ᤂᤠᤜᤢᤴᤛᤠᤒᤠ 4 - LIFOTNT

ᤔᤧᤴᤘᤠ᤹ᤔᤏᤠᤒᤠ. ᤕᤠ᤺ᤶᤒᤢᤍᤡᤰ. ᤆᤢᤶᤍᤣᤱ ᤔᤣ᤺ᤴᤏᤣ.

¹ ᤕᤠᤶᤔᤥ ᤀᤠᤱᤃᤠ᤹ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤁᤧᤒᤥᤱᤒᤠᤖ ᤁᤧᤒᤵᤐᤠ ᤁᤧᤖᤧᤰ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤜᤠ᤹ ᤏᤡᤛᤢᤱᤗᤥ— ᤋᤢᤰᤂᤣ ᤆᤠ᤺ᤵᤔᤠ ᤕᤠ᤺ᤶᤒᤰᤜᤠ᤹ᤖᤧ ᤔᤡᤰᤘᤠᤴ ᤏᤡᤛᤢᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥ ᤁᤧᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤵᤔᤠᤱ ᤔᤢᤰᤛᤠᤶ ᤘᤕᤧᤖᤥ. ᤜᤧᤰᤁᤩᤠᤱ ᤔᤧᤕᤢᤰᤋᤢᤛᤡᤒᤠᤜᤠ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥

² ᤁᤸᤗᤧ ᤆᤥᤃᤢᤸᤗᤧᤀᤣ ᤀᤠᤱᤃᤠ᤹ ᤏᤢᤖᤡᤰᤁᤠᤱ ᤐᤠ᤺ᤳᤋᤢᤱᤗᤥ. ᤂᤧᤴ ᤔᤧᤛᤩᤧ ᤔᤧᤈᤢᤖᤧᤀᤠᤱ ᤁᤧᤘᤠ᤹ᤒᤠ ᤂᤧᤴ ᤁᤢᤛᤡᤘᤧᤳᤜᤠ᤹ ᤀᤠᤸᤗᤥᤒᤠ ᤁᤢᤜᤡᤱᤘᤧᤳᤜᤠ᤹ᤏᤢ᤺ᤸᤗᤧ ᤛᤢᤰᤂᤣᤘᤠᤀᤥ ᤔᤧᤘᤠ᤹ᤖᤥ॥

³ ᤁᤖ ᤂᤧᤴ ᤏᤧᤵᤔᤠᤱᤏᤢ᤺ᤸᤗᤧᤃ ᤀᤠᤖᤛᤠᤱ ᤕᤖᤡᤰ ᤛᤢᤰᤂᤣᤘᤠ᤺ᤱᤃ ᤀᤠᤸᤗᤥ ᤌᤠᤖᤡᤰ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤁᤧᤘᤠ᤹ᤒᤠᤜᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤆᤥ᤺ᤰᤔᤏᤠᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤏᤡᤔᤠᤀᤣ ᤔᤧᤴᤏᤡᤀᤣ ᤔᤧᤘᤠ᤹ᤖᤥ॥

⁴ ᤜᤧᤰᤁᤩᤠᤱ ᤁᤧᤖᤧᤰ ᤕᤠ᤺ᤶᤒᤢᤍᤡᤰ ᤏᤢ ᤌᤥᤒᤥ ᤐᤥᤱᤔᤠ ᤐᤠ᤺ᤴᤜᤠ᤹ᤃ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤜᤡᤶᤒᤣᤛᤠᤱᤒᤧᤴ ᤏᤠᤜᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧᤖᤰ ᤁᤴ ᤐᤥᤱᤒᤠᤖᤧᤳᤇ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣ ᤏᤢ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤋᤱᤒᤠᤖᤰᤗᤥ॥

⁵ ᤀᤍᤱ ᤔᤏᤠ᤺ᤸᤗᤧ ᤁᤢᤜᤢᤰᤁᤡᤴ ᤜᤢᤵᤋᤢᤀᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤧᤰᤔᤧᤴ ᤀᤠᤵᤑᤣᤰ ᤋᤠᤖᤢᤖᤥ॥

