ᤗᤧᤒᤡ 25 - LIFOTNTᤏᤢᤛᤡᤃᤣᤰᤐᤠ ᤋᤱᤒᤣ 1 ᤛᤡᤏᤤ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤧᤖᤡᤀᤠᤱ ᤗᤠᤈᤣ᤺ᤸᤗᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤛᤒᤠᤌ ᤏᤧᤳᤋᤢᤖ॥ 3 ᤋᤱᤒᤣ ᤋᤢᤰᤛᤡ ᤂᤡᤏᤡ᤹ ᤀᤡᤰᤋᤠᤵᤐᤥ ᤁᤢᤈᤠ ᤜᤣ᤹ᤖᤧᤶᤔᤧ᤹॥ ᤋᤱᤒᤣ ᤋᤢᤰᤛᤡ ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤛᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ᤜᤠ᤹ ᤑᤢᤰᤂᤧᤶᤔᤧ᤹॥ 4 ᤁᤖ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤗᤠᤈᤣ᤺ᤸᤗᤧ ᤗᤠᤃᤡ ᤏᤠ᤺ᤶᤛᤡᤱᤔᤠ ᤛᤒᤠᤌ ᤐᤥᤱᤗ—ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤛᤒᤠᤌ ᤐᤥᤱᤗ॥ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤂᤡᤏᤡ᤹ ᤐᤩᤠᤱᤛᤡᤀᤥ ᤁᤢᤈᤠ ᤔᤧᤗᤣ᤺ᤳᤋᤧᤶᤔᤡᤴᤏᤧ᤹. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤔᤧᤛᤠ᤺ᤰᤋᤧᤶᤔᤧ᤹. 5 ᤂᤡᤏᤡ᤹ ᤁᤧᤍᤢᤶᤒᤠ ᤁᤢᤈᤠᤀᤥ ᤀᤠᤵᤑᤣᤰ ᤁᤧᤗᤡᤱᤒᤠ ᤁᤢᤈᤠᤴ ᤔᤧᤜᤧᤃᤧᤶᤔᤡᤴᤏᤧ᤹. ᤔᤧᤴᤇᤠ᤺ᤰᤁᤣ ᤁᤧᤕᤢᤱᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤈᤠ᤹ᤜᤠ᤹ ᤔᤧᤛᤢᤵᤛᤧᤶᤔᤡᤴᤏᤧ᤹॥ ᤗᤠᤈᤣ᤺ᤸᤗᤧ ᤗᤠᤃᤡ ᤋᤱᤒᤣ ᤌᤡᤰ ᤂᤧᤴ ᤁᤢᤏᤠ᤺ᤶᤛᤡᤱᤔᤠ ᤐᤥᤱᤗ॥ 6 ᤂᤧᤴ ᤗᤠᤈᤣ᤺ᤸᤗᤧ ᤁᤢᤏᤠ᤺ᤶᤛᤡᤱᤔᤠ ᤋᤱᤒᤣᤀᤥ ᤁᤧᤎᤥ᤺ᤰᤐᤠ ᤁᤢᤈᤠ᤺ᤴᤏᤣ ᤂᤡᤏᤡ᤹ ᤗᤠᤃᤡ. ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ. ᤛᤧᤘᤠᤖᤥᤒᤠ ᤛᤣᤘᤠᤖᤥᤔᤠ. ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹. 7 ᤂᤡᤏᤡ᤹ ᤌᤰᤛᤠᤜᤠ᤹. ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤗᤠᤃᤡ ᤆᤠᤔᤠ ᤁᤢᤈᤠ ᤐᤥᤱ᤹॥ ᤂᤧᤴ ᤋᤱᤒᤣᤀᤥ ᤗᤠᤈᤣ᤹ᤒᤠ ᤁᤧᤖᤧᤰ ᤁᤧᤎᤥ᤺ᤰᤐᤠ ᤁᤢᤈᤠᤴ ᤁᤧᤈᤠᤶᤛᤠᤱ ᤏᤢ᤹ᤖᤥ॥ ᤛᤠᤶᤔᤩᤠᤱ ᤋᤱᤒᤣ 8 “‘ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤢᤛᤡ ᤛᤒᤠᤌᤒᤠ ᤋᤱᤒᤣᤜᤠ᤹ ᤏᤢᤛᤡᤗᤧᤱ ᤏᤡᤖᤧᤶᤔᤧ᤹. ᤂᤧᤴ ᤁᤧᤖᤧᤰᤗᤧ ᤗᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤐᤥᤱ᤹॥ 