ᤂᤠᤜᤢᤴᤛᤠᤒᤠ 8 - LIFOTNT

¹ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧᤖᤰ ᤐᤠ᤺ᤴᤏᤧᤸᤗᤧ ᤁᤢᤒᤣᤴ ᤁᤢᤛᤡᤱ ᤏᤡ᤺ᤳᤋᤢᤖᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤂᤢᤏᤧ᤹ ᤁᤢᤏᤠᤖᤠᤴ ᤛᤧᤍᤡᤱᤍᤡᤱ ᤀᤥ᤺ᤳᤗ ᤆᤥᤃᤢᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤂᤠᤃᤧᤔᤠᤰᤐᤠ ᤁᤢᤏᤠᤖᤠᤴ ᤂᤧᤳᤋᤢᤖᤥ॥

ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤵᤛᤧ᤹

² ᤀᤠᤱᤃᤠ᤹ ᤐᤠ᤺ᤳᤋᤢᤱ᤹. ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤆᤥᤃᤧ᤹. ᤂᤧᤴ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤠᤱᤜᤧᤰ ᤁᤧᤈᤥᤃᤢᤀᤠᤱ ᤁᤧᤘᤠ᤹॥

³ ᤂᤧᤏᤧ᤹ ᤁᤧᤛᤠᤰᤐᤥ ᤌᤠᤔᤠᤏᤢ᤺ᤸᤗᤧ ᤋᤃᤡ ᤜᤠᤱᤅᤡᤸᤗᤧ ᤁᤢᤍᤃᤡᤗᤠᤶᤒᤠ ᤐᤣᤃᤧ᤹ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤣ᤺ᤴ ᤁᤢᤛᤡᤖᤠ᤹ᤌᤠᤱ. ᤜᤠᤒᤠ ᤂᤧᤴᤏᤣ ᤆᤥᤃᤢ᤹॥

⁴ ᤜᤠᤱᤅᤡᤸᤗᤧ ᤕᤠ᤺ᤶᤒᤰᤁᤡᤴ ᤕᤢᤰᤏᤢ ᤆᤥᤃᤢ᤹ᤒᤠᤸᤗᤧ ᤆᤥᤃᤢᤸᤗᤧ. “ᤂᤧᤏᤧ᤹ ᤌᤣ ᤁᤧᤈᤥᤃᤢᤖ ᤁᤧᤘᤠ᤹᥅” ᤑᤠ᤹ᤀᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤛᤧᤴᤗᤠᤵᤔᤠ ᤛᤢᤰᤋᤢᤒᤣ॥

⁵ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤀᤠᤓᤧᤸᤗᤧ ᤌᤠᤖᤡᤰ ᤁᤧᤄᤧᤵᤛᤢ᤹ ᤂᤧᤶᤒᤠ ᤌᤠᤖᤡᤰ ᤂᤧᤏᤧ᤹ ᤋᤠᤵᤑᤧ᤺ᤶᤒᤠ ᤐᤠᤴ ᤁᤧᤴᤍᤢᤔᤢᤴᤗᤥ ᤜᤧᤰᤁᤩᤠᤱ ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢᤒᤠ ᤕᤧᤶ ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤠᤶ ᤁᤢᤛᤡᤱ ᤏᤡ᤺ᤳᤋᤢᤖᤥ॥

⁶ ᤔᤏᤠ᤺ᤸᤗᤧ ᤁᤢᤍᤢᤰᤂᤣ᤺ᤴ ᤂᤢᤏᤧ᤹ ᤁᤢᤛᤶᤎᤠᤱ ᤁᤧᤗᤡ᤺ᤵᤐᤠ ᤐᤥᤱᤗᤥ ᤜᤧᤰᤁᤣᤛᤠᤱ ᤁᤧᤖᤧᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢᤒᤠ ᤕᤧᤶ ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤍᤱᤒᤠ ᤗᤠᤶ ᤘᤠ᤹ᤖᤥ॥

⁷ ᤁᤧᤍᤠᤒᤠ ᤕᤧᤶᤔᤥ ᤌᤣ ᤐᤥᤱ᤹. ᤀᤠᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤠᤴᤏᤡᤛᤢᤶᤔᤡᤴᤗᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤀᤠᤏᤡ᤹ ᤂᤧᤴ ᤔᤧᤵᤔᤠ ᤀᤠᤴᤇᤢᤰᤏᤧᤸᤗᤥ॥

⁸ ᤛᤡᤔᤧᤴᤗᤠᤶᤒᤠ ᤀᤠᤳᤋᤡᤴᤏᤠᤱ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤛᤢᤰᤏᤧᤴᤗᤥ ᤀᤡᤃᤪ ᤁᤢᤛᤡᤔᤠ ᤕᤧᤴᤏᤡᤴ ᤀᤣᤃᤠᤱ ᤆᤵᤔᤠ ᤔᤧᤛᤢᤰᤋᤢᤴᤗᤥ॥ ᤌᤱ ᤐᤥᤱᤒᤠ ᤕᤧᤶᤔᤥ ᤔᤏᤠᤜᤠ᤹ ᤜᤡᤶᤔᤥ ᤐᤠᤱᤔᤠ ᤔᤧᤱᤄᤥᤛᤢᤴᤇᤡᤴᤒᤠ ᤜᤧᤰᤁᤣ ᤋᤠᤵᤑᤧ᤺ᤶᤒᤠ ᤁᤧᤈᤥ᤺ᤰᤐᤠᤜᤠ᤹ ᤁᤢ᤹ᤀᤡᤓᤧᤶᤔᤧᤸᤗᤧ ᤔᤧᤗᤧᤖᤢᤴᤇᤡᤴᤗᤥ॥

⁹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤒᤥᤱᤒᤠᤖ ᤁᤧᤒᤵᤐᤠ ᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤡᤸᤗᤧ ᤀᤠᤱᤃᤠ᤹ ᤁᤴᤜᤠ᤹ ᤁᤧᤖᤧᤰ ᤏᤡᤛᤢᤱ॥ ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤕᤢᤰ ᤘᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤜᤢᤰᤁᤥ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤳᤋᤢᤰᤂᤣ ᤔᤧᤍᤢᤔᤢ॥

¹⁰ ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤔᤧᤗᤢᤵᤋᤢᤛᤡᤒᤠ ᤀᤠᤱᤃᤠ᤹ ᤏᤡᤛᤢᤱᤛᤡᤱᤀᤠᤱ ᤘᤠ᤹॥ ᤂᤧᤱᤜᤠ᤹ ᤛᤣᤛᤣᤍᤧᤴᤏᤥ ᤔᤧᤍᤩᤧ ᤔᤧᤒᤣᤖ ᤔᤧᤘᤕᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤘᤕᤧᤒᤠ ᤕᤧᤰᤕᤰᤁᤥ ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤜᤠᤒᤠ ᤂᤧᤴ ᤕᤧᤰᤕᤰᤁᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤖᤠᤑᤥᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤕᤧ॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣᤖᤧᤳᤇ॥

¹¹ ᤗᤠᤕᤥᤸᤗᤧ ᤂᤢᤶᤍᤡᤱ ᤂᤡᤔᤥ ᤔᤧᤒᤥᤱᤏᤧᤏᤡᤸᤗᤧ ᤔᤏᤠᤜᤠ᤹ᤖᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤴ ᤔᤧᤀᤡ᤺ᤳᤋᤢ᤹॥

¹² ᤕᤖᤡᤰ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤀᤠᤱ ᤗᤠᤕᤥ ᤁᤧᤈᤥ᤺ᤰᤐᤠ ᤔᤏᤠᤴ ᤁᤠᤵᤐᤥᤒᤠ ᤋᤢᤶᤗ ᤌᤠᤖᤡᤰ ᤜᤡᤱ᤹॥ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤏᤡᤛᤢᤱ ᤁᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤧᤸᤗᤧ. ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢᤒᤠ ᤐᤥᤱ᤹.

¹³ ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧᤱᤃ ᤏᤢᤒᤠ ᤔᤧᤒᤥᤱᤏᤧᤴ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤈᤢ᤺ᤰᤗᤀᤣ ᤔᤧᤛᤡ ᤔᤧᤄᤧᤳ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤧᤴ ᤛᤠᤶᤔᤪᤡ᤺ᤵᤐᤠ ᤁᤢᤀᤡᤛᤡᤰ ᤆᤥᤰ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤡᤖᤢᤴ॥

¹⁴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤣ ᤐᤥᤱᤗ ᤐᤳ. ᤂᤧᤴ ᤀᤥᤔᤧᤳᤋᤧᤶᤔᤧ᤹. ᤁᤢᤓᤠ ᤕᤧᤶᤔᤥ ᤋᤠᤰᤁᤧᤓᤧ᤹ᤒᤠᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤅᤡᤴ ᤛᤠᤶᤕᤥᤒᤠᤸᤗᤧ ᤂᤥᤛᤢ᤹ ᤜᤧᤰᤁᤩᤠᤱ ᤛᤠᤶᤕᤥᤒᤠᤸᤗᤧ ᤁᤢᤕᤠ᤺ᤶᤒᤰᤁᤡᤸᤗᤧ ᤜᤠᤱᤛᤧᤶᤔᤡᤴ ᤋᤠᤰᤁᤧᤓᤧ᤹ᤒᤠᤸᤗᤧ ᤂᤥᤛᤢ᤹॥ ᤁᤴᤏᤠᤱ ᤌᤣᤏᤠᤎᤣ ᤜᤏᤧᤖᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤔᤏᤠ᤺ᤸᤗᤧ ᤛᤢᤰᤂᤣᤘᤠ ᤆᤥ᤺ᤰᤔᤠ ᤐᤥᤱ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤧᤰᤂᤠᤀᤣ ᤏᤛᤠᤴ ᤆᤥᤃᤢᤱᤅᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤜᤡᤱᤔᤴᤏᤥ ᤆᤠᤔᤠ. ᤌᤢᤱᤔᤠ ᤏᤢ ᤏᤡᤱᤘᤠ᤹ ᤋᤠᤔᤠᤀᤠᤱ ᤘᤠ᤹ᤔᤠ ᤐᤣ᤺ᤰᤔᤠᤏᤢ᤺ᤸᤗᤧ ᤘᤣ᤹ ᤏᤢᤒᤠ ᤐᤠᤴ ᤌᤣᤀᤠᤱ ᤜᤥᤵ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤐᤡᤖᤢᤛᤡᤒᤠ ᤜᤡᤱᤔᤴᤏᤥ ᤛ᤺ᤵᤔᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ ᤕᤠ᤺ᤶᤒᤢᤍᤡᤰ ᤔᤧᤈᤥᤃᤢᤒᤧᤴᤏᤢ ᤐᤣ᤺ᤰᤗᤥ॥

¹⁶ ᤀᤠᤵᤑᤠᤸᤗᤧᤛᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤐᤡᤖᤢᤱ ᤜᤧᤰᤁᤩᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤌᤣᤎᤣ ᤐᤥᤱᤗ ᤐᤳ ᤂᤧᤴ ᤏᤡᤛᤢ. ᤛᤧᤴᤍᤡᤰ ᤗᤧᤴᤍᤡᤰ ᤔᤧᤴᤀᤡᤶᤔᤣ ᤀᤠᤘᤠ᤹ᤛᤠᤱ

¹⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤀᤡ᤺ᤳᤋᤢᤱᤅᤡᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤏᤡ᤹ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴ॥ ᤔᤏᤠᤴ ᤁᤧᤗᤧᤒᤠ ᤐᤥᤱᤔᤠ ᤋᤶᤛᤡᤱ ᤆᤥ᤺ᤰᤛᤠᤱ ᤂᤧᤴ ᤁᤧᤗᤧᤒᤠ ᤐᤥᤱᤔᤠ ᤔᤧᤛᤢᤰᤏᤧᤴ॥ ᤛᤡᤰᤁᤢᤶᤏᤡᤒᤠᤜᤠ᤹ᤖᤧ “ᤀᤠᤏᤡᤃᤣ ᤗᤧᤛᤢᤶᤒᤧ” ᤔᤧᤒᤠ᤺ᤳᤋᤢᤒᤡᤗᤠ ᤁᤖ ᤂᤧᤱᤜᤠ᤹ᤖᤧ ᤔᤧᤸᤗᤧᤛᤢᤴᤗᤥ॥