᥈ ᤋᤡᤔᤥᤌᤡ 1 - LIFOTNT

ᤛᤧᤘᤠ ᤏᤢ ᤏᤥᤃᤧᤴ

^1-2 ᤀᤠᤔᤡ᤺ᤶ ᤀᤠᤛ᤻ᤛᤠ ᤋᤡᤔᤥᤌᤡᤀᤣ. ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧᤴ ᤔᤠᤱᤜᤧᤰ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤥᤗᤠᤶ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤣᤃᤠᤱᤒᤠ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤠᤘᤗᤗᤠᤶ ᤁᤴ ᤛᤰᤀᤡᤱᤅᤡᤴ ᤜᤠᤰᤏᤧ᤹ᤖᤥ॥ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤗᤢᤱᤃᤢᤶ. ᤗᤢᤱᤔᤠ᤹ ᤋᤢᤰᤔᤠ ᤏᤢ ᤛᤏᤠᤖᤢᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥

³ ᤀᤡᤱᤃᤠ᤹ ᤀᤠᤎᤠ᤺ᤰᤌᤧᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤛᤣᤛᤣ ᤂᤠᤛᤡᤱᤗᤧ ᤂᤢᤏᤧ᤹ ᤁᤢᤛᤧᤘᤠ ᤆᤥᤃᤢᤱ॥ ᤜᤧᤰᤁᤩᤠᤱ ᤛᤍᤠᤍᤡᤱ ᤀᤡᤱᤃᤠ᤹ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤛᤧᤴᤍᤡᤰ ᤗᤧᤴᤍᤡᤰ ᤂᤧᤏᤧ᤹ ᤏᤡᤱᤘᤠ᤹ ᤀᤡ᤺ᤳᤏᤧᤀᤠᤱ ᤂᤢᤏᤧ᤹ ᤏᤥᤃᤧᤴ ᤐᤡᤖᤢᤱᤗᤥ॥

⁴ ᤂᤧᤏᤧ᤹ ᤁᤧᤔᤡᤰᤘᤠᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤡᤸᤗᤧ ᤁᤧᤛᤠ᤹ᤛᤧ ᤋᤠᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤥᤔᤢᤗ᤹ᤔᤠᤸᤗᤧ ᤁᤢᤎᤡᤶ ᤐᤥᤱᤅᤠᤔᤧᤴ॥

⁵ ᤀᤡᤱᤃᤠ᤹ ᤂᤧᤏᤧ᤹ ᤛᤧᤰᤂᤠᤒᤠ ᤁᤧᤏᤛᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤧᤏᤧ᤹ᤀᤠᤱ ᤁᤧᤕᤢᤔᤠ᤹ ᤗᤥᤀᤡᤛ ᤏᤢ ᤁᤧᤶᤔᤠ ᤕᤢᤏᤡᤛᤖᤧ ᤁᤳᤋᤧᤳᤇᤢᤒᤠ ᤜᤧᤰᤋᤱᤒᤠ ᤏᤢᤒᤠ ᤏᤛᤠᤴ ᤁᤧᤃᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤛ᤻ᤛᤣ᤹ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

ᤐᤠᤘᤗᤖᤧ ᤋᤡᤔᤥᤌᤡᤴ ᤀᤠ᤺ᤴᤇᤡᤱᤔᤠ ᤐᤡᤖᤢ᤹

⁶ ᤁᤴ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤱ ᤐᤡᤏᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤐᤷᤎᤠ᤺ᤶᤔᤡᤴ ᤁᤧᤍᤡ᤺ᤵᤐᤠ ᤔᤡ ᤁᤢᤀᤡᤛᤡᤰ ᤁᤳᤋᤧ᤹ᤀᤥ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ॥

⁷ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤁᤡᤛᤪᤢᤰᤐᤠ ᤀᤠᤴᤈᤥ᤺ᤰᤏᤧᤴ. ᤁᤖ ᤔᤢᤰᤛᤠᤶ. ᤔᤡ᤺ᤶᤈᤡ. ᤜᤧᤰᤁᤩᤠᤱ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ ᤀᤠᤒᤡ᤹॥

