ᤀᤠᤔᤥᤛ 1 - LIFOTNT

¹ ᤋᤁᤥᤀᤥ ᤁᤧᤕᤢᤱᤒᤠ ᤔᤧᤸᤗᤢᤁᤶᤒᤠᤜᤠ᤹ᤀᤥᤒᤠ ᤌᤡᤰᤐᤠ ᤀᤠᤔᤥᤛᤖᤧ ᤁᤴ ᤁᤢᤀᤡᤱᤄᤱᤗᤥ॥ ᤕᤜᤢᤍᤠᤒᤠ ᤜᤠᤱ ᤀᤢᤈ᤻ᤈᤡᤕᤠᤜᤴ ᤏᤢ ᤕᤣᤜᤥᤀᤠᤛᤖᤧ ᤁᤢᤛ᤻ᤛᤠ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤕᤧᤶᤔᤥ. ᤗᤢᤵᤗᤡ ᤁᤧᤵᤔᤠᤏᤢ᤺ᤸᤗᤧ ᤋᤱᤒᤣ ᤏᤧᤳᤇᤡ ᤋᤃᤡ ᤂᤢᤏᤧ᤹ ᤀᤡᤛᤪᤠᤀᤡᤗᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤛᤢᤀᤠᤱ ᤘᤕᤧᤒᤠ ᤛᤢᤑᤥᤴ ᤜᤠᤒᤠ ᤁᤴᤗᤥ॥

² ᤁᤴ ᤐᤠ᤺ᤴᤏᤡᤴ ᤀᤠᤔᤥᤛᤖᤧ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤧᤴ ᤛᤡᤕᤥᤏᤗᤠᤶ ᤜᤢ᤺ᤰᤗᤥ. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤗᤠᤶ ᤗᤥ᤺ᤰᤂᤢᤖᤥ॥ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤜᤣᤒᤣ᤺ᤰᤗᤥ. ᤜᤧᤰᤁᤩᤠᤱ ᤁᤷᤔᤣᤗ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤡᤴ ᤀᤡᤖᤧᤶᤗᤥ॥”

³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤍᤔᤛ᤻ᤁᤛᤖᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤱᤜᤠ᤹ᤖᤧ ᤃᤡᤗᤠᤍᤧᤴ ᤑᤧᤴᤈᤣ᤹ ᤁᤢᤜᤠᤒᤥ᤹ ᤁᤧᤕᤢᤱᤒᤠ ᤆᤠᤎᤠᤶᤔᤠ ᤋᤠ᤺ᤴᤍᤩᤠ᤺ᤸᤗᤧ ᤔᤧᤎᤠᤵᤛᤢ ᤆᤠᤔᤧᤏᤢᤃᤢᤒᤠᤸᤗᤧ ᤆᤥᤃᤢᤸᤗᤧ.

⁴ ᤀᤠᤱᤃᤠ᤹ ᤜᤈᤠᤀᤣᤗᤖᤧ ᤁᤢᤜᤡᤶᤔᤥ ᤔᤡ ᤁᤣ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤒᤣᤏ-ᤜᤍᤍᤖᤧ ᤁᤢᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥

⁵ ᤀᤠᤱᤃᤠ᤹ ᤍᤔᤛ᤻ᤁᤛᤖᤧ ᤁᤢᤗᤠᤶᤎᤣ᤺ᤳᤋᤡᤴ ᤔᤧᤰᤂᤢᤱᤗᤥ. ᤀᤠᤘᤏᤒᤠ ᤏᤧᤏᤧᤒᤠᤍᤧᤴᤏᤥ ᤁᤧᤕᤢᤱᤒᤠ ᤜᤠᤱᤅᤡᤴ ᤏᤢ ᤒᤣᤌ-ᤀᤍᤏᤀᤥ ᤜᤠᤱᤋᤰᤁᤠᤳ ᤁᤧᤕᤠᤱᤛᤡᤱᤒᤧᤴ ᤔᤧᤰᤂᤢᤱᤗᤥ॥ ᤀᤖᤠᤔᤒᤠ ᤔᤏᤠᤜᤠ᤹ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤡᤖ ᤗᤠᤈᤣ᤹ᤀᤥ ᤔᤧᤒᤣ᤺ᤰᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

⁶ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤃᤠᤈᤠᤒᤠ ᤛᤢᤶᤛᤡ ᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡᤀᤣ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤸᤗᤧ ᤀᤣᤍᤥᤔᤖᤧ ᤁᤢᤜᤢᤰᤁᤥ ᤌᤠᤔᤠᤛᤡᤖᤧ ᤗᤠᤃᤡ ᤁᤧᤖᤧᤰ ᤛᤢᤘᤠᤱᤜᤠ᤹ ᤋᤧᤶᤛᤢᤛᤡᤀᤠᤱ ᤋᤣ᤹ᤖᤢᤛᤡᤖᤥ॥

⁷ ᤀᤠᤱᤃᤠ᤹ ᤃᤠᤈᤠᤒᤠ ᤗᤢᤱᤎᤠᤰᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤰᤜᤠ᤹ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤔᤡᤍᤡᤰᤗᤥ॥

⁸ ᤀᤠᤱᤃᤠ᤹ ᤀᤛ᤻ᤍᤥᤍᤒᤠ ᤜᤠᤱᤅᤡᤴ ᤏᤢ ᤀᤛ᤻ᤁᤗᤥᤏᤀᤥ ᤜᤠᤱᤋᤰᤁᤠᤳ ᤁᤧᤕᤠᤱᤛᤡᤱᤒᤧᤴ ᤔᤧᤰᤂᤢᤱᤛᤡᤱᤗᤥ॥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤐᤗᤡᤛ᤻ᤋᤡᤜᤠ᤹ ᤏᤡᤴᤎᤠᤛᤣ᤺ᤰᤀᤥ ᤔᤧᤴᤇᤡᤏᤧᤴᤗ ᤌᤠᤖᤡᤰ ᤀᤣᤁᤪᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤜᤢᤰ ᤏᤢ᤺ᤰᤋᤢᤱᤗᤥ॥”

⁹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤋᤢᤖᤥᤛᤒᤠ ᤛᤢᤶᤛᤡ ᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡᤀᤣ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤸᤗᤧ ᤁᤧᤖᤧᤰ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤀᤣᤍᤥᤔᤖᤧ ᤁᤢᤜᤢᤰᤁᤥ ᤌᤠᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ᤜᤠ᤹ ᤗᤢᤶᤔᤥᤒᤠ ᤏᤠᤍᤱᤅᤡᤴ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ.

¹⁰ ᤀᤠᤱᤃᤠ᤹ ᤋᤢᤖᤥᤛᤒᤠ ᤗᤢᤱᤎᤠᤰᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤢᤖᤥ॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤣᤍᤥᤔᤖᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡᤀᤣ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤸᤗᤧ ᤁᤧᤖᤧᤰ ᤗᤢᤱᤔᤠ᤹ ᤋᤢᤰᤔᤠᤛᤡ ᤐᤠ᤺ᤴᤏᤡᤴ ᤗᤧᤖᤢᤍᤣᤛᤢ ᤜᤧᤰᤁᤩᤠᤱ ᤋᤠᤓᤣᤴ ᤕᤠᤱᤛᤡᤱᤅᤠᤱ ᤁᤢᤴᤛᤠ᤹ᤛᤡ ᤏᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤧᤸᤗᤧ ᤆᤰᤔᤧᤸᤗ᤹ᤀᤣ ᤁᤢᤛᤡᤰ ᤐᤥᤃᤧᤒᤠ ᤏᤢ ᤛᤍᤠᤍᤡᤱᤗᤧ ᤗᤠᤃᤡ ᤁᤢᤛᤠᤰᤁᤧᤴᤏᤡᤴ ᤐᤥᤃᤧᤒᤠᤸᤗᤧ ᤆᤥᤃᤢᤸᤗᤧ.

¹² ᤀᤠᤱᤃᤠ᤹ ᤋᤣᤔᤠᤏᤀᤥ ᤔᤡ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤒᤥᤈᤪᤠᤒᤠ ᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤢᤖᤥ॥”

¹³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤶᤔᤥᤏᤖᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤸᤗᤧ ᤁᤢᤀᤡ᤺ᤴᤍᤥᤜᤠ᤹ ᤑᤥᤔᤠᤖᤧ ᤗᤠᤃᤡ ᤃᤡᤗᤠᤍᤒᤠ ᤁᤢᤛ᤻ᤛᤠ ᤁᤧᤕᤠᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤥ᤺ᤰᤁᤡᤴ ᤆᤧᤖᤢᤒᤠᤸᤗᤧ ᤆᤥᤃᤢᤸᤗᤧ.

¹⁴ ᤀᤠᤱᤃᤠ᤹ ᤖᤒ᤻ᤒᤠᤒᤠ ᤗᤢᤱᤎᤠᤰᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥᤒᤠ ᤕᤰᤜᤠ᤹ ᤂᤧᤴ ᤌᤱ ᤐᤥᤱᤒᤠ ᤕᤧᤴᤏᤥ ᤜᤕᤱ ᤁᤡᤸᤗᤡᤱᤏᤢ ᤛᤥᤛᤥᤖᤡᤰ ᤛᤢᤖᤡᤳ ᤁᤣᤈᤱ ᤜᤢᤒᤠ ᤕᤧᤴᤏᤥ ᤂᤧᤴ ᤐᤕᤶ ᤕᤶᤒᤠ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥

¹⁵ ᤜᤠᤱᤅᤡᤴ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤁᤧᤖᤧᤰ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡ᤹.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