ᤔᤧᤖᤡᤱ ᤛᤠᤵᤐᤴ 1 - LIFOTNTᤕᤖᤢᤛᤗᤧᤔᤖᤧ ᤗᤠᤃᤡ ᤔᤧᤖᤡᤱ 1 ᤀᤠᤕᤠᤰᤁᤥ ᤔᤏᤠᤜᤠ᤹ᤖᤧ ᤌᤡᤰᤗᤧᤱ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤁᤧᤏᤧᤒᤠ ᤕᤧᤰᤕᤰᤁᤡᤴ. ᤀᤠᤸᤗ ᤀᤠᤓᤣᤗ᤹ᤖᤡᤰ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤒᤣ᥄ ᤂᤧᤱᤃ ᤔᤣᤔᤣᤍᤢᤔᤠ ᤜᤧᤰᤋᤱᤔᤠ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤂᤧᤴ ᤌᤡᤰᤗᤧᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤐᤕᤶ ᤕᤶᤔᤠ ᤜᤧᤰᤁᤩᤠᤱ ᤋᤧᤱᤃᤵᤜᤠ᤹ᤀᤥ ᤜᤠᤱᤛᤠᤔᤠ ᤜᤧᤰᤋᤱᤔᤠ ᤏᤧᤛ᤻ᤛᤧᤖᤥ. ᤀᤠᤸᤗ ᤂᤧᤴ ᤕᤥ᤺ᤃ᤻ᤔᤠᤀᤥ ᤁᤧᤎᤠᤔᤠ ᤕᤧᤰᤕᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 2 ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤂᤧᤴ ᤀᤢ᤺ᤰᤁᤠᤱ ᤀᤢ᤺ᤰ ᤜᤠ᤺ᤵᤗᤥ. ᤂᤧᤸᤗᤧ ᤁᤧᤏᤧᤍᤧᤱᤒᤥ ᤔᤡᤰᤘᤠ ᤆᤰ ᤆᤰ ᤌᤠᤀᤠᤱ ᤐᤳᤗᤥ॥ ᤂᤧᤸᤗᤧ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ᤀᤥᤗᤠᤶ. ᤂᤧᤴ ᤀᤠ᤺ᤴᤇᤡᤱᤔᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥ ᤂᤧᤸᤗᤧ ᤁᤧᤖᤧᤰ ᤁᤢᤴᤈᤢᤶᤜᤠ᤹ᤖᤧ ᤂᤢᤏᤧ᤹ ᤀᤡᤱᤗᤧᤰᤁᤥ ᤔᤧᤎᤠᤛᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤸᤗᤧ ᤁᤢᤏᤡᤱᤔᤡ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 3 ᤋᤢᤰᤂᤣ ᤗᤠᤰᤂᤣ ᤏᤢ ᤁᤧᤛᤠᤰᤐᤠ ᤕᤥᤃ᤻ᤒᤠ ᤆᤥ᤺ᤰᤔᤠ ᤀᤣᤃᤠᤱ ᤕᤜᤢᤍᤠᤴ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤘᤠ᤹ᤖᤥ॥ ᤀᤠᤸᤗ ᤂᤧᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤠ᤹ᤖᤥ. ᤂᤧᤸᤗᤧ ᤁᤢᤓᤠ ᤏᤠ᤺ᤶᤛᤡᤱᤔᤠᤍᤧᤴ ᤔᤧᤄᤥᤛᤢᤴᤗᤥ. ᤂᤧᤴ ᤁᤧᤏᤠ᤺ᤵᤐᤠᤜᤠ᤹ ᤁᤧᤖᤧᤰᤗᤧ ᤆᤡᤓᤡ᤺ᤵᤓᤡ᤺ᤵᤐᤠᤍᤧᤴᤏᤥ ᤂᤧᤴ ᤔᤧᤍᤧᤶᤛᤢᤀᤠᤱ ᤘᤠ᤹ᤖᤥ॥ 4 ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ᤀᤥ ᤀᤠᤳᤋᤡᤴᤏᤠᤱ ᤔᤧᤍᤠᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤛᤡᤕᤥᤏ ᤁᤧᤒᤣ᤺ᤰᤐᤠ ᤗᤠᤶᤜᤠ᤹ ᤜᤠ᤺ᤵ ᤆᤡᤱᤗ ᤏᤧᤖᤥ. ᤂᤧᤸᤗᤧ ᤁᤧᤖᤧᤰ ᤔᤠ ᤁᤢᤗᤠᤶᤎᤣ᤺ᤳᤜᤠ᤹ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤰᤔᤠᤖᤰ ᤔᤧᤛᤥ᤺ᤴᤇᤡᤱᤗᤥ॥ ᤂᤧᤵᤔᤥᤒᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ. ᤂᤧᤒᤩᤠᤱ ᤂᤧᤴ ᤁᤧᤛᤠᤰᤐᤠ ᤋᤢᤰᤔᤠ ᤕᤠ᤺ᤵᤔᤥ ᤌᤩᤧᤀᤠᤱ ᤏᤧᤖᤥ॥ 5 ᤂᤧᤸᤗᤧ ᤁᤢᤏᤡᤱᤔᤡᤜᤠ᤹ ᤂᤢᤏᤧ᤹ ᤁᤢᤴᤍᤠᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤂᤧᤸᤗᤧ ᤁᤢᤀᤳ ᤁᤢᤒᤠᤱᤜᤠ᤹ ᤔᤧᤏᤠ᤺ᤶᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧ ᤕᤖᤡᤰ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤋᤢᤰᤂᤣᤀᤥ ᤌᤠᤛᤢᤒᤠᤖᤥ. ᤂᤧᤸᤗᤧ ᤀᤅᤧ᤺ᤰᤘᤠ ᤁᤢᤛ᤻ᤛᤠᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤐᤢᤱᤗᤠᤜᤡᤶᤔᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹ᤖᤥ॥ 6 ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤃᤧᤖᤧᤰ ᤁᤢᤜᤠᤱᤘᤠ ᤁᤢᤔᤠᤱᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤁᤢᤗᤠᤶᤗᤥᤒᤠᤜᤠ᤹ ᤆᤠᤖᤠᤶᤔᤠᤍᤧᤴ ᤔᤧᤱᤄᤥᤶᤏᤠᤒᤠ ᤐᤧ᤺ᤱᤘᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ ᤔᤧᤴᤎᤢᤶᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤢᤴᤇᤡ᤹ ᤁᤧᤏᤠ᤺ᤵᤐᤠᤜᤠ᤹ᤗᤠᤶ ᤋᤃᤡ ᤋᤃᤡ ᤔᤧᤄᤧᤳᤇᤡᤱᤅᤠᤱ ᤔᤧᤘᤠ᤹ᤖᤥ॥ 7 ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤢᤰᤂᤣ ᤏᤢ ᤁᤢᤗᤠᤰᤂᤣᤒᤠ ᤕᤧᤴᤏᤥ ᤀᤢᤴᤇᤥᤴ ᤋᤢᤔᤢᤒᤠ ᤁᤧᤖᤧᤰ ᤀᤡᤔᤧᤸᤗᤢᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ ᤂᤢᤏᤧ᤹ ᤁᤢᤔᤏᤠᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤎᤩᤧ᤺ᤸᤗᤧ. ᤂᤧᤴ ᤁᤧᤓᤠ᤹ᤒᤠ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ. ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ᤖᤧ ᤂᤧᤴ ᤀᤥᤔᤧᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠᤀᤥ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖᤥ॥ 8 ᤕᤖᤢᤛᤗᤧ᤺ᤶᤔᤡᤸᤗᤧ ᤕᤶᤒᤠ ᤗᤠᤕᤥ ᤆᤥᤃᤢᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤠᤛᤢᤳᤌᤥ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤂᤧᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤁᤧᤖᤧᤰᤗᤧ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤗᤧᤰᤆᤠᤒᤢᤎᤢ᤺ᤰᤁᤡᤴ ᤔᤧᤏᤡᤛᤢᤀᤠᤱ ᤘᤠ᤹ᤖᤥ. ᤂᤧᤴ ᤀᤠᤵᤑᤣᤰ ᤀᤢᤄᤢᤀᤡ ᤗ᤹ᤀᤠᤱ ᤌᤡᤰᤏᤠᤜᤠᤱ ᤜᤡᤛᤡᤱᤗᤥ॥ 9 ᤂᤧᤸᤗᤧ ᤁᤢᤈᤡ᤺ᤴᤈᤡ᤺ᤴᤄᤢᤔᤠᤴ ᤁᤢᤛᤡᤶᤔᤥ ᤂᤡᤵᤋᤢᤖᤥ. ᤂᤧᤸᤗᤧ ᤁᤧᤍᤠᤒᤠ ᤋᤠᤵᤑᤧ᤺ᤶᤒᤠ ᤁᤢᤕᤧᤴᤏᤡᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤗᤥ॥ ᤂᤧᤸᤗᤧ ᤁᤢᤔᤧᤰᤔᤧᤴ ᤁᤡᤵᤔᤠ ᤁᤧᤄᤢᤒᤠ ᤆᤥᤃᤧᤖᤥ. ᤂᤧᤴ ᤜᤠᤱᤜᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥ “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤋᤢᤰᤂᤣ ᤋᤢᤔᤢᤱᤒᤧᤴ ᤀᤥᤔᤧᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤔᤡᤜᤠ᤹ ᤁᤧᤏᤠ᤺ᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤘᤠ᤹ᤖᤥ॥” 10 ᤂᤧᤸᤗᤧ ᤁᤧᤖᤧᤰ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤏᤠᤵᤔᤠᤖᤧ ᤗᤠᤃᤡ ᤏᤡᤱᤔᤡᤜᤠ᤹ᤖᤧ ᤜᤢᤰ ᤔᤧᤎᤧᤰᤋᤢᤀᤠᤱ ᤘᤠ᤹ᤖᤥ॥ ᤀᤠᤍᤠᤱᤒᤠᤖᤧ ᤁᤧᤕᤧᤈᤢᤶᤓᤥᤀᤥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤠ᤺ᤵᤔᤠ ᤁᤧᤶᤓᤠ᤺ᤰᤋᤢᤛᤡᤴᤏᤠᤱ ᤔᤧᤘᤕᤧᤖᤥ. ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛᤣᤛᤣᤍᤧᤴᤏᤥ ᤂᤧᤱᤜᤠ᤹ ᤔᤧᤗᤠᤛᤧᤒᤠ ᤏᤡᤛᤢᤛᤡᤖᤥ॥ 11 ᤂᤧᤸᤗᤧ ᤁᤠᤰ ᤁᤢᤔᤏᤠᤜᤠ᤹ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖ ᤁᤢᤈᤠ ᤁᤥ᤺ᤳᤏᤢ ᤔᤧᤘᤠ᤹ᤖᤥ. ᤂᤢᤴᤇᤡ᤹ ᤛᤰᤔᤠ ᤁᤣ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤆᤠᤔᤠ ᤁᤢᤈᤠ᤺ᤴᤏᤢ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤗᤧᤰᤋᤢᤖᤥ॥ “ᤕᤜᤘᤣ ᤍᤠᤱᤒᤠᤀᤣ. ᤀᤥᤔᤕᤧ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤱᤅᤠᤱ ᤘᤠ᤹ᤖᤥ॥” 12 “ᤁᤵᤔᤥᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤗᤠᤶᤍᤡ᤺ᤰᤐᤠᤜᤠ᤹ ᤁᤧᤖᤧᤰᤗᤧ ᤗᤠᤃᤡ ᤌᤣ ᤀᤠᤱᤃᤠ᤹ ᤌᤧᤔᤠᤀᤠᤱ ᤔᤧ᤺ᤴᤏᤠᤒᤡ᥅ ᤁᤧᤖᤧᤰ ᤐᤡᤛᤠᤱ ᤀᤥᤔᤧᤳᤋᤧᤶᤔᤧ᤹ᤀᤠᤱ ᤀᤥᤔᤢᤕᤧᤶᤔᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠᤃᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤠ ᤕᤧᤴᤏᤥ ᤂᤢᤏᤧ᤹ ᤀᤠᤱᤃᤠ᤹ ᤋᤢᤔᤢᤱᤒᤠ ᤀᤠᤍᤢᤰᤂᤣᤴ ᤜᤧᤰᤁᤣ ᤘᤣ᤹ ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤠᤓᤧᤸᤗᤧ ᤕᤧᤳᤋᤢᤰᤂᤣ ᤋᤢᤔᤢᤀᤠᤱ ᤘᤠ᤹ᤒᤡ᥅ 13 “ᤂᤢᤏᤧ᤹ ᤌᤠ᤺ᤱᤗᤠᤶᤒᤠ ᤔᤡᤴ ᤌᤠᤛᤢᤀᤠᤱ ᤘᤠ᤹ᤖᤥ. ᤂᤧᤴ ᤔᤡᤴ ᤀᤠᤱᤃᤠ᤹ ᤀᤠᤕᤧᤳ ᤛᤡᤃᤠᤱ ᤐᤠᤱᤄᤢᤖᤥ॥ ᤂᤢᤏᤧ᤹ ᤀᤠᤱᤃᤠ᤹ ᤀᤠᤗᤠᤱᤅᤥ ᤀᤡᤈᤥ ᤁᤧᤛᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢ᤺ᤰᤋᤠᤱ ᤋᤠᤖᤠᤱᤗᤥ॥ ᤂᤢᤏᤧ᤹ ᤀᤠᤱᤃᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤠᤱᤗᤥ ᤂᤧᤒᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤔᤧᤴᤎᤢᤶᤔᤏᤠᤒᤠ ᤆᤥᤃᤠᤱᤗᤥ॥ 14 “ᤀᤠᤱᤃᤠ᤹ ᤀᤠᤗᤠᤕᤥᤜᤠ᤹ ᤗᤳᤇᤠ ᤂᤧ᤺ᤵᤛᤡᤱᤅᤥ ᤀᤡᤄᤣ᤺ᤰᤂᤢᤀᤠᤱ ᤐᤳᤗᤥ. ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤂᤧᤱᤜᤠ᤹ ᤀᤡᤄᤣ᤺ᤰᤂᤢᤖᤥ. ᤂᤧᤴ ᤀᤠᤱᤃᤠ᤹ ᤀᤠᤓᤰᤋᤠᤱᤅᤥ ᤔᤧᤓᤳᤇᤢᤀᤠᤱ ᤐᤳᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤎᤢᤶᤔᤧᤴ ᤕᤢᤶᤛᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤠᤱᤗᤥ. ᤂᤧᤱᤜᤠ᤹ᤏᤢ ᤀᤠᤱᤃᤠ᤹ ᤌᤰᤔᤠ ᤔᤧᤛᤢᤰᤁᤠᤴᤗᤥ॥ 15 “ᤍᤠᤱᤒᤧᤸᤗᤧ ᤁᤧᤖᤧᤰ ᤀᤠᤎᤰᤛᤢᤒᤠᤜᤠ᤹ ᤏᤠ᤹ᤖᤢᤛᤡᤀᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤌᤠᤱᤒᤧᤴ ᤀᤠᤔᤏᤠᤜᤠ᤹ ᤋᤖ᤺ᤶᤍᤖ᤺ᤶ ᤗ᤺ᤶᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤧᤎᤢᤶᤒᤠᤜᤠ᤹ ᤑᤢᤰᤂᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ. ᤆᤧᤸᤗᤧᤰᤛᤣ᤹ ᤀᤣ᤺ᤵᤔᤏᤠᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤢᤍᤠ᤺ᤸᤗᤧ ᤛᤡᤛᤠᤃᤧᤴ ᤁᤢᤛ᤻ᤛᤠ ᤔᤧᤴᤇ᤻ᤕᤠᤴ ᤕᤢ᤺ᤳᤋᤢᤀᤠᤱ ᤘᤠ᤹ᤖᤥ॥ 16 “ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤜᤠ᤺ᤵᤔᤠᤖ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤀᤠᤔᤡᤰᤁᤥᤗᤠᤶ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ॥ ᤀᤠᤱᤃᤠ᤹ ᤜᤠᤱᤜᤠᤱ ᤔᤧᤵᤔᤠᤖᤧ ᤗᤠᤃᤡ ᤀᤠᤒᤣᤛᤠᤱ ᤜᤠ᤺ᤳᤋᤠᤱ ᤜᤥᤵᤗᤥ. ᤀᤠᤕᤠᤶᤛᤠᤶᤔᤡᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤀᤠᤛᤠ᤺ᤳᤋᤠᤱ ᤜᤥᤵᤗᤥ॥ ᤀᤠᤱᤃᤠ᤹ ᤀᤅᤧ᤺ᤰᤘᤠ ᤀᤠᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤀᤣ᤺ᤰᤛᤧᤳᤇᤠ ᤔᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤔᤡᤴ ᤌᤱ ᤁᤧᤏᤠ᤺ᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 17 “ᤐᤣᤗᤡ ᤑᤠᤰᤔᤠᤖᤧ ᤗᤠᤃᤡ ᤛᤡᤕᤥᤏᤖᤧ ᤁᤢᤜᤢᤰᤁᤡᤴ ᤛᤸᤗᤡᤰ ᤛᤴᤇᤢᤖᤥ. ᤁᤖ ᤂᤧᤴ ᤀᤠ᤺ᤴᤇᤡᤱᤔᤠ ᤁᤧᤒᤡᤒᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤁᤢᤒᤖᤧ ᤁᤢᤍᤰᤗᤧᤱᤘᤠᤀᤥ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤁᤢᤏᤡᤱᤔᤡ ᤔᤧᤒᤥᤱᤗ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤖᤢᤛᤗᤧ᤺ᤶᤔᤡᤴ ᤗᤳᤇᤠ ᤀᤠᤛᤢᤳᤌᤥ ᤐᤠᤴ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 18 “ᤕᤜᤘᤣ ᤍᤠᤱᤒᤧᤴ ᤛᤠᤶᤕᤥᤒᤠ ᤆᤥᤰᤗᤥ. ᤜᤧᤰᤁᤣᤛᤠᤱ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤗᤥ॥