ᤕᤷᤔᤡᤕᤠ 1 - LIFOTNT

ᤕᤷᤔᤡᤕᤠ

¹ ᤒᤣᤏᤩᤠᤔᤡᤏ ᤗᤠᤈᤣ᤹ᤒᤠ ᤀᤏᤠᤋᤥᤋ ᤕᤧᤰᤕᤰ ᤁᤧᤕᤢᤱᤒᤠ ᤗᤳᤇᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤴᤜᤠ᤹ᤖᤥ॥

² ᤀᤔᤥᤏᤖᤧ ᤁᤢᤛ᤻ᤛᤠ ᤕᤥᤛᤡᤕᤠᤜᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤒᤠ ᤌᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤆᤰᤔᤧᤴᤗ᤹ᤀᤣ ᤕᤷᤔᤡᤕᤠᤀᤥ ᤁᤧᤖᤧ॥

³ ᤕᤥᤛᤡᤕᤠᤜᤖᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤔᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶ ᤂᤠᤖᤠᤰ ᤏᤢ ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤁᤧᤖᤧᤒᤠ ᤗᤠ ᤅᤠᤛᤡ ᤌᤠᤖᤡᤰᤁᤣ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤗᤠᤈᤣ᤹ ᤗᤠ᤺ᤰᤁᤠᤳ ᤔᤧᤴᤍᤣ᤹ᤛᤡᤱᤅᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤢᤏᤧ᤹ᤀᤥ ᤁᤧᤖᤧᤖ ᤘᤕᤧᤖᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤕᤷᤔᤡᤕᤠᤴ ᤀᤢ᤺ᤳᤋᤢ

⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧᤖᤥ.

⁵ “ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤣ᤺ᤰᤏᤧᤀᤠᤱ ᤘᤕᤠᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤵᤔᤠᤛᤡᤖᤧ ᤗᤠᤃᤡ ᤀᤣ᤺ᤰ ᤆᤥ᤺ᤰᤏᤧᤀᤠᤱ ᤘᤕᤠᤱᤗᤥ॥”

⁶ ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ᤃ ᤐᤠ᤺ᤵᤔᤠᤀᤣ ᤔᤧᤗᤧᤀᤠᤴ. ᤀᤠᤱᤃᤠ᤹ᤃ ᤀᤅᤧ᤺ᤰᤘᤠᤀᤣ ᤘᤠ᤹ᤀᤠᤖᤥ॥”

⁷ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤠᤱᤃᤠ᤹ ᤀᤅᤧ᤺ᤰᤘᤠᤀᤣ ᤘᤠ᤹ᤀᤠ ᤗ᤹ᤖᤡᤰ ᤔᤧᤒᤠ᤺ᤳᤋᤧᤴᤏᤧ᤹ ᤁᤖ ᤀᤠᤱᤃᤠ᤹ ᤀᤠᤳᤋᤡᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤏᤧ᤹ ᤐᤠᤱᤏᤧ. ᤂᤧᤱᤜᤠ᤹ᤀᤥ ᤂᤧᤏᤧ᤹ ᤐᤣᤃᤧ᤹ ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤌᤣ ᤀᤡᤱᤈᤠᤱ ᤐᤡᤏᤧ. ᤂᤧᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥

⁸ ᤂᤧᤱᤜᤠ᤹ᤏᤢ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤛᤧ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ᤏᤢ ᤘᤠ᤹ᤀᤠ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤀᤠᤖᤥ᥄”

⁹ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤀᤠᤱᤃᤠ᤹ ᤀᤠᤶᤒᤪᤠᤀᤥ ᤛᤢᤛᤠᤱ ᤐᤡᤖᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤋᤠᤱᤗᤥ. “ᤂᤧᤵᤛᤧ᤹. ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤁᤡᤴ ᤂᤧᤏᤧ᤹ ᤁᤧᤶᤒᤪᤠᤀᤥ ᤁᤣ᤺ᤳᤋᤢᤱ ᤐᤡᤏᤧᤀᤠᤱ ᤘᤠ᤹ᤖᤥ॥

