ᤗᤠᤶᤍᤡᤰ 1 - LIFOTNT

ᤔᤡᤛᤪ ᤗᤠᤈᤣ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡ

¹ ᤂᤢᤴᤇᤡ᤹ ᤀᤠᤒᤠᤅᤣ ᤜᤡᤶᤛᤕᤱᤜᤠ᤹ ᤁᤧᤍᤣ᤹ᤒᤠᤀᤠᤱ ᤕᤠᤁᤢᤒᤧᤴᤏᤢ ᤔᤡᤛᤪ ᤗᤠᤈᤣ᤹ᤀᤥ ᤁᤧᤒᤣ᤺ᤰᤐᤠ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ ᤔᤡᤱᤜᤠ᤹—

² ᤖᤢᤒᤣᤏ. ᤛᤡᤔᤡᤕᤥᤏ. ᤗᤧᤒᤡ. ᤕᤜᤢᤍᤠ.

³ ᤀᤡᤛ᤻ᤛᤠᤂᤠᤖ. ᤈᤒᤗᤢᤏ. ᤒᤣᤏᤩᤠᤔᤡᤏ.

⁴ ᤍᤠᤏ. ᤏᤵᤋᤠᤗᤡ. ᤃᤠᤍ ᤏᤢ ᤀᤠᤛᤣᤖ ᤔᤧᤘᤕᤧ॥

⁵ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤜᤠ᤹ ᤁᤧᤖᤧᤰᤗᤧ ᤏᤢᤒᤥᤱ ᤔᤧᤘᤕᤧ॥ ᤂᤢᤏᤧ᤹ ᤁᤢᤛ᤻ᤛᤠ ᤕᤥᤛᤣᤑᤧᤴ ᤋᤃᤡᤀᤠᤱᤎᤥᤀᤣ ᤔᤡᤛᤪᤀᤥ ᤘᤕᤧ॥

⁶ ᤔᤧᤘᤕᤧ ᤔᤧᤕᤢᤅᤧᤸᤗᤧ ᤕᤥᤛᤣᤑᤧᤴ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤏᤢ ᤂᤧᤴ ᤌᤠ᤺ᤰᤁᤥᤒᤠᤜᤠ᤹ ᤁᤧᤖᤧᤰ ᤔᤧᤛᤩᤧ॥

⁷ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡᤛᤪᤠᤀᤡᤗᤡ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤖᤡᤰ ᤛᤠᤀᤣᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤳ ᤕᤖᤡᤰ ᤏᤢ ᤔᤢᤰᤛᤠᤶᤛᤠᤒᤠ ᤔᤧᤒᤥ᤺ᤰᤂᤧ॥ ᤔᤡᤛᤪ ᤗᤠᤈᤣᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤎᤡᤶᤛᤢ॥

⁸ ᤂᤧᤒᤩᤠᤱ ᤔᤡᤛᤪᤀᤥ ᤕᤥᤛᤣᤑᤖᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤗᤳᤇᤠ ᤘᤣ᤹ ᤜᤠᤱᤎᤡᤰᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥

⁹ ᤂᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤁᤴ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤏᤢ ᤔᤢᤰᤛᤠᤶᤛᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥

¹⁰ ᤀᤠᤸᤗ ᤀᤠᤏᤡ᤹ ᤁᤴᤜᤠ᤹ᤏᤢ ᤏᤡᤱᤘᤠ᤺ᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱ᤹. ᤔᤣ᤺ᤴᤏᤧᤓᤃᤪ ᤂᤧ᤺ᤱᤜᤠ᤹ ᤂᤠᤏᤡ᤺ᤳᤋᤥ ᤀᤠᤸᤗᤛᤠᤱ ᤕᤖᤡᤰ ᤔᤧᤒᤥᤖ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤌᤱ ᤐᤥᤱᤅᤡᤸᤗᤧ ᤀᤠᤏᤡ᤹ ᤏᤡᤱᤔᤡᤜᤠ᤹ᤏᤢ ᤔᤧᤎᤢᤰᤛᤡᤱᤅᤠᤱ ᤀᤠᤏᤡ᤹ᤏᤢ ᤌᤱ ᤔᤧᤈᤥᤰ ᤂᤧᤒᤩᤠᤱ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤔᤧᤒᤣ᤺ᤰ॥”

