ᤔᤗᤠᤁᤡ 2 - LIFOTNT

ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤠᤶᤍᤡᤱ

¹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤏᤡᤱᤘᤠ᤹ᤑᤢᤛᤠᤶᤒᤠᤛᤣ. ᤁᤴ ᤛᤠᤶᤍᤡᤱᤅᤡᤴ ᤂᤧᤏᤡ᤹ ᤗᤠᤃᤡᤖᤥ॥

² ᤂᤧᤏᤡ᤹ ᤁᤧᤈᤥᤃᤢᤶ ᤁᤧᤒᤠ᤺ᤳᤋᤢᤶᤒᤠ ᤕᤠ᤺ᤶᤒᤰᤁᤥᤗᤠᤶ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤀᤠᤃ᤻ᤒᤡᤖᤡᤖ ᤐᤥᤱ᤹॥ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤏᤡ᤹ ᤁᤧᤱᤄᤧᤵᤛᤢᤶᤔᤡᤴᤏᤧᤓᤃᤪ ᤀᤠᤱᤃᤠ᤹ ᤂᤧᤏᤡ᤹ ᤛᤶᤎᤠᤱ ᤔᤠᤱᤍᤣ ᤌᤠᤛᤢᤱ᤹॥ ᤂᤧᤏᤡ᤹ ᤁᤧᤄᤥᤛᤢᤶᤒᤠ ᤔᤢ᤹ᤀᤡᤛᤠᤶ ᤐᤠ᤺ᤴᤜᤠ᤹ᤀᤥ ᤛᤠᤱᤃᤪᤠ ᤔᤠᤱᤍᤣ ᤌᤠᤛᤢᤱ᤹॥ ᤁᤢᤈᤧᤰᤁᤠᤱᤅᤡᤸᤗᤧ. ᤂᤧᤏᤡ᤹ ᤂᤧᤴ ᤁᤧᤄᤥᤛᤢᤶᤒᤠ ᤔᤢ᤹ᤀᤡᤛᤠᤶᤜᤠ᤹ᤀᤥ ᤀᤠᤛᤣ᤺ᤴᤇᤠ ᤛᤠᤱᤃᤪᤠ ᤌᤠᤛᤢᤱᤅᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤱᤄᤧᤵᤛᤢᤶᤏᤧᤴ॥

³ “ᤂᤧᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤡ᤹ ᤛᤠᤔᤧᤴᤇᤠ᤹ᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤋᤱᤏᤠᤶᤔᤥ ᤂᤧᤏᤡ᤹ ᤛᤡᤍᤢᤱᤈᤓᤠ ᤁᤧᤍᤥ᤺ᤶᤍᤢᤶᤛᤡᤶᤒᤠ ᤌᤰᤛᤠ ᤜᤡ᤺ᤸᤗᤧ ᤂᤧᤏᤡ᤹ ᤏᤠᤖᤠᤴ ᤗᤧᤅᤢᤱ ᤐᤡᤏᤡᤱ᤹ ᤜᤧᤰᤁᤩᤠᤱ ᤂᤧᤴ ᤌᤰᤛᤠ ᤜᤡ᤺ᤴᤏᤢ ᤛᤥᤖᤡᤰ ᤗᤠ᤺ᤰᤁᤠᤳ ᤗᤠᤵᤑᤢᤏᤡᤱ᤹॥

⁴ ᤀᤠᤱᤃᤠ᤹ ᤗᤧᤒᤡᤜᤠ᤹ᤏᤢ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤡᤴ ᤀᤠᤓᤧᤸᤗᤧᤛᤠᤱ ᤘᤠ᤹ᤖ ᤑᤠ᤹ᤀᤠᤱ ᤂᤧᤏᤡ᤹ ᤁᤴ ᤛᤠᤶᤍᤡᤱᤅᤡᤴ ᤐᤡᤏᤡᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁵ “ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤂᤧᤴᤜᤠ᤹ᤏᤢ ᤘᤕᤧ. ᤜᤡᤱᤔᤴ ᤏᤢ ᤛᤏᤠᤖᤢᤱᤗᤧ ᤔᤠᤱᤜᤢᤵᤐᤡᤴ. ᤜᤧᤰᤁᤩᤠᤱ ᤂᤧᤴᤜᤠ᤹ᤖᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤧᤴ ᤐᤠ᤺ᤴᤜᤠ᤹ ᤂᤧᤴᤜᤠ᤹ ᤐᤡᤖᤢᤱᤛᤡᤱ. ᤂᤧᤒᤩᤠᤱ ᤂᤧᤴᤜᤠ᤹ ᤀᤠᤱᤃᤠ᤹ᤏᤢ ᤔᤧᤃᤡᤛᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤠᤱ॥

⁶ ᤛᤧᤰᤂᤠᤒᤠ ᤏᤡᤛᤠᤶᤔᤡᤴ ᤂᤢᤴᤇᤡ᤹ ᤔᤢᤖᤠᤀᤥᤀᤣ ᤐᤳᤇᤧ. ᤜᤧᤰᤁᤩᤠᤱ ᤂᤧᤴᤜᤠ᤹ᤖᤧ ᤀᤡᤱᤗᤧᤰ ᤐᤠᤴ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴ॥ ᤏᤢ᤹ᤔᤠᤍᤠᤔᤠ ᤏᤢ ᤁᤢᤍᤥ᤺ᤵᤔᤠ ᤗᤠᤶᤔᤥ ᤂᤧᤴᤜᤠ᤹ ᤀᤠᤱᤃᤠ᤹ᤏᤢ ᤛᤥᤖᤡᤰ ᤗᤠᤱᤔᤧᤄᤣᤃᤧᤀᤠᤱ ᤂᤧᤴᤜᤠ᤹ᤖᤧ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤗᤠᤶ ᤔᤧᤏᤢ᤺ᤰᤋᤢᤛᤡᤖᤥ॥

⁷ “ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤀᤠᤑᤠᤸᤗᤧᤛᤠᤱ ᤛᤧᤰᤂᤠᤒᤠ ᤏᤧᤜᤡᤏᤡᤱᤘᤠ᤹ᤖᤧ ᤐᤠᤴ ᤜᤢ᤹ᤔᤠᤛᤡ ᤐᤥᤱ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤢᤏᤧ᤹ᤗᤠᤶᤒᤠ ᤏᤡᤛᤠᤶ ᤔᤧᤜᤢ᤹ᤛᤡᤱᤗ ᤐᤥᤱ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ ᤁᤧᤛᤠᤒᤠᤖᤥ॥

⁸ “ᤁᤖ ᤂᤧᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢᤒᤠ ᤗᤠᤶᤔᤡᤴ ᤁᤧᤗᤧᤖᤢᤶᤔᤠᤱ ᤌᤡᤰᤏᤠᤜᤠᤱ ᤁᤧᤜᤡᤀᤠᤛᤡ ᤁᤧᤒᤣᤃᤡᤀᤠᤱ ᤁᤧᤘᤕᤡ᤹॥ ᤂᤧᤏᤡ᤹ ᤏᤡᤛᤠᤶᤔᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤰ ᤐᤠᤱᤄᤢᤛᤡᤀᤠᤱ ᤘᤠ᤹॥ ᤀᤠᤱᤃᤠ᤹ ᤗᤧᤒᤡᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤂᤧᤏᤡ᤹ ᤁᤧᤓᤣ᤺ᤴᤍᤢᤶᤔᤠᤱ ᤁᤧᤘᤕᤡ᤹” ᤗ᤹ᤖᤡᤰ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁹ “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤡ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤌᤣᤀᤠᤱ ᤔᤣ᤺ᤶᤒᤠ ᤏᤢ ᤁᤢᤏᤠᤔᤧᤴᤇᤠ᤹ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤀᤠᤱᤃᤠ᤹ ᤀᤠᤗᤠᤶᤔᤥ ᤗᤠᤱᤃᤧᤱᤄᤣᤃᤡᤴ ᤁᤖ ᤀᤠᤛᤠᤶᤕᤥ ᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤁᤧᤜᤢ᤹ᤖᤢᤶᤛᤡᤶᤔᤧᤸᤗᤧ ᤀᤣ᤺ᤰ ᤐᤀᤣ᤺ᤰ ᤁᤧᤈᤥᤃᤢᤶᤔᤠᤱ ᤘᤠ᤹ᤖᤥ॥”

ᤕᤜᤢᤍᤠ᤺ᤸᤗᤧ ᤀᤡᤱᤗᤧᤰ ᤆᤥᤃᤢ

¹⁰ ᤀᤠᤏᤡ᤹ ᤁᤧᤖᤧᤰᤗᤧ ᤐᤠᤏᤢᤍᤡᤱ ᤐᤠ ᤗᤳᤇᤠ ᤔᤧᤘᤠ᤹ᤏᤧᤶᤒᤡ᥅ ᤌᤣ ᤗᤳᤇᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤀᤠᤈᤥᤃᤧᤒᤠ ᤔᤣ᤺ᤶᤒᤡ᥅ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤀᤡᤱᤀᤠᤗᤧᤰᤛᤡᤱᤅᤠᤱ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤠᤈᤡ᤺ᤴᤍᤢᤶᤒᤠᤒᤣ᥅