9 ᤜᤧᤰᤁᤩᤠᤱ ᤏᤢᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱ ᤕᤧᤴᤏᤥ ᤛᤠ᤹ᤖᤡᤰ ᤗᤠᤃᤧᤀᤡᤰᤐᤠ ᤛᤠᤍᤠᤱᤅᤡᤴ ᤔᤢ᤺ᤵᤔᤠ ᤐᤠᤱᤄᤠᤶᤛᤡᤶᤔᤧ᤹॥ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤧᤴᤏᤥ ᤂᤡᤏᤡ᤹ ᤗᤠᤈᤣ᤹ ᤁᤧᤖᤧᤰ ᤂᤧᤴ ᤛᤠᤍᤠᤱᤅᤡᤴ ᤔᤢ᤺ᤵᤔᤠ ᤐᤠᤱᤄᤠᤶᤛᤡᤶᤔᤧ᤹॥ 10 ᤅᤠᤒᤥᤱᤒᤠ ᤋᤱᤒᤣᤴ ᤂᤡᤏᤡ᤹ ᤛᤣᤛᤣᤒᤠ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤗᤠᤈᤣ᤹ ᤁᤧᤖᤧᤰᤐᤠ ᤕᤰᤕᤢᤱᤒᤠᤜᤠ᤹ᤖᤧ ᤗᤠᤃᤡ ᤆᤥ᤺ᤰᤕᤢᤶᤓᤥ ᤀᤢᤘᤠ ᤆᤥᤃᤧᤶᤔᤧ᤹॥ ᤂᤧᤴ ᤂᤡᤏᤡ᤹ ᤗᤠᤃᤡ ᤛᤠᤶᤔᤩᤠᤱ ᤋᤱᤒᤣ ᤐᤥᤱ᤹. ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤛᤡᤱᤒᤢᤱ ᤏᤢ ᤜᤡᤶᤛᤕᤱᤜᤠ᤹ᤀᤥ ᤔᤧᤏᤢ᤺ᤱᤗ॥ 11 ᤂᤧᤴ ᤅᤠᤒᤥᤱ ᤋᤱᤒᤣᤴ ᤂᤡᤏᤡ᤹ ᤗᤠᤃᤡ ᤛᤠᤶᤔᤩᤠᤱ ᤋᤱᤒᤣ ᤐᤥᤱ᤹॥ ᤂᤧᤴ ᤋᤱᤒᤣᤀᤥ ᤂᤡᤏᤡ᤹ ᤌᤧᤔᤠᤀᤠᤱ ᤔᤧᤗᤣ᤺ᤳᤋᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤠᤵᤑᤣᤰ ᤁᤧᤗᤡᤱᤒᤠ ᤁᤢᤈᤠᤜᤠ᤹ ᤔᤧᤜᤧᤃᤧᤶᤔᤡᤴᤏᤧ᤹. ᤔᤧᤴᤇᤠ᤺ᤰᤁᤣᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤀᤡᤘᤠ᤺ᤳᤜᤠ᤹ᤗᤠᤶ ᤆᤧᤸᤗᤧᤰᤛᤣ᤹ᤜᤠ᤹ ᤔᤧᤍᤢᤒᤧᤶᤔᤡᤴᤏᤧ᤹॥ 12 ᤌᤣᤀᤠᤱᤓᤧᤸᤗᤧ ᤁᤱᤃ ᤛᤠᤶᤔᤩᤠᤱ ᤋᤱᤒᤣᤖᤥ॥ ᤂᤧᤴ ᤂᤡᤏᤡ᤹ ᤗᤠᤃᤡ ᤛᤣᤛᤣ ᤐᤥᤱᤗ॥ ᤐᤩᤠᤱᤛᤡᤀᤥ ᤀᤠᤵᤑᤣᤰ ᤁᤧᤗᤡᤱᤒᤠ ᤁᤢᤈᤠᤜᤠ᤹ ᤂᤧᤴ ᤋᤱᤒᤣᤀᤥ ᤂᤡᤏᤡ᤹ ᤁᤧᤈᤠᤶ᤹॥ 13 “‘ᤂᤧᤴ ᤛᤠᤶᤔᤩᤠᤱ ᤋᤱᤒᤣᤀᤥ ᤁᤧᤖᤧᤰ ᤔᤏᤠᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤏᤢ᤺ᤱᤗ॥ 14 “‘ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤴᤏᤢ ᤗᤠᤈᤣ᤹ᤛᤡᤱᤒᤢᤱ ᤛᤱᤔᤠ ᤀᤡᤱᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤡᤸᤗᤧ ᤌᤡᤰᤗᤧ ᤘᤣ᤹ᤀᤡᤴ ᤔᤧᤴᤘᤠ᤹ᤔᤏᤠᤒᤠ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹॥ 15 ᤛᤠᤶᤔᤩᤠᤱ ᤋᤱᤒᤣ ᤀᤣᤃᤠᤱ ᤕᤠᤱᤛᤡᤒᤠ ᤋᤱᤒᤣᤜᤠ᤹ ᤏᤡᤖᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤶᤒᤣᤛᤠᤱᤒᤠᤴᤏᤢ ᤗᤠᤈᤣ᤹ᤛᤡᤱᤒᤢᤱ ᤀᤡᤅᤧᤶᤔᤧ᤹. ᤂᤧᤒᤩᤠᤱ ᤋᤠ᤺ᤴᤍᤡ ᤁᤧᤍᤠᤒᤠ ᤛᤠᤶᤔᤩᤠᤱ ᤋᤱᤒᤣ ᤌᤠᤖᤡᤰᤗᤧ ᤗᤠᤈᤣ᤹ᤀᤥ ᤁᤧᤎᤥ᤺ᤰᤐᤠ ᤁᤢᤈᤠᤴ ᤛᤡ᤺ᤰᤋᤢᤖ ᤁᤢᤔᤧᤴ ᤜᤧᤴᤍᤢᤀᤠᤱ ᤂᤢᤏᤧ᤹ ᤂᤡᤏᤡ᤹ᤀᤥ ᤛᤱᤄᤢᤖ॥ 