ᤗᤧᤒᤡ 21 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠ ᤛᤢᤳᤌᤥ ᤐᤥᤱᤔᤠ ᤌᤡᤶ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤔᤏᤠᤜᤠ᤹ ᤁᤢᤓᤠ ᤔᤧᤛᤡ᤺ᤸᤗᤧ ᤂᤡᤏᤡ᤹ ᤁᤢᤓᤠᤖᤧ ᤆᤣ᤺ᤴ ᤔᤧᤛᤢᤛᤧᤶᤔᤡᤴᤏᤧ᤹ᤀᤠᤱ ᤀᤠᤵᤑᤣᤰ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹. 2 ᤀᤠᤵᤑᤣᤰ ᤁᤠ᤹ᤀᤡ ᤁᤧᤎᤠᤵᤐᤠᤜᤠ᤹ᤖᤰ. ᤀᤡᤃᤪ ᤀᤠᤵᤑᤣᤰ ᤔᤠᤏᤢᤍᤡᤱ ᤔᤠ. ᤐᤠᤏᤢᤍᤡᤱ ᤐᤠ. ᤛᤠᤜᤠ᤹. ᤑᤢ᤹ᤏᤢᤛᤠ᤹. 3 ᤀᤡᤃᤪ ᤜᤡᤶᤔᤥᤀᤣ ᤁᤧᤘᤠ᤹ᤔᤠ ᤔᤣ᤺ᤰᤂᤡᤶ ᤔᤧᤶᤒᤥᤱᤅᤣᤔᤠ ᤔᤠᤱᤃᤧᤴᤏᤠ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤗ॥ 4 ᤋᤧᤴᤎᤠᤶ ᤔᤣ᤺ᤰᤂᤡᤶᤗᤠᤶ ᤁᤠ᤹ᤀᤡ ᤁᤧᤎᤠᤵᤐᤠ ᤁᤢᤓᤠᤖᤧ ᤗᤠᤃᤡᤀᤠᤱ ᤂᤧᤴ ᤀᤠᤵᤑᤣᤰ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤅᤠᤱ ᤔᤧᤈᤡ᤺ᤴᤇᤡᤱᤅᤡᤴᤗ॥ 5 “‘ᤔᤡᤰᤘᤠ ᤔᤧᤃᤢ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤔᤧᤴᤏ᤺ᤰᤂᤢᤴᤗ. ᤂᤢᤴᤇᤡ᤹ ᤔᤢᤎᤥ᤹ᤜᤠ᤹ᤖᤧ ᤁᤢᤛᤢᤰᤐᤠᤜᤠ᤹ ᤔᤧᤴᤇᤠ᤺ᤰᤋᤢᤴᤗ ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤰᤁᤡᤴ ᤔᤧᤱᤄᤠ᤺ᤴᤍᤢᤴᤗ॥ 6 ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤱᤜᤠ᤹ ᤛᤣᤛᤣ ᤔᤧᤕᤢᤱᤗ. ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤁᤢᤏᤠᤔᤧᤴᤇᤠ᤹ ᤐᤥᤱᤗ ᤔᤧᤴᤈᤥᤃᤢᤴᤗ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ. ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠᤴ ᤋᤥ᤺ᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤛᤣᤛᤣ ᤔᤧᤒᤥᤱᤗ॥ 7 “‘ᤂᤧᤱᤜᤠ᤹ᤖᤧ ᤕᤧᤶᤒᤠ ᤜᤱᤈᤣᤏᤠ ᤁᤧᤒᤥᤱᤔᤠᤀᤠᤱ ᤑᤧᤰᤁᤧᤗᤠ᤹ᤔᤠ ᤔᤧᤴᤇᤢᤔᤠᤴ ᤀᤡᤃᤪ ᤁᤢᤕᤧᤶᤒᤠ᤺ᤸᤗᤧ ᤗᤠᤵᤑᤣᤛᤢᤔᤠ ᤀᤠᤳᤋᤡᤴ ᤔᤧᤴᤇᤢᤔᤠᤴᤏᤠᤱ ᤔᤧᤴᤍᤠᤖᤢᤴᤗ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤔᤧᤈᤥᤰ॥ 8 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤡᤏᤡ᤹ ᤛᤣᤛᤣᤒᤠ ᤗᤣ᤺ᤳᤋᤠᤶᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠᤴ ᤋᤥ᤺ᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤣᤛᤣᤒᤠ ᤁᤧᤈᤥ᤺ᤰᤐᤠ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠᤴ. ᤛᤣᤛᤣᤒᤠ ᤆᤥ᤺ᤰᤁᤠ॥ 