ᤍᤠᤏᤡᤀᤧᤗ 1 - LIFOTNT

ᤍᤠᤏᤡᤀᤧᤗᤧᤴ ᤏᤢ ᤁᤢᤴᤈᤢᤶᤜᤠ᤹ ( ᥇:᥇–᥌:᥈᥎ ) ᤒᤣᤒᤡᤗᤥᤴᤏᤥ ᤁᤧᤃᤧᤵᤐᤠ ᤌᤠᤱᤒᤧᤴᤜᤠ᤹

¹ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤖᤧ ᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤑᤧᤖᤧᤀᤠᤱ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤁᤒᤪᤡᤱ ᤁᤡᤷᤃᤵ ᤁᤒᤢ॥

² ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤁᤢᤓᤠ ᤂᤵᤐᤩᤠ ᤛᤠᤔᤠᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤢᤍᤠᤒᤠ ᤕᤜᤥᤕᤠᤁᤡᤔ ᤜᤠᤱᤅᤡᤴ ᤏᤒᤢᤁᤍᤏᤣᤛᤖᤧᤴ ᤍᤠᤱᤒᤧᤸᤗᤧ ᤜᤢᤰᤛᤢᤵᤋᤢ॥ ᤂᤢᤏᤧ᤹ ᤂᤧᤴ ᤂᤵᤐᤩᤠ ᤛᤠᤔᤠᤜᤠ᤹ ᤒᤣᤒᤡᤗᤥᤏᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤢᤔᤠᤱᤜᤡᤶᤔᤥ ᤋᤣ᤹ᤖᤢᤀᤠᤱ ᤔᤠᤱᤜᤡᤶᤔᤥᤒᤠ ᤌᤠ᤺ᤱᤅᤥ ᤕᤢᤰᤂᤢ॥

³ ᤂᤧᤒᤩᤠᤱ ᤘᤣ᤹ ᤗᤠᤈᤣ᤹ᤀᤥᤗᤠᤶ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤛᤡᤒᤠ ᤀᤡᤛᤪᤠᤀᤡᤗᤡᤜᤠ᤹ᤀᤥᤗᤠᤶ ᤜᤠᤱᤜᤡᤶᤛᤕᤱ ᤏᤢ ᤂᤠᤛᤡᤱ ᤁᤧᤏᤡ᤺ᤵᤐᤠ ᤜᤡᤶᤛᤕᤱᤒᤠ ᤁᤢᤓᤠ ᤏᤠᤗᤡᤃᤧᤴ ᤌᤠᤱᤒᤧᤴ ᤔᤏᤠᤜᤠ᤹ ᤛᤣᤃᤧᤛᤧ᤹ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤋᤢᤶ ᤁᤢᤛᤢᤜᤠᤱᤕᤢᤰᤐᤠ ᤀᤛᤐᤣᤏᤈᤧᤴ ᤀᤡᤱᤈᤠᤱ ᤐᤡᤖᤢ॥

⁴ ᤂᤧᤴ ᤏᤠᤗᤡᤃᤧᤴ ᤌᤠᤱᤒᤧᤴ ᤔᤏᤠᤜᤠ᤹ ᤂᤢᤴᤇᤡ᤹ ᤌᤰᤗᤠ ᤗᤡᤱᤃᤧᤴᤏᤥ ᤌᤣᤀᤠᤱ ᤁᤧᤃᤠ᤺ᤶᤒᤠ ᤔᤧᤶᤒᤵᤔᤏᤠ. ᤐᤏᤢᤏᤢᤒᤠ. ᤁᤧᤖᤧᤰ ᤐᤖᤡᤰᤐᤠ ᤏᤡᤛᤠᤶ ᤜᤢ᤹ᤛᤡᤱᤔᤠ ᤁᤧᤛᤢᤰᤐᤠ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤁᤧᤃᤵᤐᤠ. ᤜᤠᤖᤠ ᤜᤢ᤹ᤛᤡᤱᤔᤠ ᤁᤧᤛᤢᤰᤐᤠ ᤏᤢ ᤜᤠᤱᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤛᤢᤰᤐᤠ ᤐᤥᤱᤔᤠ ᤁᤧᤒᤥᤱᤒᤠ ᤘᤕᤧ॥ ᤀᤛᤐᤣᤏᤈᤖᤧ ᤂᤧᤱᤜᤠ᤹ ᤒᤣᤒᤡᤗᤥᤏᤒᤠ ᤐᤠ᤺ᤴᤍᤠᤱ ᤏᤢ ᤛᤠᤵᤛᤰ ᤜᤢ᤹ᤔᤠᤛᤡ ᤁᤧᤒᤥᤱᤒᤠ ᤘᤕᤧ॥

⁵ ᤜᤠᤱᤅᤡᤸᤗᤧ ᤜᤠᤱᤜᤡᤶᤔᤥ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤆᤒᤠ ᤁᤢᤈᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤌᤡᤜᤠ᤹ ᤂᤧᤱᤜᤠ᤹ ᤐᤡᤖᤧᤛᤧ᤹ ᤑᤠ᤹ᤀᤠᤱ ᤀᤛᤐᤣᤏᤈᤧᤴ ᤀᤡᤱᤈᤠᤱ ᤐᤡᤖᤢ॥ ᤂᤧᤱᤜᤠ᤹ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤜᤢ᤹ᤔᤠᤛᤡ ᤁᤧᤒᤥᤱᤒᤠ ᤘᤕᤧ. ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤁᤣ᤺ᤵᤔᤠᤛᤡ ᤁᤧᤒᤥᤱᤒᤠ ᤘᤕᤧ॥

⁶ ᤁᤴᤜᤠ᤹ᤀᤥᤒᤠᤜᤠ᤹ ᤁᤢᤓᤠ ᤕᤜᤢᤍᤠ ᤌᤠ᤺ᤰᤁᤥᤒᤠᤜᤠ᤹ ᤔᤧᤘᤕᤧ—ᤍᤠᤏᤡᤀᤧᤗ. ᤜᤏᤏᤩᤠᤜ. ᤔᤡᤛᤠᤀᤣᤗ ᤏᤢ ᤀᤈᤷᤕᤠᤜ ᤔᤧᤘᤕᤧ॥

⁷ ᤋᤢᤶ ᤛᤢᤜᤠᤱᤕᤢᤰᤐᤠᤸᤗᤧ ᤂᤧᤱᤜᤠ᤹ ᤁᤢᤛᤱ ᤔᤡᤱ ᤐᤡᤖᤢᤛᤡ— ᤍᤠᤏᤡᤀᤧᤗᤧᤴ ᤒᤣᤗᤋᤛᤈᤖ. ᤜᤏᤏᤩᤠᤜ᤺ᤴ ᤛᤍᤪᤁ. ᤔᤡᤛᤠᤀᤣᤗᤧᤴ ᤔᤣᤛᤁ ᤜᤧᤰᤁᤩᤠᤱ ᤀᤈᤷᤕᤠᤜᤴ ᤀᤒᤣᤍ᤻ᤏᤃᤥ॥

⁸ ᤁᤖ ᤍᤠᤏᤡᤀᤧᤗᤖᤧ ᤜᤠᤱᤜᤡᤶᤔᤥᤒᤠ ᤁᤢᤈᤠᤴ ᤆᤠᤔᤠ ᤏᤢ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤱᤔᤠᤀᤠᤱ ᤀᤠᤵᤑᤣᤰ ᤀᤠᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤔᤠ ᤏᤡ᤺ᤴᤎᤥ ᤆᤥᤃᤢ. ᤂᤧᤒᤩᤠᤱ ᤁᤶᤓᤗ᤹ᤖᤡᤰ ᤀᤠᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤢᤶ ᤛᤢᤜᤠᤱᤕᤢᤰᤐᤧᤴ ᤐᤣᤗᤡ ᤑᤠᤰᤋᤢ॥

⁹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤢᤜᤠᤱᤕᤢᤰᤐᤧᤴ ᤍᤠᤏᤡᤀᤧᤗᤧᤴ ᤗᤢᤱᤔᤠ᤹ ᤋᤢᤰᤔᤠ ᤏᤢ ᤏᤢᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤐᤡᤖᤢ.

¹⁰ ᤁᤖ ᤛᤢᤜᤠᤱᤕᤢᤰᤐᤧᤸᤗᤧ ᤍᤠᤏᤡᤀᤧᤗᤧᤴ ᤔᤧᤳᤋᤢ. “ᤂᤡᤏᤡ᤹ ᤁᤧᤈᤠᤶᤒᤠ ᤏᤢ ᤁᤧᤎᤢᤅᤢᤶᤒᤠ ᤁᤢᤈᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤔᤢᤖᤠ ᤁᤧᤔᤧᤵᤐᤠ ᤀᤠᤴᤍᤠᤱᤒᤠ ᤐᤕᤶ ᤕᤶᤒᤠ ᤜᤠᤱᤅᤡᤴᤏᤢ ᤀᤠᤱᤃᤠ᤹ ᤁᤡᤀᤠᤖᤥ॥ ᤂᤡᤏᤡ᤹ ᤐᤧᤖᤧ᤹ᤍᤠᤱᤗᤠᤒᤠ ᤘᤣ᤹ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤏᤢ᤺ᤸᤗᤧ ᤂᤡᤏᤡ᤹ ᤌᤣᤀᤠᤱ ᤂᤢᤏᤧ᤹ ᤁᤢᤍᤃᤡ ᤛᤥᤃᤡ᤺ᤰᤁᤡ᤺ᤰᤐᤠ ᤏᤡᤃᤧᤎᤠᤒᤡᤖᤒᤣ᥅ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤐᤕᤶ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤎ᤻ᤃᤣᤰᤐᤠᤴ ᤑᤢ᤹ᤕᤠᤰ ᤑᤢᤴᤍᤢᤍᤣᤛᤢ ᤐᤡᤀᤠ॥”

¹¹ ᤂᤧᤴ ᤀᤣᤃᤠᤱ ᤍᤠᤏᤡᤀᤧᤗ. ᤜᤏᤏᤩᤠᤜ. ᤔᤡᤛᤠᤀᤣᤗ ᤏᤢ ᤀᤈᤷᤕᤠᤜᤖᤧ ᤗᤠᤃᤡ ᤀᤛᤐᤣᤏᤈᤖᤧ ᤔᤢᤖᤠᤔᤧᤳᤋᤢᤒᤠ ᤛᤧᤘᤠᤖᤥᤒᤧᤴ ᤍᤠᤏᤡᤀᤧᤗᤖᤧ ᤔᤧᤳᤋᤢ.

¹² “ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹. ᤀᤠᤏᤡᤃᤣ ᤌᤡᤒᤥᤱ ᤕᤧᤴ ᤌᤠᤖᤡᤰ ᤀᤥᤀᤠᤔᤧᤳᤋᤧ ᤀᤠᤛᤠ᤹ᤖᤧ᤹॥ ᤀᤠᤏᤡᤃᤣ ᤆᤠᤔᤠᤖᤧ ᤗᤠᤃᤡ ᤏᤢᤎᤡ ᤛᤠᤰᤆᤡ᤹ ᤏᤢ ᤌᤢᤱᤔᤠᤖᤧᤗᤠᤃᤡ ᤆᤫᤠ᤺ᤳᤗᤰ ᤀᤠᤒᤡᤖᤧ᤹॥

¹³ ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤁᤢᤈᤠ ᤁᤧᤈᤠᤒᤠ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤏᤢ ᤀᤠᤏᤡᤃᤣ ᤀᤠᤍᤱᤄᤧ ᤀᤠᤛᤠ᤹ᤖᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤛᤢᤒᤠ ᤁᤢᤀᤡᤛᤡᤰ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤕᤠ᤺ᤶᤒᤰ ᤆᤥᤃᤧ᤹॥”

¹⁴ ᤁᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤥ ᤂᤢᤏᤧ᤹ ᤋᤧᤴᤍᤧ ᤜᤧᤰᤁᤩᤠᤱ ᤌᤡᤒᤥᤱ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ ᤛᤠ᤹ᤖᤢᤛᤡ॥

¹⁵ ᤌᤡᤒᤥᤱ ᤕᤧᤴ ᤀᤣᤃᤠᤱ ᤜᤠᤱᤜᤡᤸᤗᤧ ᤁᤢᤈᤠ ᤁᤧᤈᤠᤒᤠ ᤂᤧᤴ ᤘᤣ᤹ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤏᤢ᤺ᤸᤗᤧ ᤂᤢᤴᤇᤡ᤹ ᤁᤢᤕᤠᤶ ᤆᤠᤱᤈᤠᤱᤒᤠ ᤏᤢ ᤗᤖᤡᤰᤗᤡᤰᤐᤠ ᤏᤡᤔᤧᤎᤠᤒᤧ॥

