ᤗᤧᤒᤡ 23 - LIFOTNTᤛᤠᤶᤕᤥᤒᤠ ᤋᤱᤏᤠᤶᤜᤠ᤹ 1 ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤛᤣᤛᤣ ᤆᤢᤶᤗᤢᤱ ᤁᤢᤀᤡᤛᤡᤰ ᤂᤡᤏᤡ᤹ ᤀᤢᤘᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤏᤡ᤺ᤴᤎᤥ ᤆᤥᤃᤢᤒᤠ ᤋᤱᤏᤠᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤛᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴ 3 “‘ᤋᤢᤰᤛᤡ ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤔᤧᤈᤥ᤺ᤰᤗ. ᤁᤖ ᤏᤢᤛᤡᤃᤣᤰᤐᤠ ᤕᤧᤴᤏᤥᤃ ᤏᤠ᤺ᤶᤛᤡᤱᤔᤠ. ᤛᤒᤠᤌ ᤗᤳᤇᤠ ᤛᤣᤛᤣ ᤆᤢᤶᤗᤢᤱ ᤕᤧᤴ ᤐᤥᤱᤗ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤳᤋᤡ ᤁᤧᤘᤕᤡ ᤁᤧᤕᤢᤅᤡᤛᤠᤱ ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤒᤠᤌ ᤕᤧᤴᤗᤥ॥ ᤆᤥ᤺ᤰᤕᤢᤶᤓᤥ ᤏᤢ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱᤗᤧᤴ ᤋᤱᤏᤠᤶ ( ᤂᤠᤏᤡ᤺ᤳ ᥈᥎:᥇᥌-᥈᥋ ) 4 “‘ᤁᤢᤍᤥᤰ ᤁᤧᤒᤥᤱᤒᤠ ᤕᤧᤶᤔᤥ ᤂᤡᤏᤡ᤹ ᤀᤢᤘᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤏᤡ᤺ᤴᤎᤥ ᤆᤥᤃᤢᤒᤠ ᤋᤱᤏᤠᤶᤜᤠ᤹. ᤀᤡᤃᤪ ᤛᤣᤛᤣ ᤆᤢᤶᤗᤢᤱᤜᤠ᤹ ᤁᤴᤜᤠ᤹ᤀᤣᤖᤥ॥ 5 “‘ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴ ᤕᤢ᤺ᤴᤇᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥᤔᤠ ᤁᤧᤒᤥᤱᤒᤠ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤜᤣ᤺ᤰᤛᤡᤱ᤹॥ 6 ᤜᤠᤒᤠ ᤂᤧᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤴ ᤜᤣ᤺ᤰᤛᤡᤱ᤹॥ ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣ ᤂᤖᤧ᤺ᤱ ᤆᤠᤶᤔᤧ᤹॥ 7 ᤌᤡᤰᤛᤡᤃᤣᤰᤐᤠ ᤕᤧᤴᤏᤡᤴ ᤛᤣᤛᤣ ᤆᤢᤶᤗᤢᤱ ᤐᤥᤱᤗ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤡᤰᤕᤠ᤺ᤴᤎᤰᤐᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 8 ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤜᤧᤰᤁᤩᤠᤱ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤛᤣᤛᤣ ᤆᤢᤶᤗᤢᤱ ᤐᤥᤱᤗ॥ ᤂᤧᤴ ᤕᤧᤴᤏᤥ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥’” 9 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 10 “ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤗᤠᤈᤣ᤹ᤀᤥ ᤁᤧᤃᤧᤖᤡ᤹ ᤂᤧᤒᤩᤠᤱ ᤂᤧᤵᤔᤥᤒᤠ ᤁᤧᤍᤢᤶᤒᤠ ᤁᤢᤈᤠᤴ ᤁᤧᤜᤧᤃᤢᤶᤔᤡᤸᤗᤧ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤐᤥᤱᤗ ᤑᤠ᤹ᤀᤠᤱ ᤌᤡᤰᤛᤡᤃᤣᤰᤐᤠ ᤁᤢᤎ᤺ᤱᤔᤠᤎᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠᤖᤧᤶᤔᤧ᤹॥ 11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤋᤠ᤺ᤰᤋᤢᤒᤠ ᤐᤥᤱᤔᤠᤖᤧ ᤗᤠᤃᤡ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤆᤠᤎ᤺ᤱᤔᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤌᤠ᤺ᤱ ᤐᤰᤂᤢᤖ॥ ᤛᤒᤠᤌ ᤕᤧᤴᤏᤡᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤌᤠ᤺ᤱ ᤐᤰᤂᤢᤖ॥ 12 ᤂᤧᤴ ᤆᤠᤎ᤺ᤱᤔᤠᤴ ᤌᤠ᤺ᤱ ᤐᤱᤔᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤱᤒᤣᤎᤡᤰ ᤁᤧᤃᤧᤵᤐᤠ ᤔᤧᤱᤃᤠ᤺ᤶᤔᤏᤠᤒᤠ ᤗᤳᤇᤠ ᤌᤢ᤺ᤶᤒᤠ ᤂᤡᤏᤡ᤹ ᤋᤥ᤺ᤴᤍᤧᤶᤔᤧ᤹॥ 13 ᤂᤧᤴᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤗᤳᤇᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤆᤢᤴᤈᤢᤶᤒᤠ ᤁᤡᤗᤥ ᤏᤧᤳᤇᤡ ᤑᤣ᤹ᤖᤢᤶ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ ᤁᤢᤘᤠ ᤛᤡᤍᤢᤱᤈᤓᤠ᤺ᤱᤃ ᤗᤡᤋᤖ ᤌᤡᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ 14 ᤂᤡᤏᤡ᤹ ᤁᤴ ᤛᤡᤍᤢᤱᤈᤓᤠᤴ ᤀᤠᤵᤑᤣᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤧᤴᤍᤠᤖᤢᤶᤔᤡᤸᤗ ᤌᤠᤖᤡᤰ ᤂᤖᤧ᤺ᤱ. ᤏᤔᤏᤠᤒᤠ ᤁᤢᤈᤠ ᤏᤢ ᤁᤢᤖᤣ᤺ᤳᤗᤠ ᤆᤠᤍᤠᤵᤔᤠ ᤌᤧᤔᤠᤀᤠᤱ ᤔᤧᤈᤠᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡ ᤁᤧᤘᤕᤡᤛᤠᤱ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤁᤴ ᤀᤠᤵᤑᤠᤸᤗᤧᤛᤠᤱ ᤁᤧᤘᤠ᤹ᤒᤠ ᤌᤡᤶ ᤐᤥᤱᤗᤖᤥ॥ ᤕᤧᤳᤏᤠᤶᤜᤠ᤹ᤀᤥᤒᤠ ᤋᤱᤏᤠᤶ ( ᤂᤠᤏᤡ᤺ᤳ ᥈᥎:᥈᥌-᥉᥇ ) 15 “‘ᤛᤒᤠᤌ ᤁᤢᤍᤠ᤺ᤴᤍᤡᤰᤔᤠᤀᤠᤱᤎᤥ. ᤀᤡᤃᤪ ᤂᤡᤏᤡ᤹ ᤌᤠ᤺ᤱ ᤁᤧᤓᤥᤰᤂᤢᤶᤒᤠ ᤛᤡᤍᤢᤱᤈᤓᤠ ᤆᤠᤎ᤺ᤱᤔᤠᤴ ᤁᤧᤍᤠᤖᤢᤶᤒᤠ ᤕᤧᤴᤏᤠᤱᤎᤥ ᤏᤢᤛᤡ ᤕᤧᤳᤏᤠᤶ ᤂᤡᤏᤡ᤹ ᤏᤡᤖᤧᤶᤔᤧ᤹. 16 ᤀᤡᤃᤪ ᤏᤢᤛᤡᤃᤣᤰᤐᤠ ᤛᤒᤠᤌᤀᤠᤱᤎᤥ ᤁᤢᤍᤠ᤺ᤴᤍᤡᤰᤔᤠ ᤌᤠᤖᤡᤰ ᤅᤠᤒᤥᤱ ᤕᤧᤴ ᤏᤡᤖᤧᤶᤔᤧ᤹॥ ᤜᤠᤒᤠ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤃᤡ ᤁᤧᤍᤢᤶᤒᤠ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤡᤏᤡ᤹ ᤋᤥ᤺ᤴᤍᤧᤶᤔᤧ᤹॥ 17 ᤂᤡᤏᤡ᤹ ᤀᤠᤒᤠᤅᤣ ᤜᤡᤶᤔᤥᤏᤢ ᤁᤡᤗᤥ ᤏᤧᤳᤇᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤗᤠᤶ ᤁᤧᤈᤥᤃᤢᤶᤒᤠ ᤏᤢ ᤁᤧᤓᤱᤒᤠ ᤛᤡᤍᤠ᤹ ᤁᤧᤕᤠᤰᤋᤢᤶᤔᤠᤱ ᤁᤧᤗᤧ᤺ᤱᤛᤢᤶᤒᤠ ᤂᤖᤧ᤺ᤱ ᤏᤧᤳᤇᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤐᤰᤂᤧᤶᤔᤧ᤹॥ 18 ᤂᤧᤴ ᤂᤖᤧ᤺ᤱᤜᤠ᤹ᤏᤢ ᤛᤥᤛᤥᤖᤡᤰ ᤋᤱᤒᤣᤎᤡᤰ ᤁᤧᤃᤧᤵᤐᤠ ᤔᤧᤱᤃᤠ᤺ᤶᤔᤏᤠᤒᤠ ᤏᤢᤛᤡ ᤌᤢ᤺ᤶᤒᤠ ᤏᤢ ᤗᤳᤇᤠ ᤛᤧᤃᤶᤒᤠ ᤜᤧᤰᤁᤩᤠᤱ ᤌᤢ᤺ᤶᤒᤠ ᤏᤧᤳᤇᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤜᤧᤰᤁᤣ ᤋᤥ᤺ᤴᤍᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ᤺ᤴᤏᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤐᤥᤱᤗ॥ 19 ᤂᤧᤴ ᤀᤣᤃᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤗᤳᤇᤠ ᤔᤧ᤺ᤴᤍᤒᤁᤠ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤱᤒᤣᤎᤡᤰ ᤁᤧᤃᤧᤵᤐᤠ ᤌᤢ᤺ᤶᤒᤠ ᤏᤧᤳᤇᤡ ᤋᤥ᤺ᤴᤍᤧᤶᤛᤡᤶᤔᤧ᤹॥ 20 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ. ᤋᤃᤡ ᤁᤧᤍᤢᤶᤒᤠ ᤁᤢᤈᤠ᤺ᤸᤗᤧ ᤂᤖᤧ᤺ᤱᤅᤡᤴᤏᤢ ᤛᤥᤛᤥᤖᤡᤰ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤔᤧᤸᤗᤢᤰ ᤏᤧᤳᤇᤡ ᤌᤠ᤺ᤱ ᤐᤰᤂᤢᤛᤡᤖ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰ ᤐᤥᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤛᤣᤛᤣ ᤛᤡᤍᤢᤱᤈᤓᤠ ᤐᤥᤱᤗ॥ 21 ᤂᤧᤴ ᤕᤧᤴᤏᤡᤴ ᤛᤣᤛᤣ ᤆᤢᤶᤗᤢᤱ ᤑᤠ᤹ᤀᤠᤱ ᤂᤡᤏᤡ᤹ ᤀᤢᤘᤠ ᤆᤥᤃᤧᤶᤔᤧ᤹॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤳᤋᤡ ᤁᤧᤘᤕᤡᤛᤠᤱ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤂᤧᤴ ᤀᤠᤵᤑᤠᤸᤗᤧᤛᤠᤱ ᤁᤧᤘᤠ᤹ᤒᤠ ᤌᤡᤶ ᤐᤥᤱᤗ॥ 22 “‘ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤁᤢᤈᤠᤴ ᤁᤧᤜᤧᤃᤢᤶᤔᤡᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤸᤗᤧ ᤁᤢᤕᤠᤜᤠ᤹ ᤘᤖᤧᤱᤗᤧᤱ ᤔᤧᤜᤧᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧ ᤁᤧᤔᤠᤒᤠ ᤁᤧᤕᤠ᤺ᤰᤐᤠ ᤛᤡᤗᤠᤜᤠ᤹ ᤔᤧᤓᤢᤰᤂᤧᤶᤔᤡᤴᤏᤧ᤹॥ ᤂᤧᤴ ᤁᤢᤈᤠᤜᤠ᤹ ᤕᤠᤱᤃᤧᤛᤠ᤹ᤒᤠ ᤏᤢ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤗᤧᤖᤧᤶᤎᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’” ᤛᤠᤍᤠᤱ ᤔᤢ᤺ᤵᤔᤠ ᤋᤱᤏᤠᤶᤜᤠ᤹ ( ᤂᤠᤏᤡ᤺ᤳ ᥈᥏:᥇-᥌ ) 23 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 24 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤏᤢᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤗᤠᤃᤡ ᤗᤳᤇᤠ ᤁᤧᤕᤧᤰᤐᤠ ᤏᤠ᤺ᤶᤛᤡᤱᤔᤠ ᤕᤧᤴ ᤐᤥᤱᤗ॥ ᤂᤧᤸᤗᤧ ᤕᤠ᤺ᤴᤍᤡᤰ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤛᤠᤍᤠᤱᤅᤡᤴ ᤔᤢ᤺ᤳᤋᤧᤶᤔᤧ᤹ᤀᤠᤱ ᤛᤣᤛᤣ ᤆᤢᤶᤗᤢᤱ ᤆᤥᤃᤧᤶᤔᤧ᤹॥ 25 ᤂᤡᤏᤡ᤹ ᤂᤧᤸᤗᤧ ᤕᤠ᤺ᤴᤍᤡᤰ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹ᤀᤥ॥’” ᤗᤠᤕᤥᤗᤠᤶ ᤛᤢᤳᤌᤥ ᤐᤥᤱᤔᤠ ᤕᤧᤴ ( ᤂᤠᤏᤡ᤺ᤳ ᥈᥏:᥍-᥇᥇ ) 26 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 27 “ᤏᤢᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤃᤣᤰᤐᤠ ᤕᤧᤴᤏᤡᤴ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤧᤴ ᤐᤥᤱᤗ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤛᤣᤛᤣ ᤆᤢᤶᤗᤢᤱ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤀᤠᤒᤠᤅᤣ ᤏᤠ᤹ᤀᤠᤛᤡᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 28 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤡᤏᤡ᤹ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤐᤥᤱᤅᤡᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤠᤃᤡ ᤂᤧᤴ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤕᤧᤴᤗᤥ॥ 29 ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤳᤋᤡᤴ ᤀᤠᤒᤠᤅᤣ ᤏᤠ᤹ᤛᤡᤱᤔᤠ ᤔᤧᤍᤧᤴᤏᤧᤴ. ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ 30 ᤂᤧᤸᤗᤧ ᤕᤠ᤺ᤴᤍᤡᤰ ᤁᤢᤓᤠ ᤐᤖᤡᤰᤐᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤗᤠᤶ ᤀᤠᤱᤃᤠ᤹ ᤔᤧᤰᤂᤢᤱ᤹॥ 31 ᤂᤡᤏᤡ᤹ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡ ᤁᤧᤘᤕᤡᤛᤠᤱ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ॥ 32 ᤂᤡᤏᤡ᤹ ᤗᤠᤃᤡ ᤁᤴ ᤗᤳᤇᤠ ᤁᤧᤕᤧᤰᤐᤠ ᤏᤠ᤺ᤶᤛᤡᤱᤔᤠ ᤕᤧᤴ ᤛᤒᤠᤌ ᤐᤥᤱᤗ. ᤜᤧᤰᤁᤩᤠᤱ ᤂᤡᤏᤡ᤹ ᤕᤧᤴᤏᤥ ᤁᤢᤈᤠ ᤌᤣᤀᤠᤱ ᤔᤧᤈᤠᤶᤔᤡᤴᤏᤧ᤹॥ ᤂᤧᤴ ᤗᤠᤀᤥᤒᤠ ᤑᤠᤱᤛᤡᤃᤣᤰᤐᤠ ᤕᤧᤴᤏᤥᤒᤠ ᤕᤢ᤺ᤴᤇᤡᤰᤁᤠᤱᤎᤥ ᤁᤢᤍᤠ᤺ᤴᤍᤡᤰᤔᤠ ᤕᤢ᤺ᤴᤇᤡᤰ ᤌᤠᤖᤡᤰ ᤛᤒᤠᤌ ᤕᤧᤴᤏᤡᤴ ᤂᤡᤏᤡ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤥ॥” ᤋᤰᤋᤰᤘᤠ ᤜᤡᤶᤗᤧᤴ ᤋᤱᤏᤠᤶ ( ᤂᤠᤏᤡ᤺ᤳ ᥈᥏:᥇᥈-᥊᥆ ) 33 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 34 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤏᤢᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤠᤱᤎᤥ ᤏᤢᤛᤡ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤋᤰᤋᤰᤘᤠ ᤜᤡᤶ ᤕᤠ᤺ᤰᤔᤠ ᤋᤱᤏᤠᤶ ᤐᤥᤱᤗ॥ 35 ᤂᤧᤸᤗᤧ ᤕᤠ᤺ᤴᤍᤡᤰᤐᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤛᤣᤛᤣ ᤆᤢᤶᤗᤢᤱ ᤐᤥᤱᤗ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 36 ᤏᤢᤛᤡ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤛᤣᤛᤣ ᤆᤢᤶᤗᤢᤱ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤔᤡᤀᤥ ᤋᤥ᤺ᤶᤔᤏᤠᤒᤠ ᤗᤳᤇᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤁᤴ ᤛᤢᤵᤔᤏᤠᤒᤠ ᤆᤢᤶᤗᤢᤱᤗᤥ॥ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 37 (“‘ᤛᤣᤛᤣ ᤆᤢᤶᤗᤢᤱ ᤁᤢᤀᤡᤛᤡᤰ ᤂᤡᤏᤡ᤹ ᤀᤢᤘᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥᤰ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤁᤴ ᤕᤧᤴᤜᤠ᤹ᤀᤥ ᤔᤡᤀᤥᤗᤠᤶ ᤁᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤧᤶᤔᤧ᤹—ᤁᤴ ᤋᤱᤏᤠᤶᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤔᤡᤀᤥᤗᤠᤶ ᤋᤥ᤺ᤶᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ. ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠ ᤁᤧᤒᤥᤱᤒᤠ ᤕᤧᤴᤏᤥ ᤋᤥ᤺ᤴᤍᤧᤶᤔᤧ᤹॥ 38 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤒᤠᤌ. ᤂᤡᤏᤡ᤹ ᤔᤡᤰᤋᤥᤰᤜᤠ᤹. ᤁᤧᤈᤥᤃᤢᤶᤒᤠ ᤔᤠᤱᤜᤢᤵᤜᤠ᤹ ᤏᤢ ᤀᤠᤒᤠᤅᤣ ᤏᤡᤱᤘᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤴ ᤁᤧᤒᤡᤖᤢᤶᤒᤠ ᤛᤡᤍᤢᤱᤈᤓᤠᤜᤠ᤹ᤏᤢ᤺ᤸᤗᤧ ᤁᤴᤜᤠ᤹ ᤘᤣ᤹ ᤐᤥᤱᤔᤠ ᤐᤥᤱ᤹॥) 39 “‘ᤏᤢᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤀᤠᤒᤠᤅᤣ ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤛᤡᤱᤛᤣ᤹ᤜᤠ᤹ ᤁᤧᤛᤢᤵᤛᤢᤶᤔᤠᤱ ᤀᤣᤃᤠᤱ ᤂᤡᤏᤡ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤴ ᤋᤱᤏᤠᤶᤔᤡᤴ ᤋᤥᤛᤧᤶᤔᤧ᤹॥ ᤌᤡᤰᤛᤡᤃᤣᤰᤐᤠ ᤕᤧᤴᤏᤡᤴ ᤏᤢ ᤕᤧᤳᤇᤡᤃᤣᤰᤐᤠ ᤕᤧᤴᤏᤡᤱᤃ ᤏᤠ᤺ᤶᤛᤡᤱᤔᤠᤀᤣ ᤁᤧᤒᤥᤱᤒᤠ ᤕᤧᤴᤗᤥ॥ 40 ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤛᤡᤱᤛᤣ᤹ᤜᤠ᤹ᤖᤧ ᤏᤢᤒᤠ ᤏᤢᤒᤠ ᤁᤢᤈᤠ᤹ᤜᤠ᤹. ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤥᤖᤠᤰᤜᤠ᤹. ᤕᤖᤡᤰ ᤁᤢᤓᤧᤰᤘᤠ ᤁᤧᤒᤵᤐᤠ ᤛᤡᤱᤒᤥᤖᤠ᤺ᤰᤜᤠ᤹. ᤏᤢ ᤐᤡᤐᤥᤖᤧᤸᤗᤧ ᤁᤢᤒᤥᤖᤠᤰᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤕᤧᤕᤧ ᤗ᤹ᤖᤧᤶᤔᤧ᤹॥ 41 ᤋᤱᤒᤣᤖᤧ ᤂᤡᤏᤡ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤴ ᤋᤱᤏᤠᤶᤔᤡᤴ ᤋᤥᤛᤧᤶᤔᤧ᤹॥ ᤁᤴ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤀᤠᤵᤑᤠᤸᤗᤧᤛᤠᤱ ᤁᤧᤘᤠ᤹ᤒᤠ ᤌᤡᤶ ᤐᤥᤱᤗ॥ ᤏᤢᤛᤡᤃᤣᤰᤐᤠ ᤗᤠᤀᤥ ᤂᤡᤏᤡ᤹ ᤁᤴ ᤋᤥᤛᤧᤶᤔᤧ᤹॥ 42 ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤋᤰᤋᤰᤘᤠ ᤜᤡᤶᤜᤠ᤹ᤀᤥ ᤕᤢᤅᤧᤶᤔᤧ᤹॥ ᤁᤧᤖᤧᤰ ᤗᤠᤈᤣ᤹ᤛᤠᤒᤠ ᤀᤡᤛᤪᤠᤀᤡᤗᤡᤜᤠ᤹ᤃ ᤋᤰᤋᤰᤘᤠ ᤜᤡᤶᤜᤠ᤹ᤀᤥ ᤔᤧᤕᤢᤱᤗ. 43 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤂᤧᤱᤜᤠ᤹ ᤋᤰᤋᤰᤘᤠ ᤜᤡᤶᤜᤠ᤹ᤀᤥ ᤕᤠᤱᤎᤥ᤺ᤰᤔᤠ ᤐᤠᤱᤄᤢᤱᤛᤡᤱᤅᤠᤱ ᤘᤕᤠᤱ ᤑᤠ᤹ᤀᤠᤱ ᤂᤡᤏᤡ᤹ ᤕᤠᤱᤛᤡᤒᤠ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥’” 44 ᤁᤶᤓᤗ᤹ᤖᤡᤰ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤁᤢᤍᤥᤰ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ ᤋᤥᤔᤠ ᤀᤡᤱᤈᤠᤱ ᤐᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.