ᤗᤢᤁᤠ 1 - LIFOTNT

ᤗᤢᤁᤠ᤺ᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤢ᤹

¹ ᤀᤠᤍᤠᤱᤒᤠ ᤋᤢᤶᤔᤩᤠᤱᤜᤠᤱ ᤌᤡᤕᤥᤑᤡᤗᤛᤣ. ᤕᤖᤡᤰ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤗᤢᤶᤔᤥ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤥ᤺ᤰᤂᤧᤒᤠ ᤜᤡᤴᤍᤥᤰᤁᤡᤸᤗᤧ ᤐᤥᤎᤰᤁᤡᤴ ᤔᤧᤛᤠᤵᤋᤢᤀᤠᤱ ᤘᤠ᤹ᤖᤥ॥

² ᤂᤧᤴ ᤜᤡᤴᤍᤥᤰᤜᤠ᤹ᤃ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤁᤧᤏᤡᤒᤠᤜᤠ᤹ ᤏᤢ ᤒᤠ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤁᤧᤛᤧᤒᤠᤜᤠ᤹ᤖᤧ ᤀᤠᤏᤡᤃᤣ ᤔᤧᤈᤧᤰᤋᤡᤃᤧᤀᤠᤱ ᤘᤠ᤹॥

^3-4 ᤜᤧᤰᤁᤣ᤺ᤸᤗᤧ ᤀᤠᤏᤡᤃᤣ ᤗᤢᤶᤔᤥ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤥ᤺ᤶᤓᤥ ᤆᤥᤃᤢᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤛᤠᤵᤔᤠ ᤏᤢᤒᤠ ᤐᤥᤱ ᤁᤧᤗ᤹ᤒᤠᤴ ᤀᤡᤱᤃᤠ᤹ᤀᤠᤱ ᤀᤡ᤺ᤳᤋᤢᤱᤗᤥ. ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤜᤢ᤹ᤛᤡᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤌᤧᤵᤐᤧᤳ ᤛᤠᤵᤋᤢᤱ ᤐᤡᤏᤧᤀᤠᤱ ᤘᤠ᤹ᤀᤠᤖᤥ॥

ᤕᤢᤜᤢᤴᤏᤠᤖᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤔᤠᤱᤏᤡᤱᤘᤠᤐᤠᤴ

⁵ ᤕᤜᤢᤍᤡᤕᤠᤛᤔᤠ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤕᤧᤶᤔᤥ ᤀᤒᤡᤕᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤎᤠ᤺ᤰᤁᤥ ᤗᤳᤇᤠ ᤈᤁᤖᤡᤕᤠ ᤔᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤀᤡᤗᤡᤛᤡᤒᤠ᤺ᤴᤏᤠᤱ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤘᤕᤧᤖᤥ॥

⁶ ᤂᤧᤱᤜᤠ᤹ ᤏᤧᤵᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤠᤶᤕᤥᤒᤠ ᤘᤕᤧᤳᤇᤡᤀᤠᤱ ᤏᤢᤖᤡᤰᤁᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱ ᤁᤧᤄᤧᤶᤒᤠ ᤘᤕᤧᤳᤇᤡᤖᤥ॥

⁷ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ-ᤀᤣ ᤔᤧᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤀᤡᤗᤡᤛᤡᤒᤠᤖᤧ ᤁᤢᤛᤠᤔᤢ᤹ᤀᤡ ᤂᤰᤛᤡᤱᤅᤠᤱ ᤘᤕᤧ. ᤜᤧᤰᤁᤩᤠᤱ ᤏᤧᤵᤔᤠᤱ ᤁᤠᤵᤐᤥᤒᤠ ᤁᤠᤵᤔᤥᤔᤠ ᤋᤢᤶᤛᤧᤳᤇᤡᤀᤠᤱ ᤘᤕᤧᤳᤇᤡᤖᤥ॥

⁸ ᤌᤡᤰᤗᤧᤱ ᤈᤁᤖᤡᤕᤠᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠᤀᤠᤱ ᤛᤧᤘᤠ ᤆᤥ᤺ᤰᤔᤠ ᤗᤰ ᤂᤥᤛᤢ. ᤌᤣᤀᤠᤱᤓᤧᤸᤗᤧ ᤁᤴ ᤂᤢᤏᤧ᤹ ᤘᤕᤧᤒᤠ ᤗᤰᤁᤡᤸᤗᤧᤴ ᤛᤧᤘᤠ ᤆᤥ᤺ᤰᤔᤠ ᤕᤧᤶ ᤘᤕᤧᤖᤥ॥

⁹ ᤏᤡᤱᤘᤠ᤹ᤑᤢᤛᤠᤶᤒᤠ ᤌᤡᤶ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤡᤶᤔᤥ ᤐᤣ᤺ᤰᤔᤠᤀᤠᤱ ᤛᤠᤱᤛᤡᤱ ᤜᤠ᤺ᤶᤔᤠ ᤗᤰᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤋ᤹ᤕᤠ᤺ᤴᤛᤥᤴ ᤔᤧᤃᤧ᤺ᤛᤢᤸᤗᤧ ᤂᤢᤏᤧ᤹ ᤂᤥᤛᤢᤀᤠᤱ ᤘᤕᤧᤖᤥ॥

¹⁰ ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤴᤍᤢᤸᤗᤧ ᤗᤠ᤺ᤰᤁᤠᤳ ᤕᤖᤡᤰ ᤔᤏᤠᤜᤠ᤹ ᤛᤧᤘᤠ ᤆᤥ᤺ᤰᤛᤧ ᤔᤧᤈᤢᤵᤛᤧᤀᤠᤱ ᤋᤢᤘᤠ ᤆᤥ᤺ᤰᤏᤢ ᤔᤧᤕᤧᤒᤧ॥

¹¹ ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤏᤡᤸᤗᤧ ᤆᤢᤵᤛᤠᤱ ᤗᤧᤵᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤀᤥ᤺ᤴᤎᤠᤰᤛᤡᤱᤗᤥ॥

¹² ᤜᤧᤰᤁᤣ᤺ᤸᤗᤧ ᤈᤁᤖᤡᤕᤠᤖᤧ ᤁᤢᤕᤱᤔᤠ ᤁᤧᤖᤧᤀᤠᤱ ᤁᤢᤃᤡ᤺ᤔᤠᤸᤗᤧ ᤕᤢᤶᤛᤢᤱᤔᤠ ᤐᤥ᤺ᤰᤂᤧ.

¹³ ᤁᤖ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤧᤃᤡᤛᤧᤴᤏᤧ᤹ᤀᤥ ᤈᤁᤖᤡᤕᤠᤀᤣ᥄ ᤀᤠᤸᤗᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ॥ ᤀᤠᤸᤗ ᤔᤧᤸᤗᤡᤱᤃᤧᤴ ᤁᤧᤔᤣ᤺ᤳ ᤀᤡᤗᤡᤛᤡᤒᤠᤖᤧ ᤕᤧᤶᤒᤡᤳᤇᤠ᤹ᤛᤠᤎᤡᤰ ᤁᤧᤃᤳ ᤁᤧᤒᤡ᤹ᤖᤥ॥ ᤂᤧᤴ ᤀᤅᤧ᤺ᤰᤘᤠᤴ ᤕᤢᤜᤢᤴᤏᤠ ᤔᤡᤱ ᤘᤠ᤺ᤳᤋᤧ᤹ᤀᤥ॥

¹⁴ ᤂᤧᤏᤧ᤹ ᤁᤧᤛ᤺ᤳᤋᤠᤱ ᤕᤧᤕᤧ ᤁᤧᤗ᤹ᤖᤥ॥ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤛᤠᤃᤧᤘᤠ᤺ᤴᤇᤡᤱᤒᤠ ᤐᤥᤱᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤛ᤺ᤳᤗᤥ॥

¹⁵ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤏᤡᤔᤠᤀᤥ ᤕᤶᤒᤠ ᤐᤥᤱᤗᤥ॥ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤌᤡ᤺ ᤏᤢ ᤘᤣ᤹ ᤀᤠᤔᤔᤒᤠ ᤌᤢᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥᤱᤗᤥ॥

¹⁶ ᤂᤢᤏᤧ᤹ᤃ ᤕᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤍᤠᤱᤒᤠᤀᤥ ᤏᤢ᤺ᤰᤋᤢ ᤋᤠᤖᤢᤛᤡ᤹ᤖᤥ॥