16 ᤁᤢᤈᤠ ᤌᤥ᤺ᤰᤔᤠ ᤀᤠᤸᤗᤛᤠᤱ ᤕᤖᤡᤰ ᤋᤱᤒᤣ ᤘᤠ᤹ᤏᤧᤓᤃᤪ. ᤜᤧᤶᤓᤩᤠᤖᤡᤰᤁᤣ ᤕᤖᤡᤰ ᤁᤢᤔᤧᤴ ᤑᤥᤛᤧᤶᤔᤧ᤹. ᤜᤧᤰᤁᤩᤠᤱ ᤛᤢ᤺ᤸᤗᤡᤰ ᤋᤱᤒᤣᤖᤰ ᤕᤠ᤺ᤰᤋᤧᤀᤠᤱ ᤘᤠ᤹ᤏᤧᤓᤃᤪ ᤂᤧᤶᤔᤩᤠᤰᤁᤣ ᤂᤡᤏᤡ᤹ ᤁᤢᤔᤧᤴᤏᤡᤴ ᤛᤢ᤺ᤸᤗᤡᤰ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤱᤒᤣᤜᤠ᤹ᤀᤥ ᤁᤧᤎᤥ᤺ᤰᤐᤠ ᤁᤢᤈᤠᤜᤠ᤹ᤀᤣ ᤂᤡᤏᤡ᤹ᤀᤥ ᤛᤱᤄᤢᤒᤠᤖᤥ॥ 17 ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤴᤏᤢ ᤗᤠᤈᤣ᤹ᤛᤡᤱᤒᤢᤱ ᤛᤱᤔᤠ ᤀᤡᤱᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤡᤸᤗᤧ ᤌᤡᤰᤗᤧ ᤘᤣ᤹ᤀᤡᤴ ᤔᤧᤴᤘᤠ᤹ᤔᤏᤠᤒᤠ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤂᤡᤏᤡ᤹ ᤁᤡᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤁᤧᤛᤠᤰᤐᤠ ᤕᤠ᤺ᤶᤒᤰ 18 “‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤎᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤁᤧᤳᤋᤧᤶᤔᤧ᤹॥ ᤂᤧᤒᤩᤠᤱ ᤂᤡᤏᤡ᤹ ᤂᤧᤴ ᤗᤠᤈᤣ᤹ᤀᤥ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤒᤥ᤺ᤰᤂᤡ᤹॥ 19 ᤗᤠᤈᤣ᤺ᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤑᤳᤇᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤂᤡᤏᤡ᤹ ᤋᤢᤰᤂᤣ ᤁᤧᤴᤈᤩᤧ᤹ᤀᤡᤴ. ᤂᤧᤶᤒᤩᤠᤱ ᤗᤠᤈᤣᤀᤥ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤕᤢᤱᤔᤠ ᤁᤧᤄᤥᤛᤡ᤹॥ 20 “ᤁᤢᤈᤠ ᤔᤧᤴᤜᤣ᤹ᤀᤣ. ᤁᤢᤈᤠ ᤔᤧᤴᤇᤢᤶᤔᤣ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤀᤠᤏᤡᤃᤣ ᤌᤧᤔᤠ᤺ᤴ ᤆᤠᤶᤒᤧᤒᤣ᥅” ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤏᤧᤓᤃᤪ. 21 ᤋᤢᤰᤛᤡᤃᤣᤰᤐᤠ ᤋᤱᤒᤣᤀᤥ ᤀᤠᤱᤃᤠ᤹ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤡᤱ᤹. ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤋᤱᤒᤣ ᤛᤢᤶᤛᤡᤒᤠ ᤐᤥᤃᤢᤃᤧᤴ ᤁᤢᤈᤠ ᤌᤥᤰ॥ 22 ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤁᤢᤈᤠ ᤁᤧᤗᤣ᤺ᤳᤋᤢᤶᤔᤡᤸᤗᤧ. ᤋᤃᤡ ᤁᤧᤎᤥ᤺ᤰᤐᤠ ᤁᤢᤈᤠᤴ ᤆᤧᤶᤔᤧ᤹ᤖ ᤘᤕᤧᤶᤔᤧ᤹॥ ᤑᤠᤱᤛᤡᤃᤣᤰᤐᤠ ᤋᤱᤒᤣᤀᤥ ᤁᤢᤈᤠ ᤔᤧᤴᤍᤢᤶᤔᤣ ᤌᤠᤖᤡᤰ ᤂᤡᤏᤡ᤹ ᤂᤧᤴ ᤋᤃᤡᤒᤠ ᤁᤢᤈᤠ᤺ᤴᤏᤣ ᤆᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥ ᤕᤠᤱᤛᤠᤁᤢᤴᤎᤣ ᤏᤢ᤺ᤰᤔᤠ ᤌᤡᤶ 23 “‘ᤗᤠᤈᤣᤴ ᤛᤍᤠᤍᤡᤱᤗᤧ ᤗᤠᤃᤡ ᤛᤡ᤹ᤕᤠᤰ ᤔᤧᤛᤱᤄᤧᤶ ᤔᤧᤍᤣᤛᤧᤶᤔᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤗᤠᤈᤣ᤺ᤱᤃ ᤀᤠᤱᤃᤠ᤹ᤀᤡᤴᤗᤥ॥ ᤂᤡᤏᤡ᤹ᤃ ᤘᤣ᤹ ᤗᤠᤈᤣ᤹ᤒᤠ ᤏᤢ ᤘᤧᤵᤔᤡᤒᤠ ᤁᤧᤒᤥ᤺ᤰᤂᤡᤀᤠᤱ ᤀᤠᤱᤃᤠ᤹ᤏᤢ ᤁᤧᤕᤢᤅᤡᤖ ᤁᤧᤘᤕᤡ᤹॥ 24 ᤂᤡᤏᤡ᤹ ᤕᤢᤰᤁᤥ ᤁᤧᤍᤠᤒᤠ ᤗᤠᤈᤣᤴ ᤁᤢᤴᤍᤠᤱᤒᤧᤸᤗᤧ ᤕᤠᤶᤔᤥ ᤌᤧ᤹ᤔᤠ ᤂᤥᤛᤢᤖ ᤕᤠ᤺ᤴᤍᤧᤶᤔᤧ᤹॥ 25 “‘ᤕᤠᤱᤛᤠ᤹ᤔᤠᤖᤧ ᤆᤥᤃᤢᤸᤗᤧ ᤜᤡᤶᤒᤣᤛᤠᤱᤒᤠᤜᤠ᤹ᤀᤥ ᤁᤢᤓᤠᤖᤧ ᤀᤠᤒᤠᤅᤣ ᤁᤢᤗᤠᤈᤣ᤹ ᤛᤡᤱᤒᤢᤱᤅᤥᤒᤠ ᤁᤢᤓᤠ ᤁᤢᤗᤰ ᤛᤱᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤏᤧᤓᤃᤪ. ᤂᤧᤸᤗᤧ ᤁᤢᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡᤴ ᤋᤠᤀᤠᤱ ᤂᤧᤴ ᤌᤧ᤹ᤖᤢᤖ॥ 26 ᤁᤖ ᤁᤢᤓᤠᤖᤧ ᤁᤶᤓᤗ᤹ᤖᤡᤰ ᤁᤧᤎᤧ᤹ᤒᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤜᤥᤵ ᤜᤧᤰᤁᤩᤠᤱ ᤂᤧᤴ ᤋᤠ᤺ᤴᤍᤡ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱᤅᤠᤱ ᤌᤧ᤹ᤔᤠ ᤁᤧᤛᤢᤰᤐᤠ ᤐᤥᤱᤏᤧᤓᤃᤪ. 27 ᤂᤢᤏᤧ᤹ ᤂᤧᤴ ᤗᤠᤈᤣᤴ ᤛᤱᤄᤢᤒᤠ ᤋᤱᤒᤣᤜᤠ᤹ ᤏᤡᤖᤢᤖ. ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤀᤥ ᤛᤱᤄᤢᤀᤠᤱ ᤘᤕᤧ ᤂᤧᤴ ᤋᤠᤔᤠ ᤁᤧᤘᤠ᤹ᤒᤠ ᤋᤱᤒᤣᤜᤠ᤹ᤀᤥ ᤁᤧᤎᤥ᤺ᤰᤐᤠ ᤁᤢᤈᤠ᤺ᤸᤗᤧ ᤁᤢᤔᤧᤸᤗᤢᤱᤅᤡᤴ ᤏᤢ᤺ᤰᤋᤢ ᤐᤡᤖᤢᤖ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤏᤢ᤺ᤱᤗ॥ 28 ᤁᤖ ᤂᤢᤏᤧ᤹ ᤀᤠᤵᤑᤣᤰ ᤌᤧ᤹ᤔᤠ ᤔᤧᤛᤢᤰᤋᤢᤴᤏᤧᤓᤃᤪ ᤛᤠᤶᤔᤩᤠᤱ ᤋᤱᤒᤣ ᤌᤠᤖᤡᤰ ᤂᤧᤴ ᤗᤠᤈᤣ᤹ ᤁᤧᤀᤡᤱᤒᤧᤸᤗᤧ ᤁᤢᤜᤢᤰᤁᤥᤀᤣ ᤏᤧᤖ॥ ᤂᤧᤒᤩᤠᤱ ᤛᤠᤶᤔᤩᤠᤱ ᤋᤱᤒᤣᤀᤥ ᤂᤧᤴ ᤏᤢ᤺ᤰᤋᤢᤖ॥ ᤂᤧᤴ ᤀᤣᤃᤠᤱ ᤂᤧᤴ ᤔᤏᤠᤴ ᤀᤠᤵᤑᤣᤰ ᤁᤢᤗᤠᤈᤣ᤹ ᤛᤡᤱᤒᤢᤱᤅᤥ ᤐᤣ᤺ᤰᤔᤠ ᤛᤢᤰ॥ 29 “‘ᤁᤢᤓᤠᤖᤧ ᤗᤢᤱᤎᤠᤰ ᤁᤒᤪᤡᤱ ᤛᤧᤵᤔᤏᤠᤒᤠ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤁᤢᤜᤡᤶᤔᤡᤴ ᤛᤱᤄᤢᤏᤧᤓᤃᤪ. ᤛᤱᤄᤢᤒᤠ ᤋᤱᤒᤣ ᤌᤡᤰᤗᤧᤛᤠ ᤂᤢᤏᤧ᤹ ᤂᤧᤴ ᤌᤧ᤹ᤔᤠ ᤂᤥᤛᤢ᤹॥ ᤂᤧᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤕᤢᤰ ᤋᤱᤒᤣᤎᤡᤰ ᤌᤠᤖᤡᤰ ᤂᤥᤛᤢ᤹॥ 30 ᤁᤖ ᤋᤱᤒᤣᤎᤡᤰᤗᤧ ᤂᤧᤴ ᤌᤧ᤹ᤔᤠ ᤔᤧᤛᤢᤰᤋᤢᤴᤏᤧᤓᤃᤪ ᤁᤧᤀᤡᤱᤒᤠᤴ ᤏᤢ ᤂᤢᤏᤧ᤹ ᤕᤠᤱᤛᤡᤒᤠ ᤁᤢᤛ᤻ᤛᤠ ᤁᤢᤀᤣᤜᤠ᤹ᤖᤧ ᤗᤠᤃᤡ ᤂᤧᤴ ᤜᤡᤶᤔᤡᤴ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤕᤠᤱᤛᤠᤁᤢᤴᤎᤣ ᤐᤥᤱᤗ॥ ᤛᤠᤶᤔᤩᤠᤱ ᤋᤱᤒᤣᤀᤥᤀᤠᤱ ᤂᤧᤴ ᤔᤧᤏᤢ᤺ᤱᤏᤧᤴ॥ 31 ᤁᤖ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤔᤧᤱᤃᤵᤐᤣᤒᤠ ᤐᤠᤱᤓᤣ᤹ᤜᤠ᤹ᤀᤥᤒᤠ ᤜᤡᤶᤔᤡᤴ ᤗᤠᤈᤣ᤹ᤀᤥᤒᤠ ᤘᤣ᤹ ᤗᤠᤈᤣ᤹ᤛᤡᤱᤒᤢᤱ ᤜᤧᤰᤋᤱᤒᤠ ᤀᤡ᤺ᤳᤋᤧᤶᤔᤧ᤹॥ ᤂᤧᤱᤜᤠ᤹ᤃ ᤌᤧ᤹ᤔᤠ ᤛᤢᤰᤋᤧᤳ. ᤜᤧᤰᤁᤩᤠᤱ ᤛᤠᤶᤔᤩᤠᤱ ᤋᤱᤒᤣᤀᤥ ᤂᤧᤴ ᤏᤢ᤺ᤰᤔᤠ ᤛᤢᤰᤋᤧᤳ॥ 32 “‘ᤗᤧᤒᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥᤒᤠ ᤀᤠᤒᤠᤅᤣ ᤕᤧᤰᤕᤰᤜᤠ᤹ᤀᤥ ᤁᤧᤏᤧᤒᤠ ᤜᤡᤶᤜᤠ᤹ ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤛᤠᤱ ᤌᤧ᤹ᤔᤠ ᤔᤧᤛᤢᤰᤋᤢ᤹॥ 33 ᤗᤧᤒᤡ ᤌᤠ᤺ᤰᤁᤥᤒᤠ ᤕᤢᤰᤁᤥ ᤁᤧᤏᤧᤒᤠ ᤕᤧᤰᤕᤰᤜᤠ᤹ᤀᤥ ᤁᤢᤓᤠ ᤗᤧᤒᤡ᤺ᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤛᤱᤄᤢᤒᤠ ᤜᤡᤶᤔᤡᤴ ᤏᤢ᤺ᤰᤔᤠ ᤔᤧᤛᤢᤰᤋᤢᤴᤏᤧᤓᤃᤪ ᤛᤠᤶᤔᤩᤠᤱ ᤋᤱᤒᤣᤀᤥ ᤂᤧᤴ ᤜᤡᤶᤔᤡᤴ ᤂᤢᤏᤧ᤹ ᤔᤧᤏᤢ᤺ᤰᤋᤢ ᤔᤧᤒᤡᤖᤢᤖ. ᤌᤣᤀᤠᤱᤓᤧᤸᤗᤧ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤁᤧᤏᤧᤒᤠ ᤜᤡᤶᤜᤠ᤹ᤃ ᤀᤡᤛᤪᤠᤀᤡᤗᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤗᤠᤶᤒᤠᤒᤠ ᤕᤠᤱᤛᤠ ᤁᤢᤴᤎᤣᤖᤥ॥ 34 ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤗᤠᤁᤠᤳᤐᤠ ᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤛᤱᤔᤠᤍᤣᤔᤠ ᤔᤧᤱᤄᤥᤛᤢᤴ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤍᤠᤍᤡᤱᤒᤠ ᤕᤠᤱᤛᤠ ᤁᤢᤴᤎᤣᤖᤥ॥ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤗᤠᤃᤡ ᤛᤡᤱᤏᤠᤳ 35 “‘ᤂᤡᤏᤡ᤹ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤁᤢᤓᤠ᤹ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤠ ᤐᤥᤱᤅᤠᤱ ᤀᤠᤒᤠᤅᤣ ᤁᤶᤒᤪᤠᤱ ᤔᤧᤳᤇᤡᤱᤔᤠ ᤔᤧᤛᤢᤰᤏᤧᤴᤏᤧᤓᤃᤪ. ᤂᤡᤏᤡ᤹ᤀᤣ ᤘᤣ᤹ ᤗᤠᤈᤣ᤹ᤒᤠ ᤋᤖᤣᤒᤧᤴ ᤁᤶᤒᤪᤠᤱ ᤁᤧᤔᤧᤳᤋᤢᤶᤒᤠ ᤁᤢᤀᤡᤛᤡᤰ ᤂᤧᤴ ᤑᤠ᤹ᤖᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ᤏᤢ ᤕᤢᤱᤔᤠ ᤘᤠ᤹ᤔᤠ ᤂᤥᤛᤢᤖ॥ 36 ᤂᤧᤴ ᤛᤡᤱᤏᤠᤳ ᤁᤧᤒᤡᤖᤢᤶᤔᤡᤸᤗᤧ ᤀᤡᤴᤎᤠ ᤀᤡᤃᤪ ᤕᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤈᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤔᤧᤕᤢᤱ ᤔᤧᤘᤠ᤹ᤖ॥ 37 ᤁᤢᤛ᤻ᤛᤠ ᤆᤠᤔᤠᤖᤧ ᤗᤠᤃᤡ ᤂᤡᤏᤡ᤹ ᤂᤧᤴ ᤕᤠᤱ ᤔᤧᤒᤡᤖᤠᤶᤔᤡᤴᤏᤧ᤹॥ ᤂᤡᤏᤡ᤹ ᤁᤧᤒᤡᤖᤢᤶᤒᤠ ᤆᤠᤔᤠ ᤁᤢᤈᤠ᤺ᤴᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ᤗᤠᤶ ᤔᤧᤍᤠ᤺ᤰᤋᤧᤶᤔᤡᤴᤏᤧ᤹॥ 38 ᤁᤏᤠᤏ ᤗᤠᤈᤣᤴ ᤂᤡᤏᤡ᤹ ᤐᤡᤔᤠᤖᤧ ᤗᤠᤃᤡ ᤏᤢ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤧᤖᤥ॥ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤰᤕᤢᤶᤓᤥ 39 “‘ᤂᤡᤏᤡ᤹ ᤁᤢᤓᤠ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ᤜᤠ᤹ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤂᤡᤏᤡ᤹ ᤜᤢᤰᤁᤥ ᤔᤧᤛᤱᤛᤡᤱᤏᤧᤓᤃᤪ ᤂᤧᤱᤜᤠ᤹ ᤕᤥᤰ ᤁᤢᤀᤡᤛᤡᤰ ᤂᤧᤴ ᤕᤠ᤺ᤶᤒᤰᤁᤥ ᤔᤧᤓᤳᤇᤧᤶᤛᤡᤶᤔᤧᤴᤏᤧ᤹॥ 40 ᤂᤧᤴ ᤂᤡᤏᤡ᤹ᤏᤢ ᤏᤠᤶᤕᤠᤰ ᤂᤥᤔᤠᤖᤧ ᤗᤠᤃᤡ ᤀᤡᤃᤪ ᤘᤣ᤹ ᤗᤠᤈᤣ᤹ᤒᤠ ᤋᤖᤣᤒᤠ ᤁᤢᤀᤡᤛᤡᤰ ᤐᤥᤱᤅᤠᤱ ᤕᤢᤱᤗ. ᤜᤧᤰᤁᤩᤠᤱ ᤛᤠᤶᤔᤩᤠᤱ ᤋᤱᤒᤣ ᤌᤠᤖᤡᤰ ᤂᤡᤏᤡ᤹ᤏᤢ ᤘᤠ᤹ᤀᤠᤱ ᤂᤧᤸᤗᤧ ᤂᤡᤏᤡ᤹ ᤕᤠ᤺ᤶᤒᤰ ᤆᤥᤃᤢ ᤁᤧᤒᤡᤖᤡᤖ॥ 41 ᤂᤧᤴ ᤀᤣᤃᤠᤱ ᤂᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤂᤡᤏᤡ᤹ᤏᤢ ᤔᤧᤛᤧᤴᤏᤠᤱ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤀᤥ ᤏᤢ ᤕᤠᤱᤛᤠᤁᤢᤴᤎᤣᤀᤥ ᤔᤧᤏᤢ᤺ᤱᤗ॥ 