ᤕᤷᤔᤡᤕᤠ 3 - LIFOTNT

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤁᤢᤓᤠ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤖᤥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤗᤧᤖᤢᤀᤠᤱ ᤘᤣ᤹ ᤕᤧᤶᤒᤡᤳᤇᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤖᤥ ᤜᤧᤰᤁᤣᤏᤧᤓᤃᤪ ᤂᤧᤴ ᤔᤏᤠ᤺ᤸᤗᤧ ᤕᤠᤶᤔᤥ ᤂᤧᤴ ᤔᤧᤴᤇᤢᤔᤠᤴ ᤜᤡᤶᤔᤥ ᤏᤢ᤺ᤰᤔᤠ ᤋᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤜᤧᤰᤁᤣ ᤆᤥ᤺ᤰᤔᤠᤸᤗᤧ ᤁᤧᤖᤧᤰ ᤗᤠᤈᤣᤴ ᤆᤡ᤺ᤴᤈᤡᤴ ᤁᤧᤄᤢᤒᤠ ᤐᤥᤱᤗᤥ॥ ᤁᤖ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤕᤖᤡᤰ ᤁᤧᤎᤠᤱᤒᤧᤴᤜᤠ᤹ᤏᤢ ᤁᤧᤒᤥ᤺ᤳᤋᤧᤖᤥ ᤜᤧᤰᤁᤩᤠᤱ ᤕᤠᤶᤔᤥ ᤀᤠᤱᤃᤠ᤹ᤀᤥ ᤏᤢ᤺ᤱᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤈᤥᤃᤢᤖᤥ᥄”

² ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤀᤥᤔᤧᤳᤋᤧ᤹ᤀᤥ॥ ᤂᤧᤏᤧ᤹ ᤁᤧᤎᤠᤱᤒᤧᤴᤜᤠ᤹ᤏᤢ ᤁᤧᤀᤡᤵᤛᤧᤶᤒᤠᤍᤧᤴᤏᤡᤴ ᤀᤠᤳᤋᤡ ᤏᤧᤒᤣ᥅ ᤗᤳᤇᤠ ᤑᤠ᤺ᤴᤍᤠᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤔᤏᤠᤜᤠ᤹ ᤏᤠᤵᤔᤠᤛᤡ ᤑᤠ᤹ᤀᤠᤱ ᤔᤏᤠ ᤛᤢᤰᤐᤠ ᤜᤧᤰᤁᤣᤀᤣ ᤂᤧᤏᤧ᤹ ᤗᤠᤶᤒᤣᤛᤠᤱ ᤁᤧᤕᤧᤵᤐᤠᤱ ᤁᤧᤎᤠᤱᤒᤧᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤀᤥᤃᤧᤔᤧᤳᤋᤢᤖᤥ॥ ᤂᤧᤏᤧ᤹ᤃ ᤋᤠᤵᤑᤧ᤺ᤶᤒᤠ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤗᤥ ᤁᤧᤳᤏᤡᤔᤠ ᤁᤧᤈᤥ᤺ᤰᤔᤠᤖᤧ ᤗᤠᤈᤣᤴ ᤁᤧᤈᤡ᤺ᤴᤍᤢᤖᤥ॥

³ ᤂᤧᤸᤗᤧᤆᤥᤃᤢᤸᤗᤧ ᤆᤧᤖᤧᤱᤏᤠᤶ ᤌᤧᤖᤧᤱᤏᤠᤶᤒᤠ ᤐᤠᤱᤃᤧᤴᤍᤡᤱ ᤘᤜᤡᤳᤋᤡᤴ ᤔᤧᤎᤩᤧᤏᤧᤸᤗᤥ. ᤜᤧᤰᤁᤩᤠᤱ ᤜᤠᤱᤘᤠᤔᤠ ᤕᤧᤶᤔᤥ ᤐᤠᤱᤃᤧᤴᤍᤡᤱ ᤘᤃᤣ᤺ᤰᤔᤠᤀᤠᤱ ᤐᤵᤔᤠ ᤏᤠ᤹ᤖᤧᤖᤥ॥ ᤂᤧᤏᤧ᤹ ᤁᤧᤏᤠᤖᤠᤴᤏᤠᤱ ᤁᤧᤳᤏᤡᤔᤠ ᤁᤢᤀᤡᤛᤡᤰ ᤏᤡᤍᤧᤳᤗᤥ. ᤂᤧᤏᤧ᤹ ᤁᤧᤏᤢ᤺ᤶᤔᤠ ᤌᤣᤀᤠᤱ ᤜᤥᤵᤗᤥ॥

⁴ “ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤸᤗ ᤀᤠᤱᤃᤠ᤹ ᤀᤰᤂᤣ ᤁᤧᤔᤧᤳᤋᤠᤖᤥ. ‘ᤂᤧᤏᤧ᤹ᤃ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤁᤧᤘᤠ᤹ᤖᤥ. ᤀᤠᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤂᤧᤏᤧ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤅᤠᤱ ᤁᤧᤘᤠ᤹ᤖᤥ॥

⁵ ᤌᤣ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤀᤠᤓᤧᤸᤗᤧᤛᤠᤱ ᤁᤧᤛᤡᤰ ᤐᤥ᤺ᤰᤐᤡ᥅ ᤌᤣ ᤂᤧᤏᤧ᤹ ᤛᤍᤠᤍᤡᤱ ᤀᤠᤍᤰᤗᤧᤱᤘᤠᤀᤥ ᤁᤧᤘᤠ᤹ᤒᤡ᥅’ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤐᤠ᤺ᤵᤔᤠᤃ ᤜᤧᤰᤁᤣᤀᤣ ᤁᤧᤒᤠ᤺ᤳᤋᤢᤖᤥ ᤁᤖ ᤂᤧᤏᤧ᤹ ᤁᤧᤛᤢᤰᤛᤢᤰ ᤋᤠᤵᤑᤧ᤺ᤶᤒᤠ ᤁᤧᤈᤥᤃᤢᤖᤥ॥”

ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤡᤛᤪᤠᤀᤡᤗ

⁶ ᤕᤥᤛᤡᤕᤠᤜᤴ ᤜᤠᤱ ᤘᤕᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤺ᤸᤗᤧ ᤜᤧᤰᤁᤣ ᤀᤡᤛᤪᤠᤀᤡᤗᤖᤧ ᤌᤣᤎᤣ ᤆᤥᤃᤢ. ᤌᤣ ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤂᤧᤸᤗᤧ ᤀᤠᤱᤃᤠ᤹ ᤗᤧᤵᤔᤠᤱ ᤀᤠᤒᤠᤅᤣ ᤁᤢᤀᤣ᤺ᤰᤌᤠ᤺ᤰᤔᤠᤴ ᤜᤡᤛᤠᤱ ᤐᤡᤖᤠᤱ ᤜᤧᤰᤁᤩᤠᤱ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤏᤢ ᤁᤧᤖᤧᤰ ᤛᤖᤣ᤺ᤰᤕᤠ᤺ᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢ॥

⁷ ᤂᤧᤸᤗᤧ ᤂᤧᤴ ᤁᤧᤖᤧᤰ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢᤖᤢᤀᤠᤱ ᤀᤠᤱᤃᤠ᤹ ᤗᤧᤵᤔᤠᤱ ᤛᤧᤰᤂᤠᤀᤣ ᤏᤢ᤺ᤱ ᤁᤧᤗ᤹ᤒᤠ ᤀᤡ᤺ᤳᤋᤢᤱᤅᤠᤱ ᤘᤕᤠᤱ ᤁᤖ ᤂᤧᤴ ᤔᤧᤏᤢ᤺ᤰᤂᤧᤴ॥ ᤂᤧᤸᤗᤧ ᤁᤢᤴᤛᤠ᤹ ᤀᤡᤱᤀᤠᤗᤧᤰᤗᤧᤰᤔᤠ ᤕᤜᤢᤍᤠ᤺ᤸᤗᤧᤀᤠᤱ ᤂᤧᤴ ᤏᤡᤛᤢ॥

⁸ ᤀᤠᤱᤃᤠ᤹ ᤏᤠ᤹ᤖᤠᤱᤅᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤏᤠ᤹ᤖᤢᤱᤅᤠᤱ ᤜᤡᤶᤔᤥᤗᤠᤶᤒᤠ ᤏᤠ᤺ᤳᤋᤢᤱᤒᤠ ᤏᤡᤛᤢᤛᤠᤱ ᤂᤧᤸᤗᤧ ᤁᤢᤴᤛᤠ᤹ ᤀᤡᤱᤗᤧᤰᤛᤢᤘᤠᤔᤠ ᤕᤜᤢᤍᤠᤴ ᤔᤧᤃᤡᤛᤧᤴ॥

⁹ ᤕᤠᤶᤔᤥ ᤂᤧᤴᤏᤠᤱᤏᤡ ᤔᤧᤴᤏᤢ᤺ᤴᤏᤣ ᤁᤧᤳᤏᤡᤔᤠ ᤐᤥ᤺ᤰᤂᤧ॥ ᤂᤧᤸᤗᤧ ᤗᤠᤈᤣᤴ ᤕᤠᤶᤃᤧᤛᤡᤱᤒᤠ ᤆᤥᤃᤢ. ᤛᤡᤱᤒᤢᤱᤅᤡᤴ ᤏᤢ ᤗᤢᤱᤜᤠ᤹ ᤔᤠᤱᤛᤧᤘᤠ ᤔᤧᤳᤋᤢᤛᤡᤀᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢ॥

¹⁰ ᤂᤧᤴ ᤀᤣᤃᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤡᤛᤪᤠᤀᤡᤗᤖᤧ ᤁᤢᤴᤛᤠ᤹ ᤀᤡᤱᤀᤠᤗᤧᤰᤗᤧᤰᤔᤠ ᤕᤜᤢᤍᤠᤴ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤏᤢ᤺ᤱᤔᤠ ᤗᤠᤶᤛᤡᤱ ᤁᤖ ᤂᤧᤸᤗᤧ ᤁᤢᤛᤡᤰᤗᤢᤱᤔᤠᤴ ᤀᤠᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤰᤋᤢᤴ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

¹¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤡᤛᤪᤠᤀᤡᤗᤖᤧ ᤀᤠᤱᤃᤠ᤹ ᤏᤠ᤹ᤖᤠᤱᤛᤠᤱ ᤀᤡᤱᤗᤧᤰ ᤁᤧᤈᤥ᤺ᤰᤔᤠ ᤕᤜᤢᤍᤠ᤺ᤴᤏᤢ᤺ᤸᤗᤧ ᤛᤢ᤺ᤸᤗᤡᤰᤗᤰ ᤀᤠᤵᤋᤡᤰᤛᤠᤔᤠ ᤆᤥᤰ॥”

¹² ᤂᤢᤏᤧ᤹ ᤀᤠᤱᤃᤠ᤹ ᤌᤥ ᤌᤠᤱᤃᤧᤴ ᤐᤡᤛᤠᤱ ᤐᤣ᤺ᤰᤔᤠᤀᤠᤱ ᤀᤡᤛᤪᤠᤀᤡᤗᤧᤴ ᤀᤰᤂᤣ ᤔᤧᤵᤔᤠ ᤀᤡᤱᤈᤠᤱ ᤐᤡᤖᤠᤱᤗᤥ. “ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤗᤧᤵᤔᤠᤱ ᤏᤢ᤺ᤰᤂᤧ᤹ᤀᤥ॥ ᤀᤠᤱᤃᤠ᤹ ᤁᤧᤏᤢ᤹ᤒᤠ ᤆᤥ᤺ᤰᤁᤠᤖᤥ ᤀᤠᤱᤃᤠ᤹ ᤀᤠᤓᤧᤸᤗᤧᤛᤠᤱ ᤂᤧᤏᤧ᤹ᤏᤢ ᤀᤠᤛᤡᤰ ᤔᤧᤒᤥ᤺ᤰᤏᤧᤴᤏᤠᤱ ᤔᤧᤒᤳᤏᤧᤸᤗᤥ॥

¹³ ᤂᤧᤏᤧ᤹ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤁᤧᤒᤥᤃᤧᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤧᤴᤗᤥ ᤁᤧᤖᤧᤰ ᤛᤖᤣ᤺ᤰᤕᤠ᤺ᤵᤐᤠ ᤛᤡᤱᤒᤢᤱᤔᤠ ᤛᤡᤃᤠᤱ ᤘᤣ᤹ ᤔᤠᤱ ᤛᤠᤶᤔᤠᤱᤜᤠ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤖᤥ ᤂᤧᤴ ᤐᤠ᤺ᤴᤏᤥ ᤀᤠᤵᤋᤡᤰᤛᤠᤒᤠ ᤐᤥᤱᤔᤠ ᤋᤧᤴᤍᤧ᤹ᤀᤥ॥” ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

¹⁴ “ᤏᤛᤠᤴ ᤁᤧᤜᤥᤵᤐᤠ ᤔᤏᤠᤛᤣ. ᤀᤠᤱᤃᤠ᤹ ᤗᤧᤵᤔᤠᤱ ᤏᤢ᤺ᤰᤂᤧᤶᤔᤧ᤹ᤀᤥ. ᤀᤠᤱᤃᤠ᤹ ᤂᤡᤏᤡ᤹ ᤍᤠᤱᤒᤠᤀᤠᤖᤥ॥ ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰ ᤕᤧᤰᤕᤰᤗᤠᤶᤒᤠ ᤗᤳᤇᤠ ᤜᤧᤰᤁᤩᤠᤱ ᤁᤧᤖᤧᤰ ᤌᤠ᤺ᤰᤗᤠᤶᤒᤠ ᤏᤧᤵᤑᤢ ᤏᤧᤵᤑᤢ ᤋᤣ᤹ᤏᤡᤱᤗᤥ ᤜᤧᤰᤁᤩᤠᤱ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱᤗᤥ॥

¹⁵ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤛᤡᤰᤗᤢᤱᤔᤠ᤹ ᤁᤢᤛᤡᤱᤃᤧᤏᤡ᤺ᤵᤐᤠ ᤔᤧᤸᤗᤢᤰᤁᤶᤒᤠᤜᤠ᤹ ᤂᤡᤏᤡ᤹ ᤐᤡᤏᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠ ᤗᤠᤶᤔᤥ ᤗᤠᤶ ᤁᤧᤶᤗᤥᤛᤡᤖᤥ॥

¹⁶ “ᤜᤧᤰᤁᤩᤠᤱ ᤁᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤏᤡ᤺ᤳᤔᤧᤴᤍᤧᤳᤋᤣ ᤁᤧᤒᤥᤖᤡᤀᤠᤱ ᤔᤏᤠᤜᤠ᤹ᤖᤧ ᤀᤠᤔᤠᤱᤜᤢᤵᤐᤡᤸᤗᤧ ᤛᤴᤍᤥᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠᤴ ᤐᤠ᤺ᤵᤔᤠ ᤆᤠᤜᤠ ᤔᤧᤈᤥᤰᤏᤧᤴᤗᤥ॥ ᤂᤧᤱᤜᤠ᤹ ᤂᤧᤴ ᤆᤠᤜᤠ ᤔᤧᤈᤥᤰᤏᤧᤴ॥ ᤂᤧᤒᤩᤠᤱ ᤂᤧᤴ ᤂᤧᤱᤜᤠ᤹ ᤕᤠᤶᤔᤥ ᤆᤠᤜᤠ ᤔᤧᤴᤈᤥ᤺ᤰᤏᤧᤴ॥

