ᤔᤡᤁᤠ 1 - LIFOTNT

¹ ᤕᤜᤢᤍᤠᤒᤠ. ᤕᤥᤋᤠᤔ. ᤀᤠᤜᤠᤈ ᤏᤢ ᤜᤡᤈᤁᤡᤕᤠ ᤜᤠᤱᤜᤠ᤹ᤖᤧ ᤕᤢᤰ ᤔᤧᤈᤥᤃᤢᤒᤠ ᤕᤧᤶᤔᤥ ᤔᤥᤖᤣᤛᤣᤋ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤡᤁᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤄᤱᤅᤡᤴ ᤁᤧᤖᤧ—ᤂᤢᤏᤧ᤹ ᤁᤴ ᤐᤠ᤺ᤴᤜᤠ᤹ ᤛᤠᤔᤖᤡᤕᤠ ᤏᤢ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤛᤢᤀᤠᤱ ᤘᤕᤧᤖᤥ॥

ᤛᤠᤔᤖᤡᤕᤠ ᤏᤢ ᤕᤖᤢᤛᤗᤧ᤺ᤶᤔᤥ ᤔᤧᤖᤡᤱ

² “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤛᤣ. ᤂᤡᤏᤡ᤹ ᤁᤧᤖᤧᤰᤗᤧ ᤂᤧᤵᤛᤧᤶᤔᤧ᤹ᤀᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤂᤧᤵᤔᤥ ᤁᤧᤕᤢᤱᤒᤠᤛᤣ. ᤂᤡᤏᤡ᤹ ᤁᤧᤖᤧᤰᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤴ ᤁᤢᤛᤣᤛᤣ ᤜᤡᤶᤔᤥᤗᤠᤶ. ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤥᤱᤗᤖᤥ॥

³ ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ ᤁᤢᤕᤢᤱᤔᤠᤍᤧᤴᤏᤥᤗᤠᤶ ᤕᤢᤖ ᤐᤳᤗᤥ॥ ᤂᤢᤏᤧ᤹ ᤕᤥ ᤌᤠᤛᤡᤱ ᤕᤢᤖᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤆᤴᤈᤶᤒᤠᤍᤧᤴᤜᤠ᤹ ᤋᤥ᤹ᤖᤢᤖᤥ॥

⁴ ᤔᤡᤀᤥ ᤌᤢᤶᤒᤢ᤹ᤀᤡᤴ ᤕᤥ᤺ᤶᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤕᤠᤰᤁᤣ᤺ᤰᤁᤥᤗᤠᤶ ᤆᤫᤠ᤺ᤳ ᤁᤢᤱᤒᤠ ᤁᤢᤀᤡᤛᤡᤰ ᤂᤧᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤂᤢᤏᤧ᤹ ᤁᤢᤗᤠᤱᤓᤥ ᤛᤡᤃᤠᤱ ᤕᤥ᤺ᤶᤒᤣ᤺ᤰᤗᤥ. ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤜᤠ᤹ ᤐᤰᤁᤪᤧ᤹ ᤐᤰᤁᤪᤧ᤹ ᤐ᤺ᤱᤗᤥ॥

⁵ ᤕᤠᤁᤢᤒᤖᤧ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠᤖᤥ॥ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤳᤋᤡ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤒᤣ᥅ ᤌᤣ ᤂᤧᤴ ᤛᤠᤔᤖᤡᤕᤠᤀᤥ ᤔᤣ᤺ᤶᤒᤡ᥅ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤠᤳᤋᤠᤴ ᤔᤠᤱᤎᤠ᤺ᤴᤜᤠ᤹ ᤔᤧᤕᤢᤰᤂᤢᤒᤣ᥅ ᤌᤣ ᤂᤧᤴ ᤕᤖᤢᤛᤗᤧ᤺ᤶᤔᤥ ᤔᤣ᤺ᤴᤒᤡ᥅

⁶ “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ. ᤛᤠᤔᤖᤡᤕᤠᤴ ᤗᤢᤱᤈᤣᤃᤣ᤺ᤰ ᤏᤢ ᤗᤢᤱᤜᤠ᤹ ᤁᤧᤗᤢᤶᤛᤡᤱᤒᤠ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤗᤣ᤺ᤵᤔᤠᤍᤧᤴ ᤆᤥᤃᤢᤱᤗᤥ॥ ᤀᤠᤱᤃᤠ᤹ ᤂᤧᤵᤔᤥᤒᤠ ᤗᤢᤱᤜᤠ᤹ ᤏᤧᤏᤧᤒᤠᤍᤧᤴᤏᤥ ᤗᤠᤵᤑᤢᤛᤢᤱᤗᤥ. ᤂᤶᤓᤩᤠᤱ ᤂᤧᤸᤗᤧ ᤁᤢᤕᤢᤰᤏᤠᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱᤗᤥ॥

