᤛᤧ᤹॥ 24 “ᤁᤰ ᤁᤢᤔᤠ ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤃᤣᤷᤛᤥᤏ ᤛᤢᤘᤠᤱᤜᤠ᤹ᤖᤧ ᤕᤠ᤺ᤶᤒᤰᤁᤡᤴ ᤀᤠᤶᤓᤠ ᤁᤴᤗᤥ— 25 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤑᤥ᤺ᤴᤍᤠᤜᤠ᤹. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ. ᤂᤧᤸᤗᤧ ᤁᤢᤄᤠᤵᤔᤠ. ᤂᤧᤸᤗᤧ ᤁᤢᤛᤶᤎᤠᤱᤒᤠ ᤛᤠ᤹ᤖᤡᤰ ᤏᤢᤒᤠ ᤛᤠᤜᤥᤖᤡᤰ ᤁᤢᤄᤠᤵᤔᤠ ᤏᤢ ᤛᤣᤛᤣ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤁᤧᤒᤵᤐᤠ ᤑᤥ᤺ᤴᤍᤠ. 26 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤖᤧᤰ ᤐᤡᤛᤠᤱᤒᤠ ᤗᤰᤂᤢᤶᤔᤥᤒᤠ ᤑᤥ᤺ᤴᤍᤠᤜᤠ᤹. ᤂᤧᤵᤔᤥᤒᤠ ᤗᤠ᤺ᤶᤎᤣ᤺ᤳ ᤑᤥ᤺ᤴᤍᤠ. ᤌᤠᤰᤐᤠᤜᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤕᤠᤱᤔᤏᤠᤒᤠ ᤁᤧᤖᤧᤰ ᤛᤠᤔᤠ ᤆᤡᤃᤰᤘᤠᤜᤠ᤹ ᤔᤧᤒᤰᤂᤢᤖ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤗᤠᤶ ᤆᤩᤠᤈᤩᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤐᤥᤱ᤹. ᤂᤧᤱᤜᤠ᤹ᤀᤠᤱ ᤃᤣᤷᤛᤥᤏ ᤛᤢᤘᤠᤱᤜᤠ᤹ᤖᤧᤀᤣ ᤔᤧᤈᤥᤃᤢᤖ॥ 27 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤔᤠᤱᤛᤧᤘᤠ ᤕᤠ᤺ᤶᤒᤰᤜᤠ᤹. ᤀᤡᤃᤪ ᤁᤰ ᤁᤢᤔᤠ ᤕᤠ᤺ᤶᤒᤰ ᤐᤥᤱᤛᤠᤱ ᤁᤡᤃᤪ ᤘᤣ᤹ ᤕᤠ᤺ᤶᤒᤰ ᤐᤥᤱᤛᤠᤱ. ᤂᤧᤱᤜᤠ᤹ ᤁᤧᤖᤧᤰ ᤜᤠᤖᤢᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤢᤖᤠᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤃᤣᤷᤛᤥᤏ ᤛᤢᤘᤠᤱᤜᤠ᤹ᤖᤧ ᤔᤧᤈᤥᤃᤢᤖ॥ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤂᤧᤏᤡ᤹ᤀᤣ ᤔᤢᤖᤠᤔᤧᤳᤋᤧᤶᤛᤧ᤹॥ 28 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤃᤣᤷᤛᤥᤏᤡ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤜᤠᤒᤠ ᤁᤴᤗᤥ॥ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤰᤐᤧᤴᤏᤡᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤀᤡᤋᤠᤔᤠᤖᤧᤸᤗᤧ ᤁᤢᤕᤢᤰᤁᤥ ᤘᤠ᤹ᤖᤖᤥ॥” ᤔᤖᤠᤖᤡ ᤌᤠ᤺ᤰᤁᤥᤒᤠ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ 29 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤔᤖᤠᤖᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤏᤡᤖᤧᤛᤧ᤹॥ 30 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤍᤠᤒᤠ ᤛᤢᤶᤒᤥᤱ ᤋᤱᤒᤣᤀᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤕᤧᤶᤒᤡᤳᤇᤠᤜᤠ᤹ ᤁᤧᤖᤧᤰ ᤏᤡᤖᤧᤛᤧ᤹॥ 31 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤛᤡᤱᤓᤧᤸᤗᤧᤰᤜᤠ᤹. ᤂᤧᤸᤗᤧ ᤁᤢᤛᤠᤰᤔᤠᤜᤠ᤹. ᤋᤰᤗᤠᤱᤜᤠ᤹. ᤛᤡᤳᤗᤠᤱᤜᤠ᤹ ᤏᤢ ᤁᤢᤕᤢᤱᤏᤠᤜᤠ᤹. 32 ᤂᤧᤴᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤐᤡᤛᤠᤱᤒᤠ ᤗᤰᤂᤢᤶᤔᤥᤒᤠ ᤛᤡᤳᤗᤠᤱᤜᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹. ᤗᤰᤆᤢᤜᤠ᤹. ᤌᤠᤰᤐᤠᤜᤠ᤹ ᤏᤢ ᤂᤧᤴᤏᤢ ᤛᤥᤖᤡᤰᤐᤠ ᤛᤠᤔᤠ ᤆᤡᤃᤰᤘᤠᤜᤠ᤹. ᤂᤧᤒᤩᤠᤱ ᤁᤴᤜᤠ᤹ ᤕᤠᤱᤔᤠᤖᤧ ᤆᤠᤜᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤒᤰᤂᤢᤖ॥ ᤐᤖᤡᤰ ᤐᤖᤡᤰᤐᤠ ᤛᤠᤔᤠᤜᤠ᤹ ᤐᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤀᤥ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤔᤡᤱ ᤁᤢᤀᤡᤛᤡᤰ ᤔᤏᤠᤜᤠ᤹ ᤔᤢᤖᤠᤔᤧᤳᤋᤧᤛᤧ᤹॥ 33 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤖᤠᤖᤡ ᤌᤠ᤺ᤰᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤖᤧ ᤁᤢᤛ᤻ᤛᤠ ᤀᤡᤋᤠᤔᤠᤖᤧᤸᤗᤧ ᤁᤢᤀᤡᤱᤈᤠᤱᤅᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤜᤠᤒᤠ ᤁᤴ ᤘᤕᤧᤖᤥ॥” ᤗᤧᤒᤡᤖᤧ ᤁᤢᤎᤠ᤺ᤰᤜᤠ᤹ ᤂᤠᤏᤡ᤺ᤳ ᤔᤧᤈᤥᤃᤢᤛᤡ 34 ᤔᤥᤛᤠ. ᤜᤠᤖᤢᤏ ᤏᤢ ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤁᤜᤠᤋᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤏᤢ ᤜᤡᤶᤛᤕᤱ ᤀᤡᤛᤡ᤺ᤰ ᤔᤧᤏᤡᤖᤢᤛᤡ॥ 35 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤛᤢᤶᤒᤥᤱ ᤋᤱᤒᤣᤀᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤂᤰᤐᤧᤳ ᤕᤧᤶᤒᤡᤳᤇᤠᤜᤠ᤹. 36 ᤌᤠ᤺ᤰᤌᤠ᤺ᤰ ᤔᤧᤈᤥᤃᤢᤛᤡᤀᤠᤱ ᤔᤧᤏᤡᤖᤢᤛᤡᤒᤠᤜᤠ᤹ ᤁᤧᤖᤧᤰᤗᤧ ᥈.᥍᥋᥆ ᤔᤧᤘᤕᤧ॥ 37 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤐᤡᤖᤢᤛᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤏᤡᤖᤧᤇᤢᤛᤡᤒᤠ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤜᤠᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳ ᤜᤠᤒᤠ ᤁᤴ ᤘᤕᤧ॥ 38 ᤃᤣᤷᤛᤥᤏᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤔᤧᤏᤡᤖᤢᤛᤡᤀᤠᤱ ᤘᤕᤧ॥ 39 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤛᤢᤶᤒᤥᤱᤅᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤂᤰᤐᤧᤳ ᤕᤧᤶᤒᤡᤳᤇᤠᤜᤠ᤹. 40 ᤂᤧᤴ ᤌᤠ᤺ᤰᤌᤠ᤺ᤰ ᤏᤢ ᤔᤧᤏᤡᤖᤢᤛᤡᤒᤠ ᤜᤡᤶᤛᤕᤱᤜᤠ᤹ ᤁᤧᤖᤧᤰ ᥈.᥌᥉᥆ ᤔᤧᤘᤕᤧ॥ 41 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤏᤡᤖᤧᤇᤢᤛᤡᤒᤠ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤃᤣᤷᤛᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳᤋᤡᤴ ᤀᤠᤶᤓᤠ ᤁᤴ ᤘᤕᤧ॥ 42 ᤔᤖᤠᤖᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤔᤧᤏᤡᤖᤢᤛᤡᤀᤠᤱ ᤔᤧᤘᤕᤧ॥ 43 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤛᤢᤶᤒᤥᤱᤅᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤂᤰᤐᤧᤳ ᤕᤧᤶᤒᤡᤳᤇᤠᤜᤠ᤹. 44 ᤂᤧᤴ ᤌᤠ᤺ᤰᤌᤠ᤺ᤰ ᤔᤧᤏᤡᤖᤢᤛᤡᤒᤠᤜᤠ᤹ ᤁᤧᤖᤧᤰ ᥉.᥈᥆᥆ ᤔᤧᤘᤕᤧ॥ 45 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤏᤡᤖᤧᤇᤢᤛᤡᤒᤠ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤖᤠᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳᤋᤡᤴ ᤀᤠᤶᤓᤠ ᤁᤴ ᤘᤕᤧ॥ 46 ᤁᤶᤓᤗ᤹ᤖᤡᤰ ᤔᤥᤛᤠ. ᤜᤠᤖᤢᤏ ᤏᤢ ᤀᤡᤛᤪᤠᤀᤡᤗᤡ ᤗᤠᤶᤗᤥᤒᤠᤜᤠ᤹ᤖᤧ ᤁᤧᤖᤧᤰ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤔᤧᤏᤡᤖᤢᤛᤡ॥ 47 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤁᤰ ᤁᤢᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤛᤢᤶᤒᤥᤱᤅᤠᤱᤎᤥ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤁᤧᤃᤧᤵᤐᤠ ᤂᤰᤐᤧᤳ ᤕᤧᤶᤒᤡᤳᤇᤠᤜᤠ᤹. 48 ᤂᤧᤴ ᤔᤧᤏᤡᤖᤢᤛᤡᤒᤠᤜᤠ᤹ ᤁᤧᤖᤧᤰ ᥎.᥋᥎᥆ ᤔᤧᤘᤕᤧ॥ 49 ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤕᤠ᤺ᤶᤒᤰ ᤏᤢ ᤁᤰ ᤁᤢᤔᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠ᤺ᤴᤗᤠᤶ ᤂᤧᤱᤜᤠ᤹ ᤕᤢᤰᤋᤡᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤱᤜᤠ᤹ ᤏᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.