¹⁷ ᤂᤧᤴ ᤕᤧᤶᤔᤡᤴ ᤋᤠᤀᤠᤱ ᤕᤖᤢᤛᤗᤧ᤺ᤶᤔᤡᤴ ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤕᤢᤰᤏᤠ’ ᤔᤧᤔᤧᤳᤋᤢ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤛᤧ ᤔᤧᤈᤢᤶ॥ ᤂᤧᤱᤜᤠ᤹ ᤂᤢᤴᤇᤡ᤹ ᤜᤠᤍᤡᤱᤎᤰᤔᤠ ᤏᤢ ᤛᤡᤰᤗᤢᤱᤔᤥᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤀᤥ ᤕᤠᤶᤔᤥ ᤀᤠᤑᤠᤸᤗᤧᤀᤠᤱ ᤔᤧᤶᤒᤳᤏᤧᤴ॥

¹⁸ ᤂᤧᤴ ᤕᤧᤶᤔᤥ ᤕᤜᤢᤍᤠᤴ ᤀᤡᤛᤪᤠᤀᤡᤗᤧᤴᤏᤢ ᤋᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤡᤰᤜᤢᤵᤐᤥ ᤌᤠᤱᤃᤧᤳ ᤗᤧᤵᤔᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤗᤠᤈᤣ᤹ᤗᤠᤶᤒᤠ ᤔᤧᤏᤢ᤺ᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤴᤇᤡ᤹ ᤗᤰ ᤜᤧᤰᤁᤣ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤍᤠᤖᤥ॥”

¹⁹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤀᤠᤒᤠᤅᤣ ᤀᤠᤒᤢᤃᤧᤴ ᤀᤠᤛ᤻ᤛᤠ ᤆᤥ᤺ᤰᤔᤠᤏᤧ ᤀᤠᤏᤡᤱᤘᤠ᤹ ᤘᤕᤧᤖᤥ ᤗᤳᤌᤡᤰ ᤛᤢᤰᤂᤣᤘᤠᤒᤠ ᤗᤠᤈᤣ᤹ ᤏᤢ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤧᤘᤧᤶᤒᤠ ᤗᤠᤈᤣ᤹ ᤐᤡᤔᤠᤏᤧ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤧᤖᤥ. ᤂᤧᤏᤧ᤹ ᤀᤠᤱᤃᤠ᤹ ‘ᤀᤠᤶᤒᤦ’ ᤗ᤹ᤖᤡᤰ ᤕᤠᤵᤔᤡ ᤁᤧᤀᤢ᤺ᤳᤋᤡ ᤑᤠ᤹ᤀᤠᤱ ᤀᤡ᤺ᤳᤋᤢᤱᤅᤠᤱ ᤘᤕᤧᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤕᤠᤵᤔᤡ ᤁᤧᤸᤗᤧᤳᤏᤧᤶᤒᤠ ᤀᤠᤏᤡᤱᤘᤠ᤹ ᤘᤕᤧᤖᤥ॥

²⁰ ᤁᤖ ᤏᤠᤛᤠ᤹ᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤣ᤺ᤳᤋᤡᤸᤗᤧ ᤁᤢᤕᤧᤶᤒᤠ᤺ᤴ ᤗᤧᤖᤢᤖᤥ ᤂᤧᤴ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤋᤠᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

²¹ ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤀᤡᤰᤗᤠᤎᤡᤰ ᤂᤧᤶᤍᤧᤳᤗᤥ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤜᤠ᤺ᤵ ᤔᤧᤓᤡ᤺ᤰᤗ ᤐᤣᤗᤡ ᤔᤧᤓᤠᤰᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤗᤠᤕᤥᤀᤥ ᤂᤢᤴᤇᤡ᤹ ᤜᤡᤱᤔᤴ ᤔᤧᤍᤣᤛᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤀᤠᤱ ᤔᤧᤘᤠ᤹ᤖᤥ॥

²² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤣ᥄ ᤂᤡᤏᤡ᤹ ᤁᤧᤖᤧᤰ ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤶᤔᤧ᤹ᤀᤠᤱ ᤋᤩᤧᤶᤔᤧ᤹ᤀᤥ. ᤀᤠᤱᤃᤠ᤹ ᤂᤡᤏᤡ᤹ ᤘᤣ᤺ᤴᤏᤧᤏᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤏᤛᤠ᤺ᤴᤛᤠᤒᤠ ᤆᤥ᤺ᤰᤏᤡᤱᤗᤥ॥” ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. “ᤀᤥᤖᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤂᤧᤏᤧ᤹ᤀᤥ ᤏᤢ᤺ᤰᤂᤡᤃᤧ ᤋᤩᤧ᤹ᤀᤡᤃᤧᤖᤥ ᤜᤧᤏᤠᤱᤓᤧᤸᤗᤧ ᤂᤧᤏᤧ᤹ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥

²³ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠᤛᤡ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤛᤠᤶᤕᤥᤒᤠ ᤜᤕᤱᤁᤡᤸᤗᤡᤱ ᤆᤥ᤺ᤰᤔᤠᤃ ᤀᤡᤱᤗᤧᤰᤗᤥ॥ ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱ ᤗᤠᤶᤒᤠᤖᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤴᤗᤵ ᤔᤧᤄᤥᤛᤢᤖᤥ॥

²⁴ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤕᤖᤡᤰ ᤋᤱᤒᤣ ᤋᤃᤡᤀᤠᤱᤎᤥ ᤕᤖᤡᤰ ᤐᤠ᤺ᤴᤜᤠ᤹ ᤔᤧᤎᤃᤢᤀᤠᤱ ᤘᤕᤧᤖᤥ ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤧᤘᤠ ᤔᤧᤵᤔᤏᤠᤒᤠ ᤒᤠᤗ ᤛᤠᤶᤔᤠᤱᤅᤡᤸᤗᤧ ᤀᤠᤏᤡᤃᤣ ᤏᤠᤵᤋᤡᤃᤧᤖᤥ. ᤂᤧᤴ ᤛᤡᤖᤡᤱ ᤀᤠᤔᤔᤒᤠ ᤛᤠᤶᤔᤠᤱᤅᤡᤸᤗᤧ ᤀᤠᤏᤡᤃᤣ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹. ᤐᤡᤳᤌᤰᤛᤠᤜᤠ᤹. ᤛᤠᤀᤣᤜᤠ᤹ ᤁᤧᤖᤧᤰ ᤜᤍ᤹ ᤔᤧᤰᤂᤢᤛᤡᤖᤥ॥

²⁵ ᤀᤠᤸᤗ ᤀᤠᤏᤡ᤹ ᤛᤡᤖᤡᤱᤔᤔᤥ ᤌᤩᤧ᤹ᤀᤡᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤆᤠ᤺ᤳᤌᤡ ᤐᤣ᤺ᤰᤔᤠ ᤐᤠ᤺ᤴᤏᤡᤸᤗᤧ ᤀᤠᤍᤧᤵᤗᤖᤥ॥ ᤀᤠᤏᤡ᤹ ᤏᤢ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡ᤹ ᤀᤠᤈᤢᤰᤋᤧᤀᤠᤱᤎᤥ ᤗᤠᤕᤥ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ᤖᤥ. ᤀᤠᤵᤑᤠᤸᤗᤧᤀᤠᤱ ᤀᤠᤏᤡ᤹ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤀᤠᤴᤀᤡ᤺ᤳᤋᤢᤶᤔᤡᤴ ᤀᤠᤴᤏᤠ᤺ᤳᤋᤢᤔᤡᤴᤗᤥ॥”