¹¹ ᤕᤜᤢᤍᤠ᤺ᤸᤗᤧ ᤀᤡᤱᤗᤧᤰ ᤆᤥᤃᤢᤀᤠᤱ ᤘᤠ᤹॥ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤘᤠ᤹॥ ᤕᤜᤢᤍᤠ᤺ᤸᤗᤧ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤵᤔᤠ ᤔᤧᤴᤇᤢᤔᤠᤜᤠ᤹ ᤔᤣ᤺ᤰᤂᤡᤶ ᤔᤧᤳᤋᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤣᤛᤣᤍᤧᤴᤏᤡᤴ ᤆᤡ᤺ᤴᤍᤢᤀᤠᤱ ᤘᤠ᤹ᤖᤥ॥

¹² ᤀᤰᤂᤣ ᤁᤧᤈᤥ᤺ᤰᤐᤠ ᤀᤠᤳᤋᤡᤴ ᤔᤏᤠ᤺ᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤥ ᤜᤢᤰᤛᤥᤕᤠᤱ ᤋᤠᤖᤢ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤏᤠᤴ ᤕᤠᤁᤢᤒᤖᤧ ᤁᤢᤛᤢᤘᤠᤱᤜᤠ᤹ᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤢᤍᤣᤛᤢᤖᤥ॥

¹³ ᤂᤧᤏᤡ᤹ ᤕᤠᤶᤔᤥ ᤘᤣ᤹ ᤐᤠᤴ ᤁᤧᤈᤥᤃᤢᤶ. ᤂᤧᤏᤡ᤹ ᤔᤡᤰᤘᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤘᤠᤃᤧᤖᤰᤛᤢᤶ᤹॥ ᤂᤧᤏᤡ᤹ ᤁᤧᤜᤠᤒᤡ ᤜᤧᤰᤁᤩᤠᤱ ᤔᤧᤖᤡᤱ ᤁᤧᤎᤰᤋᤡ᤹. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤜᤢᤰᤁᤥᤒᤠ ᤜᤢᤰᤛᤥᤕᤠᤱᤅᤡᤴ ᤂᤢᤏᤧ᤹ ᤀᤠᤓᤧᤸᤗᤧᤀᤠᤱ ᤏᤡᤏᤡ ᤔᤧᤗᤠᤵᤋᤢᤴ᤹. ᤂᤧᤴ ᤜᤢᤰᤛᤥᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤍᤠ᤺ᤰᤋᤢᤴ॥

¹⁴ ᤂᤧᤏᤡ᤹ ᤛᤧ᤺ᤴᤃᤧᤍᤥᤛᤢᤶ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤌᤣᤀᤠᤱ ᤗᤠᤵᤑᤢᤛᤡᤃᤧᤀᤠᤱ ᤘᤕᤡᤃᤧᤒᤠᤒᤣ᥅” ᤌᤣᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠ ᤀᤠᤱᤃᤠ᤹ ᤔᤧᤳᤏᤡᤱ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤌᤠᤱᤒᤧᤴ ᤁᤧᤘᤕᤧᤸᤗᤧ ᤔᤣ᤺ᤰᤂᤡᤶ ᤁᤧᤔᤧᤳᤋᤢᤔᤠ ᤁᤧᤔᤣ᤺ᤳᤋᤡᤴᤏᤢ ᤁᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤏᤡᤛᤢᤖᤥ. ᤂᤢᤏᤧ᤹ᤃ ᤂᤧᤏᤧ᤹ ᤁᤧᤔᤣ᤺ᤳ ᤘᤕᤧ. ᤂᤢᤏᤧ᤹ᤏᤢ ᤁᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤓᤣ᤺ᤴᤍᤢ. ᤜᤧᤰᤁᤣᤛᤠᤱ ᤂᤧᤴ ᤔᤧᤴᤇᤢᤔᤠᤴ ᤁᤧᤴᤍᤣ᤺ᤱᤔᤠ ᤏᤢ ᤔᤣ᤺ᤰᤂᤡᤶᤔᤥ ᤔᤠᤱᤜᤢᤵ ᤁᤧᤒᤥᤱᤔᤠ ᤁᤧᤔᤣ᤺ᤳᤗᤥ॥

¹⁵ ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤏᤢ ᤁᤧᤔᤣ᤺ᤳᤋᤧᤴ ᤏᤠᤛᤡᤱᤃᤧᤴ ᤌᤰᤗᤠᤀᤥ ᤏᤢ ᤕᤠᤶᤛᤠᤶᤔᤥ ᤗᤳᤇᤠ ᤁᤧᤈᤥᤃᤧᤛᤡᤒᤠ ᤔᤣ᤺ᤶᤒᤡ᥅ ᤜᤧᤰᤁᤩᤠᤱ ᤌᤣᤀᤠᤱ ᤂᤧᤴᤇᤡ᤹ ᤗᤳᤇᤠᤏᤧᤛᤡᤱ᥅ ᤌᤣᤀᤠᤱᤓᤧᤸᤗᤧ ᤂᤧᤴᤇᤡ᤹ ᤗᤠᤶᤒᤠ ᤁᤧᤒᤥᤱᤒᤠ ᤛᤠᤜᤠ᤹ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤧᤒᤥᤱᤗ ᤁᤧᤗ᤹ᤒᤠ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤢ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤡ᤹ ᤀᤠᤒᤠᤅᤣ ᤕᤠᤶᤛᤠᤶᤔᤡᤴ ᤁᤶᤒᤪᤠᤱ ᤔᤧᤳᤋᤠᤶᤔᤧ᤹ ᤜᤧᤰᤁᤩᤠᤱ ᤂᤧᤏᤡ᤹ ᤀᤠᤒᤠᤅᤣ ᤌᤠᤱᤒᤧᤴ ᤁᤧᤘᤕᤡᤸᤗᤧ ᤔᤣ᤺ᤳᤋᤧᤴᤏᤢ ᤁᤧᤈᤥᤃᤢᤶᤒᤠ ᤔᤣ᤺ᤰᤂᤡᤶ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤧᤶᤔᤡᤴᤏᤧ᤹॥

¹⁶ “ᤔᤣ᤺ᤳ ᤕᤧᤶᤒᤠ ᤛᤧᤔᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤆᤡ᤺ᤳᤋᤢᤱ᤹.” ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. “ᤂᤧᤏᤡ᤹ ᤗᤢᤶᤔᤥ ᤀᤠᤳᤋᤡᤴᤜᤠ᤹ᤖᤧ ᤔᤣ᤺ᤳ ᤕᤧᤶᤒᤠ ᤛᤧᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶ᤹॥ ᤂᤧᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤆᤡ᤺ᤳᤋᤢᤱ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤒᤠᤅᤣ ᤕᤠᤶᤛᤠᤶᤔᤡᤴ ᤀᤠᤒᤠᤅᤣᤀᤣ ᤁᤶᤒᤪᤠᤱ ᤔᤧᤳᤋᤠᤶᤔᤧ᤹ᤀᤠᤱ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤧᤶᤔᤡᤴᤏᤧ᤹॥”

ᤂᤠᤛᤧᤴ ᤕᤧᤴ

¹⁷ ᤂᤧᤏᤡ᤹ ᤐᤠ᤺ᤴᤏᤡᤸᤗᤧ ᤕᤜᤘᤣ ᤍᤠᤱᤒᤧᤴ ᤏᤠᤛᤧᤖ ᤁᤧᤕᤠ᤺ᤴᤍᤢᤶᤔᤠᤱ ᤘᤠ᤹॥ ᤁᤖ ᤂᤧᤏᤡ᤹ ᤛᤧ᤺ᤴᤃᤧᤍᤥᤛᤢᤶ᤹. “ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤏᤠᤛᤧᤖ ᤕᤠ᤺ᤴᤍᤢᤶᤒᤧᤒᤣ᥅” ᤁᤖ ᤂᤧᤏᤡ᤹ ᤀᤰᤁᤣ ᤁᤧᤒᤠ᤺ᤳᤋᤢᤶᤔᤠᤱ ᤏᤠᤖ ᤁᤧᤕᤠ᤺ᤴᤍᤢᤶ᤹. “ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤏᤢᤒᤠᤀᤣ ᤔᤧᤈᤥᤰ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤁᤢᤏᤡᤱᤘᤠ᤹ ᤋᤠ᤹᤺.” ᤀᤡᤃᤪ “ᤂᤠᤛᤧᤴ ᤁᤧᤗᤥ᤺ᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤧᤴ ᤀᤠᤳᤋᤡ ᤘᤠ᤹ᤒᤣ᥅”