ᤍᤠᤏᤡᤀᤧᤗ 7 - LIFOTNTᤍᤠᤏᤡᤀᤧᤗᤖᤧ ᤏᤡᤛᤢᤒᤠ ᤛᤢᤑᤥᤜᤠ᤹ ( ᥍:᥇–᥇᥈:᥇᥉ ) ᤗᤡᤛᤡ ᤋᤠᤶᤓᤢᤱ ᤌᤰᤛᤠᤜᤠ᤹ ᤏᤡᤔᤧᤎᤠᤒᤧ 1 ᤒᤣᤒᤡᤗᤥᤏᤒᤠ ᤒᤣᤗᤛᤈᤖᤧᤴ ᤜᤠᤱ ᤐᤥ᤺ᤰᤂᤧᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤍᤠᤏᤡᤀᤧᤗᤧᤴ ᤀᤠᤒᤠᤅᤣ ᤁᤢᤀᤡᤵᤏᤠᤀᤥ ᤛᤥ᤺ᤴᤇᤡᤱᤅᤠᤱ ᤏᤧᤛ᤻ᤛᤧᤸᤗᤧ ᤂᤢᤏᤧ᤹ ᤛᤧᤵᤔᤠᤱ ᤔᤠᤰᤋᤢ ᤜᤧᤰᤁᤩᤠᤱ ᤛᤢᤑᤥᤜᤠ᤹ ᤏᤡᤛᤢ॥ ᤂᤢᤏᤧ᤹ ᤔᤠᤰᤋᤢᤒᤠ ᤛᤧᤵᤔᤠᤱ ᤐᤠ᤺ᤴᤜᤠ᤹ ᤛᤠᤵᤋᤢᤏᤧᤛ᤻ᤛᤢ॥ 2 ᤍᤠᤏᤡᤀᤧᤗᤖᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤏᤡᤛᤢᤱᤒᤠ ᤛᤢᤑᤥᤀᤥ ᤛᤧᤴᤍᤡᤰ ᤀᤥᤔᤧᤳᤋᤢᤱᤗ ᤐᤳᤇᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤍᤃᤡ ᤋᤠᤱᤛᤠᤱᤒᤥᤒᤠ ᤁᤧᤖᤧᤰ ᤐᤡᤛᤠᤱ ᤗᤠᤶᤒᤠᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤴ ᤂᤡᤷᤔᤠ᤺ᤳ ᤂᤡᤷᤔᤠ᤺ᤳ ᤔᤠ᤺ᤳᤋᤢ ᤏᤧᤛ᤻ᤛᤢ॥ 3 ᤘᤖ᤺ᤱᤅᤥᤗᤠᤶ ᤘᤣ᤹ ᤘᤣ᤹ ᤐᤖᤡᤰᤐᤠ ᤕᤶᤒᤠ ᤗᤡᤛᤡ ᤋᤠᤶᤓᤢᤱ ᤌᤰᤛᤠᤜᤠ᤹ ᤔᤧᤗ᤺ᤴᤍᤧ ᤔᤧᤎᤠᤅᤧ॥ 4 “ᤌᤡᤰᤛᤡᤃᤣ᤺ᤰᤐᤧᤴ ᤂᤡᤖᤡᤱᤒᤠ ᤜᤧᤰᤋᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤵᤜᤠ᤹ ᤔᤢᤕᤠ᤺ᤸᤗᤧᤴ ᤜᤧᤰᤋᤱᤒᤠ ᤐᤳᤇᤧ॥ ᤂᤧᤸᤗᤧ ᤁᤢᤗᤠᤵᤜᤠ᤹ ᤔᤧᤶᤓᤢ᤹ᤀᤣ ᤌᤠᤖᤡᤰ ᤀᤠᤱᤃᤠ᤹ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱ. ᤂᤧᤒᤩᤠᤱ ᤂᤧᤴ ᤔᤏᤠ ᤜᤧᤰᤁᤣ ᤁᤢᤗᤠᤱ ᤏᤧᤳᤇᤡᤖᤧ ᤋᤰᤋᤢᤖ ᤂᤠᤶᤒᤠᤱᤅᤥᤗᤠᤶ ᤐᤥᤃᤧᤀᤠᤱ ᤂᤧᤴ ᤔᤧᤴᤇᤠᤶ ᤕᤠᤵᤔᤡ ᤏᤡᤱᤘᤠ᤹ ᤔᤧᤒᤡᤖᤢ॥ 5 “ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤍᤃᤡᤒᤠ ᤏᤡᤛᤡᤃᤣᤰᤐᤠ ᤋᤠᤶᤓᤢᤱ ᤌᤰᤛᤠᤴ ᤔᤠ᤹᤺ᤕᤢ ᤜᤧᤰᤋᤱᤒᤠ ᤏᤡᤍᤧᤳᤋᤧ॥ ᤂᤧᤸᤗᤧ ᤁᤢᤎᤰᤁᤡᤴ ᤌᤡᤰ ᤗᤧᤵᤔᤠᤱᤗᤠᤶ ᤌᤠ᤺ᤱ ᤔᤧᤓᤥ᤺ᤰᤂᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤪᤠᤀᤥᤒᤠ ᤁᤢᤜᤠᤒᤥ᤹ᤒᤠᤜᤠ᤹ᤀᤥ ᤛᤢᤶᤛᤡ ᤛᤠᤒᤡᤶᤒᤠᤜᤠ᤹ ᤐᤳᤇᤧ॥ ᤂᤧᤴ ᤀᤰᤋᤱᤒᤠ ᤀᤡᤱᤈᤠᤱ ᤔᤧᤒᤡᤖᤢ—‘ᤐᤥᤃᤧ᤹. ᤜᤧᤰᤁᤩᤠᤱ ᤁᤧᤛᤢᤰᤛᤢᤰ ᤛᤠ ᤆᤩᤧ᤹᥄’ 6 “ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤀᤥᤔᤕᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤂᤧᤵᤔᤥ ᤘᤣ᤹ᤛᤔᤠ ᤌᤰᤛᤠ ᤌᤡᤰ ᤕᤧᤒᤧ. ᤂᤧᤴ ᤌᤧᤖᤡᤱᤒᤠ ᤜᤧᤰᤋᤱᤒᤠ ᤏᤡᤍᤧᤳᤋᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤣ᤺ᤰᤌᤠ᤺ᤰᤔᤥ ᤐᤢ᤺ᤸᤗᤧᤴ ᤜᤧᤰᤋᤱᤒᤠ ᤗᤡᤛᤡ ᤁᤢᤗᤠᤵᤜᤠ᤹ ᤐᤳᤇᤧ॥ ᤂᤧᤴ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤁᤢᤎᤧᤃᤣ᤺ᤰᤜᤠ᤹ ᤗᤡᤛᤡ ᤐᤳᤇᤧ. ᤂᤶᤓᤩᤠᤱ ᤂᤧᤴ ᤜᤠᤱᤕᤢᤰ ᤆᤥ᤺ᤰᤔᤠ ᤕᤢᤰ ᤔᤧᤒᤡᤖᤢ॥ 7 “ᤂᤧᤴ ᤀᤣᤃᤠᤱ ᤛᤧᤴᤍᤡᤰ ᤀᤠᤱᤃᤠ᤹ ᤛᤢᤑᤥᤀᤥ ᤏᤡᤛᤢᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤕᤱᤔᤠ ᤁᤧᤃᤧᤵᤐᤠ ᤏᤢ ᤁᤡᤵᤔᤠ ᤐᤄᤢ ᤁᤧᤄᤢᤒᤠ ᤜᤧᤰᤁᤩᤠᤱ ᤛᤠ᤹ᤖᤡᤰ ᤐᤎᤢᤶ ᤁᤧᤎᤢᤶᤒᤠ ᤗᤡᤛᤡᤃᤣᤰᤐᤠ ᤌᤰᤛᤠᤴ ᤕᤧᤒᤧ॥ ᤁᤸᤗᤧ ᤕᤶᤒᤕᤶᤒᤠ ᤑᤧᤴᤈᤣ᤹ ᤁᤢᤜᤠᤒᤥ᤹ᤒᤠᤜᤠ᤹ ᤕᤢᤅᤧ. ᤂᤧᤸᤗᤧ ᤛᤠᤏᤠ᤺ᤳᤋᤡᤴ ᤆᤡᤄᤠᤶ ᤆᤡᤄᤠᤶ ᤂᤠᤶᤍᤢᤀᤠᤱ ᤆᤍᤣᤛᤢ ᤜᤧᤰᤁᤩᤠᤱ ᤁᤧᤏᤶᤒᤧᤴ ᤁᤢᤗᤠᤱᤅᤡᤸᤗᤧ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤖᤢ ᤏᤧᤛ᤻ᤛᤢ॥ ᤋᤃᤡᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ᤺ᤸᤗᤧ ᤂᤧᤴ ᤘᤣ᤹ ᤐᤖᤡᤰᤐᤠ ᤆᤥᤃᤧ ᤜᤧᤰᤁᤩᤠᤱ ᤂᤧᤸᤗᤧ ᤌᤡᤒᤥᤱ ᤁᤢᤍᤠᤱᤜᤠ᤹ ᤕᤢᤅᤧ॥ 8 “ᤀᤠᤸᤗ ᤀᤠᤱᤃᤠ᤹ ᤂᤧᤴ ᤁᤢᤍᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤡ᤺ᤳᤇᤡᤱᤅᤠᤖ ᤐᤳᤇᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤍᤃᤡ ᤗᤳᤇᤠ ᤆᤢᤰᤛᤠ ᤁᤢᤍᤠᤱ ᤌᤡᤰ ᤂᤧᤱᤜᤠ᤹ᤀᤥᤗᤠᤶ ᤗᤡᤅᤧᤀᤠᤱ ᤕᤢᤅᤧ. ᤜᤧᤰᤁᤩᤠᤱ ᤋᤃᤡᤒᤠ ᤁᤢᤍᤠᤱᤜᤠ᤹ᤀᤥᤒᤠ ᤛᤢᤶᤛᤡᤃ ᤂᤧᤸᤗᤧ ᤁᤢᤍᤃᤡ ᤁᤢᤒᤢᤱ ᤌᤧᤷᤗᤧ ᤜᤠ᤹ᤕᤠᤰ ᤔᤧᤀᤠᤃᤧ॥ ᤔᤏᤠ ᤔᤡᤰ ᤜᤧᤰᤋᤱᤒᤠᤀᤣ ᤁᤴ ᤁᤢᤍᤠᤱᤅᤡᤸᤗᤧ ᤁᤢᤔᤡᤰ ᤐᤳᤇᤧ. ᤜᤧᤰᤁᤩᤠᤱ ᤀᤠᤱᤍᤡᤱ ᤐᤠᤴ ᤁᤧᤒᤠ᤺ᤵᤐᤠ ᤂᤧᤸᤗᤧ ᤁᤢᤶᤒᤪᤠ ᤐᤳᤇᤧᤖᤥ॥” ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤧᤴ ᤏᤡᤎᤠᤒᤧᤒᤠ ᤛᤢᤑᤥ 9 “ᤀᤥᤔᤧᤳᤋᤢᤱᤗ ᤐᤳᤇᤠᤱᤅᤡᤸᤗᤧᤛᤠ ᤜᤠᤱᤕᤢᤰᤏᤠᤜᤠ᤹ ᤔᤧᤕᤢᤰᤂᤢᤛᤡᤖᤥ. ᤜᤧᤰᤁᤩᤠᤱ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤧᤴ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥ ᤂᤢᤏᤧ᤹ ᤁᤢᤈᤠᤱᤅᤡᤴ ᤏᤠ᤺ᤱ ᤜᤧᤰᤁᤣ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤆᤥᤃᤧᤖᤥ. ᤂᤢᤏᤧ᤹ ᤁᤢᤎᤧᤃᤣᤰ ᤀᤡ᤺ᤴ ᤂᤡ ᤜᤧᤰᤁᤣ ᤑᤍᤠᤱᤒᤠ ᤆᤥᤃᤧᤖᤥ॥ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤔᤡᤎᤢᤱ ᤔᤡᤖᤠᤰ ᤁᤧᤍᤡ᤺ᤵᤐᤠ ᤆᤥᤃᤧᤖᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤠᤵᤗᤥ᤺ᤰᤜᤠ᤹ᤀᤥ ᤜᤢᤖᤢᤖᤢ ᤔᤡ ᤁᤧᤍᤡ᤺ᤵᤐᤠ ᤐᤳᤇᤧᤖᤥ॥ 10 ᤂᤢᤏᤧ᤹ ᤁᤢᤍᤃᤡᤗᤠᤶ ᤁᤧᤗ᤺ᤶᤒᤠᤖ ᤁᤧᤒᤵᤐᤠ ᤔᤡ ᤁᤧᤍᤡ᤺ᤵᤐᤠ ᤘᤜ᤺ᤱ ᤌᤡᤰ ᤁᤢᤰᤛᤧᤀᤠᤱ ᤏᤧᤛ᤻ᤛᤧᤖᤥ॥ ᤜᤧᤴᤇᤡᤱ ᤜᤧᤴᤇᤡᤱ ᤔᤏᤠᤜᤠ᤹ ᤔᤠᤱᤛᤧᤘᤠ ᤔᤧᤈᤥᤃᤧᤖᤥ. ᤌᤡᤒᤥᤱ ᤜᤧᤴᤇᤡᤱ ᤗᤧᤱ ᤌᤡᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤃᤡ ᤔᤧᤕᤧᤒᤧᤖᤥ॥ ᤂᤠᤛᤧᤴᤗᤧ ᤗᤠᤃᤡ ᤂᤠᤛᤧᤴᤜᤡᤶ ᤆᤢᤶᤗᤢᤱ ᤔᤧᤕᤢᤅᤧᤖᤥ. ᤜᤧᤰᤁᤩᤠᤱ ᤛᤠᤵᤐᤴᤜᤠ᤹ ᤜᤖᤧᤀᤠᤱ ᤏᤧᤛ᤻ᤛᤧᤖᤥ॥ 11 “ᤂᤧᤒᤩᤠᤱ ᤁᤴ ᤁᤢᤍᤠᤱᤅᤡᤸᤗᤧ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤖ ᤐᤳᤇᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱ॥ ᤂᤧᤴ ᤋᤠᤶᤓᤢᤱ ᤌᤰᤛᤠᤴ ᤔᤧᤛᤩᤧᤖᤢᤀᤠᤱ ᤔᤡᤎᤢᤱ ᤔᤡᤖᤠ᤺ᤰᤁᤥ ᤗᤠᤵᤔᤧᤍᤣᤛᤢ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤎᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤧᤒᤥ᤺ᤰᤂᤧᤴᤗ ᤌᤧᤶᤒᤠ ᤀᤠᤱᤃᤠ᤹ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱ॥ 12 ᤘᤣ᤹ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤡᤴ ᤔᤧᤏᤠᤵᤋᤢᤛᤡᤀᤠᤱ ᤘᤕᤧ. ᤁᤖ ᤁᤢᤓᤠ ᤕᤧᤶᤗᤧ ᤗᤠᤃᤡ ᤂᤧᤱᤜᤠ᤹ ᤜᤡᤱᤔᤠ ᤔᤧᤓᤠ᤺ᤰᤋᤢᤛᤡ॥ 13 “ᤂᤧᤴ ᤛᤧᤴᤍᤡᤰ ᤀᤠᤱᤃᤠ᤹ ᤛᤢᤑᤥᤀᤥ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤋᤠᤱᤛᤠᤱᤒᤥᤒᤠ ᤂᤠ᤹ᤔᤡ᤺ᤳᤜᤠ᤹ᤏᤢ ᤛᤥᤖᤡᤰ ᤁᤧᤕᤢᤒᤠᤖ ᤁᤧᤒᤵᤐᤠ ᤔᤧᤴᤇᤠᤶ ᤛᤠ ᤜᤧᤰᤋᤱᤒᤠ ᤌᤡᤰ ᤏᤡᤛᤢᤱ॥ ᤂᤢᤏᤧ᤹ ᤂᤧᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠᤀᤥ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤔᤧᤍᤣ᤹ᤖᤢ॥ 14 ᤂᤢᤏᤧ᤹ ᤕᤢᤰ. ᤔᤡᤔᤡᤍᤡᤱ ᤏᤢ ᤜᤠᤱᤕᤢᤰ ᤔᤧᤒᤡᤖᤢ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢ॥ ᤂᤢᤏᤧ᤹ ᤁᤢᤜᤠᤱᤕᤢᤰᤁᤡᤴ ᤏᤢᤵᤔᤧᤴᤍᤡᤱᤒᤠ ᤜᤠᤱᤕᤢᤰ ᤆᤥᤰ. ᤂᤧᤴ ᤀᤠᤓᤧᤸᤗᤧᤀᤠᤱ ᤔᤧᤗᤧᤱᤏᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ॥” ᤛᤢᤑᤥ᤺ᤸᤗᤧ ᤁᤢᤒᤣ 15 “ᤀᤠᤱᤃᤠ᤹. ᤍᤠᤏᤡᤀᤧᤗᤧᤴ. ᤀᤠᤱᤃᤠ᤹ ᤏᤡᤱᤘᤠ᤹ᤀᤥ ᤛᤠ᤹ᤖᤡᤰ ᤁᤡᤛᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤛᤢᤱᤒᤠ ᤛᤢᤑᤥᤜᤠ᤹ᤖᤧ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤠᤛᤠᤱ॥ 