9 “‘ᤁᤢᤓᤠ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤕᤧᤶᤒᤠ ᤁᤥ᤺ᤵᤔᤠ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤀᤠᤒᤠᤅᤣ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤏᤧᤓᤃᤪ. ᤂᤧᤸᤗᤧ ᤁᤢᤶᤒᤠ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢ᤹॥ ᤂᤧᤴ ᤔᤡᤀᤥ ᤔᤡᤔᤧᤎᤡᤰᤂᤢᤖ॥ 10 “‘ᤀᤠᤳᤋᤡᤴ ᤂᤢᤏᤧ᤹ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ᤀᤥ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤁᤢᤎᤧᤃᤣ᤺ᤰᤐᤥ ᤐᤡᤔᤠ ᤔᤠᤱᤌᤥ᤺ᤰᤏᤠ ᤏᤡ᤺ᤱᤃᤣᤴ ᤔᤧᤗᤧ᤺ᤰᤋᤢᤀᤠᤱ ᤐᤳ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ ᤆᤠᤱ ᤆᤠᤱᤔᤠᤖᤧ ᤗᤠᤃᤡ ᤀᤠᤳᤋᤡᤴ ᤗᤠ᤺ᤳᤗᤠ᤺ᤳ ᤔᤧᤛᤧᤴᤍᤢᤀᤠᤱ ᤘᤠ᤹. ᤂᤢᤏᤧ᤹ ᤔᤡᤰᤘᤠ᤺ᤸᤗᤧ ᤋᤧᤳᤋᤢᤒᤠ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤎᤧᤃᤣᤰ ᤀᤡ᤺ᤴ ᤔᤧᤓᤠ᤺ᤰᤂᤢᤴᤗ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤡᤴ ᤔᤧᤎᤣ᤺ᤰᤂᤢᤴᤗ॥ 11 ᤂᤢᤏᤧ᤹ ᤁᤢᤓᤠ ᤆᤣ ᤁᤧᤏᤧᤒᤠᤍᤧᤴᤏᤥ ᤔᤧᤒᤣ᤺ᤰᤏᤧᤴᤗ॥ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤠ ᤀᤡᤃᤪ ᤁᤢᤶᤔᤠᤖᤧ ᤁᤢᤈᤣ ᤁᤧᤏᤧᤒᤠᤍᤧᤴᤏᤥᤀᤠᤱ ᤐᤣ᤺ᤰᤁᤠᤱ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤸᤗ॥ 12 ᤛᤣᤛᤣᤍᤧᤴᤏᤥᤗᤠᤶ ᤂᤧᤴ ᤗᤠ᤺ᤰᤁᤠᤳ ᤔᤧᤗ᤺ᤴᤏᤧᤸᤗ. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤍᤧᤴᤏᤡᤴ ᤀᤠᤛᤢᤳᤌᤥ ᤔᤧᤈᤥᤃᤢᤴᤗ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤌᤥ᤺ᤰᤏᤠ ᤐᤡᤔᤠ ᤁᤢᤏᤡ᤺ᤱᤃᤣ᤺ᤸᤗᤧ ᤂᤧᤴ ᤔᤧᤍᤥᤴᤍᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 13 “‘ᤂᤧᤸᤗᤧ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤔᤣ᤺ᤰᤂᤡᤶ ᤔᤧᤳᤋᤢᤖ॥ 14 ᤂᤧᤸᤗᤧ ᤁᤢᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠ. ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤒᤠ ᤔᤧᤴᤇᤢᤔᤠᤴ. ᤀᤡᤃᤪ ᤕᤧᤶᤒᤠ ᤜᤱᤈᤣᤏᤠ ᤕᤠ᤺ᤶᤒᤰᤁᤡᤸᤗᤧ ᤑᤧᤰᤁᤧᤗᤠ᤹ᤔᤠ ᤔᤧᤴᤇᤢᤔᤠᤴ ᤔᤧᤍᤠᤖᤢᤴᤗ. ᤁᤖ ᤀᤠᤒᤠᤅᤣ ᤁᤢᤎᤠ᤺ᤰᤁᤥᤒᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤂᤧᤸᤗᤧ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤖ. 