⁶ ᤛᤩᤠᤱᤔᤧᤴᤍᤠᤱᤅᤠᤱ ᤌᤰᤔᤏᤠᤒᤠ ᤕᤠᤱᤛᤠᤁᤢᤴᤎᤣᤴ ᤏᤢ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤀᤠᤱ ᤜᤢᤰᤐᤢᤳ ᤏᤧᤳᤇᤡ ᤁᤵᤔᤏᤠᤒᤧᤴᤏᤢ᤺ᤸᤗᤧ ᤆᤡᤈᤡ ᤕᤧᤶᤕᤧᤶᤔᤠᤱ ᤜᤢᤰᤐᤢᤳᤌᤡᤰ ᤁᤵᤔᤏᤠᤒᤧᤴ ᤀᤠᤸᤗᤛᤠᤱ ᤏᤢᤒᤠᤖᤥ॥

⁷ ᤕᤠᤶᤔᤥ ᤀᤠᤱᤃᤠ᤹ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤁᤢᤓᤠ ᤌᤣᤏᤠᤎᤣᤒᤠ ᤏᤡᤛᤢᤱᤗᤥ—

⁸ ᤗᤳᤇᤠ ᤔᤏᤠᤎᤡᤰ ᤀᤣ᤺ᤰᤛᤧᤳᤇᤠ ᤘᤕᤧᤖᤥ. ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤁᤢᤶᤓᤢ᤹ ᤁᤢᤴᤛᤠ᤹ᤀᤠᤱ ᤔᤧᤜᤥ᤺ᤵᤋᤧᤖᤥ॥ ᤂᤧᤸᤗᤧ ᤛᤩᤠᤱᤔᤧᤴᤍᤠᤱᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤧᤏᤢᤒᤧᤴᤗᤥ. ᤜᤶᤓᤛᤠᤱ ᤁᤢᤕᤠᤱᤛᤠᤁᤢᤴᤎᤣᤀᤥ ᤁᤢᤏᤡᤱᤘᤠ᤹ ᤔᤧᤍᤩᤧᤏᤧᤴᤗᤥ॥ ᤂᤧᤸᤗᤧ “ᤜᤠ᤺ᤳᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤐᤳᤋᤠᤒᤠ. ᤜᤡᤱᤔᤴᤏᤥᤒᤠ ᤏᤢ᤹ᤔᤠᤍᤠᤔᤠᤴ ᤌᤣᤀᤠᤱ ᤗᤧᤖᤢᤱᤗ ᤐᤳᤋᤠᤒᤠ᥅” ᤑᤠ᤹ᤀᤠᤱ ᤀᤠᤑᤣᤰ ᤐᤠᤴ ᤛᤣ᤺ᤴᤍᤥᤛᤠᤱ॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣᤖᤥ. ᤗᤳᤇᤠ ᤋᤢᤰᤂᤣᤘᤠ ᤐᤠ᤺ᤴᤗᤥ॥

⁹ ᤗᤳᤌᤡᤰᤏᤢ᤺ᤸᤗᤧ ᤏᤧᤳᤇᤡᤴ ᤏᤢᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤆᤥ᤺ᤰᤛᤢᤒᤠ ᤛᤩᤠᤱᤔᤧᤴᤍᤠᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤏᤢᤒᤠ ᤁᤢᤗᤧᤰᤘᤠ ᤂᤥᤛᤢᤖᤥ॥

¹⁰ ᤂᤧᤴ ᤏᤧᤳᤇᤡᤀᤥ ᤌᤡᤰᤐᤠ ᤆᤥ᤺ᤴᤏᤧᤓᤃᤪ ᤂᤢᤏᤧ᤹ ᤁᤢᤴᤍᤣ᤺ᤱᤒᤧᤸᤗᤧ ᤐᤥ᤺ᤰᤔᤠ ᤑᤠ᤹ᤖᤢᤖᤥ. ᤁᤖ ᤂᤢᤏᤧ᤹ ᤆᤥ᤺ᤴᤏᤡᤸᤗᤧ ᤜᤠ᤺ᤳᤋᤠᤱ ᤁᤧᤓᤥᤱᤒᤠ ᤆᤢᤶ ᤁᤧᤜᤥ᤺ᤵᤐᤧᤱᤃ ᤐᤵᤐᤪᤠ᤹ᤔᤠ ᤐᤥᤱᤗᤥ᥄

¹¹ ᤜᤧᤰᤁᤣᤗ᤹ᤖᤡᤰᤁᤣ ᤏᤧᤳᤇᤡ ᤛᤥᤖᤡᤰ ᤀᤡᤶᤛᤡᤏᤧᤓᤃᤪ. ᤂᤢᤴᤇᤡ᤹ ᤏᤧᤵᤔᤠᤱ ᤐᤃᤥ ᤐᤃᤥ ᤁᤥᤛᤡᤖᤥ. ᤁᤖ ᤀᤣ᤺ᤰᤛᤧᤳᤇᤠᤃ ᤀᤠᤰᤂᤣᤗ᤹ᤖᤡᤰ ᤁᤧᤃᤥᤒᤠ ᤐᤥᤱᤒᤣ᥅

