ᤗᤧᤒᤡ 27 - LIFOTNTᤔᤠᤱᤜᤧᤰ ᤏᤢ ᤌᤡᤒᤥᤱᤗᤰ ᤋᤥ᤺ᤶᤔᤠ ᤌᤡᤶᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤁᤢᤓᤠ ᤔᤏᤠ᤺ᤸᤗᤧ ᤔᤠᤱᤜᤧᤰ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤒᤠ ᤔᤏᤠᤴ ᤋᤥ᤺ᤴᤍᤢᤏᤧᤓᤃᤪ. ᤂᤧᤸᤗᤧ ᤕᤠᤖᤢᤒᤠ ᤁᤢᤔᤧᤸᤗᤢᤱ ᤁᤢᤀᤡᤛᤡᤰ 3 ᤏᤡᤒᤥᤱᤅᤠᤱᤎᤥ ᤋᤢᤰᤐᤥᤱ ᤋᤱᤒᤣ ᤌᤠᤖᤡᤰᤐᤠ ᤕᤧᤶᤒᤡᤳᤇᤠᤴ ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗ ᤁᤢᤀᤡᤛᤡᤰ ᤅᤠᤒᤥᤱ ᤕᤢᤵᤐᤠ ᤛᤣᤁᤣᤗ ᤁᤢᤔᤧᤸᤗᤢᤱ ᤜᤧᤶᤔᤠ ᤐᤡᤔᤠ॥ 4 ᤜᤧᤰᤁᤩᤠᤱ ᤔᤧᤴᤇᤢᤔᤠᤴ ᤛᤢᤶᤒᤥᤱ ᤕᤢᤵᤐᤠ ᤛᤣᤁᤣᤗ ᤁᤢᤔᤧᤸᤗᤢᤱ ᤜᤧᤶᤔᤠ ᤐᤡᤔᤠ॥ 5 ᤋᤱᤒᤣ ᤅᤠᤛᤡᤀᤠᤱᤎᤥ ᤏᤡᤒᤥᤱ ᤌᤠᤖᤡᤰᤐᤠ ᤕᤧᤶᤒᤡᤳᤇᤠᤴ ᤏᤡᤒᤥᤱ ᤛᤣᤁᤣᤗ ᤏᤢ ᤔᤧᤴᤇᤢᤔᤠᤴ ᤌᤡᤒᤥᤱ ᤛᤣᤁᤣᤗ ᤁᤢᤔᤧᤸᤗᤢᤱ ᤜᤧᤶᤔᤠ ᤐᤡᤔᤠ॥ 6 ᤗᤠ ᤌᤡᤰᤁᤠᤱᤎᤥ ᤋᤱᤒᤣ ᤅᤠᤛᤡ ᤌᤠᤖᤡᤰᤐᤠ ᤕᤧᤶᤒᤡᤳᤇᤠᤴ ᤅᤠᤛᤡ ᤕᤢᤵᤐᤠ ᤛᤣᤁᤣᤗ ᤏᤢ ᤔᤧᤴᤇᤢᤔᤠᤴ ᤛᤢᤶᤛᤡ ᤕᤢᤵᤐᤠ ᤛᤣᤁᤣᤗ ᤁᤢᤔᤧᤸᤗᤢᤱ ᤜᤧᤶᤔᤠ ᤐᤡᤔᤠ॥ 7 ᤋᤢᤰᤐᤥᤱ ᤋᤱᤒᤣᤀᤠᤱ ᤌᤥᤒᤠ ᤕᤧᤶᤒᤡᤳᤇᤠᤴ ᤌᤡᤒᤥᤱᤅᤠᤱ ᤅᤠᤛᤡ ᤕᤢᤵᤐᤠ ᤛᤣᤁᤣᤗ ᤏᤢ ᤔᤧᤴᤇᤢᤔᤠᤴ ᤌᤡᤒᤥᤱ ᤕᤢᤵᤐᤠ ᤛᤣᤁᤣᤗ ᤁᤢᤔᤧᤸᤗᤢᤱ ᤜᤧᤶᤔᤠ ᤐᤡᤔᤠ॥ 8 ᤁᤢᤔᤧᤸᤗᤢᤱ ᤜᤢᤱᤔᤠ ᤔᤧᤴᤇᤢᤰᤔᤏᤠᤒᤠ ᤁᤢᤓᤠ ᤕᤠᤱᤃᤧᤛᤠ᤹ᤒᤠ ᤘᤠ᤹ᤏᤧᤓᤃᤪ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤔᤧᤍᤠᤖᤢᤖ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧᤀᤣ ᤔᤠᤱᤜᤧᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤛᤢᤰᤋᤢᤒᤠ ᤕᤠᤖᤡᤰ ᤂᤢᤏᤧ᤹ ᤁᤢᤔᤧᤸᤗᤢᤱ ᤜᤧᤴᤍᤢ ᤐᤡᤖᤢᤖ॥ 9 “‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤋᤠ᤺ᤰᤋᤢᤒᤠ ᤌᤰᤛᤠ ᤘᤠ᤹ᤏᤧᤓᤃᤪ ᤛᤡᤍᤢᤱᤈᤓᤠ ᤌᤰᤛᤠᤴ ᤛᤣᤛᤣᤒᤠ ᤆᤥᤰ॥ 10 ᤂᤧᤸᤗᤧ ᤏᤢᤒᤠᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤀᤡᤃᤪ ᤋᤠᤵᤑᤧ᤺ᤶᤒᤠᤸᤗᤧ ᤁᤢᤗᤧᤰᤘᤠ ᤏᤢᤒᤠ ᤗᤧᤰᤔᤠ ᤔᤧᤏᤢ᤹ᤏᤧᤴ᤹॥ ᤂᤧᤸᤗᤧ ᤌᤰᤛᤠ᤺ᤸᤗᤧ ᤁᤢᤗᤧᤰᤘᤠ ᤌᤰᤛᤠᤀᤣ ᤗᤧᤰᤋᤢᤏᤧᤓᤃᤪ ᤗᤧᤰᤋᤢᤛᤡᤒᤠ ᤏᤧᤵᤔᤠᤱ ᤌᤰᤛᤠᤜᤠ᤹ ᤛᤣᤛᤣᤒᤠ ᤆᤥ᤺ᤰᤛᤡ᤹॥ 11 ᤂᤧᤴ ᤔᤠᤱᤜᤧᤰ ᤆᤥᤃᤢᤒᤠ ᤌᤰᤛᤠᤴ ᤋᤥ᤺ᤶᤔᤠ ᤔᤧᤴᤏᤢ᤹ᤔᤏᤠᤒᤠ ᤀᤠᤛᤢᤳᤌᤥ ᤌᤰᤛᤠᤏᤧᤓᤃᤪ ᤂᤢᤏᤧ᤹ ᤂᤧᤴ ᤌᤰᤛᤠᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤋᤠᤖᤢᤖ॥ 12 ᤏᤢᤒᤠ ᤆᤥ᤺ᤰᤛᤠᤱ ᤋᤠᤵᤑᤧ᤺ᤶᤒᤠ ᤆᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤔᤧᤸᤗᤢᤱ ᤜᤧᤴᤍᤢᤖ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤆᤩᤠ ᤁᤢᤔᤧᤸᤗᤢᤱ ᤜᤧᤴᤍᤢ᤹ ᤜᤠᤒᤠ ᤂᤧᤴ ᤁᤢᤀᤡᤛᤡᤰ ᤐᤥᤱ᤹॥ 13 ᤂᤧᤴ ᤔᤏᤠ᤺ᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤌᤰᤛᤠᤴ ᤌᤧ᤹ᤖᤢᤒᤠᤏᤧᤓᤃᤪ. ᤜᤧᤶᤔᤏᤠᤒᤠ ᤁᤢᤔᤧᤸᤗᤢᤱᤅᤥ ᤀᤠᤸᤗᤛᤠᤱ ᤅᤠᤛᤡᤗᤧᤱ ᤁᤢᤗᤰ ᤕᤥ᤹ᤖᤢᤀᤠᤱ ᤗ᤺ᤳᤋᤢᤖ ᤐᤥᤱ᤹॥ 14 “‘ᤁᤢᤓᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤂᤢᤏᤧ᤹ ᤁᤢᤜᤡᤶᤔᤡᤴ ᤋᤥ᤺ᤴᤍᤢᤏᤧᤓᤃᤪ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤏᤢᤒᤠ ᤆᤥ᤺ᤰᤐᤡ ᤋᤠᤵᤑᤧ᤺ᤶᤒᤠ ᤆᤥ᤺ᤰᤐᤡ ᤑᤠ᤹ᤀᤠᤱ ᤂᤧᤴ ᤀᤥᤔᤧᤳᤋᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤧᤸᤗᤢᤱ ᤜᤧᤴᤍᤢ ᤐᤡᤖᤢᤖ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤠᤰᤂᤩᤠᤖᤡᤰ ᤁᤢᤔᤧᤸᤗᤢᤱ ᤜᤧᤴᤍᤢ᤹ ᤂᤧᤸᤗᤧ ᤁᤢᤔᤧᤸᤗᤢᤱ ᤂᤧᤶᤓᤩᤠᤖᤡᤰᤁᤣ ᤐᤥᤱᤗ॥ 15 ᤁᤖ ᤁᤧᤍᤥ᤺ᤶᤒᤠᤸᤗᤧ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱ ᤂᤧᤴ ᤌᤧ᤹ᤔᤠ ᤏᤡᤱᤘᤠ᤹ ᤆᤥᤃᤢᤏᤧᤓᤃᤪ. ᤜᤧᤶᤔᤏᤠᤒᤠ ᤁᤢᤔᤧᤸᤗᤢᤱᤅᤥ ᤀᤠᤸᤗᤛᤠᤱ ᤅᤠᤛᤡᤗᤧᤱ ᤁᤢᤗᤰ ᤕᤥ᤹ᤖᤢᤀᤠᤱ ᤂᤧᤸᤗᤧ ᤗ᤺ᤳᤋᤢᤖ ᤐᤥᤱ᤹. ᤂᤧᤒᤩᤠᤱ ᤂᤧᤴ ᤜᤡᤶᤔᤡᤴ ᤜᤠᤒᤠ ᤂᤧᤴ ᤔᤏᤠ᤺ᤸᤗᤧᤴ ᤐᤥᤱ᤹॥ 16 “‘ᤁᤢᤓᤠ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤗᤠᤈᤣ᤹ ᤛᤡᤱᤒᤢᤱᤅᤡᤸᤗᤧ ᤁᤢᤓᤠ ᤁᤢᤗᤰᤁᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤠ ᤏᤡᤱᤘᤠ᤹ ᤆᤥᤃᤢᤏᤧᤓᤃᤪ ᤂᤧᤵᤔᤥ ᤁᤧᤗᤠ᤺ᤵᤐᤠ ᤕᤠ᤹ᤖᤡ᤺ᤶᤒᤠᤴ ᤆᤡᤈᤧᤵᤋᤢᤖ ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤸᤗᤧ ᤁᤢᤔᤧᤸᤗᤢᤱ ᤜᤧᤴᤍᤧᤶᤔᤧ᤹॥ ᤂᤧᤴ ᤁᤢᤀᤡᤛᤡᤰ ᤏᤡᤒᤥᤱ ᤁᤡᤗᤥ ᤜ᤺ᤰᤛᤡᤖᤧ ᤗᤠᤃᤡ ᤌᤡᤒᤥᤱ ᤁᤢᤀᤠᤳ ᤕᤢᤵᤐᤠ ᤁᤢᤔᤧᤸᤗᤢᤱ ᤔᤧᤜᤧᤴᤍᤢᤖ॥ 17 ᤛᤠᤶᤔᤩᤠᤱ ᤋᤱᤒᤣᤀᤠᤱᤎᤥ ᤂᤧᤸᤗᤧ ᤁᤢᤀᤡᤰᤋᤠᤵᤐᤡᤴ ᤋᤥ᤺ᤴᤍᤢᤒᤠᤏᤧᤓᤃᤪ ᤂᤧᤸᤗᤧ ᤁᤢᤔᤧᤸᤗᤢᤱᤅᤡᤴ ᤔᤧᤜᤧᤴᤍᤢᤒᤠ ᤁᤢᤀᤡᤛᤡᤰ ᤐᤥᤱᤗ॥ 18 ᤁᤖ ᤂᤧᤸᤗᤧ ᤁᤢᤀᤡᤰᤋᤠᤵᤐᤡᤴ ᤛᤠᤶᤔᤩᤠᤱ ᤋᤱᤒᤣ ᤀᤣᤃᤠᤱ ᤋᤥ᤺ᤴᤍᤢᤒᤠᤏᤧᤓᤃᤪ. ᤛᤠᤶᤔᤩᤠᤱ ᤋᤱᤒᤣ ᤋᤠᤔᤠ ᤀᤠᤰᤂᤩᤠᤖᤡᤰ ᤕᤠ᤺ᤰᤋᤧᤀᤠᤱ ᤘᤠ᤹ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤏᤡᤖᤢᤖ. ᤜᤧᤰᤁᤩᤠᤱ ᤔᤧᤜᤧᤴᤍᤢᤒᤠ ᤁᤢᤔᤧᤸᤗᤢᤱᤅᤡᤴ ᤂᤧᤴᤗᤠᤶᤒᤠ ᤕᤢᤶᤛᤢᤖ॥ 19 ᤂᤧᤴ ᤀᤡᤰᤋᤠᤵᤐᤡᤴ ᤁᤧᤍᤥ᤺ᤶᤒᤧᤸᤗᤧᤀᤣ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤋᤣ᤹ᤖᤢᤒᤠᤏᤧᤓᤃᤪ. ᤔᤧᤜᤧᤴᤍᤢᤒᤠ ᤁᤢᤔᤧᤸᤗᤢᤱᤅᤥ ᤀᤠᤸᤗᤛᤠᤱ ᤅᤠᤛᤡᤃᤣᤰᤐᤠ ᤁᤢᤗᤰ ᤕᤥ᤹ᤖᤢᤀᤠᤱ ᤗ᤺ᤳᤋᤢᤖ. ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ᤀᤡᤴᤏᤣ ᤐᤥᤱ᤹॥ 20 ᤁᤖ ᤂᤧᤸᤗᤧ ᤂᤧᤴ ᤀᤡᤰᤋᤠᤵᤐᤡᤴ ᤁᤢᤔᤧᤸᤗᤢᤱ ᤔᤧᤜᤢᤅᤢᤴᤏᤠᤱ ᤔᤧᤎᤧ᤹ᤖᤢᤴ ᤀᤡᤃᤪ ᤂᤧᤸᤗᤧ ᤘᤣ᤹ ᤔᤏᤠᤀᤥ ᤂᤧᤴ ᤀᤡᤰᤋᤠᤵᤐᤡᤴ ᤛᤱᤄᤢᤀᤠᤱ ᤏᤧᤏᤧᤓᤃᤪ. ᤂᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤀᤠᤓᤧᤸᤗᤧᤀᤠᤱ ᤌᤧ᤹ᤔᤠ ᤔᤧᤛᤢᤰᤋᤢᤴ᤹॥ 21 ᤂᤧᤴ ᤀᤡᤰᤋᤠᤵᤐᤡᤴ ᤛᤠᤶᤔᤩᤠᤱ ᤋᤱᤒᤣᤀᤥ ᤂᤠᤸᤛᤠ ᤗ᤺ᤴᤏᤡᤸᤗᤧ ᤛᤣᤛᤣᤒᤠ ᤐᤥᤱ᤹. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤖᤰ ᤋᤥ᤺ᤶᤔᤏᤠᤒᤠ ᤀᤡᤰᤋᤠᤵᤐᤡᤴ ᤛᤣᤛᤣᤒᤠ ᤐᤥᤱ᤹. ᤂᤧᤒᤩᤠᤱ ᤂᤧᤴ ᤀᤡᤰᤋᤠᤵ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧᤴ ᤐᤥᤱ᤹॥ 22 “‘ᤁᤢᤓᤠ ᤔᤏᤠ᤺ᤸᤗᤧ ᤂᤥᤔᤠ ᤕᤢᤰ ᤗᤠᤶᤒᤠ ᤂᤥᤛᤢᤒᤠ ᤔᤣ᤺ᤴ ᤁᤖ ᤀᤡᤅᤢᤒᤠ ᤀᤡᤰᤋᤠᤵᤐᤡᤴ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢᤏᤧᤓᤃᤪ. 23 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠᤶᤔᤩᤠᤱ ᤋᤱᤒᤣ ᤋᤠᤔᤠ ᤀᤠᤰᤂᤩᤠᤖᤡᤰ ᤘᤠ᤹ ᤂᤧᤴ ᤏᤡᤖᤢᤀᤠᤱ ᤀᤠᤰᤂᤩᤠᤖᤡᤰ ᤁᤢᤔᤧᤸᤗᤢᤱ ᤜᤧᤴᤍᤢ᤹ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣ ᤆᤥᤰ ᤁᤧᤗ᤹ᤒᤠ ᤏᤡ᤺ᤴᤎᤥ ᤆᤥᤃᤢᤀᤠᤱ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤜᤢᤅᤢᤖ॥ 24 ᤕᤠᤶᤔᤥ ᤁᤢᤛᤱ ᤐᤥᤱᤔᤠ ᤋᤱᤒᤣᤀᤥ ᤂᤧᤴ ᤀᤡᤰᤋᤠᤵᤐᤡᤴ ᤂᤢᤏᤧ᤹ ᤜᤠ᤺ᤳᤗᤥᤗᤠᤶ ᤀᤡᤅᤢᤀᤠᤱ ᤏᤧᤛ᤻ᤛᤧ. ᤀᤡᤃᤪ ᤜᤠ᤺ᤳᤗᤧ ᤁᤢᤕᤢᤰᤁᤥ ᤂᤧᤴ ᤏᤧᤛ᤻ᤛᤧ. ᤂᤧᤸᤗᤧᤀᤥᤀᤣ ᤂᤧᤴ ᤏᤢ᤺ᤰᤋᤢᤍᤣᤛᤢᤖ॥ 25 ᤜᤧᤶᤔᤏᤠᤒᤠ ᤁᤢᤔᤧᤸᤗᤢᤱᤅᤡᤴ ᤁᤧᤖᤧᤰ ᤛᤣᤛᤣᤍᤧᤴᤏᤥᤒᤠ ᤕᤢᤵᤐᤠ ᤛᤣᤁᤣᤗ ᤁᤢᤀᤡᤛᤡᤰ ᤐᤥᤱᤗ—ᤏᤡᤒᤥᤱ ᤃᤣᤖᤠᤴ ᤛᤣᤁᤣᤗ ᤌᤡᤰ ᤐᤥᤱ᤹॥ 26 “‘ᤌᤰᤛᤠᤜᤠ᤹ᤖᤧ ᤔᤧᤎᤠᤵᤋᤢᤛᤡᤒᤠ ᤌᤡᤰᤛᤡᤃᤣᤰᤐᤠ ᤌᤰᤛᤠ ᤛᤠ᤺ᤳᤜᤠ᤹. ᤛᤧᤃᤶᤒᤠ ᤀᤡᤃᤪ ᤔᤧᤸᤗᤢᤰᤁᤡᤸᤗᤧ ᤁᤢᤛ᤻ᤛᤠ ᤆᤩᤠ ᤐᤥᤱᤛᤠᤱ. ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧᤴᤏᤣ ᤔᤧᤒᤥᤱ᤹—ᤂᤧᤱᤜᤠ᤹ ᤆᤠᤀᤣ ᤔᤧᤍᤥ᤺ᤴᤍᤣᤶᤛᤡᤶᤔᤡᤴᤏᤧ᤹॥ 27 ᤂᤧᤴ ᤀᤠᤛᤢᤳᤌᤥ ᤌᤰᤛᤠ᤺ᤸᤗᤧ ᤁᤢᤛ᤻ᤛᤠᤏᤧᤓᤃᤪ. ᤜᤧᤶᤔᤏᤠᤒᤠ ᤁᤢᤔᤧᤸᤗᤢᤱᤅᤥ ᤀᤠᤸᤗᤛᤠᤱ ᤅᤠᤛᤡᤃᤣᤰᤐᤠ ᤁᤢᤗᤰ ᤕᤥ᤹ᤔᤠᤀᤠᤱ ᤂᤧᤴ ᤛᤧᤶᤔᤠ ᤐᤥᤱ᤹. ᤁᤖ ᤌᤧ᤹ᤔᤏᤠᤒᤠ ᤔᤣ᤺ᤴᤏᤧᤓᤃᤪ ᤜᤧᤶᤔᤏᤠᤒᤠ ᤁᤢᤔᤧᤸᤗᤢᤱᤅᤥ ᤂᤧᤴ ᤛᤱᤔᤠ ᤐᤥᤱ᤹॥ 28 “‘ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤖᤰ ᤋᤥ᤺ᤶᤔᤏᤠᤒᤠ ᤔᤏᤠ. ᤌᤰᤛᤠ ᤀᤡᤃᤪ ᤀᤠᤵᤑᤣᤰ ᤗᤠᤈᤣ᤹ ᤛᤡᤱᤒᤢᤱᤅᤡᤴ ᤛᤱᤔᤠ ᤛᤢᤰᤔᤧᤍᤧᤳᤏᤧᤴ ᤜᤧᤰᤁᤩᤠᤱ ᤛᤧᤶᤔᤠᤀᤠᤱ ᤛᤢᤰᤔᤧᤍᤧᤳᤏᤧᤴ॥ ᤛᤖᤰ ᤋᤥ᤺ᤶᤔᤏᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 29 “‘ᤔᤧᤰᤔᤠᤖᤧ ᤗᤠᤃᤡ ᤛᤖᤰ ᤋᤥ᤺ᤶᤔᤏᤠᤒᤠ ᤔᤏᤠᤴ. ᤂᤧᤴ ᤔᤧᤸᤗᤢᤱ ᤜᤢᤱᤔᤠᤀᤠᤱ ᤌᤧ᤹ᤔᤠ ᤔᤣ᤺ᤴ॥ ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ 30 “‘ᤛᤡᤱᤛᤣ᤹ᤜᤠ᤹ᤖᤧ ᤁᤢᤈᤠ᤹ᤜᤠ᤹ ᤀᤡᤃᤪ ᤀᤡᤰᤋᤠᤵᤐᤥᤒᤠ ᤕᤠ᤹ᤖᤡ᤺ᤶᤒᤠ ᤆᤩᤠᤛᤠᤱ. ᤀᤡᤰᤋᤠᤵᤐᤥ ᤁᤧᤍᤢᤶᤒᤠ ᤁᤢᤈᤠ᤺ᤸᤗᤧ ᤌᤡᤒᤥᤱᤗᤰᤁᤡᤴ ᤕᤜᤘᤣ ᤍᤠᤱᤒᤧᤸᤗᤧᤴᤏᤣ ᤐᤥᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤆᤥᤰ॥ 31 ᤁᤢᤓᤠ ᤔᤏᤠ᤺ᤸᤗᤧ ᤁᤢᤎᤡᤒᤥᤱ ᤗᤰᤁᤡᤴ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱ ᤌᤧ᤹ᤔᤠ ᤏᤡᤱᤘᤠ᤹ ᤆᤥᤃᤢᤏᤧᤓᤃᤪ. ᤂᤧᤵᤔᤥ ᤁᤢᤗᤰ ᤅᤠᤛᤡ ᤕᤥ᤹ᤖᤢᤀᤠᤱ ᤗ᤺ᤳᤋᤢᤖ ᤐᤥᤱ᤹॥ 32 ᤌᤰᤛᤠ ᤏᤡ᤺ᤵᤔᤠ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤡᤃᤠᤱ ᤁᤧᤗᤡ᤺ᤴᤇᤡᤱ ᤁᤧᤒᤣ᤺ᤰᤐᤠ ᤌᤰᤛᤠᤀᤥ. ᤐᤡᤳᤌᤰᤛᤠ. ᤔᤧᤸᤗᤢᤰ ᤔᤧ᤺ᤴᤍᤠ ᤆᤩᤠᤛᤠᤱ. ᤌᤡᤒᤥᤱᤗᤰᤁᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤐᤥᤱ᤹॥ 33 ᤏᤢᤒᤠ ᤀᤡᤃᤪ ᤋᤠᤵᤑᤧ᤺ᤶᤒᤠ ᤌᤰᤛᤠᤜᤠ᤹ ᤂᤧᤸᤗᤧ ᤔᤧᤛᤧᤴᤍᤢᤛᤡᤴᤗ ᤜᤧᤰᤁᤩᤠᤱ ᤔᤧᤗᤧᤰᤋᤢᤛᤡᤴᤗ॥ ᤗᤧᤰᤔᤠᤀᤣ ᤐᤥᤱᤏᤧᤓᤃᤪ. ᤗᤧᤰᤋᤢᤛᤡᤒᤠ ᤏᤧᤵᤔᤠᤱ ᤌᤰᤛᤠᤜᤠ᤹ ᤛᤣᤛᤣᤒᤠ ᤐᤥᤱᤛᤡ᤹. ᤂᤧᤒᤩᤠᤱ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱ ᤂᤧᤱᤜᤠ᤹ ᤌᤧ᤹ᤔᤠ ᤛᤢᤰᤔᤧᤴᤍᤧᤳᤏᤧᤴ॥’” 34 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤡᤏᤤ ᤁᤥ᤺ᤰᤔᤠᤀᤥ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.