ᤛᤠᤶᤕᤥᤌᤡᤶ ᤀᤡᤱ 1 - LIFOTNTᤜᤥᤖᤣᤒᤗᤠᤶ ᤗ᤺ᤶᤔᤠ ᤐᤣ᤺ᤰᤔᤠ ᤀᤢᤘᤠ 1 ᤛᤢᤐᤖᤧ ᤁᤢᤍᤃᤡᤒᤠ ᤕᤷᤍᤏ ᤏᤧᤏᤧᤒᤠᤍᤧᤴᤏᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤕᤢᤅᤧᤒᤠᤍᤧᤴᤗᤠᤶ ᤌᤡᤰᤏᤠᤜᤠᤱ ᤁᤧᤏᤧᤒᤠ ᤐᤠᤖᤠᤏ. ᤋᤥᤑᤣᤗ. ᤗᤠᤒᤠᤏ. ᤜᤛᤣᤖᤥᤋ ᤏᤢ ᤍᤡᤛᤠᤜᤠᤋᤖᤧ ᤁᤢᤗᤢᤶᤔᤥᤒᤠ ᤕᤷᤍᤏ ᤏᤠᤶᤃᤧᤴ ᤐᤡᤛᤠᤱᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤐᤠ᤺ᤴᤈᤠ᤺ᤰᤁᤡᤴ ᤜᤠᤒᤠ ᤁᤴᤗᤥ॥ 2 (ᤛᤣᤀᤡᤖ ᤁᤥ᤺ᤰᤔᤠ ᤑᤠᤱᤈᤱ ᤐᤥᤱᤔᤠᤀᤠᤱ ᤜᤥᤖᤣᤒᤗᤠᤶ ᤁᤠᤍᤣᤛ-ᤒᤷᤏᤣ ᤌᤠᤖᤡᤰ ᤐᤣ᤺ᤰᤔᤠ ᤌᤡᤒᤥᤱᤅᤠᤱ ᤌᤡᤰᤕᤠᤴ ᤌᤖᤢ᤹)॥ 3 ᤔᤡᤛᤪ᤺ᤴ ᤔᤧᤗᤧᤖᤢᤒᤠ ᤗᤡᤒᤥᤱ ᤋᤱᤒᤣᤒᤠ ᤌᤡᤒᤥᤱᤅᤠᤱ ᤌᤡᤰ ᤗᤠ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤥᤛᤠᤴ ᤌᤧᤔᤠ ᤌᤧᤔᤠ ᤀᤡᤱᤈᤠᤱᤜᤠ᤹ ᤐᤡᤖᤢᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ॥ 4 ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤧᤴ ᤏᤢ ᤀᤣᤍᤪᤀᤡ ᤜᤧᤰᤁᤩᤠᤱ ᤀᤛ᤻ᤋᤠᤖᤥᤋᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤔᤥᤛᤠ᤺ᤸᤗᤧ ᤏᤠ᤺ᤴᤍᤢᤛᤡᤀᤠᤱ ᤁᤴ ᤀᤰᤂᤣ ᤐᤥ᤺ᤰᤂᤧᤀᤠᤱ ᤘᤕᤧ॥ 5 ᤕᤷᤍᤏ ᤏᤠᤎᤠ᤺ᤶᤒᤡ ᤗᤧᤵᤔᤠᤱ ᤔᤥᤀᤠᤒ ᤗᤠᤈᤣ᤹ᤀᤥ ᤔᤥᤛᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤐᤠ᤺ᤴᤜᤠ᤹ ᤆᤧᤱᤔᤠ ᤐᤠ᤺ᤵᤔᤠ ᤜᤣ᤺ᤰᤋᤢᤖᤥ— 6 ᤜᤥᤖᤣᤒ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧ. “ᤂᤡᤏᤡ᤹ ᤁᤴ ᤁᤥ᤺ᤰᤔᤠ ᤑᤠᤱᤈᤱᤅᤥ ᤁᤧᤕᤢᤅᤡᤒᤠ ᤕᤖᤡᤰ ᤕᤧᤴ ᤐᤥ᤺ᤰᤂᤧᤔᤠᤖᤧ॥ 7 ᤀᤠᤸᤗ ᤂᤡᤏᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤕᤅᤧᤶᤔᤧ᤹ᤀᤠᤱ ᤗᤠᤶ ᤌᤠᤀᤠᤛᤡᤶᤔᤧ᤹॥ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤏᤢ ᤂᤧᤸᤗᤧ ᤁᤢᤕᤠ ᤁᤢᤕᤠᤀᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ—ᤕᤷᤍᤏ ᤏᤧᤏᤧᤒᤠᤍᤧᤴᤏᤥ. ᤌᤧᤃᤢ ᤔᤠᤱᤘᤠᤀᤥ. ᤏᤠᤶᤎᤠ ᤐᤡᤛᤠᤱᤒᤠ ᤋᤧᤶᤒᤣ᤹ᤀᤥ. ᤏᤣᤃᤣᤘ ᤗᤠᤈᤣ᤹ᤀᤥ ᤜᤧᤰᤁᤩᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤌᤠᤖᤡᤰ. ᤗᤣᤒᤏᤠᤏ ᤌᤠᤖᤡᤰ ᤏᤢ ᤐᤕᤶ ᤕᤶᤒᤠ ᤘᤜ᤺ᤱ ᤕᤢᤑᤪᤣᤋᤡᤛ ᤌᤠᤖᤡᤰᤁᤣ ᤐᤣᤃᤧᤶᤔᤧ᤹॥ 8 ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤢᤜᤡᤱᤘᤧᤳ ᤘᤠ᤹ᤔᤠ ᤁᤧᤛᤢᤰᤋᤡᤖ ᤜᤧᤰᤁᤩᤠᤱ ᤕᤖᤡᤰ ᤐᤥ᤺ᤶᤔᤠ ᤌᤧ᤹ᤔᤠ ᤁᤧᤛᤢᤰᤋᤡᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤔᤠᤱᤜᤧᤰᤋᤢᤛᤡᤀᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣᤴ ᤂᤡᤏᤡ᤹ ᤐᤣ᤺ᤰᤔᤠᤀᤠᤱ ᤕᤢᤰ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗᤖᤥ॥” ᤔᤥᤛᤠ᤺ᤸᤗᤧ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤛᤣᤃᤢᤛᤡ ( ᤗᤠ ᥇᥎:᥇᥉-᥈᥍ ) 9 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. “ᤀᤠᤱᤃᤠ᤹ ᤀᤣ᤺ᤰ ᤂᤡᤏᤡ᤹ ᤗᤠᤶᤗᤥᤔᤠᤍᤣ᤹ᤔᤠ ᤔᤧᤛᤢᤰᤏᤡᤱᤅᤡᤴ॥ 10 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤖᤡᤰ ᤁᤧᤒᤥ᤺ᤴᤍᤡ ᤁᤧᤎᤧ᤹ᤖᤡᤖ ᤁᤧᤕᤠ᤺ᤴᤍᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤸᤗᤥ ᤂᤡᤏᤡ᤹ ᤋᤠᤱᤛᤠᤱᤒᤥᤒᤠ ᤂᤣᤛᤣ ᤂᤣ᤺ᤶᤛᤡᤰ ᤁᤢᤀᤡᤛᤡᤰ ᤕᤖᤡᤰ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹॥ 11 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤸᤗᤛᤠᤱ ᤜᤧᤴᤇᤡᤱ ᤜᤧᤴᤇᤡᤱ ᤁᤧᤓᤥᤛᤡᤖ ᤂᤧᤒᤩᤠᤱ ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖ᥄ 12 ᤁᤖ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤋᤢᤰᤂᤣᤜᤠ᤹. ᤁᤰᤜᤠ᤹ ᤏᤢ ᤂᤧᤔᤠ᤹ᤜᤠ᤹ ᤀᤣ᤺ᤰ ᤋᤱᤔᤠ ᤛᤢᤰᤋᤢᤱᤒᤣ᥅ 13 ᤂᤡᤏᤡ᤹ ᤌᤠ᤺ᤰᤌᤰᤔᤠ ᤁᤢᤓᤠ ᤛᤡᤰᤁᤢᤶᤛᤠᤒᤠ. ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤔᤏᤠᤜᤠ᤹ ᤂᤡᤏᤡ᤹ ᤛᤣᤃᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤗᤠᤶᤗᤥᤒᤠ ᤕᤢᤰᤋᤡᤱ ᤆᤥᤃᤢᤱᤛᤡᤱ᤹॥” 14 ᤂᤡᤏᤡ᤹ ᤁᤧᤒᤠ᤺ᤳᤋᤢᤶ. “ᤂᤧᤏᤧ᤹ ᤕᤠᤵᤔᤡ ᤁᤧᤒᤡᤖᤧᤒᤠ ᤛᤢᤈᤠᤴ ᤏᤢᤒᤠ ᤆᤥᤰ॥” 15 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤌᤠ᤺ᤰᤌᤰᤔᤠᤒᤠ ᤁᤢᤎᤧᤃᤣᤰ ᤔᤏᤠᤜᤠ᤹ ᤛᤣᤃᤢᤱᤛᤡᤱ॥ ᤂᤧᤱᤜᤠ᤹ ᤁᤧᤖᤧᤰ ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤔᤏᤠ ᤔᤧᤘᤕᤧ. ᤂᤧᤒᤩᤠᤱ ᤂᤡᤏᤡ᤹ ᤌᤠ᤺ᤰᤌᤰᤔᤠᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤜᤧᤴᤇᤡᤱ. ᤁᤡᤵ ᤌᤡᤰ. ᤅᤠᤒᤥᤱ ᤏᤢ ᤌᤡᤒᤥᤱᤗᤧ ᤗᤠᤃᤡ ᤗᤠᤶᤗᤥᤒᤠ ᤛᤣ᤺ᤴᤍᤢᤱᤛᤡᤱ॥ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤌᤠ᤺ᤰᤗᤠᤶᤗᤥᤒᤠᤜᤠ᤹ᤀᤠᤱ ᤛᤣ᤺ᤴᤍᤢᤱᤛᤡᤱ॥ 16 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤂᤡᤏᤡ᤹ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤅᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ—“ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤗᤢᤶᤔᤥᤒᤠ ᤂᤧᤔᤠ᤹ᤜᤠ᤹ ᤂᤧᤵᤛᤧᤶᤔᤧ᤹ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹. ᤂᤧᤴ ᤂᤧᤔᤠ᤹ᤀᤡᤴ ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤗᤢᤶᤔᤥᤒᤠᤛᤠᤱ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹॥ 17 ᤂᤡᤏᤡ᤹ ᤂᤠᤛᤧᤴ ᤁᤧᤗᤥ᤺ᤴᤍᤢᤶᤔᤡᤸᤗᤧ ᤔᤏᤠᤜᤠ᤹ ᤂᤡᤏᤡ᤹ ᤌᤡᤰᤁᤧᤴ ᤏᤢᤖᤡᤰ ᤏᤢ ᤘᤣ᤹ᤀᤡᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤂᤡᤏᤡ᤹ ᤆᤢᤰᤐᤠ ᤕᤶᤒᤠ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹॥ ᤀᤠᤳᤋᤡᤴ ᤔᤏᤠ᤺ᤴᤏᤢᤀᤠᤱ ᤔᤧᤃᤡᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤠᤛᤧᤴ ᤐᤠ᤺ᤴᤏᤡᤸᤗᤧ ᤏᤡ᤺ᤴᤎᤥ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤘᤠ᤹॥ ᤂᤡᤏᤡ᤹ ᤁᤧᤛᤠᤰᤐᤠ ᤁᤧᤍᤢᤔᤢᤶᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ᤀᤥ ᤋᤠᤖᤧᤶᤔᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤴ ᤂᤧᤵᤛᤢᤱ᤹॥” 18 ᤂᤧᤴ ᤕᤧᤶᤔᤥ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤡᤱᤅᤠᤱ ᤘᤕᤧᤖᤥ॥ ᤁᤠᤍᤣᤛ-ᤒᤷᤏᤣᤗᤠᤶ ᤌᤥ᤺ᤶᤈᤡᤒᤠᤜᤠ᤹ ᤔᤧᤒᤠᤱᤄᤢᤛᤡ ( ᤂᤠᤏᤡ᤺ᤳ ᥇᥉:᥇-᥈᥋ ) 19 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤜᤥᤖᤣᤒᤗᤠᤶ ᤗᤠᤱᤄᤣᤃᤡᤃᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤛᤢᤒᤠ ᤂᤧᤴ ᤐᤕᤶ ᤕᤶᤒᤠ ᤏᤢ ᤁᤡᤵᤔᤠ ᤐᤄᤢᤃᤧᤄᤢᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤐᤥ᤺ᤰᤂᤡᤃᤧᤀᤠᤱ ᤀᤣᤔᤥᤖᤡᤜᤠ᤹ ᤔᤧᤕᤢᤱᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤧᤵᤔᤠᤱ ᤐᤣᤃᤡᤃᤧ॥ ᤂᤧᤴ ᤀᤣᤃᤠᤱ ᤁᤠᤍᤣᤛ-ᤒᤷᤏᤣ ᤗᤠᤈᤣ᤹ᤀᤥ ᤁᤧᤖᤡᤃᤧ॥ 20 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤧᤖᤡᤀᤠᤱ ᤁᤧᤘᤕᤡ᤹॥ 21 ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤖᤥ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤐᤣᤃᤧᤶᤔᤧ᤹ᤀᤠᤱ ᤂᤧᤴ ᤕᤢᤰ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤏᤡᤱᤘᤠ᤹ ᤛᤪᤥ᤺ᤴ ᤔᤧᤗ᤹ᤖᤧᤶᤔᤡᤴᤏᤧ᤹॥” 22 ᤂᤧᤒᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤱᤃᤠ᤹ᤀᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤒᤠ᤺ᤳᤋᤢᤶ. “ᤌᤥ᤺ᤶᤔᤠᤖᤧ ᤗᤠᤃᤡ ᤀᤠᤏᤡ᤹ ᤋᤃᤡ ᤔᤏᤠᤜᤠ᤹ ᤐᤠᤱᤄᤢᤶᤛᤡᤶ॥ ᤂᤧᤴ ᤗᤠᤈᤣ᤹ᤀᤥ ᤀᤠᤏᤡ᤹ ᤀᤠᤳᤋᤡᤗᤠᤶ ᤐᤣ᤺ᤰᤔᤠ ᤐᤥᤱ᤹ ᤂᤧᤒᤩᤠᤱ ᤀᤠᤳᤋᤡᤴ ᤀᤠᤳᤋᤡᤴ ᤕᤧᤰᤕᤰᤁᤥ ᤀᤠᤃᤧᤳ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤂᤧᤱᤜᤠ᤹ᤖᤧ ᤀᤠᤏᤡ᤹ᤀᤥ ᤔᤧᤃᤧᤳᤋᤢ॥” 23 ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤌᤠ᤺ᤰᤁᤥᤗᤠᤶ ᤌᤡᤰᤌᤡᤰ ᤁᤧᤖᤧᤰᤗᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤔᤏᤠᤜᤠ᤹ ᤛᤣᤃᤢᤱᤛᤡᤱ॥ 24 ᤂᤧᤱᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤗᤧᤵᤔᤠᤱ ᤔᤧᤎᤠᤛᤡᤱ ᤂᤧᤒᤩᤠᤱ ᤀᤣᤛ᤻ᤁᤥᤗᤒᤠ ᤛᤣ᤺ᤱᤄᤠᤀᤥ ᤔᤧᤃᤧᤖᤧᤀᤠᤱ ᤂᤧᤴ ᤂᤵᤐᤧᤳ ᤔᤧᤃᤴᤍᤢ॥ 25 ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤥᤒᤠ ᤁᤢᤓᤠ ᤛᤡᤱᤛᤣ᤹ᤜᤠ᤹ ᤔᤧᤓᤧᤳᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤀᤡᤱᤄᤱ ᤔᤧᤃᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤒᤡᤒᤠ ᤂᤧᤴ ᤗᤠᤈᤣᤴ ᤆᤠ᤹ᤖᤡᤰ ᤏᤢᤒᤠ ᤆᤥ᤺ᤰᤗᤧᤳᤇ॥” ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤀᤳᤋᤢ ( ᤂᤠᤏᤡ᤺ᤳ ᥇᥉:᥈᥌-᥉᥉ ) 26 ᤁᤖ ᤂᤡᤏᤡ᤹ ᤂᤧᤵᤔᤥ ᤐᤣ᤺ᤰᤔᤠ ᤁᤧᤴᤍᤧᤴᤍᤡᤴ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤸᤗᤧ ᤋᤱᤗᤧᤱᤘᤠᤀᤥ ᤂᤡᤏᤡ᤹ ᤁᤧᤒᤥᤃᤡ॥ 27 ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤏᤧᤃᤧᤎᤡᤰᤋᤡᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤏᤠ᤹ᤖᤧᤒᤠᤸᤗᤧ ᤆᤥᤃᤢᤸᤗᤧ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠᤛᤡᤀᤠᤱ ᤔᤧᤱᤔᤠᤛᤡ ᤑᤠ᤹ᤀᤠᤱ ᤔᤡᤛᤪᤗᤠᤶ ᤀᤠᤏᤡ᤹ ᤀᤠᤗ᤺ᤳᤋᤧ ᤀᤠᤓᤧᤳᤋᤧᤒᤠᤖᤥ॥ 28 ᤀᤠᤏᤡᤃᤣ ᤀᤠᤳᤋᤡ ᤐᤣ᤺ᤰᤔᤠ ᤛᤢᤰᤋᤡᤃᤧᤒᤣ᥅ ᤀᤠᤏᤡᤃᤣ ᤏᤢᤛᤠ᤹ᤜᤠ᤹ᤖᤧ ᤀᤠᤏᤡᤃᤣ ᤏᤡᤱᤛᤠᤱ ᤔᤧᤒᤢᤰᤂᤢᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤂᤧᤴ ᤔᤏᤠᤜᤠ᤹ ᤀᤠᤏᤡ᤹ᤏᤢ᤺ᤸᤗᤧ ᤕᤶᤒᤠ ᤏᤢ ᤁᤣ᤺ᤶᤒᤠ ᤔᤧᤈᤥᤰ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰᤜᤠ᤹ ᤕᤶᤒᤠ ᤆᤥᤰ ᤜᤧᤰᤁᤩᤠᤱ ᤋᤠᤱᤛᤠᤱ ᤁᤧᤍᤰᤐᤠ ᤗᤢᤱᤎᤠᤰ ᤔᤧᤛᤧᤳᤋᤢᤀᤠᤱ ᤕᤧᤵ॥ ᤀᤠᤏᤡᤃᤣ ᤂᤧᤵᤔᤥ ᤀᤏᤠᤁᤡᤜᤠ᤹ᤀᤠᤱ ᤏᤡᤛᤢᤶᤛᤡᤶᤒᤧ॥’” 29 ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. “ᤂᤡᤏᤡ᤹ ᤕᤱᤔᤠ ᤔᤧᤛᤩᤧ᤹ᤀᤡᤴᤏᤧ᤹॥ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹॥ 30 ᤂᤡᤏᤡ᤹ ᤔᤡᤰᤗᤧ ᤏᤡᤛᤢᤖᤀᤣ ᤂᤡᤏᤡ᤹ ᤗᤠᤃᤡ ᤔᤡᤛᤪ ᤗᤠᤈᤣ᤹ᤀᤥ ᤀᤠᤰᤂᤣᤗ᤹ᤖᤡᤰ ᤌᤱ ᤌᤰᤋᤧ ᤁᤧᤒᤡᤖᤡᤀᤠᤱ ᤘᤕᤧ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤋᤃᤠᤱ ᤋᤃᤠᤱ ᤁᤧᤒᤣ᤺ᤰᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤡᤏᤡ᤹ ᤗᤠᤃᤡ ᤌᤱ ᤆᤥᤰ॥ 31 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤡᤏᤡ᤹ ᤗᤠᤱᤃᤧᤄᤣᤃᤡᤒᤠ ᤗᤠᤶ ᤂᤠᤖᤠᤰ ᤁᤢᤶᤒᤠᤖᤧ ᤁᤢᤛ᤻ᤛᤠᤴ ᤁᤢᤕᤢᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤒᤰᤂᤡ ᤁᤧᤓᤧᤳᤋᤡᤀᤠᤱ ᤘᤕᤧ. ᤂᤧᤴ ᤂᤡᤏᤡ᤹ ᤂᤧᤵᤔᤥ ᤁᤧᤏᤡᤛᤢᤶᤔᤠᤱ ᤘᤕᤧ॥” 32 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤡᤏᤡ᤹ ᤋᤠ᤺ᤰᤐᤥ ᤁᤧᤴᤕᤢᤰᤂᤢᤶᤔᤡᤴ. 33 ᤂᤢᤏᤧ᤹ ᤂᤡᤏᤡ᤹ ᤗᤠᤃᤡ ᤛᤠ᤺ᤱᤃᤠᤜᤡᤶ ᤗᤣ᤺ᤵᤔᤠᤍᤧᤴ ᤁᤥ᤺ᤳᤇᤧ ᤏᤢ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤒᤥᤱᤒᤠᤗᤠᤶ ᤀᤥ᤺ᤴᤎᤠᤰᤛᤧ ᤛᤧᤴᤍᤡᤰ ᤔᤡᤎᤢᤱ ᤔᤡᤖᤠ᤺ᤰ ᤛᤡᤳᤗᤠᤱ ᤏᤢ ᤗᤧᤴᤍᤡᤰ ᤂᤠ᤹ᤔᤡᤳ ᤛᤡᤳᤗᤠᤱ ᤐᤥ᤺ᤰᤂᤧᤀᤠᤱ ᤗᤠᤶᤍᤡᤰ ᤂᤠᤖᤠᤰ ᤋᤃᤠᤱ ᤋᤃᤠᤱ ᤌᤠᤛᤡᤱ ᤐᤣᤖ ᤘᤕᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ ( ᤂᤠᤏᤡ᤺ᤳ ᥇᥊:᥈᥆-᥊᥋ ) 34 ᤂᤡᤏᤡ᤹ ᤔᤏᤧᤁᤧᤎᤡᤰᤋᤡᤒᤠ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧ. ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱ. 35 “ᤁᤴ ᤀᤠᤛᤢᤳᤌᤥ ᤌᤠ᤺ᤰᤁᤥᤒᤠ ᤗᤳᤇᤠᤖᤧᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤢᤵ ᤆᤥᤃᤢᤱᤒᤠ ᤂᤧᤴ ᤏᤢᤒᤠ ᤗᤠᤈᤣᤴ ᤏᤡᤔᤠ ᤁᤧᤱᤄᤥᤛᤢᤶᤔᤡᤴ᤹॥ 36 ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤖᤧᤖᤰ ᤂᤧᤴ ᤗᤠᤈᤣᤴ ᤏᤡᤔᤠ ᤂᤥᤛᤢ᤹॥ ᤂᤢᤏᤧ᤹ ᤋᤥ᤹ᤖᤢᤒᤠ ᤗᤠᤈᤣᤴ ᤀᤠᤱᤃᤠ᤹ ᤂᤢᤏᤧ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤖᤢᤱᤛᤡᤱ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤁᤢᤗᤡᤱᤍᤥ ᤁᤧᤖᤧᤖ ᤋᤡᤶᤍᤢᤀᤠᤱ ᤘᤠ᤹॥” 37 ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤔᤧᤳᤋᤠᤱ. “ᤔᤥᤛᤠᤀᤣ. ᤂᤧᤏᤧ᤹ᤀᤠᤱ ᤂᤧᤵᤔᤥ ᤗᤠ᤺ᤵᤔᤠ ᤁᤧᤱᤄᤥᤏᤧᤴ॥ 38 ᤁᤖ ᤂᤧᤏᤧ᤹ ᤁᤧᤓᤠ᤹ᤒᤠᤱ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤂᤧᤵᤔᤥ ᤗᤠ᤺ᤳ॥ ᤂᤧᤏᤧ᤹ ᤂᤧᤴ ᤀᤠ᤺ᤴᤇᤡᤱᤔᤠ ᤐᤡᤖᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤴ ᤗᤠᤈᤣᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤖ ᤆᤥᤃᤢ᤹॥ 39 ᤂᤡᤏᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤧᤱᤜᤠ᤹ ᤐᤢᤱᤗᤠᤎᤠᤒᤠ ᤔᤧᤒᤥᤱ᤹ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶ. ᤁᤖ ᤐᤖᤢᤔᤠᤸᤗᤧ ᤂᤧᤴ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤀᤠᤶᤓᤪᤧ᤺ᤱᤘᤠ ᤀᤅᤧ᤺ᤰᤘᤠᤜᤠ᤹ ᤆᤠᤀᤣ ᤂᤧᤵᤔᤥ ᤔᤧᤗᤠᤳ॥ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤂᤧᤱᤜᤠ᤹ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤴ ᤂᤧᤱᤜᤠ᤹ᤖᤧ ᤕᤢᤰ ᤔᤧᤈᤥᤃᤢ᤹॥ 40 ᤁᤖ ᤂᤡᤏᤡ᤹ᤃ ᤏᤢ᤺ᤰᤂᤧᤶᤔᤧ᤹ᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱ ᤗᤧᤵᤔᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤜᤠ᤹ᤀᤥ ᤐᤣᤃᤧᤶᤔᤧ᤹॥” 41 ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤀᤠᤃ᤻ᤔᤧᤳᤋᤧ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ᤹॥ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤠᤏᤡᤃᤣ ᤐᤣᤃᤡᤃᤧᤀᤠᤱ ᤌᤰᤋᤡᤃᤧ॥” ᤁᤴ ᤁᤥ᤺ᤰᤔᤠᤒᤠ ᤗᤠᤈᤣ᤹ᤀᤥ ᤌᤥ᤺ᤰᤛᤡᤱᤔᤠ ᤀᤢᤛᤢᤖᤢ ᤁᤧᤏᤡᤛᤢᤶᤔᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤁᤧᤜᤣ᤹ᤀᤠᤛᤡ॥ 42 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤧᤎᤥ᤺ᤰᤁᤠᤛᤡᤶ ᤔᤧᤒᤣᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤌᤱ ᤔᤧᤈᤥᤃᤧᤶᤔᤡᤴᤏᤧ᤹॥ ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤜᤠᤖᤡ ᤁᤧᤍᤩᤧ᤹ᤀᤡ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤜᤥ᤺ᤵᤐᤠ॥’” 43 ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤁᤖ ᤂᤡᤏᤡ᤹ ᤂᤧᤶᤔᤠᤀᤣ ᤁᤧᤱᤄᤧᤵᤛᤢᤶᤔᤡᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤁᤧᤒᤣᤃᤡ. ᤜᤧᤰᤁᤩᤠᤱ ᤀᤠᤎᤡᤱᤃᤠᤏᤡ ᤁᤧᤒᤥ᤺ᤰᤂᤡᤀᤠᤱ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤁᤧᤎᤥ᤺ᤰᤁᤠᤛᤡ॥ 44 ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ ᤂᤡᤏᤡ᤹ᤏᤢ ᤔᤧᤎᤰᤋᤧ. ᤂᤶᤓᤩᤠᤱ ᤛᤰᤘᤠ ᤐᤴᤈᤩᤠᤱᤔᤧᤸᤗᤧ ᤔᤏᤠᤴ ᤔᤧᤏᤠ᤺ᤳᤋᤢᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤐᤢᤒᤣᤗᤠᤵᤛᤠ ᤁᤧᤶᤏᤠ᤺ᤳᤋᤡ. ᤂᤧᤒᤩᤠᤱ ᤛᤣᤀᤡᤖᤗᤠᤶ ᤜᤥᤷᤔᤠ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤏᤠ᤺ᤴᤍᤡ॥ 45 ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤢ᤺ᤰᤂᤡ ᤁᤧᤕᤧ᤹ᤀᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤜᤠᤒᤡ. ᤁᤖ ᤂᤢᤏᤧ᤹ ᤂᤡᤏᤡ᤹ ᤁᤧᤜᤠᤒᤡ ᤁᤧᤈᤡ᤺ᤰᤋᤡᤒᤠᤴ ᤔᤧᤄᤧᤵᤛᤢᤴ. ᤂᤧᤶᤄᤧᤶᤔᤠᤱ ᤔᤧᤗᤠᤵᤋᤢᤴ॥ 46 ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤂᤧᤴ ᤁᤠᤍᤣᤛᤀᤥ ᤕᤖᤡᤰ ᤕᤧᤴ ᤋᤣᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.