¹¹ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤡᤛᤪᤒᤠ ᤔᤏᤠ ᤕᤠ᤺ᤶᤒᤰᤁᤥ ᤁᤧᤓᤶᤒᤠ ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤏᤢ ᤁᤧᤛᤠᤰᤐᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡᤀᤠᤱ ᤂᤢᤴᤇᤡ᤹ ᤏᤡᤱᤛᤠᤱ ᤛᤠᤰᤂᤪᤡᤰ ᤐᤢᤃᤧᤖ ᤔᤧᤕᤠ᤺ᤴᤍᤢᤛᤡ॥ ᤜᤠᤱ ᤆᤡᤃᤰᤘᤠ ᤑᤢᤱᤔᤠ ᤕᤢᤱᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤐᤡᤋᤠᤔ ᤏᤢ ᤖᤠᤔᤛᤣᤛ ᤕᤧᤰᤕᤰᤜᤠ᤹ ᤔᤧᤈᤥᤃᤢ॥

¹² ᤁᤖ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤀᤠᤰᤂᤩᤠᤖᤡᤰ ᤔᤧᤕᤢᤰᤋᤢᤛᤡ. ᤂᤧᤶᤔᤩᤠᤰᤁᤣ ᤕᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤏᤡ᤺ᤳᤋᤡᤴ ᤐᤥᤖᤧᤖ ᤐᤣ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠᤈᤣ᤹ᤀᤥ ᤀᤠᤸᤗᤛᤠᤱ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣ॥ ᤔᤡᤛᤪᤡᤜᤠ᤹ ᤂᤧᤱᤜᤠ᤹ᤏᤢ ᤁᤡᤔᤠ ᤔᤧᤜᤣ᤺ᤰᤋᤧ॥

¹³ ᤜᤧᤰᤁᤩᤠᤱ ᤔᤡᤛᤪᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤛᤡᤱᤅᤣ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤁᤧᤛᤠᤰᤐᤠ ᤕᤥᤃ᤻ᤒᤠ ᤕᤠ᤺ᤶᤒᤰᤁᤥ ᤔᤧᤓᤳᤇᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤧᤴ ᤋᤢᤰᤂᤣᤗᤠᤰᤂᤣᤀᤥ ᤔᤧᤎᤠᤛᤢ ᤔᤧᤒᤡᤖᤢᤛᤡ॥

¹⁴ ᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰ ᤏᤢ ᤂᤠᤶᤗᤧ ᤗᤧ᤺ᤱᤔᤠ ᤕᤠ᤺ᤶᤒᤰ ᤜᤧᤰᤁᤩᤠᤱ ᤐᤩᤠᤱᤛᤡᤀᤥᤒᤠ ᤁᤧᤖᤧᤰ ᤐᤖᤡᤰᤗᤧᤴ ᤕᤠ᤺ᤶᤒᤰᤁᤥ ᤔᤡᤛᤪᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤕᤢ᤺ᤳᤋᤢᤛᤡᤀᤠᤱ ᤗᤢᤱᤔᤠ᤹ ᤔᤧᤴᤍᤢᤰᤋᤢᤛᤡᤴ॥

¹⁵ ᤂᤧᤒᤩᤠᤱ ᤛᤡᤐᤪᤠ ᤏᤢ ᤐᤢᤀᤠ ᤔᤡᤱ ᤁᤧᤘᤠ᤺ᤵᤔᤠ ᤏᤧᤳᤇᤡ ᤜᤢᤰᤁᤧᤗᤠᤔᤠ ᤜᤡᤒᤪᤢ ᤔᤧᤴᤇᤢᤔᤠᤜᤠ᤹ ᤔᤡᤛᤪᤒᤠ ᤜᤠᤱᤅᤡᤸᤗᤧ ᤔᤧᤳᤋᤢᤛᤡ॥

