ᤂᤠᤜᤢᤴᤛᤠᤒᤠ 3 - LIFOTNT

ᤁᤧᤖᤧᤰ ᤐᤠ᤺ᤴᤏᤡᤸᤗᤧ ᤁᤢᤕᤧᤶ ᤘᤠ᤹

¹ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤋᤠᤱᤛᤠᤱᤒᤧᤸᤗᤧ ᤁᤢᤛᤡᤱᤃᤠᤱ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤘᤠᤜᤡᤰᤏᤠᤶ ᤘᤠ᤹ᤖᤥ॥

² ᤛᤠᤘᤠ᤺ᤴᤇᤡᤱᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤛᤡᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤗᤣ᤺ᤵᤔᤠ ᤜᤣ᤹ᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤗᤣ᤺ᤵᤔᤠᤒᤧᤴ ᤀᤠ᤺ᤱᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

³ ᤛᤧᤵᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤘᤣ᤺ᤶᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤗᤢ᤺ᤶᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤆᤥ᤺ᤰᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁴ ᤜᤠ᤺ᤵᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤣ᤺ᤵᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤔᤧᤖᤡᤱᤎᤰᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤗᤠ᤺ᤱᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁵ ᤗᤢᤱ ᤗᤠᤵᤑᤢᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤗᤢᤱ ᤛᤢᤶᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤜᤧᤵᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤔᤧᤴᤜᤧᤵᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁶ ᤁᤥ᤺ᤵᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤗᤧᤵᤔᤠᤍᤣᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤁᤵᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤗᤠᤵᤑᤢᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁷ ᤌᤧ᤺ᤱᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤗᤧᤶᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤛᤫᤠ᤺ᤳ ᤘᤠ᤹ᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤐᤠ᤺ᤵᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁸ ᤏᤠᤏᤢ᤹ᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤆᤡ᤺ᤵᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥ ᤌᤱ ᤆᤥ᤺ᤰᤔᤠ ᤗᤳᤇᤠ ᤕᤧᤶ ᤘᤠ᤹ᤖᤥ. ᤂᤧᤒᤩᤠᤱ ᤏᤠᤍᤱ ᤆᤥ᤺ᤰᤔᤠ ᤕᤧᤶ ᤌᤡᤰ ᤘᤠ᤹ᤖᤥ॥

⁹ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤩᤠᤱᤔᤧᤴᤍᤠᤱ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤌᤧᤔᤠ ᤀᤡᤴᤎᤠ ᤔᤧᤄᤥᤛᤢᤀᤠᤱᤒᤣ᥅

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤶᤎᤠᤱ ᤁᤢ᤺ᤳᤋᤢᤛᤡᤒᤠ ᤁᤰᤁᤡᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥

¹¹ ᤂᤢᤏᤧ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤠ᤹ᤖᤢᤒᤠ ᤕᤧᤶᤔᤥ ᤐᤏᤢᤏᤢᤒᤠ ᤆᤥᤃᤢᤀᤠᤱ ᤘᤠ᤹॥ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤐᤠ᤺ᤴᤜᤠ᤹ ᤁᤣ᤺ᤳᤋᤢ ᤐᤡᤖᤢᤛᤡᤀᤠᤱ ᤘᤠ᤹ ᤁᤖ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢᤏᤠᤜᤢᤖᤡᤀᤠᤱᤎᤥ ᤁᤢᤏᤢᤵᤔᤥ ᤌᤠᤖᤡᤰ ᤌᤣ ᤆᤥᤃᤢᤀᤠᤱ ᤘᤠ᤹ ᤂᤧᤴ ᤛᤡᤒᤡ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ᤹॥

