ᤕᤥᤏᤠ 1 - LIFOTNT

ᤕᤥᤏᤠᤴ ᤂᤧᤳᤇᤡᤱ

¹ ᤌᤡᤰᤕᤧᤴ ᤀᤔᤡᤳᤋᤤᤖᤧ ᤁᤢᤛ᤻ᤛᤠ ᤕᤥᤏᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤅᤡᤴ ᤁᤧᤖᤧ॥

² ᤂᤢᤏᤧ᤹ ᤔᤧᤳᤋᤢ. “ᤂᤧᤴ ᤛᤠ᤹ᤖᤡᤰ ᤕᤶᤒᤠ ᤕᤧᤰᤕᤰ ᤏᤡᤏᤒᤣᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠᤖᤧ᤹॥ ᤂᤧᤵᤔᤥᤒᤠ ᤔᤏᤠᤜᤠ᤹ ᤀᤠᤂᤩᤠᤖᤡᤰ ᤛᤠ᤹ᤖᤡᤰ ᤋᤠᤰᤁᤧᤓᤧ᤹ᤒᤠ ᤔᤧᤈᤥᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹॥”

³ ᤁᤖ ᤕᤥᤏᤠᤴ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤳᤇᤡᤱᤔᤠ ᤐᤣ᤺ᤰᤔᤠᤖᤧ ᤗᤠᤃᤡ ᤘᤣ᤹ ᤗᤧᤵᤔᤠᤱ ᤌᤠᤛᤡᤱ॥ ᤂᤢᤏᤧ᤹ ᤕᤥ ᤕᤥᤵᤐᤠ ᤕᤧᤰᤕᤰᤁᤥ ᤁᤧᤖᤧ ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤋᤷᤛᤡᤛ ᤗᤧᤵᤔᤠᤱ ᤁᤧᤒᤣ᤺ᤰᤐᤠ ᤗᤳᤇᤠ ᤘᤠᤗᤠᤎᤠᤎᤡᤰ ᤂᤥᤛᤢ॥ ᤜᤧᤰᤁᤩᤠᤱ ᤋᤷᤛᤡᤛ ᤐᤣ᤺ᤰᤔᤠ ᤑᤠ᤹ᤀᤠᤱ ᤑᤠ᤹ᤕᤠᤱ ᤜᤢᤅᤢᤀᤠᤱ ᤘᤠᤗᤠᤎᤠᤀᤥ ᤗᤠᤛᤧ॥ ᤋᤷᤛᤡᤛᤀᤥ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤐᤥᤱᤅᤠ᤹ ᤁᤧᤗ᤹ᤒᤠ ᤂᤢᤏᤧ᤹ ᤀᤡ᤺ᤳᤋᤢᤀᤠᤱ ᤘᤕᤧ॥

⁴ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤘᤖ᤺ᤱᤅᤥ ᤛᤠ᤹ᤖᤡᤰ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤛᤢ॥ ᤘᤖ᤺ᤱᤅᤥ ᤛᤠ᤹ᤖᤡᤰ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤖᤧ ᤜᤧᤰᤁᤩᤠᤱ ᤘᤠᤗᤠᤎᤠᤴ ᤂᤵᤔᤧᤴ ᤕᤖᤧᤒᤣ॥

⁵ ᤘᤠᤗᤠᤎᤠᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤃᤡᤛᤧ ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤀᤠᤒᤠᤅᤣ ᤀᤠᤒᤠᤅᤣ ᤂᤢᤴᤇᤡ᤹ ᤔᤠᤱᤜᤠ᤹ ᤐᤣᤗᤡ ᤑᤠᤰᤔᤠ ᤔᤧᤜᤣ᤺ᤰᤋᤢᤛᤡ॥ ᤂᤧᤴ ᤀᤣᤃᤠᤱ ᤘᤠᤗᤠᤎᤠᤴ ᤔᤧᤏᤡ᤺ᤵᤏᤧᤸᤗ ᤑᤠ᤹ᤀᤠᤱ ᤆᤡᤃᤰᤘᤠᤜᤠ᤹ ᤘᤖ᤺ᤱᤅᤥ ᤗᤠᤵᤑᤢᤔᤠ ᤔᤧᤜᤣ᤺ᤰᤋᤢ॥ ᤁᤖ ᤕᤥᤏᤠᤴ ᤘᤠᤗᤠᤎᤠ᤺ᤸᤗᤧ ᤕᤥ ᤁᤢᤛᤡᤃᤠᤱᤒᤠ ᤆᤡᤃᤰᤘᤠ ᤕᤢᤱᤔᤠᤍᤧᤴᤏᤥ ᤔᤢᤖᤢᤰ ᤂᤠᤖᤢᤰ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥

⁶ ᤘᤠᤗᤠᤎᤠ ᤁᤧᤗᤥᤱᤒᤠ ᤌᤰᤋᤢᤶᤒᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤢᤔᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤀᤡᤶᤔᤠᤱ ᤌᤣ ᤁᤧᤈᤥ᤺ᤰᤁᤠᤱ ᤁᤧᤏᤧᤒᤠ᥅ ᤐᤥᤃᤧ᤹ᤀᤠᤱ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤧ᤹॥ ᤂᤢᤏᤧ᤹ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤁᤠᤱ ᤀᤠᤏᤡ᤹ ᤜᤡᤱᤔᤧᤴ ᤛᤧ᤺ᤵᤋᤢ ᤀᤠᤒᤡᤒᤡ॥”

⁷ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤛᤡᤱᤈᤣ᤺ᤰ ᤀᤧᤰᤂᤢᤶ ᤛᤠ᤹ᤖᤢᤶ ᤜᤠ᤺ᤳᤗᤧ ᤆᤥᤃᤢᤸᤗᤧ ᤁᤴ ᤋᤢᤰᤂᤣᤴ ᤀᤠᤏᤡ᤹ ᤛᤶᤎᤠᤱ ᤋᤩᤧᤒᤠᤒᤣ॥” ᤂᤧᤱᤜᤠ᤹ᤖᤧ ᤛᤡᤱᤈᤣ᤺ᤰ ᤔᤧᤀᤧᤰᤂᤢ ᤜᤧᤰᤁᤩᤠᤱ ᤕᤥᤏᤠᤖᤧ ᤁᤢᤔᤡᤱᤅᤥ ᤆᤢᤰᤋᤧ॥

⁸ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤗᤢ. ᤀᤠᤸᤗ ᤀᤥᤔᤧᤳᤋᤧ᤹ ᤜᤠ᤺ᤳᤗᤧ ᤆᤥᤃᤢᤸᤗᤧ ᤁᤴ ᤕᤧᤳᤋᤢᤰᤂᤣᤴ ᤀᤠᤏᤡ᤹ ᤛᤶᤎᤠᤱ ᤆᤢᤰᤋᤧᤒᤠᤒᤣ᥅ ᤂᤧᤏᤧ᤹ ᤌᤧᤔᤠ ᤕᤠ᤺ᤶᤒᤰ ᤁᤧᤈᤥᤰ᥅ ᤀᤠᤳᤋᤠᤴᤏᤢ ᤁᤧᤍᤩᤧᤒᤠ᥅ ᤂᤧᤏᤧ᤹ ᤀᤠᤳᤋᤡ ᤗᤠᤈᤣᤒᤠᤏᤧ᥅ ᤂᤧᤏᤧ᤹ ᤀᤠᤳᤋᤡᤴ ᤛᤢᤒᤠᤱᤛᤔᤠᤏᤧᤒᤣ᥅”

⁹ ᤕᤥᤏᤠ᤺ᤸᤗᤧ ᤏᤢᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤜᤡᤒᤪᤢᤀᤠ॥ ᤆᤫᤠ᤺ᤳ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤧᤵᤔᤠᤱ ᤁᤧᤈᤥ᤺ᤰᤐᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤜᤘᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤔᤧᤳᤋᤢᤱ॥”

¹⁰ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤳᤇᤡᤱᤒᤠ ᤐᤠ᤺ᤴᤏᤡᤴ ᤕᤥᤏᤠᤖᤧ ᤂᤧᤱᤜᤠ᤹ ᤆᤧᤰᤋᤢᤛᤡ॥ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤁᤡᤵᤔᤠ ᤁᤧᤄᤢᤒᤠ ᤕᤠ᤺ᤶᤒᤰᤏᤧ ᤁᤧᤈᤥᤃᤢᤖᤧᤳᤇ॥”

¹¹ ᤛᤢᤖᤡᤳ ᤁᤣᤈᤱᤅᤡᤴ ᤆᤰᤔᤧᤸᤗ᤹ᤀᤣ ᤐᤥᤖᤧᤖ ᤐᤳᤇᤧ॥ ᤂᤧᤸᤗᤧᤆᤥᤃᤢᤸᤗᤧ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤗᤠᤵᤋᤢ. “ᤛᤢᤖᤡᤳ ᤁᤣᤈᤱᤅᤡᤴ ᤆᤰ ᤌᤠᤖ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤂᤧᤏᤧ᤹ ᤌᤧᤔᤠ ᤔᤧᤳᤋᤠᤛᤡᤃᤧᤒᤠᤒᤣ᥅”

¹² ᤕᤥᤏᤠᤖᤧ ᤏᤢᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤘᤖ᤺ᤱᤅᤥ ᤗᤠᤵᤀᤠᤓᤢᤛᤧ᤹ ᤜᤧᤰᤁᤩᤠᤱ ᤘᤖ᤺ᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤐᤥᤱ᤹॥ ᤀᤠᤱᤃᤠ᤹ ᤆᤥᤃᤢᤱᤅᤡᤸᤗᤧ ᤁᤴ ᤛᤢᤖᤡᤳ ᤁᤣᤈᤱᤅᤥ ᤂᤡᤏᤡ᤹ ᤁᤧᤎᤩᤧ᤹ᤀᤡᤒᤠ ᤑᤠ᤹ᤀᤠᤱ ᤏᤡᤛᤢᤱ॥”

¹³ ᤜᤧᤰᤁᤣᤛᤠᤱ ᤘᤠᤗᤠᤎᤠᤴ ᤁᤢᤛᤢᤰᤐᤥ ᤌᤠᤖᤡᤰ ᤋᤣ᤹ᤔᤠ ᤑᤠ᤹ᤀᤠᤱ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤆᤠᤸᤗᤡᤰ ᤔᤧᤈᤠᤃᤢ॥ ᤁᤖ ᤛᤢᤖᤡᤳ ᤁᤣᤈᤱᤅᤡᤴ ᤀᤠᤸᤗᤛᤠᤱ ᤆᤠᤸᤗᤡᤰ ᤐᤥᤖᤧᤖ ᤐᤳᤇᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤧᤴᤏᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴ॥

¹⁴ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢᤖ ᤔᤧᤀ᤺ᤰᤋᤧ. “ᤕᤜᤘᤣ ᤍᤠᤱᤒᤠᤀᤣ᥄ ᤀᤠᤏᤡᤃᤣ ᤐᤣᤗᤡ ᤑᤠᤰᤁᤠᤛᤡᤃᤧ. ᤁᤴ ᤔᤏᤠ᤺ᤸᤗᤧ ᤁᤢᤜᤡᤱᤔᤧᤸᤗᤧ ᤁᤢᤗᤧᤰᤘᤠᤀᤥ ᤀᤠᤏᤡᤃᤣ ᤜᤡᤱᤔᤴ ᤔᤧᤍᤣ᤹ᤖᤧᤴᤏᤧ᤹ᤀᤥ᥄ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤧᤏᤧ᤹ᤀᤣ ᤗᤰᤐᤧᤴᤛᤠᤒᤠ ᤁᤧᤘᤠ᤹॥ ᤁᤴ ᤁᤧᤖᤧᤰ ᤜᤠᤒᤠ ᤂᤧᤏᤧ᤹ᤀᤣ ᤐᤥᤱᤔᤠ ᤁᤧᤒᤠᤱᤄᤢᤒᤠᤖᤥ॥”

¹⁵ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤕᤥᤏᤠᤴ ᤔᤧᤒᤰᤂᤢᤀᤠᤱ ᤁᤧᤜᤢ᤺ᤰᤐᤠᤖ ᤁᤧᤒᤵᤐᤠ ᤘᤖ᤺ᤱᤅᤥ ᤗᤠᤵᤔᤧᤓᤢᤛᤢ ᤜᤧᤰᤁᤩᤠᤱ ᤘᤖ᤺ᤱᤅᤡᤴ ᤂᤡᤔᤥ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤀᤠᤱ ᤆᤡᤵᤋᤢ॥

¹⁶ ᤜᤧᤰᤁᤣ ᤐᤥ᤺ᤰᤂᤧᤒᤠᤸᤗᤧ ᤂᤧᤴ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤔᤧᤃᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤁᤢᤛᤧᤘᤠ ᤆᤥ᤺ᤰᤔᤠ ᤔᤠᤱᤜᤧᤰ ᤔᤧᤈᤥᤃᤢ॥

¹⁷ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤗᤳᤇᤠ ᤛᤠ᤹ᤖᤡᤰ ᤕᤶᤒᤠ ᤅᤠ᤺ᤸᤗᤧ ᤕᤥᤏᤠᤴ ᤗᤖᤢᤍᤣᤛᤢ ᤜᤧᤰᤁᤩᤠᤱ ᤂᤧᤴ ᤅᤠ᤺ᤸᤗᤧ ᤁᤢᤛᤠᤰᤐᤥ᤺ᤰᤐᤥ ᤂᤢᤏᤧ᤹ ᤛᤢᤶᤕᤧᤴ ᤏᤢ ᤛᤢᤶᤛᤧᤴ ᤌᤠᤖᤡᤰ ᤕᤠᤃᤧᤖᤥ॥