ᤀᤣᤑᤡᤛᤡ 2 - LIFOTNTᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤢᤜᤡᤱᤘᤧᤳ ᤀᤠᤒᤥᤱ 1 ᤁᤧᤒᤣ᤺ᤰᤐᤠ ᤕᤧᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤗᤠᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤁᤧᤛᤩᤧ᤹ᤀᤡᤀᤠᤱ ᤁᤧᤘᤕᤡ॥ 2 ᤂᤧᤴ ᤕᤧᤶᤔᤥ ᤂᤡᤏᤡ᤹ᤀᤠᤱ ᤁᤴ ᤂᤠᤶᤒᤣ᤺ᤰᤔᤥᤒᤠ ᤌᤡᤶᤔᤡᤴ ᤏᤢ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤈᤢᤶᤔᤥ ᤜᤠᤱ ᤁᤧᤈᤥ᤺ᤰᤐᤠ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤒᤠ᤺ᤴᤏᤡᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ॥ ᤂᤧᤴ ᤛᤠᤶᤔᤡᤴᤏᤣ ᤏᤡᤱᤘᤠ᤹ᤑᤢᤔᤠᤱ ᤀᤡᤱᤈᤠᤱ ᤔᤧᤱᤄᤧᤶᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤕᤠ᤺ᤶᤒᤰ ᤆᤥ᤺ᤰᤗ ᤘᤠ᤹ᤖᤥ॥ 3 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤢᤴᤇᤥᤴ ᤀᤠᤏᤡ᤹ᤀᤠᤱ ᤕᤠᤶ ᤏᤢ ᤏᤡᤱᤘᤠ᤹ᤀᤡᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤗᤠᤕᤥᤒᤠ ᤗᤠᤶᤔᤥ ᤀᤠᤘᤕᤧ॥ ᤂᤧᤱᤜᤠ᤹ ᤜᤧᤰᤁᤣ ᤀᤠᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤥ ᤁᤧᤎᤠᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤕᤧᤖᤥ॥ 4 ᤁᤖ ᤛᤠ᤹ᤖᤡᤰ ᤗᤢᤱᤃᤢᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤖᤥ॥ 5 ᤀᤠᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤕᤠᤶᤛᤠᤶᤔᤥ ᤀᤠᤛᤩᤧᤀᤠᤱ ᤀᤠᤘᤕᤧᤛᤠᤱ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤂᤢᤏᤧ᤹ ᤁᤢᤜᤡᤱᤘᤧᤳ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ—ᤂᤢᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤸᤗᤧ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤘᤕᤡ᤹॥ 6 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤢᤜᤡᤱᤘᤧᤳ ᤀᤠᤈᤥᤃᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤋᤧᤴᤏᤥ ᤂᤪᤡᤛ᤻ᤋ ᤕᤧᤛᤢᤴ ᤏᤢ ᤀᤠᤕᤢᤰᤂᤧᤀᤠᤱ ᤀᤠᤘᤠ᤹ᤖᤥ॥ 7 ᤁᤱᤃ ᤁᤧᤍᤠᤒᤠ ᤕᤧᤶᤔᤥ ᤂᤢᤏᤧ᤹ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤒᤠᤖᤥ॥ ᤂᤪᤡᤛ᤻ᤋ ᤕᤧᤛᤢᤗᤠᤶ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠ ᤁᤴ ᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥ 8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥᤃᤢᤶᤒᤠᤗᤠᤶᤒᤠ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤘᤕᤡ᤹॥ ᤁᤱᤃ ᤀᤠᤒᤠᤅᤣ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤗᤠᤶ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤔᤡᤸᤗᤧ ᤆᤥᤃᤢᤒᤠᤖᤥ॥ 9 ᤔᤏᤠᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤀᤰᤂᤣ ᤐᤥ᤺ᤰᤂᤧᤒᤠ ᤔᤣ᤺ᤴᤗᤥ. ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴᤏᤣ ᤜᤥᤵᤗᤥ॥ 10 ᤌᤣᤀᤠᤱᤓᤧᤸᤗᤧ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤪᤡᤛ᤻ᤋ ᤕᤧᤛᤢᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤈᤥᤃᤧᤒᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤀᤠᤏᤡ᤹ ᤀᤠᤈᤥᤃᤢᤶᤗ ᤑᤠ᤹ᤀᤠᤱ ᤋᤃᤡᤛᤠ ᤕᤠᤖᤡᤵ ᤆᤥᤃᤢᤀᤠᤱ ᤘᤕᤧᤒᤠᤖᤥ॥ ᤂᤪᤡᤛ᤻ᤋᤧᤴᤏᤢ ᤌᤡᤰᤜᤢᤵ ᤀᤠᤒᤥᤱ 11 ᤂᤧᤸᤗᤧᤆᤥᤃᤢᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤅᤥ ᤛᤠᤃᤧᤘᤠ᤺ᤴᤏᤠᤛᤡᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤜᤷᤍᤥ ᤜᤧᤰᤔᤠ ᤌᤡᤶ ᤁᤧᤃᤵᤐᤠᤛᤡᤃᤧ ᤁᤧᤗ᤹ᤒᤠ ᤕᤜᤢᤍᤡᤜᤠ᤹ᤖᤧ ᤂᤡᤏᤡ᤹ “ᤜᤷᤍᤥ ᤔᤧᤴᤜᤧᤰᤔᤏᤠᤏᤡᤱ” ᤁᤧᤶᤔᤧᤳᤋᤡ᤹ (ᤁᤖ ᤂᤧᤱᤃ ᤔᤏᤠᤜᤠ᤹ᤖᤧ ᤏᤠᤛᤡᤱᤃᤧᤴ ᤌᤰᤁᤥ ᤔᤧᤈᤥᤃᤢᤒᤠ ᤌᤡᤶᤗᤰᤗᤥ)॥ 12 ᤂᤧᤴ ᤕᤧᤶᤔᤥ ᤂᤡᤏᤡ᤹ ᤂᤪᤡᤛ᤻ᤋ ᤔᤣ᤺ᤴᤏᤣ. ᤀᤡᤛᤪᤠᤀᤡᤗᤒᤠ ᤕᤰᤕᤢᤱᤒᤠ ᤁᤧᤴᤘᤕᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤏᤡᤱ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤔᤠᤱᤜᤢᤵᤜᤠ᤹ ᤔᤧᤱᤄᤥᤶᤏᤠᤒᤠ. ᤏᤡᤱᤛᤠᤱ ᤁᤧᤜᤥᤵᤐᤠ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤥ ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤴᤏᤣ ᤁᤧᤘᤕᤡᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 13 ᤁᤖ ᤂᤡᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤁᤧᤘᤕᤡᤛᤠᤱ ᤀᤠᤸᤗᤥ ᤂᤡᤏᤡ᤹ ᤂᤪᤡᤛ᤻ᤋ ᤕᤧᤛᤢᤴ ᤏᤢ ᤌᤡᤰᤜᤢᤵ ᤁᤧᤒᤥᤱᤒᤠᤜᤠ᤹ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤏᤡ᤺ᤳᤋᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ 14 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠᤀᤣ ᤀᤠᤏᤡ᤹ ᤛᤏᤠᤖᤢᤱ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹॥ ᤂᤢᤏᤧ᤹ᤀᤣ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤧᤛᤧᤶᤒᤠ ᤏᤡᤱᤔᤡᤃᤧᤴ ᤗᤢᤱᤎᤠᤰ ᤁᤢᤀᤡᤛᤡ᤺ᤰᤐᤠ ᤌᤡᤶᤔᤡᤴ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤕᤛ᤻ᤛᤢᤖ ᤂᤧᤱᤜᤠ᤹ ᤌᤡᤰᤜᤢᤵ ᤆᤥᤃᤢᤛᤡᤀᤠᤱ ᤘᤠ᤹॥ 15 ᤂᤢᤏᤧ᤹ᤀᤣ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤌᤡᤶᤜᤠ᤹ ᤌᤣᤏᤠᤎᤣᤒᤠ ᤆᤥᤃᤢ॥ ᤂᤢᤏᤧ᤹ᤀᤣ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤏᤧᤳᤇᤡ ᤛᤢᤘᤠᤱᤗᤠᤶᤒᤠ ᤂᤢᤏᤧ᤹ᤏᤢ ᤌᤡᤰᤜᤢᤵ ᤁᤧᤒᤥᤱᤒᤠ ᤗᤳᤇᤠ ᤁᤢᤛᤱ ᤛᤢᤘᤠᤱᤎᤡᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 16 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤧᤀᤠᤱ ᤀᤠᤏᤡ᤹ ᤏᤧᤳᤇᤡ ᤛᤢᤘᤠᤱᤒᤠ ᤔᤏᤠᤜᤠ᤹ ᤌᤡᤰᤜᤢᤵᤐᤥ ᤀᤠᤍᤠᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤀᤠᤈᤥᤃᤧ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤗᤢᤶᤔᤥᤒᤠ ᤆᤡ᤺ᤳᤇᤡᤱᤔᤠᤴ ᤂᤧᤳᤋᤢᤍᤣᤛᤢᤖᤥ॥ 17 ᤂᤪᤡᤛ᤻ᤋᤧᤴ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤢ ᤏᤡ᤺ᤳᤋᤠᤱ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤀᤥ ᤛᤏᤠᤖᤢᤱᤅᤡᤸᤗᤧᤴ ᤛᤢᤏᤠᤀᤡᤱ ᤛᤧᤛᤢᤖᤥ॥ 18 ᤂᤢᤏᤧ᤹ᤗᤠᤶᤔᤣ ᤀᤠᤏᤡ᤹ ᤁᤧᤖᤧᤰᤗᤧ ᤌᤡᤰ ᤛᤣᤛᤣᤔᤠᤱ ᤀᤠᤄᤥᤛᤢᤶᤔᤠᤱ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣ᤺ᤰᤔᤠ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹ᤖᤥ॥ 19 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤘᤣ᤹ ᤗᤠᤈᤣ᤹ᤒᤠ ᤏᤢ ᤋᤠᤛᤫᤠᤒᤠᤏᤡᤱ ᤔᤣ᤺ᤴ. ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠ ᤕᤰᤕᤢᤱᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ 20 ᤀᤠᤏᤡ᤹ᤃ ᤛᤣ᤺ᤰᤕᤢᤰᤔᤡᤒᤠ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤏᤧᤛ᤻ᤛᤢᤒᤠ ᤜᤡᤶᤐᤠᤱᤕᤰᤁᤥ ᤆᤥ᤺ᤰᤔᤏᤠᤒᤠ ᤜᤡᤶ ᤁᤢᤀᤡᤛᤡᤰ ᤀᤠᤈᤥᤰ॥ ᤜᤧᤰᤁᤩᤠᤱ ᤂᤧᤴ ᤜᤡᤶᤔᤡᤸᤗᤧᤴ ᤁᤧᤕᤧᤰᤐᤠ ᤁᤢᤶᤔᤠᤗᤢᤱᤅᤡᤱᤃ ᤂᤪᤡᤛ᤻ᤋ ᤕᤧᤛᤢᤴ ᤏᤣᤖᤥ॥ 21 ᤂᤢᤏᤧ᤹ᤀᤥᤀᤣ ᤁᤠᤰ ᤜᤡᤶᤔᤡᤴ ᤁᤠᤶᤔᤠᤱ ᤍᤠᤱᤒᤠᤸᤗᤧ ᤗᤠᤃᤡ ᤛᤣᤛᤣᤒᤠ ᤔᤠᤱᤜᤡᤶ ᤐᤥᤱᤅᤠᤱ ᤐᤥᤖ ᤐᤣ᤺ᤰᤗᤥ॥ 22 ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤱᤔᤠᤍᤧᤴ ᤁᤧᤒᤥ᤺ᤰᤂᤡ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤔᤠᤱᤗᤠᤶ ᤕᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.