¹⁶ “ᤜᤡᤒᤪᤢ ᤔᤧᤴᤇᤢᤔᤠᤜᤠ᤹ᤖᤧ ᤛᤠ ᤔᤧᤃᤳᤋᤢᤛᤡᤸᤗᤧ ᤂᤧᤱᤜᤠ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤁᤧᤒᤡᤃᤡᤸᤗᤧ ᤕᤧᤶᤒᤡᤳᤇᤠᤛᤠ ᤔᤧᤃᤳᤋᤢᤛᤡᤏᤧᤓᤃᤪ ᤂᤧᤱᤜᤠ᤹ ᤛᤧᤖᤧᤶᤛᤡᤶᤔᤧ᤹. ᤁᤖ ᤔᤧᤴᤇᤢᤔᤠᤛᤠ ᤔᤧᤃᤳᤋᤢᤛᤡᤏᤧᤓᤃᤪ ᤁᤢᤜᤡᤱᤘᤧᤳ ᤗᤧᤖᤧᤶᤛᤡᤶᤔᤧ᤹॥”

¹⁷ ᤁᤖ ᤂᤧᤴ ᤜᤢᤰᤁᤧᤗᤠᤔᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤃᤡᤛᤧ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤔᤧᤳᤋᤢᤛᤡᤒᤠᤴ ᤔᤧᤱᤄᤧᤵᤛᤢᤴ॥ ᤂᤧᤱᤜᤠ᤹ᤖᤧ ᤕᤧᤶᤒᤡᤳᤇᤠ ᤛᤠᤜᤠ᤹ᤀᤠᤱ ᤁᤢᤜᤡᤱᤘᤧᤳᤋᤣ ᤔᤧᤗᤧᤖᤢᤛᤡ॥

¹⁸ ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤏᤧᤳᤇᤡ ᤜᤢᤰᤁᤧᤗᤠᤔᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤂᤧᤴᤇᤡ᤹ ᤌᤣ ᤁᤧᤈᤥ᤺ᤰᤛᤢᤖ ᤁᤧᤘᤠ᤹ᤛᤡ᥅ ᤌᤣᤀᤠᤱ ᤕᤧᤶᤒᤡᤳᤇᤠ ᤛᤠᤜᤠ᤹ᤀᤠᤱ ᤁᤢᤜᤡᤱᤘᤧᤳᤋᤣ ᤁᤧᤗᤧᤳᤇᤢᤛᤡᤒᤠ᥅”

¹⁹ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤛᤢ. “ᤜᤡᤒᤪᤢ ᤔᤧᤴᤇᤢᤔᤠᤜᤠ᤹ ᤔᤡᤛᤪᤡ ᤔᤧᤴᤇᤢᤔᤠᤜᤠ᤹ ᤜᤧᤰᤁᤣ ᤔᤧᤸᤗ᤹ᤏᤧᤴ. ᤂᤧᤱᤜᤠ᤹ᤖᤧ ᤁᤢᤃᤳ ᤏᤢ᤹ᤖ ᤛᤠᤔᤧᤃᤳᤋᤢᤛᤡ. ᤜᤢᤰᤁᤧᤗᤠᤔᤠᤜᤠ᤹ ᤁᤧᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤱᤜᤠ᤹ᤖᤧ ᤛᤠᤔᤧᤃᤳᤋᤢ ᤔᤧᤛᤢᤖᤢᤛᤡ॥”

²⁰ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤢᤰᤁᤧᤗᤠᤔᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤀᤠᤸᤗᤛᤠᤱ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤢᤰᤛᤠᤶᤛᤠᤒᤠ ᤔᤧᤒᤥ᤺ᤰᤂᤧ॥

²¹ ᤜᤢᤰᤁᤧᤗᤠᤔᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤖᤢᤛᤡ॥

²² ᤂᤧᤒᤩᤠᤱ ᤁᤢᤏᤢᤵᤔᤥ ᤑᤠᤖᤥ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤜᤡᤒᤪᤢᤜᤠ᤹ᤖᤧ ᤂᤠᤖᤰ ᤛᤠᤃᤧᤘᤠ᤺ᤴᤇᤡᤱᤒᤠ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤕᤧᤶᤒᤡᤳᤇᤠᤛᤠᤜᤠ᤹ ᤏᤡᤗ ᤘᤜ᤺ᤱᤅᤥ ᤗᤠᤵᤑᤢᤛᤠᤶᤛᤧ᤹ ᤁᤖ ᤔᤧᤴᤇᤢᤔᤠ ᤛᤠᤜᤠ᤹ ᤁᤢᤜᤡᤱᤘᤧᤳᤋᤣ ᤗᤧᤖᤧᤶᤛᤡᤶᤔᤧ᤹ᤀᤥ॥”