¹⁷ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤁᤢᤀᤡᤛᤡᤰ ᤌᤢᤶ ᤏᤢ ᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤐᤥᤱᤅᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤏᤠᤜᤠ᤹ ᤕᤠᤖᤡᤵ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤍᤃᤡ ᤐᤣ᤺ᤰᤗᤥ॥ ᤂᤢᤏᤧ᤹ ᤐᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤛᤠᤜᤠ᤹ ᤗᤧᤵᤔᤠᤱ. ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤏᤢ᤺ᤰᤋᤢᤛᤡᤖᤥ॥”

¹⁸ ᤜᤧᤰᤁᤩᤠᤱ ᤈᤁᤖᤡᤕᤠᤖᤧ ᤔᤠᤱᤗᤠᤀᤡᤱᤒᤠᤴ ᤛᤣ᤺ᤴᤍᤥᤛᤢ. “ᤀᤠᤰᤂᤣᤀᤠᤱ ᤁᤴ ᤁᤢᤛᤡᤱ ᤏᤡ᤺ᤳᤋᤢᤱᤒᤠᤒᤣ᥅ ᤀᤡᤱᤃᤠ᤹ᤀᤠᤱ ᤁᤠᤵᤐᤥᤒᤠ ᤋᤢᤶᤛᤠᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤩᤠᤱ ᤀᤠᤔᤣ᤺ᤳᤋᤡᤴᤏᤠᤱ ᤁᤠᤵᤔᤥ ᤋᤢᤶᤛᤧᤀᤠᤱ ᤘᤠ᤹ᤖᤥ॥”

¹⁹ ᤂᤢᤏᤧ᤹ ᤔᤧᤳᤋᤢ. “ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤃᤠᤒᤪᤡᤀᤣᤗ ᤔᤠᤱᤗᤠᤀᤡᤱᤒᤠ᤹ᤀᤠᤖᤥ॥ ᤂᤧᤏᤧ᤹ᤀᤥ ᤁᤴ ᤛᤢᤏᤠᤀᤡᤱᤅᤡᤴ ᤋᤠ᤺ᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥

²⁰ ᤁᤴ ᤐᤠ᤺ᤳᤋᤢᤱᤒᤠ ᤔᤠᤱᤜᤧᤰᤁᤡᤴ ᤁᤢᤕᤧᤶᤔᤥ ᤁᤧᤳᤗᤥ. ᤁᤖ ᤂᤧᤏᤧ᤹ ᤏᤛᤠᤴ ᤁᤧᤴᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤧᤛ᤻ᤛᤠᤴ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤁᤧᤒᤠᤴ ᤔᤧᤗ᤺ᤴᤏᤧᤴᤗᤥ॥”

²¹ ᤜᤧᤰᤁᤣᤗ᤹ᤖᤡᤰ ᤔᤠᤱᤜᤡᤶ ᤗᤠ᤺ᤰᤁᤠᤳ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤌᤣᤀᤠᤱ ᤈᤁᤖᤡᤕᤠᤴ ᤛᤢᤛᤧᤒᤣ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤜᤠᤱᤄᤢᤖ ᤔᤧᤕᤧᤒᤧᤖᤥ॥

²² ᤜᤧᤰᤁᤩᤠᤱ ᤈᤁᤖᤡᤕᤠᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤁᤖ ᤂᤢᤏᤧ᤹ ᤐᤠ᤺ᤵᤔᤠᤀᤣ ᤔᤧᤛᤢᤰᤋᤧᤴᤗᤥ. ᤜᤧᤰᤁᤣ᤺ᤸᤗᤧ ᤜᤢᤰᤆᤠ᤺ᤸᤁᤡᤸᤗᤧ ᤔᤡᤰᤛᤣᤴ ᤆᤥᤃᤢᤖ ᤐᤠᤖᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤸᤗᤧ ᤔᤠᤱᤜᤡᤶ ᤛᤡᤃᤠᤱ ᤛᤢᤑᤥᤴ ᤏᤡᤛᤢᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥

²³ ᤜᤧᤰᤁᤩᤠᤱ ᤈᤁᤖᤡᤕᤠ᤺ᤸᤗᤧ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤕᤧᤶ ᤆᤢᤖᤧᤀᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣ॥

²⁴ ᤕᤠᤱᤛᤡ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤗᤠ ᤅᤠᤛᤡ ᤌᤠᤖᤡᤰ ᤜᤡᤶᤔᤥᤀᤣ ᤕᤠ᤺ᤰᤋᤧ॥