¹⁰ ᤀᤠᤀᤡᤴ ᤂᤧᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤜᤠᤱᤈᤢᤶᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤀᤠ᤺ᤱᤔᤠᤛᤡ. ᤛᤥ᤺ᤶᤔᤠᤛᤡ. ᤔᤧᤱᤔᤠᤛᤡ ᤀᤡᤃᤪ ᤗᤠᤵᤑᤣᤔᤠᤛᤡ. ᤑᤥᤱᤔᤠᤛᤡ ᤏᤢ ᤕᤢᤰᤛᤡᤱ ᤆᤥ᤺ᤰᤔᤠᤛᤡ ᤔᤢᤖᤠ ᤔᤧᤳᤏᤧᤖᤥ॥”

ᤏᤧᤳᤇᤡ ᤛᤢᤑᤥᤜᤠ᤹

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ. “ᤕᤷᤔᤡᤕᤠᤀᤣ. ᤂᤧᤏᤧ᤹ ᤌᤣ ᤁᤧᤏᤡᤛᤢᤖ ᤁᤧᤒᤳ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤂᤱᤈᤱᤛᤣ᤹ ᤛᤡᤱᤅᤡᤸᤗᤧ ᤗᤳᤇᤠ ᤁᤢᤒᤥᤖᤠᤰ ᤌᤡᤰ ᤏᤡᤛᤢᤱ᤹॥”

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤏᤧ᤹ ᤁᤢᤍᤥ᤺ᤵᤔᤠᤀᤣ ᤁᤧᤏᤡᤛᤢ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤁᤧᤖᤧᤒᤠᤴ ᤀᤥᤔᤧᤵᤔᤠᤖᤧ ᤗᤠᤃᤡ ᤜᤠᤱᤄᤢᤱᤗ ᤘᤠ᤹ᤀᤠ॥”

¹³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤠᤶᤔᤥ ᤀᤠᤱᤃᤠ᤹ᤀᤥ ᤁᤧᤖᤧ. “ᤘᤣ᤹ ᤌᤣ ᤁᤧᤏᤡᤛᤢᤒᤣ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤌᤠᤱᤃᤧᤳ ᤐᤡᤛᤠᤱ ᤀᤠᤱᤃᤠ᤹ ᤗᤳᤇᤠ ᤂᤵᤐᤩᤠᤎᤡᤰ ᤗᤠᤰᤋᤢᤖ ᤕᤢᤱᤒᤠ ᤏᤡᤛᤢᤱ᤹ ᤜᤧᤰᤁᤩᤠᤱ ᤂᤧᤴ ᤁ᤹ᤕᤥ ᤗᤧᤵᤔᤠᤱ ᤘᤧᤵᤔᤠ ᤆᤥ᤺ᤰᤁᤠᤱ ᤕᤢᤱ᤹॥”

¹⁴ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤌᤥᤜᤠᤱ ᤐᤡᤛᤠᤱᤗᤠᤶᤒᤠᤀᤣ ᤔᤧᤰᤔᤠᤛᤡᤔᤠᤴ ᤗᤠᤰᤋᤢᤀᤠᤱ ᤁᤴ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤛᤶᤎᤠᤱ ᤆᤢᤰ॥

¹⁵ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤀᤢ᤺ᤳᤋᤢᤱᤛᤡᤱᤗ ᤐᤳᤋᤠᤖᤥ॥ “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤠᤱᤕᤢᤰᤏᤠᤴ ᤕᤖᤢᤛᤗᤧᤔ ᤗᤠ᤺ᤵᤔᤠ ᤋᤠ᤺ᤰᤜᤴᤜᤠ᤹ᤀᤥ ᤔᤧᤕᤢᤰᤂᤢᤖᤥ ᤂᤧᤒᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤐᤡᤛᤠᤱᤒᤠ ᤗᤢᤱᤎᤠᤰᤜᤠ᤹ᤀᤥ ᤏᤢ ᤕᤜᤢᤍᤠᤒᤠ ᤁᤧᤖᤧᤰ ᤕᤧᤰᤕᤰ ᤂᤡᤖᤡᤀᤠᤱ ᤔᤧᤕᤢᤰᤂᤢᤖᤥ॥