16 ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ᤀᤥᤒᤠ ᤌᤡᤰᤐᤠᤀᤥ ᤀᤠᤱᤃᤠ᤹ ᤐᤣᤃᤠᤱ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤛᤧᤰᤂᤠᤒᤠ ᤁᤢᤒᤣᤴ ᤜᤶᤔᤠᤖᤧ ᤗᤠᤃᤡ ᤂᤧᤴ ᤐᤣᤗᤡ ᤑᤠᤰᤋᤢᤱ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤒᤣᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤜᤴᤍᤠᤱ ᤐᤡᤖᤠᤱ— 17 ‘ᤁᤴ ᤕᤶᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤒᤥ᤺ᤰᤐᤠ ᤗᤡᤛᤡ ᤜᤠᤱᤈᤢᤶᤜᤠ᤹ᤖᤥ॥ 18 ᤁᤖ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤜᤠ᤹ᤖᤧ ᤛᤍᤠᤍᤡᤱ ᤕᤢᤰ ᤆᤥ᤺ᤰᤔᤠ ᤔᤧᤄᤥᤛᤢ᤹ ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤁᤴ ᤜᤠᤱᤈᤢᤶᤜᤠ᤹ ᤔᤧᤄᤥᤛᤢᤖᤥ॥’ 19 “ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤴ ᤗᤡᤛᤡᤃᤣᤰᤐᤠ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤛᤧᤰᤂᤠᤒᤠ ᤁᤢᤒᤣᤴ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱ. ᤂᤧᤱᤃ ᤑᤧᤴᤈᤣ᤹ ᤁᤢᤜᤠᤒᤥ᤹ ᤏᤢ ᤁᤠᤛᤠ ᤁᤢᤛᤣ᤺ᤶᤒᤢ᤹ ᤁᤧᤒᤵᤐᤠ ᤘᤣ᤹ᤜᤠ᤹ᤏᤢ᤺ᤸᤗᤧ ᤀᤣ᤺ᤰ ᤐᤖᤡᤰᤐᤠ ᤏᤢ ᤁᤡᤵᤔᤠ ᤐᤄᤢ ᤁᤧᤄᤢᤒᤠ ᤆᤥᤃᤧ—ᤂᤧᤴ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤛᤠᤏᤠ᤺ᤳᤋᤡᤴ ᤆᤡᤄᤠᤶ ᤆᤡᤄᤠᤶ ᤂᤠᤶᤍᤢᤀᤠᤱ ᤆᤍᤣᤛᤢ ᤜᤧᤰᤁᤩᤠᤱ ᤁᤧᤏᤶᤒᤧᤴ ᤁᤢᤗᤠᤱᤅᤡᤸᤗᤧ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤖᤢ ᤏᤧᤛ᤻ᤛᤢ॥ 20 ᤀᤠᤱᤃᤠ᤹ ᤂᤧᤸᤗᤧ ᤁᤢᤎᤧᤃᤣ᤺ᤰᤁᤥ ᤁᤧᤕᤢᤱᤒᤠ ᤌᤡᤒᤥᤱ ᤁᤢᤍᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤢ ᤂᤧᤴ ᤁᤢᤍᤠᤱᤜᤠ᤹ᤀᤥᤗᤠᤶ ᤁᤧᤗ᤺ᤶᤒᤠ ᤘᤣ᤹ ᤁᤢᤍᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱ. ᤂᤧᤸᤗᤧ ᤁᤢᤒᤣᤛᤠᤱ ᤂᤧᤱᤜᤠ᤹ᤀᤥᤗᤠᤶ ᤁᤢᤍᤠᤱ ᤛᤢᤶᤛᤡ ᤔᤧᤀᤠᤃᤧ—ᤁᤢᤍᤠᤱᤅᤡᤴ ᤘᤣ᤹ᤜᤠ᤹ᤏᤢ᤺ᤸᤗᤧ ᤁᤧᤎᤢᤶᤒᤠ ᤏᤡᤍᤧᤳᤋᤧ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤰ ᤏᤢ ᤀᤠᤱᤍᤡᤱ ᤐᤠᤴ ᤁᤧᤒᤠ᤺ᤵᤐᤠ ᤁᤢᤶᤒᤪᤠ ᤐᤳᤇᤧ॥ 21 ᤀᤠᤱᤃᤠ᤹ ᤀᤥᤔᤧᤳᤋᤢᤱᤗ ᤐᤳᤇᤠᤱᤅᤡᤸᤗᤧ. ᤂᤧᤴ ᤁᤢᤍᤠᤱᤅᤡᤴ ᤛᤣᤛᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥᤃᤧᤖ ᤐᤳᤇᤧ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤱᤜᤠ᤹ ᤏᤠ᤺ᤴᤍᤢᤛᤡᤖ ᤐᤳᤇᤧᤖᤥ॥ 22 ᤂᤧᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤧᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤜᤠ᤹ ᤗᤧᤵᤔᤠᤱ ᤂᤠᤛᤧᤴᤗᤧ ᤀᤢᤘᤠ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤏᤢ ᤕᤧᤶ ᤋᤩᤧᤀᤠᤱ ᤂᤧᤱᤜᤠ᤹ᤖᤧ ᤜᤠᤱᤈᤢᤶᤔᤡᤴ ᤕᤢᤰ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤸᤗᤧ ᤏᤠ᤺ᤴᤍᤢᤛᤡ॥ 23 “ᤂᤧᤸᤗᤧ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤁᤢᤒᤣᤴ ᤆᤧᤰᤋᤠᤱ—‘ᤗᤡᤛᤡᤃᤣᤰᤐᤠ ᤋᤠᤶᤓᤢᤱ ᤌᤰᤛᤠ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤱ ᤁᤧᤒᤥᤱᤒᤠ ᤗᤡᤛᤡᤃᤣᤰᤐᤠ ᤜᤠᤱᤈᤢᤶᤗᤥ॥ ᤁᤱᤃ ᤘᤣ᤹ ᤜᤠᤱᤈᤢᤶᤜᤠ᤹ᤏᤢ᤺ᤸᤗᤧ ᤀᤣ᤺ᤰᤛᤔᤠ ᤐᤖᤡᤰᤐᤠ ᤐᤥᤱ᤹ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤧᤸᤗᤧ ᤆᤡᤛ᤹ ᤆᤡᤛ᤹ ᤛ᤹ᤖᤢ ᤜᤧᤰᤁᤩᤠᤱ ᤋᤥ᤹ᤖᤢᤀᤠᤱ ᤗᤖᤢᤍᤣᤛᤢ᤹॥ 24 ᤌᤡᤒᤥᤱ ᤋᤠᤱᤜᤠ᤹ᤃ ᤂᤧᤴ ᤗᤡᤛᤡᤃᤣᤰᤐᤠ ᤜᤠᤱᤈᤢᤶᤗᤠᤶ ᤁᤧᤍᤠᤒᤠ ᤌᤡᤒᤥᤱ ᤜᤠᤱᤜᤠ᤹ᤖᤥ॥ ᤂᤧᤴ ᤀᤣᤃᤠᤱ ᤀᤣ᤺ᤰᤛᤔᤠ ᤜᤠᤱᤎᤡᤰ ᤐᤥᤰ. ᤋᤃᤡᤒᤧᤴᤏᤢ᤺ᤸᤗᤧ ᤂᤧᤴ ᤘᤣ᤹ ᤐᤥᤱ᤹॥ ᤂᤧᤸᤗᤧ ᤛᤢᤶᤒᤪᤠᤱ ᤜᤠᤱᤜᤠ᤹ ᤕᤢᤰᤋᤢᤛᤡ᤹॥ 25 ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠᤳ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤣᤛᤣ ᤔᤏᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤛᤡᤀᤠᤱ ᤁᤢᤍᤥᤰ ᤁᤧᤒᤥᤱᤒᤠ ᤕᤧᤶᤔᤡᤴ ᤏᤢ ᤁᤢᤓᤠᤱᤜᤠ᤹ ᤗᤧᤱᤔᤠ ᤋᤶᤛᤡᤱ ᤆᤥᤃᤢ᤹॥ ᤂᤧᤸᤗᤧ ᤁᤢᤜᤢᤰᤁᤥ ᤛᤣᤛᤣ ᤔᤏᤠᤜᤠ᤹ ᤕᤧᤶ. ᤕᤧᤶᤜᤠ᤹ ᤏᤢ ᤁᤢᤓᤪᤧ᤺ᤱ ᤕᤧᤶ ᤌᤠᤖᤡᤰ ᤔᤧᤎᤠᤛᤢᤛᤡ᤹॥ 26 “‘ᤁᤖ ᤂᤠᤛᤧᤴᤜᤡᤶᤔᤥ ᤂᤠᤛᤧᤴ ᤐᤥᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤢᤰᤁᤡᤴ ᤔᤧᤏᤠᤵᤋᤢᤀᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤕᤢᤔᤪᤧᤰ ᤔᤧᤔᤧᤰᤂᤢ᤹॥ 27 ᤂᤧᤒᤩᤠᤱ ᤛᤠᤱᤃᤪᤠᤶᤐᤣᤍᤠᤱ ᤛᤡᤃᤠᤱᤒᤠ ᤜᤠᤱᤈᤢᤶᤜᤠ᤹ᤀᤥᤒᤠ ᤜᤠᤱᤕᤢᤰᤁᤡᤴ. ᤔᤢᤰᤛᤠᤶᤔᤡᤴ ᤏᤢ ᤐᤕᤶ ᤕᤶᤒᤠ ᤜᤠᤱᤘᤠᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤧᤒᤡᤖᤢᤛᤡ᤹॥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤏᤢᤵᤔᤧᤴᤍᤡᤱᤒᤠ ᤜᤠᤱᤈᤢᤶ ᤐᤥᤱ᤹. ᤜᤧᤰᤁᤩᤠᤱ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤀᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹॥’ 28 “ᤁᤢᤏᤢᤵᤔᤠ ᤐᤠ᤺ᤴᤏᤡᤴ ᤀᤠᤶᤓᤠ ᤁᤴᤗᤥ॥ ᤀᤠᤱᤃᤠ᤹. ᤍᤠᤏᤡᤀᤧᤗᤧᤴ. ᤀᤠᤏᤡᤱᤘᤠ᤹ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤩᤧᤀᤠᤱ ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤶᤃᤧᤗ᤹ᤒᤠ ᤐᤥ᤺ᤰᤂᤧ. ᤁᤖ ᤀᤠᤱᤃᤠ᤹ ᤁᤴ ᤐᤠ᤺ᤴᤜᤠ᤹ ᤀᤠᤏᤡᤱᤘᤠ᤹ᤀᤥᤀᤣ ᤕᤢᤰᤂᤢᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.