¹² ᤔᤏᤠ᤺ᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤁᤢᤜᤡᤱᤔᤴᤏᤥ ᤏᤢ᤹ᤔᤠᤍᤠᤔᤠᤀᤠᤱ ᤘᤠ᤹ᤔᤠ ᤏᤢ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱᤎᤥ ᤘᤣ᤹ ᤏᤢᤒᤠ ᤌᤣᤀᤠᤱ ᤜᤥᤵ ᤁᤧᤗ᤹ᤒᤠ ᤀᤠᤱᤃᤠ᤹ ᤏᤡᤛᤢᤱ᤹॥

¹³ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤈ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤛᤩᤠᤱᤔᤧᤴᤍᤠᤱ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖ ᤜᤠᤒᤠ ᤂᤧᤴᤏᤣ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤒᤠ ᤐᤷᤎᤠᤶᤗᤥ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤧᤔᤠ ᤆᤥᤃᤢ᤹. ᤂᤧᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹॥ ᤂᤧᤴ ᤐᤠ᤺ᤴᤏᤥ ᤌᤣᤀᤠᤱ ᤕᤥ᤹ᤔᤠ ᤀᤡᤃᤪ ᤕᤢᤶᤔᤠ ᤛᤢᤰᤔᤧᤍᤧᤳᤏᤧᤴ॥ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤃᤡᤖᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤀᤰᤂᤣ ᤆᤥᤃᤢᤖᤥ॥

¹⁵ ᤌᤣ᤺ᤴ ᤀᤠᤸᤗᤥ ᤘᤠ᤹ ᤂᤧᤴ ᤀᤢᤴᤇᤣ᤺ᤴᤏᤠᤱ ᤘᤕᤧᤖᤥ. ᤌᤣ᤺ᤴ ᤐᤥᤱᤔᤠ ᤘᤠ᤹ ᤂᤧᤴ ᤋᤃᤡᤀᤠᤱᤎᤥᤀᤣ ᤘᤕᤧᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤣ᤺ᤰᤐᤠ ᤕᤧᤶᤔᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ᤀᤣ ᤀᤧᤳᤗᤧᤱ ᤀᤧᤳᤗᤧᤱ ᤐᤥᤱᤗ ᤆᤥᤃᤢᤖᤥ॥

¹⁶ ᤜᤧᤰᤁᤩᤠᤱ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤘᤣ᤹ ᤐᤠ᤺ᤴᤏᤠᤱ ᤏᤡᤛᤢᤱᤗᤥ— ᤛᤠᤶᤕᤥᤏᤡᤔᤠᤸᤗᤧ ᤁᤢᤗᤧᤰᤘᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤋᤧᤴᤏᤥ ᤑᤧᤴᤐᤠᤴ ᤐᤥᤱᤗᤇ. ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥ᤺ᤰᤔᤠ ᤁᤧᤒᤥᤱᤒᤥ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤐᤥᤱᤗᤇ॥

¹⁷ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤰᤂᤣ ᤀᤡ᤺ᤳᤋᤢᤱᤗᤥ. “ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧᤴ ᤕᤧᤶ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤠᤰ ᤆᤥ᤺ᤰᤔᤏᤠᤒᤠ ᤐᤠ᤺ᤜᤠ᤹ᤖᤧᤴ ᤕᤧᤶ ᤘᤠ᤹ᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤒᤠ ᤏᤢ ᤗᤠᤕᤥᤒᤠᤜᤠ᤹ ᤏᤧᤵᤔᤠᤱ ᤂᤠᤛᤧᤴᤏᤥ ᤋᤠᤖᤢᤛᤡᤖᤥ॥”

¹⁸ ᤀᤠᤱᤃᤠ᤹ ᤁᤴᤏᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱ. “ᤔᤧᤴᤇᤠᤶ ᤕᤠᤵᤔᤡᤜᤠ᤹ᤃ ᤌᤰᤛᤠᤜᤠ᤹ᤏᤢ ᤁᤢᤍᤱᤒᤠᤛᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥᤛᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤛᤠ᤹ᤖᤢ᤹॥

¹⁹ ᤔᤧᤴᤇᤠᤶ ᤕᤠᤵᤔᤡ ᤋ᤹ᤕᤠ᤺ᤴᤏᤡᤴ ᤌᤰᤛᤠ᤺ᤸᤗᤧᤴ ᤜᤧᤰᤋᤱᤒᤠᤀᤣ ᤆᤥᤰ॥ ᤌᤡᤰᤁᤧᤴ ᤀᤠᤰᤂᤣᤗ᤹ᤖᤡᤰ ᤛᤡᤔᤠ ᤐᤥᤱ᤹. ᤘᤣ᤹ᤀᤡᤴᤏᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤛᤡᤖᤥ॥ ᤁᤧᤖᤧᤰᤗᤧᤴ ᤗᤳᤇᤠ ᤐᤖᤡᤰᤐᤠ ᤛᤰᤔᤠ ᤘᤠ᤹॥ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤍ᤹ᤕᤠ᤺ᤴᤏᤡᤴ ᤌᤰᤛᤠᤏᤢ᤺ᤸᤗᤧ ᤏᤢᤒᤠ ᤔᤧᤈᤥᤰᤏᤧᤴ॥ ᤁᤧᤖᤧᤰ ᤐᤠ᤺ᤴᤜᤠ᤹ ᤌᤣᤏᤠᤎᤣᤖᤰ॥

²⁰ ᤔᤧᤴᤇᤠᤶ ᤕᤠᤵᤔᤡᤴ ᤏᤢ ᤌᤰᤛᤠᤴ ᤗᤳᤌᤡᤰ ᤋᤧᤴᤏᤥ ᤐᤡᤳᤇᤡᤖᤥ. ᤏᤧᤵᤔᤠᤱ ᤂᤠᤶᤓᤢᤳᤇᤪᤢᤶᤒᤠᤗᤠᤶ ᤋᤩᤧᤇᤡᤒᤠ ᤜᤧᤰᤁᤩᤠᤱ ᤏᤧᤵᤔᤠᤱ ᤂᤠᤶᤓᤣᤳᤇᤪ᤺ᤶᤒᤥ ᤏᤢ᤺ᤱᤛᤡ ᤐᤡᤳᤇᤡᤖᤥ॥

²¹ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤌᤠ᤺ᤱ ᤗᤧᤵᤔᤠᤱ ᤐᤣᤰ ᤜᤧᤰᤁᤩᤠᤱ ᤌᤰᤛᤠ᤺ᤸᤗᤧ ᤁᤢᤛ᤻ᤛᤠᤶᤔᤡᤴ ᤕᤥ ᤂᤠᤶᤒᤣ᤺ᤰᤁᤥ ᤐᤣᤰ ᤑᤠ᤹ᤀᤠᤱ ᤜᤠ᤺ᤳᤗᤧ ᤏᤡᤛᤢᤀᤠᤱᤒᤣ᥅

²² “ᤂᤧᤸᤗᤧᤆᤥᤃᤢᤸᤗᤧ ᤔᤏᤠ᤺ᤸᤗᤧ ᤁᤢᤗᤠᤃᤡᤃ ᤀᤠᤵᤑᤣᤰ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤋᤠᤔᤠᤏᤢ᤺ᤸᤗᤧ ᤘᤣ᤹ ᤏᤢᤒᤠ ᤕᤠ᤺ᤶᤒᤰ ᤌᤣᤀᤠᤱ ᤜᤥᤵ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ. ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤴᤏᤣ ᤂᤧᤸᤗᤧ ᤁᤢᤄᤥᤔᤠ ᤗᤰ ᤐᤥᤱ᤹॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤂᤢᤏᤧ᤹ᤏᤢ᤺ᤸᤗᤧ ᤕᤠᤱᤛᤡ ᤐᤥᤱᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤋᤠ᤺ᤵᤔᤠᤀᤠᤱ ᤀᤥ᤺ᤴᤎᤠᤰᤔᤠ ᤛᤢᤰᤋᤢᤒᤣ᥅”