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤛᤣ. ᤂᤧᤵᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤀᤠᤔᤏᤠᤜᤠ᤹ ᤏᤢ ᤌᤠᤱᤒᤧᤴ ᤀᤠᤔᤏᤠᤜᤠ᤹ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹ᤖᤥ॥ 19 “ᤀᤠᤱᤃᤠ᤹ ᤀᤠᤴᤈᤢᤶ ᤀᤠᤴᤍᤣᤱᤒᤠᤜᤠ᤹ ᤀᤢ᤺ᤳᤋᤢᤱᤛᤡᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤡᤱᤗᤧᤰᤁᤥ ᤔᤧᤎᤠᤛᤠᤱᤗᤥ॥ ᤕᤠᤶᤔᤥ ᤜᤡᤱᤔᤠᤖᤧ ᤗᤠᤃᤡ ᤆᤠᤔᤠ ᤁᤢᤈᤠᤜᤠ᤹ ᤔᤧᤃᤥ᤺ᤳᤋᤢᤀᤠᤱ ᤔᤧᤱᤄᤥᤛᤢᤴᤏᤡᤸᤗᤧ ᤕᤧᤰᤕᤰᤁᤥ ᤀᤠᤱᤃᤠ᤹ ᤀᤠᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤀᤠᤗᤠᤶᤗᤥᤒᤠᤜᤠ᤹ ᤔᤧᤔᤧᤃᤧᤖᤥ॥ 20 “ᤕᤜᤘᤣ ᤍᤠᤱᤒᤠᤀᤣ. ᤀᤥᤔᤧᤳᤋᤧ᤹ᤀᤥ. ᤋᤢᤰᤂᤣᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤛᤠ᤹ᤖᤡᤰ ᤐᤡᤑᤩᤢᤱᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤠᤴ ᤕᤠ᤺ᤳᤗᤥ. ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤀᤠᤛᤡᤃᤠᤱ ᤌᤠᤶᤛᤡᤱ ᤔᤢᤱᤛᤡᤱᤗᤥ॥ ᤗᤠ᤺ᤰᤁᤠᤳ ᤋᤠᤓᤣ᤺ᤸᤗᤧ ᤔᤏᤠ ᤛᤩᤧᤖᤢᤛᤡᤖᤥ. ᤛᤡᤃᤠᤱ ᤂᤧᤵᤔᤥ ᤛᤡᤔᤠᤖᤰ ᤘᤠ᤹ᤖᤥ॥ 21 “ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤕᤠ᤺ᤳᤋᤠᤒᤠᤴ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ. ᤁᤖ ᤀᤠᤱᤃᤠ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥ ᤀᤠᤱᤃᤠ᤹ ᤁᤧᤖᤧᤰ ᤀᤠᤏᤡᤱᤔᤡᤜᤠ᤹ᤖᤧ ᤀᤠᤕᤧᤳᤋᤢᤰᤂᤣᤴ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ. ᤀᤠᤍᤠᤱᤒᤠᤖᤧ ᤀᤰᤂᤣ ᤁᤧᤈᤥᤃᤢᤒᤠᤀᤥ ᤂᤧᤱᤜᤠ᤹ ᤔᤧᤛ᤺ᤳᤗᤥ॥ ᤀᤠᤍᤠᤱᤒᤠᤖᤧ ᤀᤢᤘᤠ ᤁᤧᤈᤥᤃᤢᤒᤠ ᤕᤧᤴᤏᤡᤴ ᤁᤧᤍᤠᤖᤢᤖᤥ. ᤂᤶᤓᤩᤠᤱ ᤂᤧᤱᤜᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱᤒᤠᤀᤣ ᤔᤧᤒᤥᤱᤗᤖᤥ॥ 22 “ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤂᤰᤐᤧᤳ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤋᤠᤖᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤀᤠᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤔᤧᤳᤋᤠᤱᤒᤠ ᤜᤧᤰᤁᤣ ᤂᤧᤱᤜᤠ᤹ᤀᤠᤱ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤧᤛᤧ᤹ᤀᤥ॥ ᤀᤠᤱᤃᤠ᤹ ᤛᤠ᤹ᤖᤡᤰ ᤕᤖᤡᤰ ᤕᤠ᤺ᤳᤋᤠᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤀᤠᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.