¹⁶ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤏᤠᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤗᤠᤵᤔᤧᤓᤢᤛᤠᤱᤗᤥ ᤜᤧᤰᤁᤩᤠᤱ ᤘᤣ᤹ ᤔᤠᤱ ᤛᤠᤶᤔᤠᤱᤜᤠ᤹ᤀᤥ ᤛᤠᤱᤛᤡᤱ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤔᤧᤘᤠ᤹ᤖᤥ ᤏᤠᤘᤠᤀᤡᤳᤗᤠᤜᤠ᤹ ᤔᤧᤈᤥᤃᤢᤛᤡ ᤂᤧᤒᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥”

¹⁷ “ᤕᤷᤔᤡᤕᤠᤀᤣ. ᤕᤠᤖᤡᤵ ᤐᤥ᤺ᤰᤂᤧ᤹. ᤜᤧᤰᤁᤩᤠᤱ ᤐᤣᤃᤧ᤹ᤀᤥ ᤀᤠᤱᤃᤠ᤹ ᤂᤧᤏᤧ᤹ ᤀᤡᤱᤈᤠᤱ ᤐᤡᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹ᤀᤥ॥ ᤀᤠᤸᤗ ᤂᤧᤱᤜᤠ᤹ᤏᤢ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ॥ ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤖᤛᤠᤱ ᤕᤖᤡᤰ ᤁᤧᤃᤡᤒᤠ ᤆᤥ᤺ᤰᤏᤧᤖᤥ॥

¹⁸ ᤕᤷᤔᤡᤕᤠᤀᤣ. ᤂᤧᤵᤛᤧ᤹ᤀᤥ ᤀᤠᤀᤡᤴ ᤗᤳᤇᤠ ᤗᤡᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤠᤱᤕᤰ ᤜᤧᤰᤋᤱᤒᤠ ᤁᤧᤎᤢᤶᤒᤠ ᤆᤥ᤺ᤰᤏᤧᤀᤠᤱ ᤘᤠ᤹ᤖᤥ ᤂᤧᤴ ᤕᤧᤰᤕᤰᤁᤡᤱᤃ ᤑᤧᤴᤈᤣ᤹ ᤛᤡᤳᤗᤠᤱ ᤀᤡᤃᤪ ᤁᤠᤛᤠ᤺ᤸᤗᤧᤴ ᤗᤢᤱᤎᤠᤰ ᤜᤧᤰᤋᤱᤒᤠ ᤆᤥᤰᤗᤥ ᤕᤜᤢᤍᤠᤒᤠ ᤜᤠᤱᤜᤠ᤹. ᤛᤢᤜᤠᤱᤕᤢᤰᤐᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤗᤢᤶᤔᤥ ᤂᤧᤏᤧ᤹ ᤁᤧᤖᤧᤰ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤎᤵ ᤔᤧᤸᤗ᤹ᤀᤣ ᤁᤧᤕᤧᤵᤗᤥ॥

¹⁹ ᤂᤧᤱᤜᤠ᤹ ᤂᤧᤏᤧ᤹ᤏᤢ ᤌᤱ ᤔᤧᤈᤥᤰ ᤁᤖ ᤂᤧᤏᤧ᤹ ᤏᤠ᤺ᤶᤔᤠ ᤁᤧᤔᤧᤴᤇᤢᤰᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤍᤠᤱᤛᤧ᤺ᤵᤛᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠᤖᤥ॥ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥”