ᤜᤥᤛᤣ 1 - LIFOTNT

¹ ᤕᤜᤢᤍᤠᤒᤠ ᤜᤠᤱᤜᤠ᤹ ᤀᤢᤈ᤻ᤈᤡᤕᤠᤜ. ᤕᤥᤋᤠᤔ. ᤀᤠᤜᤠᤈ. ᤜᤡᤈᤁᤡᤕᤠ ᤏᤢ ᤕᤣᤜᤥᤀᤠᤛᤖᤧ ᤁᤢᤛ᤻ᤛᤠ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤒᤣᤖᤡᤖᤧ ᤁᤢᤛ᤻ᤛᤠ ᤜᤥᤛᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤖᤧᤖᤥ॥

ᤜᤥᤛᤣᤖᤧ ᤁᤢᤔᤣᤳ ᤏᤢ ᤁᤢᤛ᤻ᤛᤠ ᤁᤢᤀᤣᤜᤠ᤹

² ᤀᤠᤸᤗ ᤕᤜᤘᤣ ᤍᤠᤱᤒᤠᤴ ᤜᤥᤛᤣ᤺ᤴᤗᤠᤶ ᤐᤠ᤺ᤵᤔᤠ ᤜᤣ᤺ᤰᤋᤧᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤁᤴ ᤗᤠᤈᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤏᤠ᤹ᤖᤢᤀᤠᤱ ᤛᤠ᤹ᤖᤡᤰ ᤕᤠᤶᤒᤥ᤺ᤵᤔᤠ ᤀᤠᤵᤋᤡᤰᤁᤥ ᤌᤩᤧᤀᤠᤱ ᤘᤠ᤹. ᤂᤧᤏᤧ᤹ ᤐᤣᤃᤧ᤹ᤀᤠᤱ ᤆᤠᤃᤧᤖᤠᤶᤔᤠ ᤁᤧᤳᤏᤡᤔᤠᤎᤡᤰ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤧ᤹. ᤂᤧᤒᤩᤠᤱ ᤂᤧᤸᤗᤧ ᤆᤠᤖᤠᤶᤔᤠ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥᤃᤢᤒᤠᤗᤠᤶ ᤁᤳᤋᤢᤛᤡᤒᤠ ᤛᤠᤜᤠ᤹ ᤛᤠ ᤆᤥᤃᤧᤛᤧ᤹॥”

³ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤐᤣᤀᤠᤱ ᤍᤡᤒ᤻ᤗᤤᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤃᤥᤔᤣᤖᤧᤴ ᤔᤣ᤺ᤰᤂᤡᤶ ᤔᤧᤳᤋᤢ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ᤗᤠᤶ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥

⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤥᤛᤣᤴ ᤔᤧᤳᤋᤢ. “ᤂᤧᤸᤗᤧ ᤁᤢᤔᤡᤱ ᤕᤡᤈᤖᤣᤗ ᤘᤠ᤺ᤳᤋᤧ᤹. ᤌᤣᤀᤠᤱᤓᤧᤸᤗᤧ ᤜᤠᤖᤠᤀᤣ ᤀᤠᤱᤃᤠ᤹ ᤕᤣᤜᤢᤖᤧ ᤁᤢᤜᤡᤶᤛᤕᤱᤜᤠ᤹ ᤕᤡᤈᤖᤣᤗᤀᤥ ᤐᤥ᤺ᤰᤂᤧᤒᤠ ᤔᤠᤰᤂᤡ᤹ ᤛᤧᤖᤧᤒᤧᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤈᤢᤶᤔᤡᤴ ᤏᤢᤵᤛᤢᤱ᤹॥

⁵ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤀᤡᤛᤪᤠᤀᤡᤗᤖᤧ ᤁᤢᤗᤡ᤹ᤀᤡᤴ ᤕᤡᤈᤖᤣᤗᤒᤠ ᤏᤧᤏᤧᤒᤠᤍᤧᤴᤏᤥ ᤀᤧᤰᤂᤢᤱ ᤐᤡᤖᤢᤱ᤹॥”

⁶ ᤃᤥᤔᤣᤖᤧᤴ ᤕᤠᤶᤔᤥ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤔᤧᤴᤇᤢᤔᤠ ᤛᤠᤎᤡᤰ ᤁᤳᤋᤢ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤥᤛᤣᤴ ᤔᤧᤳᤋᤢ. “ᤂᤧᤸᤗᤧ ᤁᤢᤔᤡᤱ ᤗᤢᤱᤔᤠ᤹ ᤔᤧᤴᤍᤢᤰᤔᤏᤠᤔᤠ ᤘᤠ᤺ᤳᤋᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤀᤠᤸᤗᤀᤠᤱᤎᤥ ᤗᤢᤱᤔᤠ᤹ ᤔᤧᤍᤢᤰᤁᤠᤛᤡᤱᤅᤡᤴᤏᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤓᤧᤸᤗᤧᤀᤠᤱ ᤗᤧᤵᤔᤡ ᤔᤧᤒᤡᤖᤢᤱᤛᤡᤱᤅᤡᤴ᤹॥

⁷ ᤁᤖ ᤀᤠᤱᤃᤠ᤹ ᤕᤜᤢᤍᤠᤒᤠ ᤜᤡᤶᤛᤕᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱ᤹॥ ᤗᤡ. ᤋᤠᤓᤣ. ᤌᤱ. ᤀᤴ ᤏᤢ ᤀᤴᤃᤧᤗᤥᤱᤒᤠᤜᤠ᤹ᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤛᤧ᤺ᤵᤋᤢᤱᤛᤡᤱᤅᤡᤴ᤹. ᤁᤖ ᤀᤠᤱᤃᤠ᤹ᤀᤣ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤱᤛᤡᤱ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥”

⁸ ᤀᤠᤸᤗ ᤃᤥᤔᤣᤖᤧᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤔᤏᤠ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤏᤢᤎᤢᤰᤔᤠᤗᤠᤶ ᤛᤧᤴᤍᤢ. ᤂᤧᤒᤩᤠᤱ ᤕᤠᤶᤔᤥ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤘᤣ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥

⁹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤥᤛᤣᤴ ᤔᤧᤳᤋᤢ. “ᤂᤧᤸᤗᤧ ᤁᤢᤔᤡᤱ ᤀᤠᤔᤏᤠ ᤔᤣ᤺ᤴᤏᤡᤱ ᤘᤠ᤺ᤳᤋᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤏᤠ ᤔᤣ᤺ᤴᤏᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤔᤧ᤺ᤴᤏᤠᤖᤥ॥

ᤀᤡᤛᤪᤠᤀᤡᤗᤧᤴ ᤕᤠᤶᤔᤥ ᤐᤥᤰ

¹⁰ “ᤜᤧᤰᤁᤣᤛᤠᤱ ᤀᤡᤛᤪᤠᤀᤡᤗᤡᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤕᤠᤖᤡᤰ ᤕᤖᤡᤰ ᤔᤧᤒᤥᤱ᤹. ᤂᤧᤱᤜᤠ᤹ ᤛᤡ᤺ᤰᤔᤠᤀᤠᤱ ᤛᤢᤰᤔᤧᤴᤍᤧᤳᤏᤧᤴ ᤏᤡ᤺ᤵᤔᤠᤀᤠᤱ ᤛᤢᤰᤔᤧᤴᤍᤧᤳᤏᤧᤴ॥ ᤂᤧᤱᤜᤠ᤹ ᤀᤠᤳᤋᤡ ‘ᤀᤠᤱᤃᤠ᤹ ᤀᤠᤔᤏᤠᤏᤡᤱ ᤔᤣ᤺ᤴ.’ ᤔᤧᤔᤧᤳᤋᤢᤛᤡᤀᤠᤱ ᤘᤕᤧ. ᤜᤠᤒᤠ ᤂᤧᤵᤔᤥᤀᤣ ᤂᤧᤱᤜᤠ᤹. ‘ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤏᤡᤱ’ ᤔᤧᤔᤧᤳᤋᤢᤛᤡᤖᤥ॥

¹¹ ᤂᤧᤒᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤁᤧᤖᤧᤰ ᤕᤠᤶᤔᤥ ᤛᤥᤖᤡᤰ ᤔᤧᤒᤥᤱ᤹. ᤜᤧᤰᤁᤩᤠᤱ ᤗᤳᤇᤠ ᤗᤠᤶᤗᤥᤒᤠ ᤔᤧᤛᤣᤃᤢᤀᤠᤱ ᤗᤠᤈᤣ᤹ᤀᤥᤗᤠᤶ ᤔᤧᤗᤴ. ᤌᤣᤀᤠᤱᤓᤧᤸᤗᤧ ᤕᤡᤈᤖᤣᤗᤒᤠ ᤕᤧᤴᤏᤡᤴ ᤐᤕᤶ ᤕᤶᤒᤠ ᤐᤥᤱᤗᤥ॥”