᥈ ᤛᤠᤵᤔᤢ᤺ᤴᤎᤢᤶ 5 - LIFOTNT

¹ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤢᤖᤢᤀᤠᤱ ᤂᤢᤏᤧ᤹ ᤐᤠᤏᤢᤍᤡᤱ ᤁᤢᤶᤒᤠ ᤍᤠᤀᤢᤍᤖᤧ ᤛᤣᤛᤣ ᤕᤠ᤺ᤶᤒᤰᤗᤧ ᤗᤠᤃᤡ ᤗᤠ᤺ᤳᤗᤠ᤺ᤳ ᤏᤧᤛ᤻ᤛᤢᤒᤠ ᤆᤡᤃᤰᤘᤠᤜᤠ᤹ ᤛᤠᤶᤔᤩᤠᤱ. ᤕᤢᤵᤐᤠ ᤜᤧᤰᤁᤩᤠᤱ ᤁᤧᤖᤧᤰ ᤛᤠᤔᤠᤐᤢᤔᤠᤜᤠ᤹ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥ ᤕᤢᤰᤂᤢᤖᤥ॥

ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤠᤱᤜᤡᤶᤔᤥ ᤔᤧᤍᤠᤖᤢ᤹

² ᤂᤧᤴ ᤀᤣᤃᤠᤱ ᤛᤥᤗᤥᤔᤏᤖᤧ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤌᤠ᤺ᤰᤌᤠ᤺ᤰᤁᤥᤒᤠ ᤁᤧᤖᤧᤰ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ᤀᤥᤒᤠ ᤗᤠᤶᤗᤥᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤍᤥᤰᤁᤧᤴ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤛᤡᤕᤥᤏᤗᤠᤶ ᤑᤧᤵᤔᤠ ᤑᤠ᤹ᤀᤠᤱ ᤕᤖᤢᤛᤗᤧ᤺ᤶᤔᤥ ᤆᤢᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ॥

³ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢᤛᤡᤃᤣᤰᤐᤠ ᤗᤠᤀᤥᤒᤠ ᤋᤱᤏᤠᤶᤔᤥᤒᤠ ᤕᤧᤶᤔᤥ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤈᤢᤵᤛᤧ॥

⁴ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤧᤍᤩᤧ ᤔᤧᤈᤢᤖᤧᤀᤠᤱ. ᤗᤧᤒᤡᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤓᤥ᤺ᤰᤂᤢ.

⁵ ᤜᤧᤰᤁᤩᤠᤱ ᤛᤴᤍᤥᤰᤁᤡᤴ ᤏᤢ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤂᤧᤒᤩᤠᤱ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤛᤣᤛᤣ ᤛᤠᤔᤠᤐᤢᤔᤠᤜᤠ᤹ ᤔᤧᤓᤥᤰᤂᤢᤀᤠᤱ ᤌᤠ᤺ᤱ ᤔᤧᤕᤢᤰᤂᤢ॥ ᤏᤡᤱᤘᤠ᤹ᤑᤢᤛᤠᤶᤒᤠ ᤗᤧᤒᤡᤜᤠ᤹ᤖᤧ ᤂᤧᤴ ᤔᤧᤒᤰᤂᤢᤀᤠᤱ ᤌᤠ᤺ᤱ ᤔᤧᤍᤣ᤹ᤖᤢ॥

⁶ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤏᤢ ᤂᤢᤏᤧ᤹ ᤁᤢᤍᤃᤡ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡ᤺ᤵᤔᤧᤴᤍᤧᤳ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤸᤗᤢᤰᤜᤠ᤹ ᤏᤢ ᤛᤧᤃᤶᤒᤠ ᤐᤡᤳᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡᤖ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤔᤧᤘᤕᤧ॥

⁷ ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤠᤱᤜᤡᤶᤔᤥᤒᤠ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤜᤠᤒᤠ ᤛᤴᤍᤥᤰᤁᤡᤸᤗᤧᤀᤣ ᤁᤢᤕᤢᤰᤏᤠᤀᤥ ᤔᤧᤓᤧᤳᤋᤢᤀᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤛᤡᤃᤠᤱ ᤔᤧᤕᤢᤰᤂᤢ॥

⁸ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤔᤠᤱᤜᤢᤵ ᤛᤴᤍᤥᤰ ᤔᤧᤕᤢᤰᤂᤢᤒᤠ ᤋᤧᤴᤏᤡᤸᤗᤧ ᤁᤢᤛᤶᤎᤠᤱ ᤜᤵᤑᤧ ᤗ᤹ᤖᤧᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤗᤠᤵᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤏᤢ ᤁᤢᤒᤱᤔᤠ ᤋᤰᤗᤠᤱᤜᤠ᤹ ᤛᤢ᤺ᤵᤋᤢᤀᤠᤱ ᤐᤳᤇᤧ॥

⁹ ᤋᤰᤗᤠᤱᤜᤠ᤹ᤖᤧ ᤁᤢᤛᤶᤜᤠ᤹ ᤛᤡᤃᤠᤱᤒᤠ ᤛᤣᤛᤣᤒᤠᤍᤧᤴᤏᤥᤗᤠᤶ ᤏᤡᤔᤠ ᤛᤢᤰᤋᤧᤳᤋᤧᤖ ᤌᤠᤖᤡᤰ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤣ᤺ᤴᤍᤧᤖ ᤗ᤺ᤴᤍᤧᤀᤠᤱ ᤐᤳᤇᤧ. ᤁᤖ ᤛᤣᤛᤣᤒᤠᤍᤧᤴᤏᤥᤒᤠ ᤗᤠ᤺ᤰᤁᤠᤳᤗᤠᤶᤒᤠ ᤏᤡᤔᤠ ᤛᤢᤰᤔᤧᤍᤧᤳᤋᤧᤴ॥ ᤂᤧᤱᤜᤠ᤹ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤵᤔᤥᤀᤣ ᤐᤳ॥

¹⁰ ᤂᤧᤴ ᤔᤠᤱᤜᤢᤵ ᤛᤴᤍᤥᤰᤁᤥ ᤘᤣ᤹ ᤌᤣᤀᤠᤱ ᤔᤧᤕᤠᤃᤧᤴ. ᤔᤥᤛᤠ᤺ᤸᤗᤧ ᤜᤥᤖᤣᤒ ᤁᤥ᤺ᤰᤔᤠᤀᤥ ᤔᤠᤱᤜᤢᤵ ᤛᤴᤍᤥᤰᤁᤥ ᤁᤣ᤺ᤳᤋᤢᤀᤠᤱ ᤕᤠᤃᤧᤒᤠ ᤏᤧᤳᤇᤡ ᤛᤠᤵᤗᤢᤱᤜᤠ᤹ᤖᤰ ᤕᤠᤃᤧ. ᤂᤧᤱᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧᤖᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱ

¹¹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣᤛᤣᤍᤧᤴᤏᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤔᤧᤓᤧᤖᤧ॥ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤢᤗᤢᤵ ᤁᤢᤗᤢᤵ ᤔᤧᤴᤈᤥ᤺ᤰᤛᤡᤱᤅᤣ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤣᤛᤣ ᤔᤧᤈᤥ᤺ᤰᤛᤡᤱᤅᤠᤱ ᤘᤕᤧ॥

¹² ᤁᤧᤖᤧᤰ ᤛᤠᤶᤗᤥ ᤁᤧᤗ᤺ᤵᤐᤠ ᤗᤧᤒᤡᤜᤠ᤹—ᤀᤠᤛᤠᤐ. ᤜᤣᤔᤠᤏ ᤏᤢ ᤕᤍᤢᤋᤢᤏ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤏᤢ ᤁᤠ᤹ᤀᤡᤜᤠ᤹ ᤛᤥᤛᤥᤖᤡᤰ ᤐᤠᤖᤠᤴᤗᤠ ᤆᤠ᤺ᤶᤒᤠ ᤆᤠᤱ ᤔᤧᤈᤠᤰᤂᤢᤀᤠᤱ ᤛᤠᤵᤑᤱᤃᤠ. ᤀᤴᤔᤣ ᤏᤢ ᤋᤢᤱᤏᤠᤜᤠ᤹ ᤔᤧᤕᤠᤱᤛᤡᤱ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤏᤠᤱᤃᤧᤴ ᤗᤧᤵᤔᤠᤱ ᤔᤧᤕᤧᤶᤛᤡᤱ॥ ᤂᤧᤒᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ॥

¹³ ᤛᤠᤍᤠᤱ ᤁᤧᤔᤢ᤺ᤵᤐᤠᤜᤠ᤹ ᤏᤢ ᤛᤠᤶᤗᤥ ᤁᤧᤗ᤺ᤵᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤏᤠᤖᤠ ᤑᤥᤔᤠ ᤏᤢ ᤏᤢᤃᤧᤴ ᤐᤡᤔᤠᤖᤧ ᤗᤠᤃᤡ ᤗᤳᤇᤠ ᤀᤡᤰᤗᤠ ᤔᤧᤗ᤺ᤳᤋᤢ॥ ᤜᤧᤰᤁᤩᤠᤱ ᤛᤠᤍᤠᤱᤜᤠ᤹. ᤛᤠᤵᤑᤱᤃᤠᤜᤠ᤹ ᤏᤢ ᤘᤣ᤹ ᤔᤢᤰᤗᤠᤜᤠ᤹ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤧᤴ ᤁᤢᤏᤠᤖᤠ ᤑᤥᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤛᤠᤶᤗᤥ ᤀᤡᤰᤗᤠ ᤔᤧᤗ᤺ᤳᤋᤢᤖᤥ “ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥” ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤂᤠ᤹ᤔᤡ᤺ᤳᤋᤧᤸᤗᤧ ᤋᤡᤶᤛᤧ॥

¹⁴ ᤜᤧᤰᤁᤩᤠᤱ ᤂᤠ᤹ᤔᤡ᤺ᤳᤋᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤠᤱᤛᤧᤘᤠ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤋᤡᤶᤛᤧᤖᤥ॥