ᤀᤡᤈᤁᤡᤀᤣᤗ 1 - LIFOTNTᤀᤡᤈᤁᤡᤀᤣᤗᤖᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤡᤛᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤑᤥ (ᤀᤡᤈᤁᤡᤀᤣᤗ ᥇:᥇–᥍:᥈᥍) ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ 1 ᤀᤠᤱᤃᤠ᤹ ᤋᤱᤒᤣ ᤛᤢᤶᤒᤥᤱ ᤁᤧᤖᤠᤱᤒᤠ ᤗᤡᤛᤡᤃᤣᤰᤐᤠ ᤗᤠ ᤅᤠᤛᤡᤃᤣᤰᤐᤠ ᤕᤧᤴᤏᤥ. ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤕᤜᤢᤍᤠᤒᤠ ᤛᤱᤈᤢᤶᤓᤥᤜᤠ᤹ᤏᤢ ᤛᤥᤖᤡᤰ ᤒᤣᤒᤡᤗᤥᤏ ᤗᤠᤈᤣ᤹ᤀᤥᤒᤠ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤀᤠᤱᤃᤠ᤹ ᤀᤡᤈᤁᤡᤀᤣ᤺ᤸᤗᤧᤴ ᤘᤕᤠᤱᤅᤡᤸᤗᤧ ᤋᤠᤱᤛᤠᤱᤒᤧᤴ ᤜᤖᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤑᤥᤜᤠ᤹ ᤏᤡᤛᤢᤱ॥ 2 ᤕᤜᤥᤕᤠᤁᤡᤏ ᤜᤠᤱᤅᤡᤴ ᤗᤠᤈᤣ᤹ᤗᤠᤶᤒᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ ᤁᤴ ᤀᤰᤂᤣ ᤐᤥ᤺ᤰᤂᤧᤀᤠᤱ ᤘᤕᤧ॥ 3 (ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤒᤠ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤒᤢᤈᤡᤖᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤡᤈᤁᤡᤀᤣᤗᤖᤥ ᤁᤧᤖᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤂᤢᤏᤧ᤹ ᤁᤢᤛᤶᤎᤠᤱ ᤐᤳᤇᤧᤒᤠ ᤏᤡᤱᤘᤠ᤹ ᤂᤥᤛᤢ॥) 4 ᤀᤠᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱᤅᤡᤸᤗᤧ ᤌᤠᤱᤃᤧᤳ ᤌᤥᤗᤠᤶᤒᤠ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤰᤋᤧ ᤕᤧᤖ ᤐᤳᤇᤧᤒᤠ. ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠ᤹ᤶᤔᤡ᤺ᤵᤐᤠ ᤗᤢᤶᤔᤥ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤛᤠ᤺ᤶᤓᤣ ᤗᤧᤰᤋᤧᤖ ᤐᤳᤇᤧᤒᤠ ᤏᤡᤛᤢᤱ॥ ᤂᤧᤵᤔᤥ ᤂᤠ᤹ᤔᤡ᤺ᤳᤋᤡᤸᤗᤧ ᤁᤢᤗᤢᤶᤔᤥ ᤔᤡ ᤕᤠᤃᤧ. ᤜᤧᤰᤁᤩᤠᤱ ᤔᤡ᤺ᤸᤗᤧ ᤁᤢᤗᤢᤶᤔᤥ ᤁᤠᤛᤠᤴ ᤕᤥ᤺ᤴᤍᤧᤒᤠ ᤁᤢᤀᤡᤛᤡᤰ ᤋᤡᤸᤗᤧᤰ ᤋᤡᤸᤗᤧᤰ ᤗᤧᤰᤋᤧᤖ ᤐᤳᤇᤧ॥ 5 ᤂᤠ᤹ᤔᤡ᤺ᤳᤋᤡᤸᤗᤧ ᤁᤢᤗᤢᤶᤔᤥᤗᤠᤶ ᤔᤏᤠ ᤜᤧᤰᤋᤱᤒᤠ ᤏᤡᤃᤧᤍᤧᤵᤐᤠ ᤗᤡᤛᤡ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤔᤧᤗ᤺ᤴᤍᤧ॥ 6 ᤁᤖ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤡᤛᤡ ᤗᤡᤛᤡ ᤏᤠᤖᤠ ᤏᤢ ᤗᤡᤛᤡ ᤗᤡᤛᤡ ᤗᤠᤵ ᤐᤳᤇᤧ॥ 7 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤋᤥ᤹ᤍᤥ᤺ᤶᤒᤠ ᤆᤥᤃᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤱᤍᤠᤵᤐᤣ᤹ᤜᤠ᤹ ᤁᤖ᤺ᤱ ᤐᤡᤳᤋᤧᤸᤗᤧ ᤁᤢᤗᤠᤱ ᤋᤥ᤹ᤓᤣ᤺ᤳ ᤜᤧᤰᤋᤱᤒᤠ ᤆᤥᤃᤧ ᤂᤧᤶᤒᤩᤠᤱ ᤀᤡ᤺ᤱᤔᤏᤠᤒᤠ ᤁᤠᤛᤠ ᤁᤢᤀᤡᤛᤡᤰ ᤋᤡᤸᤗᤧᤰ ᤋᤡᤸᤗᤧᤰ ᤗᤧᤰᤋᤧ॥ 8 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤡᤛᤡ ᤗᤠᤵᤜᤠ᤹ ᤛᤡᤃᤠᤱ ᤔᤏᤠ ᤜᤢᤰᤜᤠ᤹ ᤏᤡᤔᤠ ᤛᤢᤰᤋᤢᤱ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤡᤛᤡ ᤏᤠᤖᤠ ᤏᤢ ᤗᤡᤛᤡ ᤗᤠᤵᤜᤠ᤹ ᤐᤳᤇᤧ॥ 9 ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤐᤡᤸᤗᤧ ᤁᤢᤛᤶᤔᤡᤸᤗᤧ ᤘᤣ᤹ᤛᤔᤠ ᤗᤠᤵᤐᤡᤸᤗᤧ ᤘᤣ᤹ ᤌᤰᤛᤠ᤺ᤸᤗᤧ ᤁᤢᤗᤠᤵᤐᤡᤸᤗᤧ ᤁᤢᤕᤠᤴ ᤛᤢᤛᤢᤀᤠᤱ ᤁᤒᤪᤡᤱᤒᤠ ᤐᤥ᤺ᤰᤂᤧᤀᤠᤱ ᤐᤳᤇᤧ॥ ᤂᤧᤱᤜᤠ᤹ ᤁᤧᤖᤧᤰ ᤋᤃᤡ ᤔᤧᤒᤣ᤺ᤸᤗᤧ ᤂᤢᤴᤇᤡ᤹ ᤌᤰᤁᤡᤴ ᤏᤠ ᤏᤢ ᤁᤳᤏᤠ ᤔᤧᤴᤜᤡᤀᤣ ᤛᤥᤛᤥᤖᤡᤰ ᤗᤠᤱᤔᤧᤄᤣᤃᤧ॥ 10 ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤃᤠᤱ ᤔᤧᤴᤇᤠᤶ ᤕᤠᤵᤔᤡ ᤏᤠᤖᤠ. ᤆᤢᤵᤛᤠᤱ ᤗᤧᤵᤔᤠᤱ ᤂᤡᤖᤡᤱᤒᤠ ᤏᤠᤖᤠ. ᤑᤧᤴᤇᤠᤱ ᤗᤧᤵᤔᤠᤱ ᤐᤡᤳ ᤏᤠᤖᤠ ᤏᤢ ᤀᤣᤃᤠᤱ ᤗᤧᤵᤔᤠᤱ ᤁᤰᤁᤑᤡ᤺ᤰᤔᤠ ᤏᤠᤖᤠ ᤐᤳᤇᤧ॥ 11 ᤁᤧᤖᤧᤰᤗᤧ ᤁᤢᤃᤠᤵᤌᤡᤰ ᤗᤠᤵᤜᤠ᤹ ᤜᤵᤑᤧ ᤔᤧᤔᤧᤳᤋᤢᤀᤠᤱ ᤐᤳᤇᤧ. ᤁᤢᤃᤠᤵᤌᤡᤰ ᤜᤵᤑᤧ ᤁᤧᤓᤧᤒᤠ ᤗᤠᤵᤜᤠ᤹ᤖᤧ ᤘᤣ᤹ᤛᤔᤠᤸᤗᤧ ᤁᤢᤗᤠᤵᤜᤠ᤹ ᤛᤢᤛᤢᤀᤠᤱ ᤐᤳᤇᤧ. ᤂᤧᤒᤩᤠᤱ ᤏᤧᤳᤇᤡ ᤗᤠᤵᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤌᤰᤁᤡᤴ ᤋᤧᤵᤋᤢᤀᤠᤱ ᤐᤳᤇᤧ॥ 12 ᤕᤠᤶᤛᤠᤶᤔᤡᤸᤗᤧ ᤛᤣᤃᤢᤒᤠ ᤀᤠᤳᤋᤡ ᤐᤡᤛᤠᤱᤛᤠᤱ ᤂᤡᤖᤡ ᤔᤧᤴᤜᤡᤛᤡᤱᤅᤣ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤔᤧᤒᤣ॥ 13 ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤔᤡᤄᤠ᤺ᤱ ᤀᤡᤃᤪ ᤁᤧᤀᤥ᤺ᤵᤐᤠ ᤋᤩᤠ᤺ᤸᤗᤥᤳ ᤜᤧᤰᤋᤱᤒᤠ ᤏᤡᤔᤧᤎᤠᤒᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤠ ᤏᤢ ᤁᤳᤏᤠ ᤛᤠ᤺ᤶᤓᤣ ᤗᤧᤰᤋᤧᤒᤠ ᤜᤧᤰᤁᤣ ᤗ᤹ᤖᤧ॥ 14 ᤜᤧᤰᤁᤩᤠᤱ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤛᤠ᤺ᤶᤓᤣ ᤗᤧᤰᤋᤧᤒᤠ ᤁᤢᤀᤡᤛᤡᤰ ᤏᤠ ᤏᤢ ᤁᤳᤏᤠ ᤔᤧᤛᤢ᤺ᤰᤋᤧᤀᤠᤱ ᤔᤧᤘᤕᤧ॥ 15 ᤁᤴ ᤗᤡᤛᤡ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤀᤠᤱᤃᤠ᤹ ᤀᤥᤔᤧᤳᤋᤢᤱᤛᤡᤱᤗ ᤐᤳᤇᤠᤱᤅᤡᤸᤗᤧᤛᤠ. ᤁᤧᤖᤧᤰᤗᤧ ᤂᤢᤴᤇᤡ᤹ ᤐᤣᤛᤠᤱ ᤂᤠᤶᤒᤠᤱ ᤁᤧᤛᤢᤒᤠ ᤗᤡᤛᤡ ᤁᤠᤵᤗᤥ᤺ᤰᤜᤠ᤹ ᤏᤡᤛᤢᤱᤛᤡᤱ. ᤂᤧᤴ ᤁᤧᤖᤧᤰᤗᤧᤴ ᤗᤳᤇᤠ ᤗᤳᤇᤠ ᤁᤠᤵᤗᤥᤰ ᤐᤳᤇᤧ॥ 