15 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤒᤠᤅᤣ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤀᤠᤛᤢᤳᤌᤥ ᤔᤧᤈᤥᤃᤢᤛᤡᤴᤗ॥ ᤂᤢᤏᤧ᤹ ᤛᤣᤛᤣ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ॥’” 16 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 17 “ᤂᤧᤏᤧ᤹ ᤜᤠᤖᤢᤏᤧᤴ ᤔᤧᤳᤋᤧ᤹—‘ᤂᤧᤏᤧ᤹ ᤁᤧᤜᤡᤶᤛᤕᤱᤒᤠ ᤁᤧᤖᤧᤰ ᤌᤠ᤺ᤰᤁᤥ ᤁᤧᤃᤠ᤺ᤶᤒᤠ ᤁᤢᤕᤥᤰ ᤁᤧᤒᤵᤐᤠ ᤀᤠᤳᤋᤡᤴᤇᤠᤱ. ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ ᤋᤥ᤺ᤴᤇᤧ ᤏᤡ᤺ᤳᤋᤠᤱ ᤔᤧᤍᤠᤏᤧᤴᤗ॥ 18 ᤁᤧᤃᤠ᤺ᤶᤒᤠ ᤁᤧᤒᤵᤐᤠ ᤀᤠᤳᤋᤡᤴ ᤔᤏᤠ᤺ᤴᤇᤠᤱ. ᤁᤢᤔᤡᤰ ᤁᤧᤜᤥᤵᤐᤠ ᤔᤡᤰᤑ᤺ᤶᤒᤠ ᤀᤡᤃᤪ ᤗᤠᤱᤛᤰᤐᤠ. ᤁᤢᤏᤠᤖᤠ ᤑᤧᤰᤁᤧᤗᤠ᤹ᤒᤠ. ᤀᤡᤃᤪ ᤁᤢᤎᤰ ᤑᤧᤰᤁᤧᤗᤠ᤹ᤒᤠ. 19 ᤁᤢᤗᤠᤱ ᤀᤡᤃᤪ ᤁᤢᤜᤢᤰ ᤁᤧᤍᤢ᤺ᤱᤒᤠ. 20 ᤀᤣ᤺ᤰᤌᤢ᤺ᤰᤁᤣ. ᤌᤧᤵᤐᤪᤢᤁᤩᤠ. ᤁᤢᤔᤡᤰ ᤁᤧᤍᤢᤰᤐᤠ. ᤁᤧᤍᤢᤶᤒᤠ ᤕᤠᤱᤄᤣ᤺ᤰ ᤁᤧᤒᤵᤐᤠ. ᤁᤢᤎᤡ᤺ᤴᤏᤥ ᤁᤧᤃᤠ᤺ᤶᤒᤠ ᤀᤠᤳᤋᤡᤴᤏᤠᤱ ᤏᤡ᤺ᤳᤋᤠᤱ ᤔᤧᤍᤠᤏᤧᤴᤗ॥ 21 ᤜᤠᤖᤢᤏ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤡᤶᤛᤕᤱᤜᤠ᤹ᤀᤥᤒᤠ ᤁᤧᤃᤠ᤺ᤶᤒᤠ ᤁᤧᤒᤵᤐᤠ ᤀᤠᤳᤋᤡᤴ ᤕᤧᤶᤒᤡᤳᤇᤠ᤺ᤴᤏᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤏᤡ᤺ᤳᤋᤠᤱ ᤔᤧᤍᤠᤏᤧᤴᤗ॥ ᤂᤧᤵᤔᤥ ᤁᤢᤕᤥᤰ ᤐᤳ॥ ᤂᤧᤴ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ ᤋᤥ᤺ᤴᤇᤧ ᤏᤡ᤺ᤳᤋᤠᤱ ᤋᤠᤔᤠ ᤔᤧᤏᤢ᤹ᤏᤧᤴ॥ 22 ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤒᤠ ᤏᤢ ᤛᤠ᤹ᤖᤡᤰ ᤛᤣᤛᤣᤒᤠ ᤁᤢᤈᤠᤴ ᤂᤧᤸᤗᤧ ᤆᤠᤔᤠ ᤛᤢᤰᤋᤢ᤹॥ 23 ᤁᤖ ᤂᤧᤵᤔᤥ ᤁᤧᤃᤠ᤺ᤶᤒᤠ ᤐᤵᤐᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤑᤥ᤺ᤴᤍᤠ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤏᤡ᤺ᤳᤋᤠᤱ ᤋᤠᤀᤠᤱ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤡᤴ ᤀᤠᤛᤢᤳᤌᤥ ᤔᤧᤈᤥᤃᤢᤴᤗ॥ ᤂᤧᤱᤜᤠ᤹ ᤛᤣᤛᤣ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ॥’” 24 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤁᤴ ᤐᤠ᤺ᤴᤜᤠ᤹ ᤆᤧᤰᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.