ᤀᤧᤈᤪᤠ 1 - LIFOTNT

ᤁᤥᤖᤣᤛᤖᤧ ᤕᤜᤢᤍᤡᤜᤠ᤹ ᤏᤢ᤺ᤱᤔᤠ ᤑᤠ᤺ᤰᤋᤢᤛᤡ

¹ ᤁᤥᤖᤣᤛᤧᤴ ᤑᤠᤖᤛ ᤗᤠᤈᤣ᤹ᤀᤥ ᤐᤕᤶ ᤜᤠᤱ ᤐᤥ᤺ᤰᤂᤧᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤔᤧᤳᤋᤢᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤳᤋᤢ॥ ᤁᤴ ᤕᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤱᤈᤠᤱᤅᤡᤴ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤋᤧᤴᤜᤠ᤹ᤀᤥ ᤀᤡᤱᤄᤱ ᤛᤧᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤠᤵᤋᤢᤀᤠᤱ ᤜᤠᤅᤢᤖᤥ—

² “ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱ ᤁᤥᤖᤣᤛᤧᤸᤗᤧ ᤁᤢᤀᤡᤱᤈᤠᤱ ᤁᤴ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱ ᤆᤥᤃᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤃᤡ ᤕᤜᤢᤍᤠ ᤗᤠᤈᤣ᤹ᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰ ᤐᤡᤖᤠᤱᤅᤠᤱ ᤘᤠ᤹॥

³ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤘᤠ᤹ᤖ॥ ᤂᤡᤏᤡ᤹ ᤕᤜᤢᤍᤠᤒᤠ ᤕᤖᤢᤛᤗᤧ᤺ᤶᤔᤥ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤒᤠ ᤕᤖᤢᤛᤗᤧ᤺ᤶᤔᤥ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤵᤔᤥ ᤕᤠᤶᤔᤥ ᤔᤠᤱᤜᤡᤶ ᤆᤥᤃᤧᤶᤔᤧ᤹॥

⁴ ᤘᤣ᤹ ᤗᤠᤈᤣ᤹ᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤂᤢᤏᤧ᤹ ᤁᤢᤓᤠ ᤁᤢᤔᤏᤠᤜᤠ᤹ ᤏᤢ᤺ᤱᤔᤠ ᤑᤧᤶᤔᤠᤖᤧᤗᤠᤃᤡ ᤑᤠ᤹ᤔᤠᤛᤡ ᤆᤠᤜᤠᤒ᤻ ᤔᤧᤈᤥᤰᤏᤧᤓᤃᤪ ᤂᤢᤴᤇᤡ᤹ ᤐᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡᤖ॥ ᤂᤢᤴᤇᤡ᤹ ᤐᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤂᤧᤱᤜᤠ᤹ ᤛᤠᤶᤔᤩᤠᤱ. ᤕᤢᤵᤐᤠ. ᤆᤡᤃᤰᤘᤠᤜᤠ᤹ ᤜᤧᤰᤁᤩᤠᤱ ᤜᤡᤶᤔᤥ ᤜᤡᤶᤌᤰᤛᤠᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤋᤥ᤺ᤶᤔᤠᤖᤧ ᤗᤠᤃᤡ ᤜᤢᤰᤘᤠ ᤔᤧᤒᤡᤖᤢᤛᤡᤖ॥”

⁵ ᤂᤧᤒᤩᤠᤱ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤛᤢᤘᤠᤱᤛᤔᤠ ᤋᤢᤶᤓᤠᤰᤐᤠᤜᤠ᤹. ᤏᤡᤱᤘᤠ᤹ᤓᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤛᤡᤰᤛᤶᤔᤠ ᤏᤡᤱᤘᤠ᤹ ᤐᤡᤖᤢᤛᤡᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤕᤖᤢᤛᤗᤧ᤺ᤶᤔᤥ ᤐᤣ᤺ᤰᤔᤠᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤕᤠᤖᤡᤵ ᤔᤧᤒᤥ᤺ᤰᤂᤧ॥

⁶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤕᤖᤡᤰ ᤆᤡᤃᤰᤘᤠ ᤛᤠᤔᤠᤜᤠ᤹. ᤕᤢᤵᤐᤠ ᤂᤵᤐᤩᤠᤜᤠ᤹. ᤛᤠᤶᤔᤩᤠᤱ. ᤆᤡᤃᤰᤘᤠᤜᤠ᤹. ᤜᤡᤶᤌᤰᤛᤠᤜᤠ᤹. ᤘᤣ᤹ ᤀᤡᤔᤧᤸᤗᤢᤱᤒᤠ ᤐᤠ᤺ᤴᤜᤠ᤹ ᤏᤢ ᤔᤠᤱᤜᤡᤶᤔᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤜᤢᤰᤘᤠᤜᤠ᤹ ᤔᤧᤒᤡᤖᤢᤛᤡᤀᤠᤱ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡ॥

⁷ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤕᤖᤢᤛᤗᤧᤔ ᤔᤠᤱᤜᤡᤶᤔᤥᤗᤠᤶ ᤋᤣ᤹ᤖᤢᤀᤠᤱ ᤂᤢᤏᤧ᤹ ᤁᤢᤔᤠᤱᤅᤡᤸᤗᤧ ᤔᤠᤱᤜᤡᤶᤔᤥ ᤕᤢᤰᤂᤢᤛᤡᤀᤠᤱ ᤕᤢᤅᤧᤒᤠ ᤂᤵᤐᤩᤠ ᤛᤠᤔᤠᤜᤠ᤹ ᤁᤥᤖᤣᤛ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤏᤢ᤺ᤰᤋᤢ ᤐᤡᤖᤢᤛᤡ॥

⁸ ᤂᤢᤏᤧ᤹ ᤜᤠᤱᤜᤡᤶ ᤕᤠᤱᤕᤢᤱᤔᤥᤒᤠ ᤋᤢᤶ ᤛᤢᤜᤠᤱᤕᤢᤰᤐᤠ ᤔᤡᤋᤪᤣᤍᤠᤋᤧᤴ ᤂᤧᤴ ᤂᤵᤐᤩᤠᤜᤠ᤹ ᤐᤡᤖᤢᤀᤠᤱ ᤂᤢᤏᤧ᤹ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤛᤣᤛᤣᤒᤛ᤻ᤛᤖᤧᤸᤗᤧ ᤁᤢᤗᤠᤃᤡ ᤂᤧᤴ ᤆᤡᤃᤰᤘᤠ ᤛᤠᤔᤠᤜᤠ᤹ ᤗᤳᤇᤠ ᤌᤠᤔᤡᤱᤅᤥ ᤑᤥ᤺ᤴᤍᤢ॥

^9-10 ᤂᤧᤴ ᤛᤠᤔᤠᤜᤠ᤹ᤖᤧ ᤁᤢᤔᤡᤱ ᤁᤧᤒᤵᤐᤠ ᤌᤠᤔᤡᤱᤅᤡᤴ ᤀᤰᤋᤱᤒᤠ ᤆᤥᤃᤧᤖᤥ— ᤜᤢᤰᤘᤠ ᤋᤥ᤺ᤶᤔᤠ ᤛᤠᤶᤔᤩᤠᤱ ᤂᤷᤒᤠ—᥉᥆ ᤜᤢᤰᤘᤠ ᤋᤥ᤺ᤶᤔᤠ ᤕᤢᤵᤐᤠ ᤂᤷᤒᤠ—᥇.᥆᥆᥆ ᤛᤢᤰᤐᤠ ᤜᤠ᤺ᤶᤔᤠ ᤂᤷᤒᤠᤜᤠ᤹—᥈᥏ ᤆᤢᤈᤢᤰᤛᤠ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹—᥉᥆ ᤆᤢᤈᤢᤰᤛᤠ ᤕᤢᤵᤐᤠ ᤂᤥᤷᤕᤠᤜᤠ᤹—᥊᥇᥆ ᤘᤣ᤹ ᤂᤵᤐᤩᤠ ᤛᤠᤔᤠᤜᤠ᤹—᥇.᥆᥆᥆

¹¹ ᤁᤧᤖᤧᤰ ᥋.᥊᥆᥆ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤂᤵᤐᤩᤠᤜᤠ᤹ ᤘᤕᤧ॥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤒᤣᤒᤡᤗᤥᤏᤗᤠᤶ ᤕᤖᤢᤛᤗᤧ᤺ᤶᤔᤥ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤸᤗᤧ ᤛᤣᤛᤒᤛ᤻ᤛᤖᤧᤸᤗᤧ ᤂᤧᤴ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤑᤧᤳᤋᤢᤀᤠᤱ ᤕᤖᤢᤛᤗᤧ᤺ᤶᤔᤥ ᤑᤧᤖᤧᤖᤥ॥