᥈ ᤛᤠᤵᤔᤢ᤺ᤴᤎᤢᤶ 1 - LIFOTNT

ᤛᤥᤗᤥᤔᤏᤖᤧ ᤛᤡᤰᤁᤢᤶᤏᤡᤱᤘᤠ᤹ ᤏᤠ᤺ᤰᤋᤢ᤹

¹ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤜᤠᤱᤈᤢᤶᤔᤥ ᤕᤢᤰᤁᤡᤴ ᤁᤧᤎᤢᤶᤒᤠ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤛᤥᤖᤡᤰ ᤘᤕᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤕᤶᤒᤠ ᤆᤥᤃᤢ॥

² ᤂᤧᤒᤩᤠᤱ ᤛᤥᤗᤥᤔᤏᤧᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤋᤠ᤹ᤈᤧᤰᤂᤧ—ᤜᤧᤴᤇᤡᤱ ᤜᤧᤴᤇᤡᤱᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤁᤡᤵ ᤌᤡᤰ ᤁᤡᤵ ᤌᤡᤰᤁᤥᤒᤠ ᤗᤠᤶᤗᤥᤒᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤜᤡᤶᤛᤕᤱ ᤜᤡᤶᤛᤕᤱᤅᤥᤒᤠ ᤗᤠᤶᤗᤥᤒᤠᤜᤠ᤹ᤏᤢ ᤋᤠ᤹ᤈᤧᤰᤂᤧ॥

³ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤃᤡᤒᤥᤏᤀᤥ ᤁᤧᤏᤧᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴᤏᤥ ᤔᤧᤒᤣ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤆᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤜᤠᤒᤠ ᤂᤧᤵᤔᤥ ᤏᤧᤛ᤻ᤛᤧ॥

⁴ ᤀᤠᤸᤗ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤁᤡᤷᤕᤋ-ᤕᤠᤖᤡᤔᤗᤠᤶ ᤂᤢᤏᤧ᤹ ᤂᤧᤸᤗᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤒᤠᤍᤧᤴᤏᤥ ᤌᤠᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥᤀᤣ ᤂᤧᤸᤗᤧ ᤗᤠᤃᤡ ᤛᤠ᤺ᤱᤃᤠᤜᤡᤶ ᤂᤡᤱᤄᤢᤀᤠᤱ ᤐᤳᤇᤧ॥

⁵ ᤁᤖ ᤜᤢᤖᤖᤧ ᤁᤢᤶᤔᤧᤴᤇᤠ᤹. ᤀᤢᤖᤡᤖᤧ ᤁᤢᤛ᤻ᤛᤠ ᤒᤈᤗᤧᤗᤖᤧ ᤆᤥᤃᤢᤒᤠ ᤁᤠᤛᤠᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤃᤡᤒᤥᤏᤀᤥᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴ ᤋᤃᤡ ᤕᤢᤅᤧ॥ ᤁᤸᤗᤧᤆᤥᤃᤢᤸᤗᤧ ᤛᤥᤗᤥᤔᤏ ᤏᤢ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤕᤜᤘᤣ ᤍᤠᤱᤒᤧᤴ ᤛᤧᤘᤠ ᤔᤧᤳᤇᤧ ᤀᤠᤶᤓᤠ ᤂᤧᤵᤔᤥ ᤔᤧᤒᤣ॥

⁶ ᤂᤧᤵᤔᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤁᤠᤛᤠᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤌᤠᤖᤡᤰ ᤛᤥᤗᤥᤔᤏᤧᤴ ᤐᤣᤀᤠᤱ ᤜᤧᤴᤇᤡᤱ ᤌᤡᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥

⁷ ᤂᤧᤴ ᤛᤧᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤥᤗᤥᤔᤏᤀᤥ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤛᤥᤗᤥᤔᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤌᤧᤔᤠ ᤐᤡᤏᤧᤒᤠᤒᤣ᥅ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥”

⁸ ᤛᤥᤗᤥᤔᤏᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤍᤠᤀᤢᤍᤧᤴ ᤐᤕᤶ ᤕᤶᤒᤠ ᤁᤧᤈᤥᤃᤢᤀᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢ. ᤂᤶᤓᤩᤠᤱ ᤂᤢᤏᤧ᤹ ᤁᤢᤗᤧᤰᤘᤠᤀᤥ ᤀᤠᤱᤃᤠ᤹ ᤜᤠᤱ ᤁᤧᤈᤥᤃᤠᤱᤅᤠᤱ ᤘᤠ᤹॥

⁹ ᤀᤠᤸᤗ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤍᤠᤀᤢᤍᤧᤴ ᤁᤧᤔᤧᤳᤋᤢᤒᤠ ᤀᤠᤍᤠᤱᤒᤠᤖᤧ ᤁᤧᤔᤠᤱᤜᤢᤵᤐᤡᤴ ᤛᤧᤰᤂᤠ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤶᤜᤡ᤺ᤰ ᤕᤠᤖᤡᤰ ᤕᤖᤡᤰ ᤏᤡ᤺ᤵᤔᤧᤴᤍᤧᤳ ᤔᤏᤠᤜᤠ᤹ᤀᤥ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤜᤠᤱ ᤁᤧᤈᤥᤃᤠᤱᤅᤠᤱ ᤘᤠ᤹ᤀᤠ॥

¹⁰ ᤀᤠᤸᤗ ᤁᤴ ᤔᤏᤠᤜᤠ᤹ ᤗᤠᤶᤗᤥᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤛᤡᤰᤁᤢᤶᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤐᤡᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤁᤴ ᤕᤠᤖᤡᤰ ᤁᤧᤔᤏᤠᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠ ᤜᤠ᤺ᤳᤗᤧ ᤛᤢᤰᤋᤢᤀᤠᤱᤒᤣ᥅”

¹¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤥᤗᤥᤔᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤜᤠᤒᤠ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹ ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣ. ᤗᤠᤈᤣ᤹ᤛᤡᤱᤒᤢᤱ. ᤔᤡᤱᤛᤥ ᤀᤡᤱᤎᤠᤱ ᤁᤧᤴᤏᤠ᤺ᤰᤋᤢᤴ ᤜᤧᤰᤁᤩᤠᤱ ᤁᤧᤏᤡᤱᤔᤡᤜᤠ᤹ ᤛᤧᤵᤔᤠᤛᤡᤀᤠᤱ ᤂᤧᤏᤧ᤹ ᤁᤧᤗᤠᤃᤡ ᤀᤡᤖᤡᤰ ᤜᤡᤱᤔᤠ ᤌᤠ᤺ᤰ ᤁᤧᤴᤏᤠ᤺ᤰᤋᤢᤴ ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤜᤠᤱ ᤆᤥ᤺ᤰᤏᤧᤒᤠ ᤁᤴ ᤔᤏᤠᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠ ᤛᤡᤰᤁᤢᤶᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤠᤸᤗᤧ ᤆᤥᤃᤢᤸᤗᤧ.

¹² ᤂᤧᤏᤧ᤹ ᤛᤡᤰᤁᤢᤶᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤁᤧᤄᤥᤛᤢ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤀᤰᤋᤱᤒᤠ ᤕᤠᤱᤛᤠᤁᤢᤴᤎᤣ. ᤗᤠᤈᤣ᤹ᤛᤡᤱᤒᤢᤱ ᤏᤢ ᤔᤡᤱᤛᤥ ᤀᤡᤱᤎᤠᤱᤅᤠᤱ ᤐᤡᤏᤧᤖᤥ. ᤂᤧᤱᤃ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡᤒᤠ ᤀᤠᤳᤋᤡᤴ ᤜᤠᤱᤅᤡᤸᤗᤧᤀᤠᤱ ᤔᤧᤱᤄᤥᤀᤣ ᤘᤕᤧ. ᤜᤧᤰᤁᤩᤠᤱ ᤀᤣᤃᤠᤱᤒᤠ ᤜᤠᤱᤅᤡᤸᤗᤧᤀᤠᤱ ᤔᤧᤄᤥᤛᤢᤴᤗᤥ॥”

¹³ ᤂᤧᤒᤩᤠᤱ ᤛᤥᤗᤥᤔᤏᤧᤴ ᤃᤡᤒᤥᤏᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴᤏᤥᤏᤢ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤕᤖᤢᤛᤗᤧ᤺ᤶᤔᤥ ᤏᤢ᤺ᤰᤂᤧ ᤌᤠᤅᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥

¹⁴ ᤛᤥᤗᤥᤔᤏᤖᤧ ᤕᤖᤡᤰ ᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ ᤑᤢᤰᤂᤢᤛᤡ॥ ᤂᤢᤏᤧ᤹ ᥇.᥊᥆᥆ ᤀᤴᤗᤠᤎᤠᤜᤠ᤹ ᤏᤢ ᥇᥈.᥆᥆᥆ ᤀᤴᤜᤠ᤹ ᤁᤳᤋᤢᤛᤡ॥ ᤁᤢᤓᤠ ᤂᤢᤏᤧ᤹ ᤀᤴᤗᤠᤎᤠ ᤕᤧᤶᤔᤠ ᤕᤧᤰᤕᤰᤜᤠ᤹ᤀᤥ ᤏᤢ ᤁᤢᤓᤠᤃ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤕᤖᤢᤛᤗᤧ᤺ᤶᤔᤥ ᤕᤧᤵᤛᤢᤛᤡ॥

¹⁵ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤥ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤗᤢᤱ ᤕᤠᤖᤡᤰ ᤕᤖᤡᤰ ᤏᤢ ᤛᤠᤶᤔᤠᤱᤛᤡᤱᤜᤠ᤹ ᤀᤢ᤺ᤰᤆᤶᤈᤶᤒᤠᤍᤧᤴᤜᤠ᤹ᤀᤥᤒᤠ ᤐ᤺ᤳᤇᤣ᤹ᤜᤠ᤹ ᤕᤖᤡᤰ ᤘᤧᤳᤋᤧᤛᤖᤧ ᤘᤕᤧᤖ ᤆᤥᤃᤢ॥

¹⁶ ᤛᤥᤗᤥᤔᤏᤖᤧ ᤁᤢᤀᤴᤜᤠ᤹ ᤔᤡᤛᤪ ᤗᤠᤈᤣ᤹ ᤏᤢ ᤁᤩᤢᤀᤣᤗᤠᤶ ᤔᤧᤗ᤺ᤳᤋᤢ ᤔᤧᤎᤠᤰᤋᤢᤛᤡ॥ ᤜᤠᤱᤅᤡᤸᤗᤧ ᤁᤢᤗᤧᤱᤜᤱᤒᤠᤜᤠ᤹ᤖᤧ ᤂᤧᤱᤜᤠ᤹ ᤁᤩᤢᤀᤣᤗᤠᤶ ᤔᤧᤀᤡᤅᤢ ᤔᤧᤍᤠᤖᤢᤛᤡ॥

¹⁷ ᤀᤴᤗᤠᤎᤠ ᤌᤡᤰᤗᤧ ᥌᥆᥆ ᤛᤣᤁᤣᤗ ᤕᤢᤵᤐᤠ ᤏᤢ ᤀᤴ ᤌᤡᤰᤗᤧ ᥇᥋᥆ ᤛᤣᤁᤣᤗ ᤕᤢᤵᤐᤠᤀᤥ ᤔᤡᤛᤪᤗᤠᤶ ᤔᤧᤗ᤺ᤳᤋᤢ ᤔᤧᤎᤠᤰᤋᤢᤛᤡ॥ ᤜᤠᤶᤓᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤜᤡᤳᤋᤡ ᤏᤢ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤠᤱᤜᤠ᤹ᤖᤧ ᤗᤠᤃᤡᤀᤠᤱ ᤗ᤺ᤵᤔᤠ ᤌᤠᤰᤔᤠᤛᤡ ᤕᤠ᤺ᤶᤒᤰ ᤔᤧᤄᤥᤛᤢᤀᤠᤱ ᤘᤕᤧᤖᤥ॥