ᤜᤠᤃ᤻ᤃᤤ 1 - LIFOTNT

ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ

¹ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ. ᤋᤢᤰᤛᤡᤃᤣᤰᤐᤠ ᤗᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤᤗᤠᤶ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤕᤖᤢᤒᤠᤒᤣᤗᤀᤥ ᤏᤢ ᤕᤜᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤀᤥ ᤁᤧᤖᤧᤖᤥ॥

² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤁᤴ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤆᤥ᤺ᤰᤔᤠ ᤕᤧᤶᤔᤡᤴ ᤀᤠᤸᤗᤛᤠᤱ ᤔᤧᤴᤍᤠᤀᤣ ᤘᤠ᤹ᤖᤥ॥’”

³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤᤗᤠᤶᤒᤠ ᤁᤧᤖᤧ—

⁴ “ᤁᤴ ᤔᤠᤱᤜᤡᤶᤔᤡᤴ ᤗᤢ᤺ᤶᤔᤠᤄᤧᤵᤔᤠ ᤆᤥ᤺ᤰᤐᤠ ᤁᤧᤏᤡᤛᤢᤶᤛᤠᤱ ᤌᤣ ᤂᤡᤏᤡ᤹ ᤁᤢᤓᤢᤱ ᤗᤰᤔᤏᤠᤒᤠ ᤛᤡᤱᤜᤠ᤹ᤖᤧ ᤁᤧᤄᤧᤶᤛᤡᤱᤒᤠ ᤆᤥ᤺ᤰᤔᤏᤠᤒᤠ ᤜᤡᤶᤜᤠ᤹ᤀᤥ ᤕᤢᤱᤔᤠ ᤁᤴ ᤂᤡᤏᤡ᤹ ᤕᤧᤶᤒᤡ᥅”

⁵ ᤀᤠᤸᤗ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤵᤗᤧᤰᤜᤠ᤹ᤀᤥ ᤛᤡᤱᤛᤡᤱᤅᤠᤱ ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹॥

⁶ ᤂᤡᤏᤡ᤹ ᤗᤣ᤺ᤵᤔᤠᤃ ᤕᤖᤡᤰ ᤁᤧᤗᤣ᤺ᤳᤋᤢᤶᤔᤠᤱ ᤏᤧᤖᤥ. ᤁᤖ ᤆᤒᤧ᤺ᤳᤇᤡᤰᤗᤰ ᤁᤧᤛᤢᤵᤛᤢᤶᤔᤠᤱ ᤕᤢᤱ᤹॥ ᤂᤡᤏᤡ᤹ ᤆᤠᤔᤠᤃ ᤁᤧᤈᤠᤶ. ᤁᤖ ᤀᤠᤓᤧᤸᤗᤧᤀᤠᤱ ᤁᤧᤱᤄᤠᤛᤡᤴ᤹॥ ᤂᤡᤏᤡ᤹ ᤌᤢᤱᤔᤠᤃ ᤁᤧᤎᤢᤅᤢᤶ᤹. ᤁᤖ ᤀᤠᤓᤧᤸᤗᤧᤀᤠᤱ ᤂᤡᤏᤡ᤹ ᤘᤠᤔᤡ᤺ᤰᤔᤠ ᤔᤧᤈᤡᤵᤋᤢᤴ᤹॥ ᤂᤡᤏᤡ᤹ ᤆᤠᤱᤃ ᤁᤧᤈᤠᤰᤂᤢᤶ᤹. ᤁᤖ ᤁᤧᤱᤃᤥᤛᤡᤴ᤹॥ ᤂᤡᤏᤡ᤹ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤏᤡᤶᤕᤠᤰ ᤁᤧᤎᤃᤢᤶ᤹. ᤁᤖ ᤁᤧᤜᤱᤒᤠ ᤛᤢᤰᤘᤠᤜᤠ᤹ᤀᤥ ᤁᤧᤕᤠᤰᤋᤢᤶ᤹॥”

⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤵᤗᤧᤰᤜᤠ᤹ᤀᤥ ᤛᤡᤱᤛᤡᤱᤅᤠᤱ ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹॥

⁸ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤛᤡᤱᤜᤠ᤹ ᤕᤢᤖᤧᤶᤔᤧ᤹ᤀᤠᤱ ᤜᤡᤶ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤂᤧᤵᤔᤥ ᤕᤢᤱᤔᤠ ᤛᤢᤰᤁᤠᤖ ᤜᤧᤰᤁᤩᤠᤱ ᤀᤠᤔᤡᤱᤛᤥ ᤀᤠᤎᤠᤱᤛᤥ ᤐᤥᤱᤗ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁹ “ᤂᤡᤏᤡ᤹ ᤕᤖᤡᤰ ᤁᤢᤈᤠ ᤛᤢᤶᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤀᤥᤔᤧᤳᤋᤧᤶᤔᤧ᤹. ᤆᤒᤧ᤺ᤳᤇᤡᤰᤗᤰ ᤐᤥ᤺ᤰᤂᤧ॥ ᤜᤡᤶᤔᤥ ᤂᤡᤏᤡ᤹ ᤁᤧᤍᤠᤖᤢᤶᤒᤠᤴ ᤀᤠᤱᤃᤠ᤹ ᤔᤢ᤺ᤳᤋᤢᤱᤅᤠᤱ ᤛᤢᤖᤡ᤺ᤳᤋᤥ ᤑᤧᤛᤢᤱᤍᤧᤛᤢᤱ॥ ᤌᤣᤀᤠᤱᤒᤣ᥅” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ “ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤗᤢ᤺ᤴᤍᤧᤒᤣᤀᤠᤱ ᤏᤧᤖᤥ. ᤁᤖ ᤂᤡᤏᤡ᤹ᤃ ᤁᤧᤖᤧᤰ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤛᤡ᤹ᤔᤧᤴᤇᤡ᤹ ᤁᤧᤕᤠᤃᤡ᤹॥

¹⁰ ᤁᤸᤗᤧᤆᤥᤃᤢᤸᤗᤧ ᤋᤠᤱᤛᤠᤱᤒᤧᤸᤗᤧ ᤛᤣ᤺ᤰᤘᤠ ᤌᤠᤔᤠ ᤌᤣ᤺ᤰᤋᤢ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤌᤥ᤺ᤰᤔᤠ ᤛᤠᤰᤋᤢᤀᤠᤱ ᤏᤧᤖᤥ॥

¹¹ ᤀᤠᤱᤃᤠ᤹ ᤀᤡᤰᤋᤠᤵᤜᤠ᤹ᤀᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ. ᤐᤥᤃᤢᤃᤧᤴ ᤁᤢᤈᤠ ᤏᤢ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡᤀᤥ. ᤏᤡ᤺ᤱᤃᤣ᤹ᤀᤥ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤧᤎᤥ᤺ᤰᤐᤠ ᤁᤧᤖᤧᤰᤁᤥ. ᤔᤏᤠᤜᤠ᤹ᤀᤥ. ᤜᤡᤱᤔᤏᤠᤒᤠ ᤌᤰᤛᤠᤜᤠ᤹ᤀᤥ ᤏᤢ ᤂᤡᤏᤡ᤹ ᤜᤢᤰᤁᤡᤸᤗᤧ ᤛᤩᤠᤱᤔᤧᤴᤍᤠᤱ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤀᤥ ᤛᤠᤰᤘᤠᤴ ᤐᤥᤃᤧᤖ ᤆᤥᤃᤢᤱᤅᤠᤱ ᤘᤠ᤹ᤖᤥ॥”

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤃ᤻ᤃᤤᤴ ᤐᤠᤱᤄᤢᤒᤠᤸᤗᤧ ᤆᤥᤃᤢᤸᤗᤧ. ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤖᤢᤒᤠᤒᤣᤗ. ᤕᤜᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤴ ᤏᤢ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ᤖᤧᤀᤠᤱ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠᤴ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤ᤺ᤸᤗᤧ ᤁᤢᤀᤡᤱᤄᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ॥ ᤂᤶᤓᤩᤠᤱ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤴᤏᤢ ᤔᤧᤃᤡᤛᤧᤖᤥ॥

¹³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤛᤠᤒᤠ ᤜᤠᤃ᤻ᤃᤤ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤔᤏᤠᤜᤠ᤹ ᤔᤧᤳᤋᤢᤛᤡ—“ᤀᤠᤱᤃᤠ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ᤀᤠ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁴ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤕᤖᤢᤒᤠᤒᤣᤗᤧᤴ ᤏᤢ ᤕᤜᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤴ ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤛᤔᤧᤖ ᤕᤠ᤺ᤴᤍᤢᤛᤡ॥ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧ॥

¹⁵ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ. ᤋᤢᤰᤛᤡᤃᤣᤰᤐᤠ ᤗᤠ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