⁸ ᤂᤧᤸᤗᤧᤆᤥᤃᤢᤸᤗᤧ ᤍᤠᤱᤒᤠᤸᤗᤧᤴ ᤛᤠ᤺ᤰᤂᤡ ᤐᤡᤔᤠ ᤏᤢ ᤁᤢᤗᤠᤃᤡ ᤀᤡᤱᤃᤠ᤹ ᤛᤠᤰᤐᤠ ᤁᤧᤎᤠᤒᤠᤴᤏᤢ ᤂᤧᤏᤧ᤹ ᤛᤡᤖᤡᤱ ᤔᤧᤔᤕᤧᤴᤏᤧ᤹ᤀᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥ ᤀᤠᤏᤡᤃᤧᤏᤢ ᤛᤥᤖᤡᤰ ᤂᤧᤏᤧ᤹ᤀᤠᤱ ᤛᤢᤏᤠᤀᤡᤱᤗᤧ ᤗᤠᤃᤡ ᤋᤢᤰᤂᤣ ᤆᤧ᤹ᤀᤥ॥

⁹ ᤂᤢᤏᤧ᤹ᤀᤣ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤀᤠᤱ ᤀᤠᤵᤑᤣᤰ ᤛᤣᤛᤣ ᤁᤢᤔᤏᤠ ᤐᤥᤱᤛᤧ ᤀᤠᤛᤣᤃᤧᤀᤠᤱ ᤀᤠᤘᤠ᤹ᤖᤥ॥ ᤁᤱᤃ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤐᤥ᤺ᤰᤂᤧᤒᤠ ᤔᤣ᤺ᤴᤗᤥ. ᤁᤖ ᤂᤢᤏᤧ᤹ ᤀᤠᤵᤑᤣᤰ ᤁᤢᤏᤡᤱᤘᤠ᤹ᤛᤥᤰ ᤏᤢ ᤁᤢᤗᤢᤱᤃᤢᤶᤖᤧ ᤆᤥᤃᤢᤒᤠᤖᤥ॥ ᤋᤥᤗᤡᤱᤛᤥᤔᤢᤀᤠᤱᤎᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤴ ᤗᤢᤱᤃᤢᤶᤔᤡᤴ ᤀᤠᤒᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤛᤣᤰ ᤆᤥᤃᤢᤀᤠᤱ ᤘᤕᤧ॥

¹⁰ ᤁᤖ ᤀᤠᤸᤗᤥ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤴ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤂᤢᤏᤧ᤹ᤀᤥ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ᤀᤣ ᤛᤡᤔᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤧᤰᤂᤢᤀᤠᤱ ᤛᤢᤏᤠᤀᤡᤱᤗᤠᤶ ᤏᤧᤳᤋᤡᤃᤧᤴ ᤜᤡᤱᤔᤴ ᤏᤢ ᤀᤠᤈᤢᤏᤡ ᤜᤡᤱᤔᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥

¹¹ ᤁᤴ ᤛᤢᤏᤠᤀᤡᤱᤅᤡᤸᤗᤧ ᤗᤠᤃᤡ ᤀᤡᤱᤃᤠ᤹ ᤛᤣᤛᤣ ᤛᤣ᤺ᤰᤕᤢᤰᤔᤡᤒᤠ. ᤛᤡᤰᤛᤠᤶᤒᤠ. ᤜᤧᤰᤁᤩᤠᤱ ᤀᤡᤱᤃᤧᤓᤥᤒᤠ ᤐᤥᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤰᤕᤢᤰ ᤆᤥᤃᤠᤱᤗᤥ॥

¹² ᤜᤧᤰᤁᤩᤠᤱ ᤒᤠ ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤡᤱᤃᤠ᤹ ᤋᤢᤰᤂᤣ ᤆᤠᤀᤠᤖ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤛᤡᤖᤡᤱ ᤔᤧᤔᤀᤠᤴᤗᤥ. ᤌᤣᤀᤠᤱᤓᤧᤸᤗᤧ ᤜᤠᤳ ᤀᤡᤱᤃᤠ᤹ ᤏᤛᤠᤴ ᤆᤥᤃᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤏᤢᤖᤡᤰᤁᤠᤱ ᤏᤡᤛᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤜᤢᤰᤁᤥ ᤐᤡᤖᤢᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤢ᤺ᤱᤔᤠ ᤕᤢᤔᤠ ᤕᤧᤴ ᤌᤠᤖᤡᤰ ᤛᤧ᤺ᤵᤋᤢᤀᤠᤱ ᤁᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤛ᤻ᤛᤣ ᤘᤠ᤹ᤀᤠᤖᤥ॥

¹³ ᤀᤡᤱᤃᤠ᤹ ᤜᤢ᤹ᤏᤧᤒᤠ ᤛᤧᤰᤂᤠ ᤏᤡᤛᤠᤶᤜᤠ᤹ᤖᤧ ᤁᤢᤒᤡᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤀᤥ ᤂᤥᤃᤧᤍᤧᤵᤐᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤏᤥ ᤏᤢᤖᤡᤰᤁᤠᤱ ᤘᤕᤧ᤹ᤀᤥ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤏᤢᤒᤠ ᤐᤠ᤺ᤴᤜᤠ᤹ ᤀᤠᤏᤡ᤹ᤀᤥ ᤁᤧᤘᤠ᤹ᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤓᤠ᤹ᤗᤠᤶ ᤏᤢᤖᤡᤰᤁᤠᤱ ᤁᤳᤋᤧ᤹ᤀᤥ॥

¹⁵ ᤀᤣᤛᤡᤕᤠᤛᤔᤠ ᤌᤢᤶᤔᤥᤗᤠᤶ ᤁᤧᤍᤠᤒᤠ ᤁᤠᤰ ᤏᤛᤠᤏᤡᤒᤠᤜᤠ᤹ᤖᤧ ᤀᤡᤱᤃᤠ᤹ ᤔᤧᤗᤧᤖᤠᤱ ᤔᤧᤍᤣᤛᤠᤱᤒᤠ ᤐᤠ᤺ᤴᤜᤠ᤹ᤃ ᤂᤧᤏᤧ᤹ ᤁᤧᤏᤡᤛᤢᤖᤥ॥ ᤂᤧᤱᤜᤠ᤹ᤀᤥ ᤑᤢᤃᤣᤗᤛ ᤏᤢ ᤜᤷᤔᤥᤈᤣᤏᤛᤧᤴᤏᤠᤱᤗᤥ॥

¹⁶ ᤍᤠᤱᤒᤠᤸᤗᤧ ᤜᤠᤖᤠ᤹ ᤀᤥᤏᤣᤛᤡᤑᤥᤖᤛᤖᤧ ᤁᤢᤜᤡᤶᤛᤕᤱᤅᤡᤴ ᤗᤢᤱᤔᤠ᤹ ᤋᤢᤰᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤢᤱᤗᤠᤜᤡᤶᤔᤥ ᤘᤕᤠᤱᤅᤡᤸᤗᤧ ᤂᤢᤏᤧ᤹ ᤕᤖᤡᤰᤗᤧᤱ ᤜᤠᤱᤜᤠᤱ ᤔᤧᤳᤇᤧ ᤀᤠᤍᤢᤶᤛᤧ ᤋᤠᤔᤠ ᤔᤧᤏᤢ᤺ᤴᤍᤧᤴ.

¹⁷ ᤁᤖ ᤂᤢᤏᤧ᤹ ᤖᤥᤔ ᤕᤧᤰᤕᤰᤁᤥ ᤁᤧᤖᤧᤀᤠᤱ ᤛᤠ᤹ᤖᤡᤰ ᤁᤥ᤺ᤳᤋᤠᤱᤅᤠᤱ ᤀᤡᤱᤃᤠ᤹ ᤋᤢᤔᤠᤱᤗᤥ॥

¹⁸ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢᤔᤠ ᤕᤧᤴᤏᤥ ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤢᤏᤧ᤹ ᤗᤢᤱᤃᤢᤶ ᤀᤥᤛᤣ᤺ᤴᤎᤠᤰᤋᤢᤏᤡᤖᤥ॥ ᤀᤡᤱᤃᤠ᤹ ᤀᤣᤑᤡᤛᤛᤀᤥ ᤘᤕᤠᤱᤅᤡᤸᤗᤧ ᤀᤠᤰᤂᤧᤴ ᤛᤠ᤹ᤖᤡᤰ ᤁᤢᤓᤠ᤹ ᤐᤡᤖᤠᤱ ᤁᤧᤗ᤹ᤒᤠ ᤐᤠ᤺ᤴᤏᤡᤱᤃ ᤂᤧᤏᤧ᤹ ᤁᤧᤏᤡᤛᤢᤀᤣᤖᤥ॥