⁷ ᤂᤧᤸᤗᤧ ᤁᤢᤏᤠᤘᤠᤀᤡᤳᤗᤠᤜᤠ᤹ ᤁᤧᤖᤧᤰ ᤑᤕ᤺ᤵᤑᤕ᤺ᤵ ᤔᤧᤕ᤺ᤵᤛᤢᤖᤥ. ᤂᤧᤸᤗᤧ ᤁᤢᤔᤠᤱᤜᤡᤶᤔᤥ ᤔᤧᤍᤥᤴᤍᤢᤒᤠ ᤁᤧᤖᤧᤰ ᤔᤡᤰᤋᤥ᤺ᤰᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤍᤣᤛᤢᤖᤥ॥ ᤂᤧᤸᤗᤧ ᤁᤧᤖᤧᤰ ᤁᤢᤏᤠᤘᤠᤀᤡᤳᤗᤠᤜᤠ᤹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ. ᤂᤧᤴ ᤔᤡᤰᤋᤥ᤺ᤰᤜᤠ᤹ ᤁᤢᤃᤧᤳᤏᤡᤔᤧᤸᤗᤧ ᤁᤢᤏᤠᤶᤕᤠᤰᤁᤥ ᤗᤢᤵᤛᤢᤒᤠᤸᤗᤧ ᤆᤥᤃᤢᤸᤗᤧ. ᤁᤧᤳᤏᤡᤔᤧᤸᤗᤧ ᤁᤢᤏᤠᤶᤕᤠᤰ ᤜᤧᤰᤁᤣᤀᤣ ᤘᤣ᤹ᤜᤠ᤹ ᤏᤠᤶᤕᤠᤰ ᤔᤧᤒᤡᤖᤢᤛᤡᤖᤥ॥”

ᤜᤠ᤺ᤵᤔᤠ ᤆᤡ᤺ᤱᤔᤠ ᤏᤢ ᤔᤧᤖᤡᤱ

⁸ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤜᤠ᤺ᤵᤐᤠᤖ ᤔᤧᤖᤡᤱ ᤌᤰᤁᤠᤖᤥ. ᤀᤠᤱᤃᤠ᤹ ᤗᤠᤱᤛᤢ᤺ᤵ ᤔᤣ᤺ᤴᤏᤣ ᤏᤢ ᤗᤧᤰᤆᤠᤒᤢᤎᤢ᤺ᤰ ᤀᤠᤶᤓᤠ ᤗᤠᤱᤄᤣ᤺ᤰᤁᤠᤖᤥ॥ ᤀᤠᤱᤃᤠ᤹ ᤛᤩᤠᤗ ᤜᤧᤰᤁᤣ ᤀ᤺ᤰᤁᤠᤖᤥ ᤜᤧᤰᤁᤩᤠᤱ ᤑᤰᤌᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤖᤡᤱ ᤌᤰᤁᤠᤖᤥ॥

⁹ ᤌᤣᤀᤠᤱᤓᤧᤸᤗᤧ ᤛᤠᤔᤖᤡᤕᤠ᤺ᤸᤗᤧ ᤁᤢᤕᤠᤱᤄᤣ᤺ᤰᤁᤡᤴ ᤔᤧᤘᤣ᤺ᤳᤏᤧᤴᤗᤥ. ᤕᤜᤢᤍᤠ ᤌᤠᤖᤡᤰ ᤂᤧᤴ ᤁᤧᤖᤧᤀᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤎᤣᤳ ᤕᤖᤢᤛᤗᤧᤔ ᤌᤠᤖᤡᤰ ᤁᤧᤖᤧᤀᤠᤱ ᤘᤠ᤹ᤖᤥ॥

¹⁰ ᤃᤠᤋᤀᤥ ᤁᤴ ᤔᤧᤈᤧᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤂᤡᤏᤡ᤹ ᤜᤠ᤺ᤵᤔᤠᤀᤣ ᤔᤧᤜᤠᤒᤧᤶᤔᤡᤴᤏᤧ᤹ᤀᤥ॥ ᤒᤧᤌ-ᤀᤥᤐᤪᤠᤒᤠ ᤔᤏᤠᤛᤣ ᤂᤠᤶᤜᤡ᤺ᤰᤁᤥ ᤂᤡᤏᤡ᤹ ᤌᤠᤶᤔᤠᤛᤡᤶᤔᤧ᤹ ᤜᤥ᤺ᤳᤋᤠᤛᤡᤶᤔᤧ᤹ᤀᤥ॥

¹¹ ᤛᤠᤑᤡᤖ ᤁᤧᤕᤢᤱᤒᤠᤛᤣ. ᤂᤡᤏᤡ᤹ ᤗᤧᤰᤆᤠᤒᤧᤎᤡᤰ ᤜᤧᤰᤁᤩᤠᤱ ᤏᤠᤖᤠ ᤛᤡᤖᤣ᤺ᤵ ᤗ᤹ᤖᤡᤰ ᤗ᤺ᤴᤍᤧᤶᤐᤣᤃᤧᤶᤔᤧ᤹ᤀᤥ. ᤛᤠᤏᤠᤏ ᤁᤧᤕᤢᤱᤒᤠᤜᤠ᤹ ᤗᤠ᤺ᤰᤁᤠᤳ ᤔᤧᤸᤗ᤺ᤴᤏᤧᤸᤗᤥ॥ ᤒᤣᤌ-ᤀᤣᤈᤣᤗᤒᤠ ᤔᤏᤠᤜᤠ᤹ ᤔᤧᤖᤡᤱ ᤔᤧᤎᤰᤗ ᤔᤧᤕᤠᤰᤗᤥ. ᤂᤧᤴ ᤁᤶᤒᤪᤠᤱ ᤔᤧᤵᤔᤠᤍᤧᤴᤏᤡᤴ ᤂᤡᤏᤡ᤹ᤗᤠᤶ ᤔᤧᤍᤣ᤹ᤖᤢᤀᤠᤱ ᤏᤧᤖᤥ॥

¹² ᤔᤠᤖᤥᤋ ᤁᤧᤕᤢᤱᤒᤠᤜᤠ᤹ ᤋᤢᤰᤔᤧᤸᤗᤧ ᤆᤥᤃᤢᤸᤗᤧ ᤔᤧᤜᤥ᤺ᤳᤇᤡᤱᤗᤥ. ᤂᤧᤱᤜᤠ᤹ᤖᤧ ᤘᤣ᤺ᤵᤔᤠ ᤗᤠᤶ ᤀᤥᤔᤧᤔᤧᤳᤋᤢᤖ ᤔᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤖᤢᤛᤗᤧ᤺ᤶᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤠᤗᤠᤶ ᤕᤧᤳᤋᤢᤰᤂᤣᤴ ᤁᤧᤖᤧᤀᤠᤱ ᤘᤠ᤹ᤖᤥ॥

¹³ ᤗᤠᤁᤡᤛ ᤁᤧᤕᤢᤱᤒᤠᤛᤣ. ᤀᤴᤜᤠ᤹. ᤀᤴᤗᤠᤎᤠᤜᤠ᤹ᤀᤥ ᤑᤳᤇᤧᤶᤛᤡᤶᤔᤧ᤹ᤀᤥ॥ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤗᤠᤃᤡ ᤗᤠᤕᤥᤸᤗᤧ ᤁᤢᤜᤣ᤺ᤰᤛᤡᤱᤔᤠ ᤂᤡᤏᤡ᤹ᤀᤣ ᤁᤧᤘᤕᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤖᤧ ᤁᤢᤓᤧᤴᤕᤠ᤺ᤶᤒᤰᤜᤠ᤹ ᤂᤡᤏᤡ᤹ᤀᤥ ᤂᤥᤍᤧᤳᤋᤧᤖᤥ॥

¹⁴ ᤁᤸᤗᤧᤆᤥᤃᤢᤸᤗᤧ ᤔᤥᤖᤣᤛᤣᤋ-ᤃᤠᤋᤧᤴ ᤛᤧᤶᤔᤢ᤹ᤀᤡ ᤔᤡᤰᤋᤥ᤺ᤰᤜᤠ᤹ ᤂᤡᤏᤡ᤹ᤀᤣ ᤁᤧᤒᤡᤖᤢᤶᤗ ᤐᤥᤱᤗᤥ॥ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ ᤀᤡᤱᤗᤧᤰᤁᤥ ᤁᤧᤎᤠᤒᤠ ᤀᤰᤈᤡᤒᤒᤠ ᤕᤧᤰᤕᤰᤁᤡᤴ ᤐᤥᤱᤗᤥ॥

¹⁵ ᤔᤠᤖᤣᤛᤠ ᤁᤧᤕᤢᤱᤒᤠ ᤔᤏᤠᤛᤣ. ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤂᤡᤏᤡ᤹ ᤁᤧᤏᤠ᤺ᤶᤒᤠ ᤔᤏᤠᤎᤡᤰ ᤋᤠᤖᤢᤱᤗᤥ॥ ᤀᤡᤛᤪᤠᤀᤡᤗᤒᤠ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ. ᤗᤠᤶᤗᤥᤒᤠᤜᤠ᤹ ᤀᤍᤢᤸᤗᤠᤔᤀᤥ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥

¹⁶ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤠ ᤛᤠᤜᤠ᤹ᤖᤧ ᤗᤠᤃᤡ ᤔᤧᤖᤡᤱ ᤌᤰᤋᤧᤶᤔᤧ᤹ᤖ ᤂᤡᤏᤡ᤹ ᤌᤧᤃᤣ᤺ᤰᤁᤡᤴ ᤏ᤺ᤰᤂᤧᤶᤔᤧ᤹ᤀᤥ॥ ᤂᤡᤏᤡ᤹ ᤁᤧᤖᤧᤰ ᤌᤧᤃᤣ᤺ᤰᤔᤢᤖᤡᤰᤜᤠ᤹ ᤏ᤺ᤰᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤁᤡ᤺ᤳᤌᤧᤴ ᤜᤧᤰᤁᤣ ᤋᤠᤱᤗᤧ᤺ᤰᤁᤩᤠ ᤆᤥ᤺ᤰᤁᤠᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤀᤣᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