ᤃᤗᤠᤋᤡ 1 - LIFOTNT

ᤐᤠᤘᤗᤖᤧ ᤜᤠᤅᤢᤒᤠ ᤛᤧᤘᤠ

¹ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤐᤠᤘᤗᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥ ᤔᤏᤠᤜᤠ᤹ᤗᤠᤶ ᤏᤢ ᤔᤏᤠ ᤕᤢᤰᤗᤠᤶ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤠᤱᤒᤠ ᤔᤣ᤺ᤴ. ᤁᤖ ᤕᤧᤛᤢ ᤂᤪᤡᤛ᤻ᤋ ᤏᤢ ᤂᤢᤏᤧ᤹ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤐᤥᤱᤛᤧ ᤕᤠᤵᤔᤡ ᤛᤣᤃᤧᤛᤡᤒᤠᤖᤥ॥

² ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤘᤠ᤹ᤒᤠ ᤁᤠᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤃᤗᤠᤋᤡᤕᤠ ᤌᤢᤶᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤁᤧᤘᤠ᤹ᤒᤠᤜᤠ᤹ ᤛᤧᤘᤠ ᤁᤧᤶᤜᤠᤰᤋᤡ᤹ᤖᤥ॥

³ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶ ᤏᤢ ᤁᤢᤛᤏᤠᤖᤢᤱᤅᤡᤴ ᤂᤡᤏᤡ᤹ ᤁᤧᤒᤡᤖᤡᤖ॥

⁴ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤕᤧᤛᤢᤖᤧ ᤁᤴ ᤕᤧᤶᤔᤥᤒᤠ ᤋᤠᤵᤑᤧ᤺ᤶᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤠᤱᤛᤧ᤺ᤵᤔᤠ ᤀᤠᤛᤢᤰᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤗᤧᤰᤘᤠ ᤛᤩᤧᤖᤥ॥

⁵ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ॥ ᤀᤠᤔᤧᤴ᥄

ᤘᤣ᤹ᤛᤔᤠ ᤛᤢᤏᤠᤀᤡᤱ ᤜᤥᤵ

⁶ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤔᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤗᤠᤶ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤰᤂᤧᤴ ᤜᤠᤖᤠ ᤁᤧᤗᤧᤖᤢᤶᤔᤠᤱ ᤘᤣ᤹ᤛᤔᤠ ᤛᤢᤏᤠᤀᤡᤱᤅᤥ ᤁᤧᤒᤣᤃᤡᤖ ᤁᤧᤒᤳᤇᤡᤒᤣ॥

⁷ ᤛᤧᤰᤂᤠ᤺ᤸᤗᤧ ᤂᤧᤱᤃ ᤁᤢᤈᤧᤰ ᤛᤢᤏᤠᤀᤡᤱ ᤔᤣ᤺ᤴᤗᤥ. ᤁᤖ ᤁᤢᤓᤠ ᤔᤏᤠᤜᤠ᤹ᤖᤧᤃ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤌᤠᤔᤠᤛᤡ ᤑᤠ᤹ᤀᤠᤱ ᤂᤪᤡᤛ᤻ᤋᤧᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱᤅᤡᤴ ᤔᤧᤀᤡᤃᤢ ᤔᤧᤗᤧᤰᤂᤢᤖ ᤔᤧᤘᤠ᤹ᤖᤥ॥

⁸ ᤁᤖ ᤋᤃᤡ ᤀᤠᤏᤡᤃᤣ ᤂᤡᤏᤡ᤹ ᤀᤡᤱᤓᤥᤀᤠᤛᤡᤃᤧᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤛᤢᤏᤠᤀᤡᤱᤅᤡᤴ ᤀᤠᤏᤡᤃᤣ ᤀᤡᤱᤓᤥᤛᤢᤶᤒᤧ᤹ ᤀᤡᤃᤪ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤓᤥᤛᤢ᤹ᤛᤠᤱ ᤂᤧᤴᤏᤡᤴ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤖᤖᤥ॥

⁹ ᤀᤠᤏᤡᤃᤣ ᤋᤃᤡ ᤔᤧᤳᤋᤠᤛᤡᤃᤧᤒᤠ ᤜᤧᤰᤁᤣ ᤕᤠᤶᤔᤥᤀᤠᤱ ᤔᤧᤳᤋᤠᤛᤡᤃᤧ᤹ᤖᤥ. ᤀᤠᤳᤋᤡᤸᤗᤧ ᤂᤡᤏᤡ᤹ ᤁᤧᤍᤠ᤺ᤰᤋᤢᤶᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛᤔᤠ ᤛᤢᤏᤠᤀᤡᤱᤅᤡᤴ ᤀᤡᤱᤃᤧᤓᤥᤛᤡ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤱᤃᤪᤠᤴ ᤂᤧᤸᤗᤧ ᤁᤢᤛᤶᤍᤠᤱ ᤆᤢᤰᤗᤖᤥ॥

¹⁰ ᤀᤠᤸᤗ ᤀᤡᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤔᤣ᤺ᤴ. ᤁᤖ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ ᤐᤡᤔᤠ ᤁᤥ᤺ᤳᤋᤢᤱᤗᤥ॥ ᤀᤠᤸᤗᤛᤠᤱ ᤀᤡᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤡᤔᤠᤛᤡᤖᤰ ᤁᤥ᤺ᤳᤋᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤛᤧᤘᤠᤖᤥᤒᤠ ᤔᤧ᤺ᤴᤏᤠ᤹ᤖᤥ॥

ᤐᤠᤘᤗᤖᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤕᤢᤰ ᤂᤥᤛᤢ᤹

¹¹ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤀᤡᤱᤓᤥᤛᤢᤱᤒᤠ ᤛᤢᤏᤠᤀᤡᤱᤅᤡᤱᤃ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤋᤩᤧᤒᤠ ᤔᤣ᤺ᤴᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥

¹² ᤁᤱᤃ ᤔᤧᤴᤇᤠᤶ ᤕᤠᤵᤔᤡᤗᤠᤶᤒᤠ ᤂᤥᤛᤢᤱᤒᤠ ᤔᤣ᤺ᤴ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤜᤢ᤹ᤖᤠᤱᤒᤠᤀᤠᤱ ᤔᤣ᤺ᤴ. ᤁᤖ ᤀᤡᤱᤃᤠ᤹ ᤕᤧᤛᤢ ᤂᤪᤡᤛ᤻ᤋᤧᤸᤗᤧᤀᤣ ᤀᤥᤛᤣ᤺ᤴᤎᤠᤰᤋᤠᤱᤅᤠᤱ ᤂᤥᤛᤢᤱᤒᤠᤖᤥ॥

¹³ ᤀᤡᤱᤃᤠ᤹ ᤋᤃᤡ ᤕᤜᤢᤍᤡ ᤛᤠᤶᤕᤥᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤰᤋᤱᤒᤠ ᤔᤏᤠ ᤘᤕᤠᤱ ᤜᤧᤰᤁᤩᤠᤱ ᤀᤠᤰᤂᤧᤴ ᤛᤠ᤹ᤖᤡᤰ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱᤅᤠᤱ ᤔᤧᤱᤔᤠ ᤁᤥ᤺ᤳᤋᤢᤱᤛᤡᤱ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

¹⁴ ᤀᤡᤱᤃᤠ᤹ ᤕᤜᤢᤍᤡ ᤀᤠᤒᤧᤖᤧᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤜᤢᤍᤡ ᤛᤠᤶᤕᤥᤀᤥ ᤐᤥᤔᤠ ᤏᤡᤱᤘᤠ᤹ ᤐᤡᤖᤢᤱ ᤜᤧᤰᤁᤩᤠᤱ ᤀᤠᤶᤒᤠ ᤀᤠᤴᤎᤧᤒᤠᤜᤠ᤹ᤗᤠᤶ ᤁᤧᤒᤥᤱᤒᤠ ᤁᤧᤕᤢ᤺ᤒᤠ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤢᤛᤡᤰ ᤁᤧᤛᤶᤒᤠ ᤘᤕᤠᤱᤗᤥ॥

^15-16 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤠᤔᤧᤴᤘᤠ᤺ᤴᤇᤡᤱᤅᤣᤀᤠᤱᤎᤥᤀᤣ ᤗᤢᤱᤔᤠ᤹ ᤋᤢᤰᤋᤠᤱ. ᤜᤧᤰᤁᤩᤠᤱ ᤛᤣᤃᤠᤱᤅᤠᤱ ᤛᤧᤘᤠ ᤆᤥ᤺ᤰᤛᤧ ᤀᤢ᤺ᤳᤋᤠᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤢᤱᤛᤡᤱᤗ ᤑᤠ᤹ᤀᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤀᤥ᤺ᤴᤎᤠᤰᤔᤠ ᤁᤢᤛᤡᤖᤠ᤹ ᤌᤠᤅᤧ॥ ᤂᤧᤴ ᤕᤧᤶᤔᤥ ᤀᤡᤱᤃᤠ᤹ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤛᤢᤈᤠ ᤔᤧᤏᤠ᤺ᤰᤋᤢᤱᤛᤡᤱᤅᤡᤴ.

¹⁷ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥᤀᤠᤱ ᤛᤢᤈᤠ ᤏᤠ᤺ᤰᤛᤧ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤌᤥ ᤔᤧᤶᤒᤣ᤺ᤰᤐᤧᤴᤗᤥ. ᤁᤖ ᤀᤡᤱᤃᤠ᤹ᤃ ᤂᤡᤔᤥ ᤀᤖᤒᤡᤕᤠ ᤗᤠᤈᤣ᤹ᤀᤥ ᤐᤣᤃᤠᤱ. ᤜᤧᤰᤁᤩᤠᤱ ᤋᤠ᤺ᤴᤍᤡ ᤀᤡᤱᤃᤠ᤹ ᤍᤔᤛ᤻ᤁᤛ ᤕᤧᤰᤕᤰᤁᤥ ᤏᤢ᤺ᤰᤂᤠᤱ ᤋᤩᤠᤱᤗᤥ॥

¹⁸ ᤜᤧᤰᤁᤩᤠᤱ ᤋᤱᤒᤣ ᤛᤢᤶᤛᤡ ᤀᤣᤃᤠᤱᤗᤰ ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤐᤋᤪᤢᤛᤖᤧ ᤁᤢᤍᤢᤶᤛᤧ ᤐᤣᤃᤠᤱ. ᤜᤧᤰᤁᤩᤠᤱ ᤂᤢᤏᤧ᤹ᤏᤢᤀᤣ ᤌᤡᤰ ᤅᤠ (᥇᥋) ᤕᤧᤴ ᤌᤠᤖᤡᤰ ᤕᤢᤅᤠᤱᤗᤥ॥

¹⁹ ᤂᤧᤵᤔᤥ ᤍᤠᤱᤒᤠᤸᤗᤧ ᤁᤢᤴᤛᤠ᤹ ᤕᤠᤁᤢᤒᤧᤴᤏᤢ ᤘᤣ᤹ ᤀᤠᤳᤋᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤠᤱ ᤔᤧᤍᤢᤔᤢᤱᤛᤡᤱᤅᤡᤴᤗᤥ॥

²⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤧᤰᤂᤠ ᤐᤠᤴ ᤔᤧᤳᤏᤡᤱᤗᤥ. ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤐᤠ᤺ᤴᤜᤠ᤹ ᤀᤡᤱᤗᤧᤰ ᤔᤣ᤺ᤴᤗᤥ॥

²¹ ᤂᤧᤴ ᤀᤣᤃᤠᤱ ᤀᤡᤱᤃᤠ᤹ ᤛᤡᤖᤡᤕᤠ ᤏᤢ ᤛᤡᤗᤡᤛᤡᤕᤠ ᤌᤢᤶᤔᤥ ᤐᤣᤃᤠᤱᤗᤥ॥

²² ᤕᤜᤢᤍᤡᤕᤠ ᤗᤠᤈᤣ᤹ᤀᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤀᤡᤱᤃᤠ᤹ ᤔᤧᤴᤏᤡᤀᤣ ᤔᤧᤘᤕᤧᤖᤥ॥

²³ ᤂᤧᤱᤜᤠ᤹ᤖᤧᤃ ᤋᤃᤡ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤸᤗᤧ ᤔᤧᤱᤔᤠ ᤁᤥ᤺ᤳᤋᤢᤒᤠ ᤏᤛᤠ᤺ᤴᤏᤡᤴ ᤀᤰᤂᤣ᤺ᤸᤗᤧ ᤀᤡᤱᤓᤥᤛᤢᤖ ᤘᤠ᤹ᤖᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴᤗᤰ ᤔᤧᤄᤧᤵᤛᤢᤀᤠᤱ ᤔᤧᤘᤕᤧᤖᤥ॥

²⁴ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤥ॥