᥈ ᤛᤠᤔᤢᤀᤧᤗ 1 - LIFOTNTᤍᤠᤀᤢᤍᤖᤧ ᤛᤠᤘᤗᤧᤴ ᤔᤠᤛᤡᤱᤒᤠ ᤏᤡᤱᤘᤠ᤹ ᤂᤥᤛᤢ 1 ᤛᤠᤘᤗᤧᤴ ᤛᤩᤧᤀᤠᤱ ᤀᤣᤃᤠᤱ ᤍᤠᤀᤢᤍᤖᤧ ᤀᤔᤠᤗᤧᤁᤡᤜᤠ᤹ ᤌᤱᤅᤥ ᤏᤠ᤺ᤴᤍᤢᤛᤡᤀᤠᤱ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤕᤧᤴ ᤌᤠᤖᤡᤰ ᤛᤡᤰᤗᤃᤀᤥᤀᤣ ᤕᤢᤅᤧ ᤕᤠ᤺ᤰᤋᤧ॥ 2 ᤜᤧᤰᤁᤩᤠᤱ ᤛᤢᤶᤕᤧᤴ ᤁᤧᤖᤧᤸᤗᤧ ᤕᤠ᤺ᤴᤍᤡᤰ ᤁᤢᤍᤣ᤺ᤳ ᤁᤧᤍᤧ᤺ᤱᤒᤠ. ᤁᤢᤎᤧᤃᤣ᤺ᤰᤐᤥ ᤂᤠᤶᤓᤢᤋᤪᤠ ᤁᤧᤒᤵᤐᤠ ᤔᤏᤠᤎᤡᤰ ᤛᤠᤘᤗᤖᤧ ᤁᤢᤍᤢᤖᤠᤕᤰᤗᤠᤶ ᤗᤡᤃᤰ ᤗ᤺ᤴᤍᤧᤍᤩᤧ॥ ᤂᤧᤴ ᤍᤠᤀᤢᤍᤖᤧ ᤁᤢᤒᤣᤛᤠᤱ ᤁᤧᤖᤧ ᤜᤧᤰᤁᤩᤠᤱ ᤁᤢᤍᤃᤡ ᤛᤠᤶᤒᤥᤴ ᤜᤒᤳ ᤑᤴᤇᤡᤱ॥ 3 ᤍᤠᤀᤢᤍᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤠᤴᤗᤠᤶᤒᤠ ᤁᤧᤍᤩᤧᤒᤠ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤋᤢᤖᤠᤕᤰᤗᤠᤶᤒᤠ ᤋᤠᤅᤠᤱᤅᤠᤱ ᤂᤧᤳᤇᤡᤅᤠᤀᤠᤱ ᤋᤩᤠᤱᤒᤠ॥” 4 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤧᤴ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤀᤡᤱᤄᤱ ᤌᤧᤔᤠ ᤘᤠ᤹ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥” ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤏᤡ᤹ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤔᤠᤍᤧᤴᤗᤠᤶ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤌᤱᤅᤥ ᤕᤖᤡᤰ ᤔᤧᤛᤩᤧ॥ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴᤏᤠᤱ ᤛᤩᤧᤛᤡ॥” 5 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤧᤴ ᤀᤡᤱᤄᤱ ᤁᤧᤍᤠ᤺ᤵᤐᤠ ᤌᤠᤱᤒᤧᤴᤏᤡᤴ ᤛᤣ᤺ᤴᤍᤥᤛᤢ. “ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤔᤧᤛᤧᤖᤢᤛᤡ ᤑᤠ᤹ᤀᤠᤱ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤁᤧᤏᤡᤛᤢ᥅” 6 ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤃᤡᤸᤒᤥ ᤁᤥ᤺ᤰᤔᤠᤀᤥ ᤘᤕᤠᤱ. ᤜᤧᤰᤁᤩᤠᤱ ᤛᤠᤘᤗᤧᤴ ᤀᤠᤒᤠᤅᤣ ᤁᤢᤗᤠ᤺ᤰᤁᤡᤸᤗᤧ ᤋᤰᤛᤡᤱᤅᤠᤱ ᤀ᤺ᤰᤂᤢᤶ ᤐᤳᤇᤧᤒᤠ ᤏᤡᤛᤢᤱ॥ ᤂᤶᤒᤩᤠᤱ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤗᤥᤱᤒᤠᤜᤠ᤹ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤘᤕᤧ॥” 7 ᤜᤧᤰᤁᤩᤠᤱ ᤂᤢᤏᤧ᤹ ᤀᤣᤃᤠᤱ ᤜᤡᤛᤡᤱᤅᤡᤸᤗᤧ ᤀᤠᤱᤃᤠ᤹ ᤏᤡᤛᤠᤱᤅᤠᤱ ᤀᤢ᤺ᤳᤋᤠᤱ॥ ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤁᤵᤔᤥ ᤘᤠ᤹ᤀᤠᤖᤥ॥” 8 “ᤂᤢᤏᤧ᤹ ᤔᤧᤳᤋᤠᤱ. ‘ᤂᤧᤏᤧ᤹ ᤜᤠ᤺ᤳᤏᤧᤒᤣ᥅’ ᤀᤠᤱᤃᤠ᤹ ‘ᤀᤔᤠᤗᤧᤁᤡᤀᤠ’ ᤔᤧᤳᤋᤢᤱ॥ 9 “ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤠᤱ. ‘ᤀᤠᤱᤃᤠ᤹ ᤀᤠᤒᤣᤛᤠᤱ ᤑᤧᤖᤧ᤹ᤀᤠᤱ ᤛᤧᤖᤠᤱᤅᤧ᤹ᤏᤠ॥ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠ. ᤜᤧᤰᤁᤣᤛᤠᤱ ᤛᤡᤔᤠᤗᤡᤱᤎᤥᤀᤥ ᤁᤧᤖᤠᤱ ᤆᤢᤖᤠᤱᤅᤠᤱ ᤘᤠ᤹ᤀᤠ॥’ 10 “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤢᤒᤣᤛᤠᤱ ᤐᤣᤃᤠᤱ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤠ᤺ᤴᤍᤧᤒᤠᤸᤗᤧ ᤆᤥᤃᤢᤸᤗᤧ ᤛᤧᤖᤢᤱ॥ ᤂᤢᤏᤧ᤹ ᤔᤧᤜᤡᤱᤏᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ॥ ᤀᤠᤱᤃᤠ᤹ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥᤗᤠᤶ ᤋᤡᤆ᤺ᤴ ᤏᤢ ᤁᤢᤜᤢᤰᤁᤥᤗᤠᤶ ᤜᤢᤰᤐᤠ᤺ᤱᤃᤡ᤺ᤴ ᤗ᤺ᤳᤋᤢᤱ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ᤹ᤀᤥ ᤂᤠ ᤁ᤹ᤕᤥ ᤋᤠᤖᤢᤱᤅᤠᤱ ᤘᤠ᤹॥” 11 ᤁᤴ ᤂᤧᤵᤛᤢᤀᤠᤱ ᤍᤠᤀᤢᤍᤖᤧ ᤁᤢᤍᤣ᤺ᤳᤋᤧᤴ ᤋᤧᤖᤧᤰ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧᤀᤠᤱ ᤜᤠᤒᤠᤜᤧᤰᤁᤣ ᤔᤧᤈᤥᤃᤢ॥ 12 ᤜᤧᤰᤁᤩᤠᤱ ᤛᤠᤘᤗᤧᤴ. ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ. ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ ᤋᤠᤓᤣᤗᤠᤶ ᤔᤧᤛᤩᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤛᤱᤒᤣ᤹ᤔᤧᤴ ᤔᤧᤜᤡᤵᤋᤢᤖ ᤔᤧᤜᤠᤒᤧ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤋ᤺ᤰᤏᤧᤳ ᤔᤧᤕᤢᤅᤧ॥ 13 ᤜᤧᤰᤁᤩᤠᤱ ᤀᤡᤱᤄᤱ ᤁᤧᤍᤠ᤺ᤵᤐᤠ ᤂᤧᤴ ᤌᤠᤱᤒᤧᤴᤏᤡᤴ ᤍᤠᤀᤢᤍᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤳᤋᤠᤗᤠᤶ ᤁᤧᤍᤩᤧᤒᤠ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤔᤠᤗᤧᤁᤡ. ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤀᤠ॥” 14 ᤍᤠᤀᤢᤍᤖᤧ ᤂᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤢᤒᤠ ᤁᤢᤔᤏᤠᤴ ᤛᤧᤵᤔᤠᤖᤧ ᤗᤠᤃᤡ ᤜᤢᤰᤁᤣ᤺ᤵᤔᤠ ᤂᤧᤏᤧ᤹ ᤁᤧᤱᤃᤡᤛᤧᤶᤒᤡ᥅” 15 ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤀᤥ ᤗᤳᤇᤠ ᤌᤠᤱᤒᤧᤴ ᤔᤏᤠᤎᤡᤰ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤁᤴ ᤔᤏᤠᤴ ᤛᤧᤖᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤜᤡᤵᤋᤢᤀᤠᤱ ᤛᤧᤖᤢ॥ 16 ᤍᤠᤀᤢᤍᤖᤧ ᤂᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤂᤧᤏᤧ᤹ ᤁᤧᤔᤠᤰᤂᤡᤴ ᤀᤠᤒᤠᤅᤣ ᤁᤧᤎᤣᤃᤣᤰ ᤛᤶᤎᤠᤱ ᤆᤢᤰᤗ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤛᤣᤃᤢᤒᤠ ᤁᤢᤔᤏᤠᤴ ᤛᤧᤖᤢᤱ’ ᤗ᤹ᤖᤡᤰ ᤀᤠᤒᤠᤅᤣ ᤁᤧᤶᤒᤪᤠ᤺ᤸᤗᤧ ᤁᤧᤒᤠ᤺ᤳᤋᤢᤀᤠᤱ ᤀᤠᤵᤋᤡᤰ ᤁᤧᤄᤥᤛᤢᤖᤥ॥” ᤍᤠᤀᤢᤍᤖᤧ ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤜᤠ᤺ᤵᤋᤢᤛᤡᤒᤠ 17 ᤂᤧᤴ ᤀᤣᤃᤠᤱ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤢᤴᤇᤡ᤹ ᤗᤠᤃᤡ ᤍᤠᤀᤢᤍᤧᤴ ᤀᤰᤂᤣᤗ᤹ᤖᤡᤰ ᤔᤧᤖᤡᤱ ᤌᤰᤋᤧ. 18 ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤢᤍᤠᤒᤠ ᤔᤏᤠᤜᤠ᤹ ᤁᤴ “ᤗᤡ” ᤔᤧᤵᤔᤏᤠᤒᤠ ᤛᤠᤶᤗᤥᤴ ᤜᤢ᤹ᤖᤠᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤁᤴ ᤛᤠᤶᤗᤥᤴ ᤕᤠᤛᤠᤖ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ— 19 “ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠᤛᤣ. ᤀᤠᤏᤡ᤹ ᤂᤧᤶᤛᤡᤱᤔᤠ ᤀᤠᤏᤡ᤹ ᤗᤠᤶᤗᤥᤒᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤔᤧᤏᤧᤖᤥ॥ ᤂᤧᤴ ᤐᤎᤢᤶ ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤈᤥ᤺ᤴᤍᤧᤒᤣ᥄ 20 “ᤁᤴ ᤐᤠ᤺ᤴᤏᤡᤴ ᤃᤠᤋᤀᤥ ᤔᤧᤈᤧᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤀᤛ᤻ᤁᤗᤥᤏᤒᤠ ᤔᤠᤖᤠᤶᤜᤠ᤹ᤀᤥ ᤁᤴ ᤐᤠ᤺ᤴᤏᤡᤴ ᤔᤧᤀᤡᤱᤛᤠᤶᤔᤡᤴᤏᤧ᤹ᤀᤥ. ᤁᤧᤀᤡᤱᤛᤢᤶᤏᤧᤓᤃᤪ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇ᤻ᤕᤠ ᤛᤠᤜᤠ᤹ ᤔᤧᤛ᤺ᤳᤗᤥ. ᤔᤣ᤺ᤴᤏᤧᤓᤃᤪ ᤜᤷᤍᤥ ᤔᤧᤴᤜᤧᤰᤁᤣᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇ᤻ᤕᤠ ᤛᤠᤜᤠ᤹ ᤔᤧᤀᤣ᤺ᤳᤗᤥ॥ 21 “ᤃᤡᤸᤒᤥᤒᤠ ᤁᤥ᤺ᤰᤔᤠᤛᤣ. ᤂᤡᤏᤡ᤹ ᤛᤶᤎᤠᤱ ᤜᤡ᤺ᤰᤘᤠ ᤀᤡᤃᤪ ᤘᤜᤡᤳ ᤔᤧᤎᤠᤏᤧᤴᤗᤖᤥ. ᤂᤡᤏᤡ᤹ᤀᤥ ᤁᤢᤈᤠᤀᤣ ᤔᤧᤎᤥ᤺ᤰᤏᤧᤸᤗᤖᤥ॥ ᤌᤣᤀᤠᤱᤓᤧᤸᤗᤧ ᤐᤎᤢᤶ ᤁᤧᤎᤢᤶᤒᤠᤸᤗᤧ ᤁᤢᤎᤣ᤺ᤰᤛᤡᤱᤔᤠ ᤁᤢᤄᤥᤴ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤀᤠᤱ ᤂᤠᤶᤒᤠᤱᤅᤥ ᤏᤧᤃᤴᤗᤥ. ᤛᤠᤘᤗᤖᤧ ᤁᤢᤎᤣ᤺ᤰᤛᤡᤱᤔᤠ ᤁᤢᤄᤥᤴ ᤏᤡ᤺ᤱᤃᤣ᤹ ᤔᤣ᤺ᤴᤏᤣ ᤔᤧᤸᤗᤧᤰᤔᤏᤠᤒᤠ ᤐᤥ᤺ᤰᤂᤧᤖᤥ॥ 22 ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ᤔᤧᤴ ᤔᤧᤴᤍᤡ᤺ᤱᤅᤣ. ᤁᤧᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ ᤔᤧᤴᤏᤧ᤺ᤰᤁᤣ ᤈᤥᤏᤠᤌᤠᤏᤖᤧ ᤁᤢᤍᤥ᤺ᤱ ᤏᤢ ᤁᤢᤗᤡᤴ ᤀᤠᤓᤧᤸᤗᤧᤀᤠᤱ ᤀᤣᤃᤠᤱ ᤔᤧᤏᤢ᤺ᤰᤂᤧᤴᤗᤥ ᤛᤠᤘᤗᤖᤧ ᤁᤢᤍᤠᤓᤣᤴ ᤔᤠᤰᤂᤡ᤹ ᤔᤧᤴᤇᤧᤀᤣ ᤁᤢᤛᤢ᤺ᤵᤐᤥ ᤔᤧᤗᤠᤛᤧᤴᤗᤥ॥ 23 “ᤛᤠᤘᤗ ᤏᤢ ᤈᤥᤏᤠᤌᤠᤏᤧᤴ ᤁᤢᤜᤡᤱᤘᤧᤳ ᤘᤕᤧᤛᤡᤸᤗᤧ ᤏᤢᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤘᤕᤧᤛᤡᤖᤥ॥ ᤂᤧᤱᤜᤠ᤹ ᤜᤡᤱᤔᤠ ᤏᤢ ᤛᤡᤔᤠᤀᤥᤀᤠᤱ ᤔᤧᤛᤧᤴᤍᤧᤛᤡᤴᤗᤥ॥ ᤂᤧᤱᤜᤠ᤹ ᤁᤰᤁᤑᤡ᤺ᤰᤔᤠᤏᤢ᤺ᤸᤗᤧᤀᤠᤱ ᤁᤧᤈᤠᤵᤐᤠ ᤘᤕᤧᤛᤡ. ᤂᤡᤖᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤁᤧᤎᤢᤶᤒᤠ ᤘᤕᤧᤛᤡᤖᤥ॥ 24 “ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤔᤧᤴᤇ᤻ᤕᤠᤛᤣ. ᤛᤠᤘᤗᤖᤧ ᤁᤢᤗᤠᤃᤡ ᤜᤠᤒᤠᤶᤔᤧ᤹ᤀᤥ॥ ᤂᤢᤏᤧ᤹ᤀᤣ ᤁᤢᤜᤧ᤺ᤳᤗᤠ ᤏᤢ ᤐᤏᤢᤏᤢᤒᤠ ᤆᤠᤱ ᤁᤧᤈᤠᤰᤋᤡᤖᤥ. ᤂᤡᤏᤡ᤹ ᤆᤠᤱᤜᤠ᤹ᤃ ᤛᤠᤶᤔᤩᤠᤱ ᤑᤢᤱᤜᤠ᤹ᤖᤧ ᤌᤥ᤹ᤖᤢᤖᤥ॥ 25 “ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤌᤱᤅᤥ ᤔᤧᤛᤩᤧᤒᤣ᥄ ᤂᤧᤱᤜᤠ᤹ᤃ ᤋᤧᤴᤎᤱᤅᤥ ᤔᤧᤛᤧᤖᤢᤛᤡᤖᤥ. ᤈᤥᤏᤠᤌᤠᤏᤧᤱᤃ ᤂᤡᤏᤡ᤹ ᤁᤥ᤺ᤰᤔᤠᤀᤥ ᤛᤩᤧᤀᤠᤱ ᤏᤧᤖᤥ॥ 26 “ᤈᤥᤏᤠᤌᤠᤏᤣ. ᤀᤠᤱᤃᤠ᤹ ᤀᤠᤴᤛᤠ᤹ᤀᤣ. ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤜᤠ᤺ᤵᤐᤠᤖᤥ॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤏᤢ᤹ᤒᤠ ᤏᤢ ᤐᤏᤢᤏᤢᤒᤠ ᤁᤧᤘᤕᤧᤖᤥ॥ ᤀᤠᤱᤃᤠ᤹ ᤀᤠᤗᤠᤃᤡ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤧᤴ ᤔᤧᤴᤇᤢᤔᤠᤖᤧ ᤗᤢᤱᤔᤠ᤹ ᤀᤠᤶᤜᤡ᤺ᤵᤐᤧᤴ ᤁᤧᤏᤠ᤺ᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤘᤕᤧᤖᤥ॥ 27 “ᤐᤎᤢᤶ ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤛᤩᤧᤒᤣ᥄ ᤌᤱ ᤆᤥ᤺ᤰᤔᤠ ᤑᤧᤈᤢᤶ ᤑᤧᤕᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤔᤧᤃᤧᤒᤣ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.