¹² ᤁᤢᤓᤠᤖᤧ ᤗᤳᤇᤠᤀᤡᤴ ᤏᤠ᤺ᤶᤔᤠ ᤛᤢᤰᤋᤢᤒᤡᤗᤠᤖᤥ. ᤁᤖ ᤏᤧᤵᤑᤢᤖᤧᤃ ᤁᤶᤒᤪᤠᤱ ᤔᤧᤳᤇᤡᤱᤔᤠ ᤛᤢᤰᤛᤢᤖᤥ. ᤁᤢᤍᤥᤖᤠ ᤛᤢᤶᤛᤡᤖᤧ ᤔᤠ᤺ᤵᤔᤏᤠᤒᤠ ᤀᤡᤍᤠ᤺ᤰᤁᤡᤴ ᤜᤠᤖᤠ ᤔᤧᤒᤢ᤹ᤏᤧᤴᤗᤥ॥

ᤕᤖᤡᤰ ᤋᤃᤡ ᤐᤥᤔᤧᤴᤏᤠᤱ ᤌᤣᤏᤠᤎᤣᤖᤰ

¹³ ᤛᤠᤶᤍᤡᤱ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤁᤠᤵᤐᤥᤒᤠ ᤁᤖ ᤀᤍᤱ ᤜᤠᤱᤅᤡᤴᤏᤢ᤺ᤸᤗᤧ ᤕᤠᤱᤃᤧᤛᤠ᤹ᤒᤠ ᤁᤖ ᤛᤡᤰᤁᤢᤶᤛᤠᤒᤠ ᤏᤠᤗᤡᤃᤧᤴ ᤌᤠᤱᤒᤧᤴᤏᤡᤴ ᤀᤠᤸᤗᤛᤠᤱ ᤏᤢᤒᤠᤖᤥ॥

¹⁴ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤌᤠᤱᤒᤧᤴᤏᤧᤴ ᤕᤠᤱᤃᤧᤛᤠ᤹ᤒᤠ ᤐᤥ᤺ᤰᤂᤧᤀᤠᤱ ᤛᤠᤘᤠ᤺ᤴᤇᤡᤱᤅᤠᤱ ᤘᤕᤧ. ᤀᤡᤃᤪ ᤂᤧᤴ ᤐᤢᤱᤗᤠᤜᤡᤶᤔᤥᤗᤠᤶ ᤗ᤺ᤴᤍᤧᤒᤣᤀᤠᤱ ᤜᤠᤱ ᤐᤥ᤺ᤰᤂᤧᤖᤥ॥

¹⁵ ᤀᤠᤱᤃᤠ᤹ ᤌᤣ ᤏᤡᤛᤢᤱᤓᤧᤸᤗᤧ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤁᤧᤜᤡᤱᤒᤠᤜᤠ᤹ ᤏᤢ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤁᤧᤖᤧᤰ ᤗᤰᤁᤧᤄᤥᤒᤠᤜᤠ᤹ ᤜᤠᤱᤅᤡᤸᤗᤧ ᤁᤢᤰᤏᤠᤀᤥ ᤁᤧᤕᤢᤱᤒᤠ ᤂᤧᤴ ᤏᤠᤗᤡᤃᤧᤴ ᤌᤠᤱᤒᤧᤴᤏᤡᤸᤗᤧ ᤁᤢᤀᤣᤃᤠᤱ ᤔᤧᤒᤣ॥

¹⁶ ᤂᤢᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ ᤏᤡ᤺ᤵᤔᤠᤀᤣ ᤛᤢᤰᤔᤧᤴᤍᤧᤳ ᤔᤧᤘᤕᤧ᤹. ᤁᤖ ᤂᤧᤸᤗᤧ ᤁᤢᤀᤣᤃᤠᤱ ᤁᤧᤍᤠᤒᤠᤜᤠ᤹ ᤂᤧᤴᤏᤢ ᤂᤢᤴᤇᤡ ᤏᤡᤱᤘᤠ᤹ ᤔᤧᤍᤩᤧᤏᤧᤴ॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣ ᤏᤢ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣᤖᤰᤗᤥ॥