᥈ ᤛᤠᤵᤔᤢ᤺ᤴᤎᤢᤶ 13 - LIFOTNT

ᤀᤒᤡᤕᤠᤴ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤋᤧᤴᤎᤱ

¹ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤀᤒᤡᤕᤠᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ॥

² ᤀᤒᤡᤕᤠ᤺ᤸᤗᤧ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤛᤢᤶᤛᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤔᤠᤁᤠ ᤘᤕᤧ. ᤂᤢᤏᤧ᤹ ᤃᤡᤒᤠᤒᤠ ᤀᤢᤖᤡᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ ᤀᤒᤡᤕᤠᤴ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤶᤓᤠ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥

³ ᤀᤒᤡᤕᤠ᤺ᤸᤗᤧ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᥊.᥆᥆.᥆᥆᥆ ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠᤜᤠ᤹ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤠᤖᤥᤒᤠᤔᤖᤧ ᥎.᥆᥆.᥆᥆᥆ ᤌᤰᤗᤡᤜᤠᤱᤜᤠ᤹ᤖᤧᤴ ᤋᤢᤖᤠ ᤕᤠᤖᤡᤵ ᤆᤥᤃᤢᤛᤡ॥

⁴ ᤀᤒᤡᤕᤠᤴ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤛᤔᤠᤖᤤᤔ ᤁᤥ᤺ᤰᤔᤠᤀᤥ ᤕᤧᤶᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ. “ᤕᤠᤖᤥᤒᤠᤔ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹᥄

⁵ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤓᤧᤸᤗᤧᤀᤠᤱ ᤆᤰᤔᤧᤸᤗ᤹ᤔᤏᤠᤒᤠ ᤔᤠᤱᤜᤢᤵᤗᤠᤶ ᤛᤍᤠᤍᤡᤱᤗᤧ ᤗᤠᤃᤡ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤀᤡᤛᤪᤠᤀᤡᤗᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠᤱᤈᤢᤶᤔᤡᤴ ᤐᤡᤖᤢᤛᤡᤒᤠ ᤑᤠ᤹ᤀᤠᤱ ᤌᤣ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅

⁶ ᤜᤶᤓᤛᤠᤱ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤖᤧ ᤁᤢᤛᤢᤜᤠᤱᤕᤢᤰᤐᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤂᤢᤏᤧ᤹ ᤁᤢᤴᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧ॥

⁷ ᤁᤢᤓᤠ ᤌᤣᤏᤠᤎᤣ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤖᤜᤒᤠᤔᤧᤴ ᤛᤣ᤺ᤵᤑᤠ ᤁᤧᤘᤠ᤹ᤒᤠ ᤏᤢ ᤌᤣᤀᤠᤱ ᤔᤧᤴᤍᤢᤶᤔᤣ ᤔᤧᤴᤏᤡᤀᤣ ᤁᤧᤘᤠ᤹ᤒᤠ ᤔᤧᤏᤡᤛᤢ ᤜᤧᤰᤁᤩᤠᤱ ᤜᤠᤍᤡᤱ ᤌᤰᤏᤢ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤧᤒᤥᤃᤧ॥ ᤂᤧᤴ ᤕᤧᤶᤔᤥ ᤖᤜᤒᤠᤔᤧᤴ ᤂᤧᤱᤜᤠ᤹ ᤀᤵᤔᤠᤛᤡ ᤁᤧᤛᤢᤰᤐᤠ ᤔᤧᤈᤥᤃᤧᤴ॥

⁸ “ᤀᤠᤸᤗ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤏᤧᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ᤹॥ ᤂᤡᤏᤡ᤹ ᤛᤧᤰᤂᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠ ᤁᤧᤘᤕᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤕᤠᤖᤥᤒᤠᤔᤖᤧ ᤆᤥᤃᤢᤒᤠ ᤁᤴ ᤛᤠᤶᤔᤩᤠᤱ ᤐᤡᤳᤛᤠᤳᤜᤠ᤹ ᤂᤡᤏᤡ᤹ ᤁᤧᤃᤳᤋᤢᤶᤛᤡᤶ᤹॥

⁹ ᤁᤖ ᤌᤣ ᤜᤠᤖᤢᤏᤧᤸᤗᤧ ᤁᤢᤎᤠ᤺ᤰᤁᤥᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤂᤡᤏᤡ᤹ ᤁᤧᤗ᤺ᤳᤋᤢᤶ ᤁᤧᤍᤣᤛᤢᤶᤛᤡᤶᤔᤠᤱ ᤘᤣ᤹ ᤗᤠᤈᤣ᤹ᤒᤠ ᤌᤡᤶ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤢᤰᤋᤡᤱ ᤁᤧᤈᤥᤃᤢᤶᤛᤡᤶᤔᤠᤱ ᤔᤧᤴᤘᤠ᤹ᤏᤧᤶᤒᤡ᥅ ᤁᤢᤓᤠ ᤔᤏᤠᤎᤡᤰ ᤂᤢᤏᤧ᤹ ᤋᤥ᤺ᤴᤇᤡᤱᤔᤠᤖᤧ ᤗᤠᤃᤡ ᤐᤡᤳᤛᤠᤳ ᤌᤡᤰ ᤏᤢ ᤏᤢᤛᤡ ᤌᤢ᤺ᤶᤒᤠᤜᤠ᤹ ᤋᤠᤖᤢᤛᤡᤀᤠᤱ ᤋᤠ᤺ᤸᤗᤧ ᤌᤣ ᤂᤧᤴ ᤔᤠᤱ ᤔᤣ᤺ᤶᤒᤠᤴ ᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤍᤠ᤺ᤰᤋᤢᤶᤒᤡ᥅

¹⁰ “ᤁᤖ ᤀᤠᤏᤡᤃᤣ ᤗᤠᤃᤡᤃ ᤕᤜᤘᤣ ᤍᤠᤱᤒᤧᤴᤏᤣ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤗᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤢᤏᤧ᤹ ᤔᤧᤸᤗᤧᤳᤋᤣ ᤘᤕᤡᤃᤧ॥ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤜᤠᤖᤢᤏᤖᤧ ᤁᤢᤛ᤻ᤛᤠᤜᤠ᤹ᤖᤥ. ᤂᤧᤒᤩᤠᤱ ᤗᤧᤒᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡ᤹॥

¹¹ ᤂᤧᤱᤜᤠ᤹ᤖᤧ ᤋᤠᤏᤠᤶ ᤏᤢ ᤕᤢ᤺ᤴᤎᤥ ᤌᤰᤔᤠ ᤛᤡᤍᤢᤱᤈᤓᤠᤜᤠ᤹ ᤜᤧᤰᤁᤩᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤧᤍᤥᤴᤍᤢ᤹॥ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠᤀᤥᤒᤠ ᤂᤖᤧ᤺ᤱᤅᤡᤴ ᤌᤡᤶ ᤁᤢᤀᤡᤛᤡᤰ ᤛᤣᤛᤣ ᤆᤥ᤺ᤰᤔᤏᤠᤒᤠ ᤆᤵᤋᤧᤴᤏᤥ ᤁᤢᤍᤡ᤺ᤰᤗᤠ ᤁᤢᤍᤡ᤺ᤰᤗᤠ ᤔᤧᤒᤧᤴᤇᤢ ᤔᤧᤏᤧᤛ᤻ᤛᤢ᤹॥ ᤂᤧᤱᤜᤠ᤹ᤖᤧ ᤕᤢ᤺ᤴᤇᤡᤰ ᤌᤰᤔᤠ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤏᤥ ᤁᤧᤕᤢᤱᤒᤠ ᤛᤣᤔᤡᤜᤠ᤹ ᤔᤧᤜᤠ᤺ᤴᤍᤢ᤹॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤡᤃᤧᤒᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤀᤡ᤺ᤳᤋᤢᤶᤒᤧ ᤆᤥᤃᤢᤶᤒᤧ॥ ᤁᤖ ᤂᤡᤏᤡ᤹ᤃ ᤂᤢᤏᤧ᤹ ᤁᤧᤗᤧᤖᤢᤶ ᤁᤧᤍᤣᤛᤢᤶᤔᤠᤱ ᤁᤧᤘᤕᤡ᤹॥

¹² ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤗᤠᤶᤗᤥᤒᤠ ᤐᤥ᤺ᤰᤂᤧᤀᤠᤱ ᤀᤠᤏᤡᤃᤧᤏᤢ ᤘᤠ᤹॥ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱ ᤀᤡᤰᤗᤠ ᤔᤡᤰᤛᤣᤴ ᤐᤡᤔᤠᤖᤧ ᤗᤠᤃᤡ ᤛᤠᤍᤠᤱᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤧᤕᤧᤶᤛᤡᤱ᤹॥ ᤀᤡᤛᤪᤠᤀᤡᤗᤡᤛᤣ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤔᤧᤴᤈᤥ᤺ᤰᤁᤠᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤢᤛᤠᤱ ᤁᤧᤸᤗᤛᤢᤶᤔᤡᤴ᤹᥄”

¹³ ᤕᤠᤖᤥᤒᤠᤔᤖᤧ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤀᤥᤒᤠ ᤁᤢᤗᤢᤵ ᤌᤡᤰ ᤀᤣᤃᤠᤱ ᤗᤧᤵᤔᤠᤱ ᤐᤣ᤺ᤰᤔᤠᤀᤠᤱ ᤛᤢᤰᤔᤠᤛᤡᤀᤠᤱ ᤕᤢᤱᤔᤠᤖᤧ ᤗᤠᤃᤡ ᤐᤠᤱᤄᤢᤛᤡᤀᤠᤱ ᤔᤧᤘᤕᤧ. ᤜᤧᤰᤁᤣᤗ᤹ᤖᤡᤰ ᤀᤣᤃᤠᤱ ᤗᤧᤵᤔᤠᤱᤗᤠᤶ ᤔᤧᤛᤢᤃᤢᤛᤡᤸᤗᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤌᤰᤛᤢᤒᤠᤜᤠ᤹ᤖᤧ ᤕᤜᤢᤍᤠᤴ ᤋᤃᤠᤱᤗᤠᤶ ᤆᤡᤓᤳ ᤔᤧᤓᤳᤋᤢ॥

¹⁴ ᤀᤠᤸᤗ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤜᤡᤛᤡᤱᤅᤠᤱ ᤀᤥᤔᤧᤔᤕᤧᤸᤗᤧ ᤂᤢᤴᤇᤡ᤹ ᤋᤃᤠᤱ ᤏᤢ ᤀᤣᤃᤠᤱ ᤏᤧᤵᤔᤠᤱ ᤐᤡᤛᤠᤱ ᤌᤱᤅᤥ ᤔᤧᤓᤢᤳᤋᤢᤛᤡᤒᤠ ᤔᤧᤏᤡᤛᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤢᤓᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤠᤍᤠᤱᤜᤠ᤹ ᤔᤧᤔᤧᤳᤋᤢ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤓᤡ᤺ᤰᤋᤧᤀᤠᤱ ᤔᤧᤀ᤺ᤰᤋᤧ॥

¹⁵ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤈᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤡᤕᤠᤴ ᤏᤢ ᤕᤜᤢᤍᤠ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤕᤠᤖᤥᤒᤠᤔᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤜᤠᤖᤡᤈᤠ᤺ᤳᤋᤢᤛᤡ॥

¹⁶ ᤀᤡᤛᤪᤠᤀᤡᤗᤡᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤄᤧᤳᤇᤡᤱ ᤔᤧᤄᤧᤖᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥

¹⁷ ᤁᤶᤓᤗ᤹ᤖᤡᤰ ᤀᤒᤡᤕᤠᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰᤁᤠᤱ ᤔᤧᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᥋.᥆᥆.᥆᥆᥆ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱᤜᤠ᤹ ᤌᤱᤅᤥ ᤔᤧᤛᤩᤧᤖᤢᤛᤡ॥

¹⁸ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤡᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠ ᤛᤢᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤠ᤺ᤰᤐᤥ ᤔᤧᤈᤥᤃᤢᤀᤠᤱ ᤘᤕᤧ॥

¹⁹ ᤀᤒᤡᤕᤠ᤺ᤸᤗᤧ ᤕᤠᤖᤥᤒᤠᤔᤧᤴ ᤏᤠ᤺ᤳᤋᤢᤍᤣᤛᤢ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤒᤣᤌᤣᤗ. ᤕᤣᤛᤏᤠ ᤂᤧᤒᤩᤠᤱ ᤀᤣᤐᤪᤥᤏᤒᤠ ᤕᤧᤰᤕᤰᤜᤠ᤹ᤏᤢ ᤛᤥᤛᤥᤖᤡᤰ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤠᤱ ᤀᤒᤡᤕᤠ᤺ᤸᤗᤧ ᤜᤢᤰᤁᤠᤵ ᤆᤥᤃᤢ॥

²⁰ ᤀᤒᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤕᤠᤖᤥᤒᤠᤔᤧᤸᤗᤧ ᤂᤢᤏᤧ᤹ ᤁᤢᤔᤢᤰᤁᤧᤴ ᤕᤠᤶᤔᤥ ᤂᤥᤔᤠ ᤔᤧᤛᤢᤰᤋᤢᤴ॥ ᤐᤡᤵᤔᤡᤖᤡ ᤁᤢᤛᤥ᤺ᤴᤍᤡᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤌᤡᤱᤄᤢ. ᤜᤧᤰᤁᤩᤠᤱ ᤂᤧᤴ ᤛᤩᤧ॥

²¹ ᤁᤖ ᤀᤒᤡᤕᤠᤴ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤌᤡᤒᤥᤱᤅᤠᤱ ᤗᤡᤛᤡ ᤔᤣ᤺ᤳᤜᤠ᤹ ᤋᤠᤖᤢᤛᤡᤀᤠᤱ ᤂᤢᤏᤧ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤕᤧᤶᤒᤡᤳᤇᤠ ᤏᤢ ᤌᤡᤒᤥᤱ ᤋᤢᤰᤛᤡ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ ᤐᤥ᤺ᤰᤂᤧ॥

²² ᤀᤒᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰ ᤐᤠ᤺ᤴᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤡᤍ᤻ᤍᤥᤖᤧ ᤁᤢᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ॥