42 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤒᤠ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤠᤛᤧᤖᤥᤔᤠᤛᤡᤖᤥ॥ ᤂᤧᤱᤜᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤜᤧᤰᤁᤣ ᤂᤧᤱᤜᤠ᤹ ᤛᤱᤔᤠᤛᤡ ᤔᤧᤏᤢ᤹ᤏᤧᤴ॥ 43 ᤂᤡᤏᤡ᤹ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹॥ 44 “‘ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤆᤠᤜᤠ ᤁᤧᤈᤥᤃᤡᤏᤧᤓᤃᤪ ᤂᤡᤏᤡ᤹ ᤁᤒᤪᤡᤱ ᤐᤡᤛᤠᤱᤒᤠ ᤛᤢᤘᤠᤱᤜᤠ᤹ᤀᤥᤗᤠᤶ ᤀᤡᤅᤧᤶ ᤋᤠᤖᤧᤶᤛᤧ᤹॥ 45 ᤂᤡᤏᤡ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤏᤢ ᤂᤡᤏᤡ᤹ ᤗᤠᤈᤣ᤹ᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤀᤣᤜᤠ᤹ᤀᤠᤱ ᤂᤡᤏᤡ᤹ ᤀᤡᤱᤔᤠᤛᤡᤀᤠᤱ ᤀᤠᤵᤑᤣᤰ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤛᤡᤶ᤹॥ 46 ᤂᤧᤴ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤗᤰᤂᤥᤔᤠ ᤁᤢᤀᤡᤛᤡᤰ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤔᤠ ᤁᤧᤛᤢᤰᤋᤢᤶᤛᤡᤶ᤹॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤜᤡᤱ ᤂᤡᤏᤡ᤹ ᤛᤠᤜᤠ᤹ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤒᤡᤖᤢᤛᤡᤖ. ᤁᤖ ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠᤛᤡᤀᤠᤱ ᤕᤢᤰᤁᤥ ᤁᤵᤔᤠᤛᤡ ᤔᤣ᤺ᤴ॥ 47 “‘ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠᤀᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥᤱᤒᤠ ᤘᤣ᤹ ᤗᤠᤈᤣᤒᤠ ᤀᤡᤃᤪ ᤘᤧᤵᤔᤡᤒᤠᤸᤗᤧ ᤁᤡᤃᤪ ᤂᤧᤸᤗᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤜᤢᤰᤁᤥ ᤂᤡᤏᤡ᤹ ᤁᤢᤓᤠ ᤕᤠᤱᤃᤧᤛᤠ᤹ᤒᤠ ᤑᤢ᤹ᤏᤢᤛᤠ᤹ᤀᤡᤴ ᤀᤠᤒᤠᤅᤣ ᤛᤱᤛᤡᤱᤅᤠᤱ ᤘᤠ᤹ᤏᤧᤓᤃᤪ. 48 ᤂᤧᤴ ᤁᤧᤛᤱᤛᤡᤱᤒᤠᤴ ᤌᤧ᤹ᤔᤠ ᤛᤢᤰᤋᤧᤳ॥ ᤂᤢᤏᤧ᤹ᤀᤣ ᤁᤢᤴᤛᤠ᤹ ᤁᤢᤃᤠ᤹ᤀᤡᤜᤠ᤹ᤀᤥᤒᤠ ᤁᤢᤓᤠᤖᤧ ᤂᤧᤴ ᤌᤧ᤹ᤔᤠ ᤔᤧᤛᤢᤰᤋᤢ᤹॥ 49 ᤂᤧᤸᤗᤧᤀᤣ ᤁᤢᤶᤓᤅᤠ. ᤁᤢᤶᤓᤢ᤹ ᤁᤢᤴᤛᤠ᤹. ᤀᤡᤃᤪ ᤁᤢᤓᤠ ᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡ ᤁᤧᤎᤠᤵᤐᤠ ᤁᤢᤓᤠᤖᤧ ᤂᤧᤴ ᤌᤧ᤹ᤖᤢᤖ॥ ᤔᤣ᤺ᤴᤇᤠᤱ ᤂᤧᤸᤗᤧ ᤋᤠ᤺ᤴᤍᤡ ᤛᤢᤰᤋᤢᤏᤧᤓᤃᤪ ᤂᤢᤏᤧ᤹ ᤀᤠᤵᤑᤣᤰ ᤌᤧ᤹ᤛᤡᤱᤗ॥ 50 ᤂᤧᤴ ᤔᤏᤠᤴ ᤁᤢᤴᤍᤠᤱᤒᤥ ᤛᤱᤛᤡᤱᤒᤠ ᤋᤱᤒᤣᤀᤠᤱᤎᤥ ᤛᤠᤶᤔᤩᤠᤱ ᤋᤱᤒᤣ ᤌᤠᤖᤡᤰᤐᤠ ᤕᤧᤶᤜᤠ᤹ ᤂᤧᤴ ᤁᤧᤛᤱᤛᤡᤱᤒᤧᤴ ᤏᤢ ᤂᤢᤏᤧ᤹ ᤁᤧᤀᤡᤱᤒᤠ ᤁᤢᤴᤍᤠᤱᤒᤠ ᤏᤧᤵᤔᤠᤱᤗᤧ ᤏᤡ᤺ᤳᤇᤢᤖ॥ ᤏᤠᤶᤕᤠᤰᤁᤥ ᤑᤶᤔᤏᤠᤒᤠ ᤔᤏᤠ᤺ᤸᤗᤧ ᤂᤥᤛᤢᤒᤠ ᤁᤢᤏᤠᤶᤕᤠᤰ ᤁᤢᤀᤡᤛᤡᤰ ᤂᤧᤴ ᤋᤱᤒᤣᤜᤠ᤹ᤀᤥᤒᤠ ᤏᤠᤶᤕᤠᤰᤁᤡᤴ ᤜᤢᤅᤢᤀᤠᤱ ᤂᤢᤏᤧ᤹ ᤁᤢᤴᤍᤠᤱᤒᤧᤴᤏᤢ ᤀᤠᤒᤠᤅᤣ ᤌᤧ᤹ᤛᤡᤱᤗ॥ 51 ᤕᤠᤶᤔᤥ ᤕᤢᤰᤛᤡᤱᤒᤠ ᤋᤱᤒᤣ ᤋᤠᤔᤠ ᤕᤖᤡᤰ ᤕᤧᤶ ᤘᤠ᤹ᤏᤧᤓᤃᤪ. ᤂᤢᤏᤧ᤹ ᤔᤧᤀᤡᤅᤢᤒᤠ ᤁᤧᤖᤧᤰ ᤔᤧᤸᤗᤢᤱᤅᤡᤴ ᤏᤡ᤺ᤵᤔᤠᤀᤠᤱ ᤆᤥ᤺ᤰᤕᤢᤶᤓᤥ ᤂᤥᤔᤠᤖᤧ ᤗᤠᤃᤡ ᤕᤖᤡᤰ ᤂᤧᤸᤗᤧ ᤔᤧᤸᤗᤢᤱᤅᤡᤴ ᤏᤢ᤺ᤰᤋᤢ ᤐᤡᤖᤢᤛᤡᤖ ᤐᤥᤱ᤹॥ 52 ᤕᤠᤶᤔᤥ ᤕᤢᤰᤛᤡᤱᤒᤠ ᤋᤱᤒᤣ ᤋᤠᤔᤠ ᤀᤠᤈᤧ᤺ᤳᤇᤡᤰᤗᤰ ᤕᤧᤶ ᤘᤠ᤹ᤏᤧᤓᤃᤪ. ᤂᤢᤏᤧ᤹ ᤔᤧᤀᤡᤅᤢᤒᤠ ᤁᤧᤖᤧᤰ ᤔᤧᤸᤗᤢᤱᤅᤡᤴ ᤏᤡ᤺ᤵᤔᤠᤀᤠᤱ ᤆᤥ᤺ᤰᤕᤢᤶᤓᤥ ᤂᤥᤔᤠᤖᤧ ᤗᤠᤃᤡ ᤂᤧᤸᤗᤧ ᤔᤧᤸᤗᤢᤱᤅᤡᤴ ᤏᤢ᤺ᤰᤋᤢ ᤐᤡᤖᤢᤛᤡᤖ ᤐᤥᤱ᤹॥ 53 ᤏᤠᤶᤕᤠᤰ ᤂᤥᤔᤠᤖᤧ ᤗᤠᤃᤡ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤠ ᤁᤢᤀᤡᤛᤡᤰ ᤘᤣ᤹ ᤗᤠᤈᤣᤒᤠ ᤁᤢᤴᤍᤠᤱᤒᤧᤴᤏᤢ ᤂᤧᤴ ᤘᤠ᤹ᤖ ᤐᤥᤱ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤘᤣ᤹ ᤗᤠᤈᤣᤒᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠᤀᤠᤱ ᤕᤢᤰᤔᤠ ᤔᤧᤓᤠ᤺ᤰᤋᤧᤶᤔᤡᤴᤏᤧ᤹॥ 54 ᤁᤴ ᤐᤠ᤺ᤴᤜᤠ᤹ ᤗᤠᤶᤔᤠᤱ ᤂᤧᤸᤗᤧ ᤆᤥ᤺ᤰᤕᤢᤶᤓᤥ ᤔᤧᤄᤥᤛᤢᤴᤏᤧᤓᤃᤪ. ᤂᤧᤴ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤏᤢ ᤛᤥᤛᤥᤖᤡᤰ ᤛᤠᤶᤔᤩᤠᤱ ᤋᤱᤒᤣᤀᤥ ᤗ᤺ᤴᤏᤠᤱ ᤐᤣ᤺ᤰᤗ॥ 55 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤛᤡ ᤔᤣ᤺ᤴ ᤁᤖ ᤂᤧᤱᤜᤠ᤹ᤃ ᤀᤠᤱᤃᤠ᤹ᤀᤣ ᤀᤠᤔᤏᤠᤛᤡᤀᤠᤱ ᤀᤠᤛᤧᤘᤠᤖᤥᤒᤠᤛᤡᤖᤥ॥ ᤀᤠᤱᤃᤠ᤹ᤀᤣ ᤂᤧᤱᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.