16 ᤁᤠᤵᤗᤥ᤺ᤰᤜᤠ᤹ ᤔᤢᤎᤡᤱᤗᤢᤱᤗᤠᤶ ᤆᤥ᤺ᤰᤔᤏᤠᤒᤠ ᤜᤧᤰᤁᤣ ᤋᤡᤸᤗᤧᤰ ᤋᤡᤸᤗᤧᤰ ᤁᤧᤗ᤹ᤒᤠ ᤆᤥᤃᤧ॥ ᤁᤧᤖᤧᤰ ᤗᤡᤛᤡ ᤁᤠᤵᤗᤥ᤺ᤰᤜᤠ᤹ ᤗᤳᤌᤡᤰ ᤐᤖᤡᤰᤐᤠ ᤏᤡᤔᤧᤍᤧᤳᤋᤧ ᤜᤧᤰᤁᤩᤠᤱ ᤗᤳᤌᤡᤰ ᤐᤖᤡᤰᤗᤧ ᤔᤧᤈᤥᤃᤢᤒᤠ ᤆᤥᤃᤧ. ᤁᤧᤖᤧᤰ ᤁᤠᤵᤗᤥ᤺ᤰᤜᤠ᤹ ᤗᤢᤶᤔᤥ ᤗᤳᤇᤠ ᤗᤳᤇᤠ ᤘᤣ᤹ ᤁᤠᤵᤗᤥᤰ ᤐᤳᤇᤧ॥ 17 ᤂᤧᤴ ᤁᤢᤜᤡᤱᤘᤧᤳ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ ᤋᤃᤡ ᤔᤧᤎᤠᤛᤡᤱᤅᤡᤸᤗᤧ. ᤋᤰ ᤔᤧᤔᤧᤳᤋᤢᤒᤠ ᤀᤠᤳᤋᤡ ᤐᤡᤛᤠᤱ ᤔᤧᤒᤣᤛᤠᤱ ᤂᤡᤖᤡ ᤔᤧᤴᤜᤡᤛᤡᤱᤅᤣ ᤀᤠᤳᤋᤡᤛᤠᤱ ᤐᤣ᤺ᤰᤔᤠ ᤔᤧᤛᤢᤰᤋᤧ॥ 18 ᤂᤧᤴ ᤁᤠᤵᤗᤥ᤺ᤰᤜᤠ᤹ᤖᤧ ᤁᤢᤃ᤺ᤱᤃᤩᤠᤜᤠ᤹ ᤆᤠᤱᤈᤠᤱᤒᤠ ᤏᤢ ᤁᤡᤵᤔᤠᤃᤧᤄᤢᤒᤠ ᤆᤥᤃᤧ. ᤂᤧᤒᤩᤠᤱ ᤗᤠᤁᤠᤳᤐᤠ ᤁᤢᤕᤠ ᤁᤒᤪᤡᤱ ᤔᤡᤰᤁᤣ ᤔᤡᤰ ᤁᤧᤒᤵᤐᤠ ᤆᤥᤃᤧ॥ 19 ᤁᤢᤜᤡᤱᤘᤧᤳ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ ᤔᤧᤒᤣ᤺ᤸᤗᤧ ᤁᤠᤵᤗᤥ᤺ᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤔᤧᤗᤥ᤺ᤰᤋᤧ॥ ᤂᤧᤱᤜᤠ᤹ ᤌᤥ ᤔᤧᤒᤣ᤺ᤸᤗᤧ. ᤁᤠᤵᤗᤥ᤺ᤰᤜᤠ᤹ᤀᤠᤱ ᤌᤥ ᤔᤧᤒᤣ॥ 20 ᤁᤢᤜᤡᤱᤘᤧᤳ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤧᤴ ᤁᤠᤵᤗᤥ᤺ᤰᤜᤠ᤹ᤀᤥ ᤕᤠᤃᤧ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤳᤋᤠᤴ ᤀᤠᤳᤋᤠᤴ ᤐᤣ. ᤁᤠᤵᤗᤥ᤺ᤰᤜᤠ᤹ ᤏᤢ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ᤀᤠᤱ ᤂᤧᤵᤔᤥᤀᤣ ᤔᤧᤒᤣ॥ 21 ᤂᤧᤴ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤔᤧᤔᤢᤴᤍᤧᤸᤗᤧ. ᤂᤧᤴ ᤁᤠᤵᤗᤥ᤺ᤰᤜᤠ᤹ᤀᤠᤱ ᤔᤧᤔᤢᤴᤍᤧ॥ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤔᤢᤶᤔᤠ ᤔᤧᤏᤠ᤹ᤖᤧᤸᤗᤧ ᤁᤠᤵᤗᤥ᤺ᤰᤜᤠ᤹ᤀᤠᤱ ᤔᤢᤶᤔᤠ ᤔᤧᤏᤠ᤹ᤖᤧ॥ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤌᤥ ᤔᤧᤒᤣ᤺ᤸᤗᤧ ᤁᤠᤵᤗᤥ᤺ᤰᤜᤠ᤹ᤀᤠᤱ ᤌᤥ ᤔᤧᤒᤥᤃᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤧᤴ ᤁᤠᤵᤗᤥ᤺ᤰᤜᤠ᤹ᤀᤥ ᤕᤠᤃᤧ॥ 22 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤒᤠᤍᤧᤴᤏᤡᤴ ᤋᤠᤱᤛᤠᤱᤒᤠ ᤜᤧᤰᤁᤣ ᤋᤠᤶᤍᤠᤶᤒᤠ ᤁᤧᤓᤧᤛᤡᤱᤒᤠ ᤏᤠᤱ ᤜᤧᤰᤁᤣ ᤑᤍᤠᤱᤒᤠ ᤁᤧᤀᤥ᤺ᤵᤐᤠ ᤆᤥᤃᤧ॥ 23 ᤁᤴ ᤁᤧᤓᤧᤛᤡᤱᤒᤠᤍᤧᤴᤏᤡᤸᤗᤧ ᤁᤢᤛᤡ᤺ᤰᤋᤥ ᤂᤧᤴ ᤁᤢᤜᤡᤱᤘᤧᤳ ᤌᤰᤛᤠ ᤗᤠᤵᤜᤠ᤹ ᤜᤵᤑᤧ ᤔᤧᤓᤧᤛᤢᤀᤠᤱ ᤘᤣ᤹ ᤗᤠᤵᤜᤠ᤹ᤏᤢ ᤔᤧᤍᤢᤶᤛᤢᤀᤠᤱ ᤐᤳᤇᤧ. ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤧᤳᤇᤡ ᤗᤠᤵᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤴ ᤔᤧᤍᤧᤵᤋᤢᤀᤠᤱ ᤐᤳᤇᤧ॥ 24 ᤂᤧᤱᤜᤠ᤹ ᤔᤧᤔᤢᤴᤍᤧᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤵ ᤗᤠᤀᤡ᤺ᤰᤋᤧᤒᤧᤴ ᤘᤖ᤺ᤱ ᤁᤢᤀᤡᤛᤡᤰ ᤛ᤺ᤰᤋᤧᤒᤠ ᤀᤡᤃᤪ ᤔᤢᤰᤛᤠᤶᤍᤠᤱᤒᤧᤸᤗᤧ ᤁᤢᤀᤡᤰᤗᤠ ᤜᤧᤰᤁᤣ ᤗ᤹ᤖᤧᤒᤠ ᤀᤡᤃᤪ ᤕᤖᤡᤰ ᤌᤰᤛᤢᤒᤠ ᤋᤢᤖᤠ ᤗᤠᤱᤔᤧᤄᤣᤃᤧᤒᤠ ᤁᤢᤀᤡᤛᤡᤰ ᤂᤧᤵᤛᤢᤱ॥ ᤂᤧᤱᤜᤠ᤹ ᤔᤧᤏᤠ᤺ᤶᤛᤡᤱᤅᤧᤸᤗᤧ ᤂᤢᤴᤇᤡ᤹ ᤗᤠᤵᤜᤠ᤹ ᤕᤥ ᤛᤥᤖᤥ ᤔᤧᤎᤠᤛᤢ॥ 25 ᤂᤧᤱᤜᤠ᤹ ᤌ᤺ᤵᤐᤧᤳ ᤔᤧᤕᤧᤶᤛᤡᤱᤅᤠᤱ ᤂᤢᤴᤇᤡ᤹ ᤗᤠᤵᤐᤡᤴ ᤕᤥ ᤔᤧᤎᤠᤛᤢᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤒᤠ ᤛᤧᤸᤗᤧᤱᤃᤥ ᤁᤧᤓᤧᤛᤡᤱᤒᤠᤍᤧᤴᤏᤥᤗᤠᤶ ᤀᤡᤰᤗᤠᤎᤡᤰ ᤐᤠᤖᤧᤗ᤺ᤴᤍᤧ॥ 26 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤒᤠ ᤁᤧᤓᤧᤛᤡᤱᤒᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤜᤡ᤺ᤰᤁᤱᤁᤱᤒᤠ ᤔᤢᤎᤡᤱᤗᤢᤱᤅᤡᤸᤗᤧ ᤆᤥ᤺ᤰᤔᤏᤠᤒᤠ ᤜᤠᤱᤕᤢᤰᤏᤠ ᤜᤧᤰᤁᤣ ᤏᤡᤃᤧᤎᤠ᤺ᤵᤐᤠ ᤌᤡᤰ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤁᤴ ᤜᤠᤱᤕᤢᤰᤏᤠ᤺ᤸᤗᤧ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤌᤠ᤺ᤱᤎᤠᤰ ᤔᤏᤠ ᤜᤧᤰᤋᤱᤒᤠ ᤏᤡᤃᤧᤍᤧᤵᤐᤠ ᤌᤡᤰ ᤕᤢᤅᤧ॥ 27 ᤂᤧᤸᤗᤧ ᤁᤢᤃᤧᤱᤅᤠᤱ ᤌᤥᤜᤠᤱ ᤗᤧᤵᤔᤠᤱ ᤁᤧᤖᤧᤰ ᤐᤡᤛᤠᤱ ᤔᤡ ᤁᤧᤍᤡ᤺ᤵᤐᤠ. ᤕᤥ᤺ᤶᤔᤏᤠᤒᤠ ᤐᤡᤳᤋᤥᤗᤡ ᤁᤧᤍᤡ᤺ᤵᤐᤠ ᤔᤡ ᤜᤧᤰᤁᤣ ᤗ᤹ᤖᤧ॥ ᤜᤧᤰᤁᤩᤠᤱ ᤁᤢᤃᤧᤱᤅᤠᤱ ᤕᤥᤜᤠᤱ ᤗᤧᤵᤔᤠᤱ ᤁᤢᤜᤠᤱᤘᤠ ᤁᤢᤔᤠᤱᤘᤠ᤺ᤸᤗᤧ ᤌᤥ᤹ᤖᤢᤒᤠ ᤜᤢᤖᤢᤖᤢ ᤁᤧᤍᤡ᤺ᤵᤐᤠ ᤔᤡ ᤜᤧᤰᤋᤱᤒᤠ ᤏᤡᤍᤧᤳᤋᤧ॥ 28 ᤘᤜᤡᤳ ᤌᤠᤛᤢᤒᤠ ᤕᤧᤴᤏᤥ ᤂᤠ᤹ᤔᤡ᤺ᤳᤋᤥ ᤏᤠᤶᤎᤡᤱᤃᤥᤴ ᤏᤡᤎᤠ᤺ᤵᤐᤠ ᤜᤧᤰᤁᤣ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤀᤥ᤺ᤵᤐᤠᤎᤡᤰ ᤂᤢᤏᤧ᤹ ᤁᤢᤃᤒᤪᤡᤱ ᤐᤡᤛᤠᤱ ᤐᤳᤇᤧ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤰᤋᤱᤒᤠ ᤏᤡᤛᤢᤱ॥ ᤀᤠᤱᤃᤠ᤹ ᤁᤴ ᤏᤡᤛᤢᤱᤅᤠᤱ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ. ᤂᤧᤒᤩᤠᤱ ᤁᤢᤓᤠᤖᤧ ᤀᤠᤱᤃᤠ᤹ ᤐᤠ᤺ᤴᤇᤠ᤺ᤳᤋᤠᤱᤗ ᤐᤳᤇᤠᤱᤒᤠ ᤀᤡᤰᤗᤠ ᤂᤧᤵᤛᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.