²⁵ ᤂᤧᤸᤗᤧ ᤐᤠ᤺ᤳᤋᤢ. “ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤛᤠᤔᤧᤱᤃᤵᤔᤏᤠᤔᤠ ᤗ᤹ᤖᤡᤰ ᤋᤠᤵᤑᤧ᤺ᤶᤒᤠ ᤀᤠᤔᤡᤱᤅᤡᤴ ᤂᤧᤳᤋᤢᤍᤣᤛᤢ ᤐᤡᤖᤠᤱᤗᤥ॥”

ᤕᤧᤛᤢᤖᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤔᤠᤱᤏᤡᤱᤘᤠᤐᤠᤴ

^26-27 ᤜᤧᤰᤁᤩᤠᤱ ᤀᤡᤗᤡᤛᤡᤒᤠᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤗᤠ ᤋᤢᤰᤛᤡ ᤁᤧᤖᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤃᤠᤒᤪᤡᤀᤣᤗᤧᤴ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤐᤠᤱᤄᤢᤖᤥ॥ ᤂᤧᤴ ᤔᤖᤡᤕᤔ ᤔᤧᤵᤔᤏᤠᤔᤠ ᤛᤡᤛᤠᤍᤡᤱ ᤔᤧᤴᤇᤢᤔᤠᤀᤥ ᤐᤣ॥ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤔᤣ᤺ᤰᤂᤡᤶ ᤐᤠ᤺ᤴᤏᤡᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤎᤠ᤺ᤰ ᤕᤢᤛᤢᤑ ᤔᤧᤵᤔᤏᤠᤒᤠ ᤔᤏᤠ᤺ᤴᤏᤢ ᤐᤢ᤹ᤖᤧᤀᤠᤱ ᤘᤕᤧᤖᤥ॥

²⁸ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢ. “ᤀᤠᤛᤣᤘᤠᤖᤥ. ᤂᤧᤏᤧ᤹ᤃ ᤍᤠᤱᤒᤠᤸᤗᤧ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥ ᤂᤢᤏᤧ᤹ ᤂᤧᤏᤧ᤹ᤏᤢ ᤘᤠ᤹ᤖᤥ॥”

²⁹ ᤔᤖᤡᤕᤶᤔᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤀᤠᤰᤋᤱᤒᤠ ᤐᤖᤡᤰᤗᤧᤴ ᤛᤧᤘᤠ ᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ॥

³⁰ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤖᤡᤕᤶᤔᤣ. ᤔᤧᤃᤡᤛᤧᤴᤏᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤃ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥

³¹ ᤀᤠᤸᤗ ᤂᤧᤏᤧ᤹ ᤕᤧᤶᤒᤡᤳᤇᤠ᤹ᤛᤠᤎᤡᤰ ᤁᤧᤃᤳᤋᤢ᤹॥ ᤂᤧᤸᤗᤧ ᤁᤢᤔᤡᤱ ᤕᤧᤛᤢ ᤘᤠ᤺ᤳᤋᤧ᤹ᤀᤥ॥

³² ᤂᤢᤏᤧ᤹ ᤐᤕᤶ ᤕᤶᤒᤠ ᤐᤥᤱᤅᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤑᤠ᤹ᤀᤠᤱ ᤔᤧᤔᤧᤳᤋᤢ᤹ᤖᤥ॥ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤎᤠ᤺ᤰᤌᤧᤒᤠ ᤍᤠᤀᤢᤍᤖᤧ ᤜᤠᤱ ᤆᤥᤃᤢᤒᤠ ᤜᤧᤰᤁᤣ ᤜᤠᤱ ᤆᤥᤃᤢ᤹ᤖᤥ॥

³³ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗ ᤛᤶᤍᤠᤱ ᤛᤍᤠᤍᤡᤱ ᤜᤠᤱ ᤆᤥᤃᤢ᤹ᤖᤥ॥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ॥”

³⁴ ᤔᤖᤡᤕᤶᤔᤡᤸᤗᤧ ᤔᤠᤱᤗᤠᤀᤡᤱᤒᤠᤴ ᤛᤣ᤺ᤴᤍᤥᤛᤢ. “ᤁᤴ ᤀᤠᤰᤂᤣᤗ᤹ᤖᤡᤰ ᤐᤥᤱᤒᤠᤒᤣ᥅ ᤀᤡᤱᤃᤠ᤹ᤃ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤀᤠᤖᤥ॥”

³⁵ ᤔᤠᤱᤗᤠᤀᤡᤱᤒᤠᤸᤗᤧ ᤏᤥᤃᤵ ᤐᤡᤖᤢ. “ᤛᤣᤛᤣᤔᤠᤱᤅᤡᤴ ᤁᤧᤛᤶᤍᤠᤱ ᤋᤠᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤄᤢ᤺ᤰᤗᤥ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤥᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤱᤃ ᤏᤡᤱᤘᤠ᤹ᤑᤢᤛᤠ ᤔᤧᤔᤧᤳᤋᤢ᤹ᤖᤥ॥

³⁶ ᤂᤧᤵᤛᤧ᤹ᤀᤥ. ᤂᤧᤏᤧ᤹ ᤁᤧᤃᤠ᤹ᤀᤡ ᤀᤡᤗᤡᤛᤡᤒᤠᤴ ᤂᤢᤏᤧ᤹ ᤁᤢᤃᤠᤵᤔᤥ ᤋᤢᤶᤔᤥ ᤁᤛᤠᤵᤐᤥᤰᤁᤥ ᤕᤧᤶᤒᤡᤳᤇᤠᤛᤠ ᤌᤡᤰ ᤜᤠᤱᤛᤡᤅᤠᤱ ᤘᤠ᤹॥ ᤀᤠᤸᤗᤥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤠᤔᤧᤱᤃᤵᤔᤏᤠᤔᤠ ᤔᤧᤔᤧᤳᤋᤢᤛᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤗᤠ ᤋᤢᤰᤛᤡ ᤁᤧᤖᤧᤀᤠᤱ ᤘᤠ᤹ᤖᤥ॥

³⁷ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤜᤥᤵᤗᤥ॥”

³⁸ ᤔᤖᤡᤕᤔᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤔᤠᤀᤠᤖᤥ॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤧᤴ ᤐᤣ॥

ᤔᤖᤡᤕᤶᤔᤡᤴ ᤀᤡᤗᤡᤛᤡᤒᤠᤴ ᤁᤢᤍᤢᤶᤛᤧ ᤐᤣᤰ

³⁹ ᤕᤠᤱᤛᤡ ᤔᤖᤡᤕᤶᤔᤡᤴᤏᤠᤱ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤐᤠᤱᤈᤢᤶᤔᤥ ᤌᤠᤛᤡᤱ॥

⁴⁰ ᤂᤧᤵᤔᤥ ᤈᤁᤖᤡᤕᤠᤖᤧ ᤁᤢᤜᤡᤶᤔᤥ ᤁᤧᤖᤧᤀᤠᤱ ᤀᤡᤗᤡᤛᤡᤒᤠᤴ ᤛᤧᤘᤠ ᤔᤧᤳᤋᤢᤖᤥ॥

⁴¹ ᤀᤡᤗᤡᤛᤡᤒᤠᤖᤧ ᤔᤖᤡᤕᤶᤔᤡᤴ ᤛᤧᤘᤠ ᤔᤕᤧᤒᤠ ᤂᤧᤵᤛᤢᤏᤠᤔᤧ᤺ᤴᤏᤣ ᤁᤢᤛᤠᤵᤐᤥ᤺ᤰᤁᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠᤴ ᤔᤢᤴᤈᤡᤱ ᤗ᤹ᤖᤧᤖᤥ॥ ᤀᤡᤗᤡᤛᤡᤒᤠᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧ.

⁴² ᤜᤧᤰᤁᤩᤠᤱ ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧ. “ᤂᤧᤏᤧ᤹ᤃ ᤔᤧᤴᤇᤢᤔᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤃᤧᤘᤠ᤺ᤴᤍᤢᤒᤠ ᤀᤅᤧ᤺ᤰᤘᤠ᤺ᤱᤃ ᤔᤢ᤹ᤀᤡᤛᤠᤒᤠ ᤐᤥᤱᤗᤥ॥

⁴³ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤍᤠᤱᤒᤠᤸᤗᤧ ᤁᤢᤶᤔᤠᤀᤣ ᤀᤠᤍᤢᤶᤛᤧ ᤋᤠᤔᤠ ᤁᤴ ᤀᤠᤰᤋᤱᤒᤠ ᤔᤡᤱᤛᤥ ᤀᤡᤱᤎᤠᤱᤏᤧ ᤀᤡᤱᤃᤠ᤹ ᤂᤥᤛᤢᤱᤒᤣ᥅

⁴⁴ ᤂᤧᤏᤧ᤹ ᤛᤧᤘᤠ ᤁᤧᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤏᤢᤔᤧ᤺ᤴᤏᤣ ᤀᤡᤱᤃᤠ᤹ ᤀᤠᤛᤠᤵᤐᤥ᤺ᤰᤐᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠᤴ ᤛ᤺ᤳᤋᤧᤖ ᤔᤢᤴᤈᤡᤱ ᤗ᤹ᤖᤧᤖᤥ॥

⁴⁵ ᤂᤧᤏᤧ᤹ᤃ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤜᤡᤱᤔᤴᤏᤥ ᤐᤥᤱ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤏᤠ ᤁᤧᤛᤠ᤹ᤖᤢᤖᤥ॥”

ᤔᤖᤡᤕᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢ᤹

⁴⁶ ᤜᤧᤰᤁᤩᤠᤱ ᤔᤖᤡᤕᤔᤖᤧ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤛᤡᤰᤗᤢᤱᤔᤥᤗᤠᤶᤔᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ.

⁴⁷ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥

⁴⁸ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤧᤰᤋᤱᤔᤠ ᤆᤢᤱᤈᤡᤃᤧᤴ ᤁᤢᤛᤣᤘᤠᤖᤥᤔᤠᤴ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗᤀᤠᤱᤎᤥ ᤌᤠ᤺ᤰᤌᤠ᤺ᤰᤁᤥ ᤀᤡᤱᤃᤠ᤹ ᤔᤢ᤹ᤀᤡᤛᤠᤔᤠ ᤑᤠ᤹ᤀᤠᤱ ᤔᤧᤔᤧᤳᤋᤠᤖᤥ.

⁴⁹ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤗᤠᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤃᤠ᤹ ᤆᤥᤃᤠᤱ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤁᤢᤔᤡᤱᤅᤡᤱᤃ ᤛᤣᤛᤣ ᤆᤥᤰᤗᤥ॥

⁵⁰ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤁᤧᤖᤧᤰ ᤌᤠ᤺ᤰᤌᤠ᤺ᤰᤁᤥ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥

⁵¹ ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤜᤢᤰᤜᤠ᤹ᤖᤧ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤁᤧᤖᤧᤰ ᤀᤡᤍᤡᤘᤍᤡ᤹ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥

⁵² ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤡ᤹ ᤜᤠᤱᤕᤢᤰᤏᤠᤀᤥᤗᤠᤶ ᤕᤥ ᤌᤠ᤺ᤛᤢᤛᤡᤀᤠᤱ ᤘᤠ᤹. ᤁᤖ ᤆᤢᤱᤈᤡᤃᤧᤶᤒᤠᤜᤠ᤹ ᤌᤠ᤺ᤱᤎᤠ᤺ᤱ ᤑᤥ᤺ᤰᤂᤢᤛᤡᤀᤠᤱ ᤘᤠ᤹ᤖᤥ॥

⁵³ ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢᤒᤠ ᤆᤡᤃᤰᤘᤠᤜᤠ᤹ ᤐᤡᤖᤢᤛᤡᤀᤠᤱ ᤘᤠ᤹. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤁᤢᤄᤠᤗᤧᤶ ᤐᤠᤱᤄᤢᤛᤡᤀᤠᤱ ᤘᤠ᤹ᤖᤥ॥

^54-55 ᤂᤢᤏᤧ᤹ ᤀᤒᤪᤠᤜᤠᤔ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤏᤡᤃᤣ ᤌᤠ᤺ᤰᤜᤠ᤹ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤁᤢᤛᤧᤘᤠᤖᤥᤒᤠ ᤀᤡᤛᤪᤠᤀᤡᤗᤧᤴ ᤁᤢᤓᤠ᤹ ᤐᤡᤖᤢᤀᤠᤱ ᤘᤠ᤹ᤖᤥ॥”

⁵⁶ ᤔᤖᤡᤕᤶᤔᤡᤴ ᤗᤠ ᤛᤢᤶᤛᤡ ᤌᤠᤖᤡᤰ ᤀᤡᤗᤡᤛᤡᤒᤠᤴ ᤏᤢ ᤘᤕᤧ. ᤜᤧᤰᤁᤩᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧᤖᤥ॥

ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤛᤠᤘᤠ᤺ᤴᤇᤡᤱ

⁵⁷ ᤜᤧᤰᤁᤩᤠᤱ ᤀᤡᤗᤡᤛᤡᤒᤠᤖᤧ ᤁᤢᤛᤠᤘᤠ᤺ᤶᤔᤠ ᤕᤧᤶ ᤋᤩᤧᤀᤠᤱ ᤕᤧᤶᤒᤡᤳᤇᤠ᤹ᤛᤠᤎᤡᤰ ᤛᤠᤘᤠ᤺ᤴᤍᤢᤖᤥ॥

⁵⁸ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤏᤢ ᤁᤢᤃᤠ᤹ᤀᤡᤒᤠᤜᤠ᤹ᤖᤧ ᤁᤴ ᤍᤠᤱᤒᤠᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤔᤧᤛ᤺ᤳᤋᤧᤖᤥ॥

⁵⁹ ᤜᤧᤰᤁᤩᤠᤱ ᤀᤅᤧ᤺ᤰᤘᤠᤛᤠᤴ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤒᤠ ᤌᤡᤶᤔᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴᤏᤠᤱ ᤁᤢᤶᤒᤠᤖᤧ ᤁᤢᤔᤡᤱ ᤁᤢᤀᤡᤛᤡᤰ ᤈᤁᤖᤡᤕᤠ ᤔᤡᤱ ᤘᤠ᤺ᤵᤔᤠ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧ.

⁶⁰ ᤁᤖ ᤁᤢᤶᤔᤠᤖᤧ ᤔᤧᤳᤋᤢᤛᤡ “ᤔᤣ᤺ᤴᤗᤥ᥄ ᤁᤸᤗᤧ ᤁᤢᤔᤡᤱᤃ ᤕᤢᤜᤢᤴᤏᤠ ᤘᤠ᤺ᤵᤔᤠ ᤐᤥᤱᤗᤥ॥”

⁶¹ ᤂᤧᤱᤜᤠ᤹ᤖᤧ ᤁᤢᤶᤔᤠᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤃᤠ᤹ᤀᤡᤜᤠ᤹ᤀᤥ ᤀᤰᤋᤱᤒᤠ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤜᤠ᤹ ᤔᤧᤜᤥᤵᤗᤥ॥”

⁶² ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤈᤁᤖᤡᤕᤠᤴ ᤜᤢᤰᤆᤠ᤺ᤸᤁᤡ᤺ᤸᤗᤧ ᤛᤣ᤺ᤴᤔᤧᤍᤥᤛᤢ. “ᤁᤸᤗᤧ ᤁᤢᤔᤡᤱ ᤌᤣ ᤘᤠ᤺ᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤒᤣ᥅”

⁶³ ᤂᤧᤸᤗᤧ ᤛᤠᤵᤔᤠ ᤛᤠᤔᤠ᤺ᤴ ᤏᤠ᤺ᤰᤋᤢᤛᤡᤀᤠᤱ ᤁᤸᤗᤧ ᤁᤢᤔᤡᤱ ᤕᤢᤜᤢᤴᤏᤠ ᤗ᤹ᤖᤡᤰ ᤛᤠᤵᤋᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

⁶⁴ ᤂᤡᤔᤥ ᤂᤧᤴ ᤐᤠ᤺ᤵᤔᤠ ᤜᤣ᤺ᤰᤋᤧᤀᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤜᤣ᤺ᤰᤋᤢᤖᤥ॥

⁶⁵ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤃᤡᤛᤧᤖᤥ॥ ᤕᤜᤢᤍᤡᤕᤠᤛᤔᤠ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤒᤠ ᤐᤠᤱᤓᤣ᤹ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤛᤧᤖᤧᤖᤥ॥

⁶⁶ ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤸᤗ ᤁᤴ ᤀᤅᤧ᤺ᤰᤘᤠᤴ ᤋᤠ᤺ᤴᤍᤡ ᤌᤣ ᤐᤥᤱᤒᤠᤀᤡᤖᤥ᥅” ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤜᤢᤰᤁᤡᤴ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤛᤶᤍᤠᤱ ᤘᤕᤧᤖᤥ॥

ᤈᤁᤖᤡᤕᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢ᤹

⁶⁷ ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤁᤢᤶᤒᤠ ᤈᤁᤖᤡᤕᤠᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ.

⁶⁸ “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ᤀᤥ ᤋᤩᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

⁶⁹ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤗᤠᤶ ᤕᤠᤵᤔᤡ ᤛᤧᤴᤗᤵ ᤁᤧᤒᤡᤒᤠ ᤔᤢᤰᤁᤧᤃᤢᤒᤠ ᤛᤧᤴᤗᤵᤍᤠᤱᤒᤠᤎᤡᤰ ᤑᤥ᤺ᤰᤂᤢᤖᤥ॥

^70-71 ᤀᤠᤏᤡ᤹ ᤏᤡᤱᤔᤡᤜᤠ᤹ ᤏᤢ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤋᤠᤱᤀᤠᤛᤧ᤺ᤵᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤕᤖᤡᤰ ᤋᤱᤒᤣ ᤋᤃᤡ ᤛᤣᤛᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤘᤕᤧ॥

⁷² ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤗᤢᤱᤃᤢᤶ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢ॥

⁷³ ᤂᤧᤴ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤀᤠᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤶᤔᤡᤴᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤖᤥ॥

^74-75 ᤁᤴ ᤔᤠᤱᤜᤧᤰᤁᤡᤴ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤔᤠ ᤀᤠᤄᤥᤛᤢᤶᤗ. ᤜᤧᤰᤁᤩᤠᤱ ᤔᤧᤱᤃᤡᤀᤣ ᤔᤧᤴᤕᤱᤅᤣ ᤀᤠᤏᤡ᤹ ᤜᤡᤱᤔᤴ ᤂᤠᤖᤠᤰ ᤛᤣᤛᤣ ᤏᤢ ᤛᤠᤶᤕᤥᤒᤠ ᤐᤥᤱᤔᤠᤀᤠᤱ ᤂᤢᤏᤧ᤹ ᤁᤢᤛᤧᤘᤠ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ॥”

⁷⁶ “ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤧᤶᤔᤧᤳᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤍᤠᤱᤒᤠᤸᤗᤧ ᤁᤢᤍᤃᤡ ᤗᤠᤶ ᤕᤠᤖᤡᤵ ᤆᤥ᤺ᤰᤛᤧ ᤁᤧᤒᤣ᤺ᤰᤗᤥ॥

⁷⁷ ᤜᤧᤰᤁᤩᤠᤱ ᤁᤢᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤏᤢ ᤛᤧᤴᤗᤵᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤥᤛᤧ᤺ᤴᤃᤧᤎᤠᤰᤋᤢᤛᤡ᤹ᤖᤥ॥

⁷⁸ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤢᤱᤈᤡᤃᤧᤴ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤠᤶᤛᤠᤱᤅᤡᤴ ᤀᤠᤏᤡ᤹ᤀᤥ ᤆᤢᤰᤔᤠ ᤀᤡ᤺ᤳᤋᤧᤖᤥ॥

⁷⁹ ᤜᤧᤰᤁᤩᤠᤱ ᤂᤠᤍᤠᤶᤔᤠ ᤏᤢ ᤛᤡᤔᤧᤸᤗᤧᤴ ᤛᤠᤶᤔᤪᤡ᤺ᤵᤐᤥ ᤁᤧᤘᤠ᤹ᤒᤠᤜᤠ᤹ᤀᤥ ᤂᤧᤴ ᤏᤠᤶᤛᤠᤱᤅᤡᤴ ᤀᤥ᤺ᤳᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤱᤓᤥᤴ ᤛᤏᤠᤖᤢᤱ ᤗᤠᤶᤔᤥ ᤋᤥ᤺ᤴᤇᤡᤱᤗᤥ॥”

⁸⁰ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤕᤢᤜᤢᤴᤏᤠᤴ ᤐᤥᤖᤧᤖ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤖ ᤐᤣᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤥᤛᤣ᤺ᤴᤔᤧᤴᤎᤠᤰᤛᤡᤱᤅᤣ ᤌᤠᤖᤡᤰ ᤀᤣ᤺ᤰᤛᤠᤍᤧᤴᤏᤥᤀᤣ ᤘᤕᤧ॥