¹⁶ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤁᤶᤒᤪᤠᤱᤒᤠᤸᤗᤧ ᤂᤧᤱᤜᤠ᤹ ᤐᤡᤔᤠᤛᤡ ᤁᤧᤒᤥᤱᤒᤠ ᤁᤢᤈᤠ᤹ ᤁᤧᤏᤢ᤹ᤒᤠ ᤁᤢᤈᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤌᤡᤜᤠ᤹ ᤂᤧᤳᤋᤢᤍᤣᤛᤢᤀᤠᤱ ᤂᤧᤱᤜᤠ᤹ ᤏᤢᤎᤡ ᤛᤠᤰᤆᤡ᤹ ᤐᤡᤖᤢᤛᤡ॥

¹⁷ ᤁᤴ ᤗᤡᤛᤡ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤖᤡᤰᤐᤠ ᤛᤰᤛᤠᤵ ᤁᤢᤛᤡᤱ ᤏᤡ᤺ᤵᤔᤠ ᤏᤢ ᤏᤡᤛᤠᤶ ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠ᤹ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤍᤠᤏᤡᤀᤧᤗᤧᤴ ᤁᤧᤖᤧᤰ ᤐᤖᤡᤰᤐᤠ ᤔᤡᤰ ᤏᤡᤔᤠ ᤛᤢᤑᤥ ᤏᤢ ᤛᤧᤵᤔᤠᤱᤜᤠ᤹ᤖᤧ ᤁᤢᤒᤣ ᤜᤶᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ॥

¹⁸ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤋᤠᤖᤧᤶᤛᤧ᤹ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥᤃᤢᤒᤠ ᤕᤧᤶᤔᤡᤴ ᤁᤧᤖᤧᤀᤠᤱ ᤀᤣᤃᤠᤱ ᤂᤧᤴ ᤋᤢᤶ ᤛᤢᤜᤠᤱᤕᤢᤰᤐᤧᤸᤗᤧ ᤂᤧᤱᤜᤠ᤹ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤁᤢᤍᤃᤡ ᤋᤠᤖᤢᤛᤡ॥

¹⁹ ᤜᤠᤱᤅᤡᤴ ᤂᤧᤱᤜᤠ᤹ᤏᤢ ᤋᤠ᤹ᤈᤧᤰᤂᤧ ᤜᤧᤰᤁᤩᤠᤱ ᤂᤢᤏᤧ᤹ ᤍᤠᤏᤡᤀᤧᤗ. ᤜᤏᤏᤩᤠᤜ. ᤔᤡᤛᤠᤀᤣᤗ ᤏᤢ ᤀᤈᤷᤕᤠᤜᤴᤏᤠᤱᤎᤥ ᤜᤠ᤺ᤳᤋᤠᤱ ᤁᤢᤍᤱᤒᤠ ᤔᤧᤄᤥᤛᤢᤛᤡᤴ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤕᤢᤰᤋᤡᤱ ᤔᤧᤒᤥ᤺ᤰᤂᤧ॥

²⁰ ᤜᤠᤱᤅᤡᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤢᤛᤡᤸᤗᤧ. ᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤁᤡᤳᤆᤠᤰ ᤁᤧᤈᤥ᤺ᤰᤐᤠ ᤏᤢ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹ᤏᤢ᤺ᤸᤗᤧ ᤌᤡᤒᤥᤱᤗᤧᤱ ᤕᤠᤖᤡᤰ ᤏᤢᤖᤡᤰ ᤔᤧᤗᤧᤛᤢᤒᤠ ᤏᤡᤱᤘᤠ᤹ ᤂᤥᤛᤢ॥

²¹ ᤜᤧᤰᤁᤩᤠᤱ ᤁᤥᤖᤣᤛ ᤜᤠᤱᤅᤡᤸᤗᤧ ᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣ ᤌᤠᤖᤡᤰ ᤍᤠᤏᤡᤀᤧᤗᤧᤴ ᤜᤠᤒᤠ ᤂᤧᤵᤔᤥᤀᤣ ᤘᤕᤧᤖᤥ॥