ᤜᤒᤁᤢᤁ 1 - LIFOTNT

¹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤒᤁᤢᤁᤖᤧ ᤏᤡᤛᤢᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤜᤠᤒᤠ ᤁᤴᤗᤥ॥

ᤜᤒᤁᤢᤁᤖᤧ ᤁᤢᤗᤢᤱᤜᤠᤴ

² ᤕᤜᤘᤣ ᤍᤠᤱᤒᤠᤀᤣ᥄ ᤀᤠᤵᤑᤠᤸᤗᤧ ᤌᤠᤖᤡᤰ ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤒᤠᤒᤣ᥅ ᤁᤖ ᤂᤧᤏᤧ᤹ ᤂᤧᤶᤔᤠᤀᤣ ᤁᤧᤱᤄᤧᤵᤛᤢᤴᤏᤡᤱ ᤃ᥅ ᤀᤡᤃᤪ ᤀᤠᤓᤧᤸᤗᤧ ᤌᤧᤶᤒᤠ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤏᤧᤒᤠᤒᤣ᥅ “ᤂᤣᤔᤠ ᤌᤰᤔᤠ ᤀᤠᤳᤋᤡᤛᤠᤱ ᤐᤥ᤺ᤰᤂᤧᤀᤠᤱ ᤏᤧᤖᤥ” ᤁᤖ ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤋᤠᤱᤁᤧᤴᤇᤧ᤺ᤵᤏᤧᤴᤗᤥ॥

³ ᤂᤧᤏᤧ᤹ ᤌᤣᤀᤠᤱ ᤔᤧᤴᤘᤠ᤹ᤔᤏᤠ ᤂᤠᤛᤧᤴᤏᤡᤴ ᤀᤥᤔᤧᤵᤔᤠ ᤁᤧᤒᤠᤱᤅᤠᤒᤣ᥅ ᤂᤧᤏᤧ᤹ ᤌᤣᤀᤠᤱ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤠᤛᤡᤃᤧᤎ᤺ᤳᤋᤢᤒᤠᤒᤣ᥅ ᤔᤧᤰᤔᤧᤴ ᤏᤢ ᤛᤧᤳᤇᤡᤱᤔᤧᤴ ᤀᤠᤱᤃᤠ᤹ ᤀᤠᤍᤃᤡᤀᤣ ᤐᤥᤱᤗ ᤐᤳᤗᤥ. ᤂᤣᤔᤠ ᤌᤰᤔᤠ ᤏᤢ ᤕᤧᤔᤧᤴᤍᤱ ᤁᤧᤖᤧᤰ ᤐᤡᤛᤠᤱ ᤘᤠ᤹ᤖᤥ॥

⁴ ᤁᤸᤗᤧᤆᤥᤃᤢᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤜᤏᤧ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤒᤣ᤺ᤰᤗ ᤐᤳᤗᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤀᤠᤓᤧᤸᤗᤧᤀᤠᤱ ᤔᤧᤒᤥᤱᤏᤧᤴᤗᤥ॥ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤁᤢᤍᤥ᤺ᤵᤔᤠᤜᤠ᤹ ᤔᤧᤃᤒᤢᤛᤡᤀᤠᤱ ᤘᤠ᤹ᤖᤥ. ᤜᤧᤰᤁᤣᤗ᤹ᤖᤡᤰ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤜᤏᤧᤒᤠ ᤐᤥᤱᤗᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤢᤃᤵ ᤐᤠᤴ

⁵ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤥᤔᤧᤳᤋᤧᤶ ᤑᤳᤇᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤴᤜᤠ᤹ᤀᤥ ᤁᤢᤓᤠ ᤕᤠ᤺ᤶᤒᤰ ᤆᤥᤃᤢᤱᤗᤥ ᤂᤧᤴ ᤀᤠᤱᤃᤠ᤹ ᤔᤧᤳᤏᤡᤱᤛᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ॥

⁶ ᤀᤠᤱᤃᤠ᤹ᤀᤣ ᤒᤣᤒᤡᤗᤥᤏᤡᤜᤠ᤹ ᤑᤥ᤺ᤰᤂᤢᤱᤛᤡᤱᤗ ᤐᤳᤋᤠᤖᤥ. ᤂᤧᤱᤜᤠ᤹ᤃ ᤁᤢ᤹ᤀᤡᤃᤧᤓᤧᤶᤒᤠ ᤏᤢ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠ ᤔᤏᤠᤛᤡᤖᤥ. ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤏᤠᤍᤧᤴᤜᤠ᤹ ᤏᤠᤵᤔᤠᤛᤡᤖᤧ ᤗᤠᤃᤡ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤴᤎᤥ᤹ ᤔᤧᤒᤣ᤺ᤰᤗᤥ॥

⁷ ᤂᤧᤱᤜᤠ᤹ᤃ ᤁᤡᤵᤔᤠ ᤁᤧᤄᤢᤒᤠ ᤏᤢ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰᤁᤣ ᤔᤧᤈᤥᤃᤢᤒᤠ ᤀᤡᤱᤈᤠᤱᤜᤠ᤹ ᤏᤢ ᤌᤡᤶᤜᤠ᤹ᤖᤰ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖᤥ॥

⁸ ᤂᤢᤴᤇᤡ᤹ ᤀᤴᤜᤠ᤹ ᤌᤧᤖᤡᤱᤒᤠᤜᤠ᤹ᤏᤢ᤺ᤸᤗᤧ ᤜᤠᤖᤠ ᤔᤧᤗᤥ᤺ᤰᤗᤥ ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤁᤧᤗ᤺ᤶᤒᤠ ᤐᤖᤠᤒᤠᤜᤠ᤹ᤏᤢ᤺ᤸᤗᤧ ᤁᤧᤀᤠ᤺ᤵᤐᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤃᤧᤕᤢᤰᤐᤠᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤔᤧᤍᤠᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ᤖᤧ ᤂᤠᤶᤒᤠᤱᤅᤡᤴ ᤔᤧᤒᤠᤃᤢᤖᤥ ᤔᤕᤠ᤺ᤸᤗᤧ ᤛᤠᤏᤠ᤺ᤳᤋᤡᤴ ᤗᤵᤔᤠᤖᤧ ᤗᤠᤃᤡ ᤐᤣᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤛᤢᤒᤢᤒᤢᤏᤠ ᤋᤃᤡ ᤔᤧᤛᤢ᤺ᤰ ᤔᤧᤒᤣ᤺ᤰᤗᤥ॥

⁹ ᤂᤧᤱᤜᤠ᤹ ᤁᤧᤖᤧᤰ ᤔᤏᤠ ᤛᤧᤵᤔᤠᤛᤡᤖᤧ ᤗᤠᤃᤡᤀᤣ ᤔᤧᤍᤠᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤛᤢᤶᤜᤠ᤹ ᤋᤃᤡ ᤔᤧᤒᤥ ᤔᤧᤒᤣ᤺ᤰᤗᤥ॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤛᤠᤶᤔᤡ᤺ᤳᤋᤡᤸᤗᤧ ᤕᤧ᤺ᤱᤄᤠᤴ ᤛᤢᤵᤛᤢᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤔᤧᤛᤢᤵᤛᤢᤛᤡᤖᤥ॥

¹⁰ ᤂᤧᤱᤜᤠ᤹ᤖᤧ ᤜᤠᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤖᤥ ᤜᤧᤰᤁᤩᤠᤱ ᤕᤢᤰᤛᤠᤒᤠᤜᤠ᤹ ᤀᤣ᤺ᤳᤗᤠᤒᤠ ᤔᤧᤈᤥᤃᤢᤛᤡᤖᤥ॥ ᤜᤠᤱᤕᤰ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤔᤧᤏᤡᤛᤢᤀᤠᤱ ᤔᤧᤀᤣ᤺ᤳᤗᤥ. ᤜᤧᤰᤁᤩᤠᤱ ᤂᤠᤶᤔᤡᤴ ᤌᤢᤵᤌᤠ᤹ ᤔᤧᤈᤥᤃᤢᤀᤠᤱ ᤔᤧᤗᤡᤅᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤖᤥ॥

¹¹ ᤂᤧᤒᤩᤠᤱ ᤛᤢᤖᤡᤳ ᤁᤢᤀᤡᤛᤡᤰ ᤔᤧᤍᤠᤀᤠᤱ ᤔᤧᤒᤣ᤺ᤰᤗᤥ. ᤁᤖ ᤂᤧᤱᤜᤠ᤹ᤃ ᤀᤠᤵᤋᤡᤰᤛᤠᤒᤠ ᤔᤏᤠᤛᤡᤖᤥ. ᤂᤢᤴᤇᤡ᤹ ᤔᤢᤰᤁᤡᤱᤃ ᤂᤢᤴᤇᤡ᤹ ᤀᤠᤵᤑᤣᤰ ᤔᤠᤱᤅᤡᤴᤗᤥ॥”

ᤜᤒᤁᤢᤁᤖᤧ ᤏᤡᤛᤡᤃᤣᤰᤐᤠ ᤁᤢᤗᤢᤱᤜᤠ᤺ᤵᤔᤠ ᤐᤠᤴ

¹² ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤢᤏᤠᤜᤢᤖᤡᤀᤠᤱᤎᤥᤀᤣ ᤁᤧᤴᤘᤠ᤹ᤏᤧᤴᤒᤡ᥅ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤛᤣᤛᤣᤒᤠᤀᤣ. ᤀᤠᤏᤡᤃᤣ ᤀᤠᤃ᤻ᤛᤧᤵᤐᤠᤒᤡ᥅ ᤕᤜᤘᤣ ᤍᤠᤱᤒᤠᤀᤣ. ᤂᤠᤛᤧᤴ ᤆᤥ᤺ᤰᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤂᤧᤏᤧ᤹ ᤂᤧᤱᤜᤠ᤹ ᤕᤢᤰᤋᤡᤱ ᤁᤧᤈᤥᤃᤢᤛᤡᤀᤠᤱ ᤔᤧᤘᤠ᤹ᤖᤥ. ᤀᤠᤛᤧ᤺ᤵᤛᤡᤱᤔᤠ ᤕᤠᤰᤐᤣ᤹ᤀᤣ. ᤀᤠᤏᤡᤃᤣ ᤂᤢᤶᤍᤡᤱ ᤐᤡᤔᤠᤖᤧ ᤗᤠᤃᤡ ᤂᤧᤏᤧ᤹ ᤂᤧᤱᤜᤠ᤹ ᤔᤠᤱᤌᤥ᤺ᤰᤏᤠ ᤁᤧᤒᤡᤖᤢᤛᤡᤀᤠᤱ ᤔᤧᤘᤠ᤹ᤖᤥ॥

¹³ ᤂᤧᤏᤧ᤹ ᤁᤧᤔᤡᤰᤛᤠᤴ ᤛᤠ᤹ᤖᤡᤰ ᤛᤢᤳᤌᤥ ᤆᤥᤰᤗᤥ. ᤂᤧᤏᤧ᤹ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤀᤥᤔᤧᤵᤔᤠ ᤁᤧᤴᤇᤢᤰᤋᤢᤴᤗᤥ॥ ᤔᤧᤴᤘᤠ᤹ᤔᤏᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤏᤠᤛᤡᤌ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ ᤁᤖ ᤀᤡᤱᤗᤧᤰᤐᤠ ᤔᤏᤠᤜᤠ᤹ ᤌᤣᤀᤠᤱ ᤏᤠᤛᤡᤌ᤺ᤵᤔᤠ ᤁᤧᤛᤢᤰᤋᤢᤛᤡᤒᤠᤒᤣ᥅ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ᤏᤢ᤺ᤸᤗᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤔᤧᤔᤧᤰᤂᤢᤛᤡᤸᤗᤧ ᤂᤧᤏᤧ᤹ ᤌᤣᤀᤠᤱ ᤛᤫᤠ᤺ᤳ ᤁᤧᤘᤠ᤹ ᤁᤧᤃᤶᤒᤠᤒᤣ᥅

¹⁴ ᤂᤧᤏᤧ᤹ ᤔᤏᤠᤜᤠ᤹ ᤘᤖ᤺ᤱᤅᤥᤒᤠ ᤅᤠᤜᤠ᤹ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤁᤧᤀᤢ᤺ᤱᤛᤡᤱᤒᤠ ᤑᤣ᤹ᤒᤠ᤺ᤳᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤕᤢᤰᤛᤠᤒᤠ ᤔᤣ᤺ᤴᤏᤣᤒᤠ ᤁᤧᤈᤥᤃᤢᤛᤡᤀᤠᤱ ᤔᤧᤘᤠ᤹ᤖᤥ॥

¹⁵ ᤏᤡᤱᤔᤡ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤂᤣ᤺ᤱᤅᤡᤸᤗᤧ ᤘᤣ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤕᤥ᤺ᤱᤅᤥ ᤌᤠᤛᤢᤛᤡᤖᤥ. ᤂᤢᤏᤧ᤹ ᤂᤧᤱᤜᤠ᤹ ᤐᤕᤶ ᤕᤶᤒᤠ ᤕᤥ᤺ᤱᤅᤥ ᤑᤢᤰᤂᤢᤛᤡᤖᤥ. ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤛ᤺ᤳᤋᤠᤱ ᤁᤢᤏᤡᤱᤘᤠ᤹ ᤋᤠᤖᤥ॥

¹⁶ ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤥ᤺ᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖᤥ. ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤕᤥ᤺ᤱᤅᤡᤸᤗᤧ ᤁᤢᤗᤠᤃᤡ ᤛᤢᤰᤐᤠ ᤜᤠ᤺ᤴᤍᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤥ᤺ᤱᤅᤡᤴ ᤗᤠᤶᤒᤠᤀᤣ ᤏᤢ᤹ᤍᤠᤀᤠᤱ ᤕᤢᤱᤗᤥ ᤜᤧᤰᤁᤩᤠᤱ ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠᤜᤠ᤹ ᤆ ᤌᤢᤅᤢᤖᤥ॥

¹⁷ ᤌᤣ ᤂᤧᤸᤗᤧ ᤁᤢᤕᤥ᤺ᤱᤅᤡᤴ ᤁᤢᤄᤠᤗᤧᤶ ᤆᤥᤃᤢᤖ ᤐᤣ᤺ᤰᤗᤒᤡ᥅ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤛᤡᤱᤅᤣ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤔᤧᤰᤂᤢᤛᤡᤀᤠᤱ ᤕᤠᤰᤗᤒᤡ᥅