᥇ ᤌᤡᤛ᤻ᤛᤗᤥᤏᤡᤁᤡ 1 - LIFOTNT

¹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤌᤡᤛ᤻ᤛᤗᤥᤏᤡᤁᤠ ᤕᤧᤰᤕᤰᤛᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤕᤠᤵᤔᤡᤜᤠ᤹ᤀᤥ. ᤀᤡᤱᤃᤠ᤹ ᤐᤠᤘᤗ. ᤛᤡᤗᤠᤛ ᤏᤢ ᤋᤡᤔᤥᤌᤡᤗᤠᤶᤒᤠ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤛᤏᤠᤖᤢᤱ ᤏᤢ ᤗᤢᤱᤃᤢᤶ ᤁᤧᤄᤥᤛᤢᤶᤗᤖᤥ॥

ᤌᤡᤛ᤻ᤛᤗᤥᤏᤡᤁᤡᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤒᤠᤀᤥ ᤏᤥᤃᤧᤴ

² ᤀᤠᤏᤡᤃᤣ ᤋᤢᤘᤠᤀᤥ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤠᤛᤡᤃᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤗᤠᤃᤡ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤢᤶᤒᤧ᤹ᤖᤥ॥

³ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤏᤛᤠ᤺ᤴᤗᤠᤶᤒᤠ ᤁᤧᤈᤥᤃᤢᤶᤒᤠ ᤂᤡᤏᤡ᤹ ᤕᤠ᤺ᤶᤒᤰᤁᤡᤴ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤔᤠᤱ ᤛᤩᤠᤱᤔᤧᤴᤍᤠᤱ ᤁᤧᤈᤥᤃᤢᤶᤒᤠᤴ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤕᤠᤶᤔᤥ ᤁᤢᤏᤢ᤺ᤱᤔᤠ ᤕᤢᤔᤠ ᤏᤡᤱᤛᤠᤱᤗᤠᤶ ᤁᤧᤍᤠᤒᤠ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤴ ᤀᤠᤏᤡᤃᤣ ᤆᤰᤔᤧᤸᤗ᤹ᤀᤣ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥

⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤠᤒᤠᤅᤣ ᤁᤢᤔᤏᤠ ᤐᤥᤱᤛᤧ ᤁᤧᤛᤣᤃᤡᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤏᤡᤛᤢᤶᤒᤧᤖᤥ॥

⁵ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤋᤠᤖᤢᤶᤒᤧᤸᤗᤧ ᤐᤠ᤺ᤴᤏᤥᤖᤰ ᤔᤧᤘᤕᤧᤴ. ᤁᤖ ᤔᤢᤰᤛᤠᤶᤔᤥ ᤘᤕᤧᤖᤥ॥ ᤜᤧᤰᤁᤩᤠᤱ ᤁᤱᤃ ᤛᤣᤛᤣᤔᤠᤱᤗᤠᤶ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤛᤔᤠ ᤘᤕᤧ ᤑᤠ᤹ᤀᤠᤱ ᤁᤧᤏᤡᤛᤢᤶᤗᤥ॥ ᤀᤠᤏᤡᤃᤣ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤂᤡᤏᤡ᤹ ᤗᤠᤃᤡ ᤀᤠᤏᤡᤃᤣ ᤜᤡᤱᤔᤴᤏᤡᤴ ᤀᤠᤰᤋᤱᤒᤠ ᤘᤕᤧ ᤁᤧᤗ᤹ᤒᤠᤴ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤔᤠᤱ ᤘᤠ᤹ᤖᤥ॥

⁶ ᤀᤠᤰᤂᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤛᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤀᤥᤔᤢᤗ᤹ᤔᤠᤀᤥ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤃ ᤍᤠᤱᤒᤠᤸᤗᤧᤴ ᤏᤢ ᤀᤠᤏᤡᤃᤣ ᤆᤥ᤺ᤱ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤖᤥ॥

⁷ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠ ᤌᤢᤶᤔᤥᤒᤠ ᤁᤧᤖᤧᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤁᤢᤒᤡ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥

⁸ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠᤀᤥᤖᤰ ᤔᤧᤛᤧ᤺ᤖᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥᤒᤠ ᤂᤡᤏᤡ᤹ ᤏᤛᤠ᤺ᤴᤏᤡᤴᤏᤠᤱ ᤁᤠᤰ ᤐᤡᤛᤠᤱ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤏᤡᤃᤣ ᤘᤣ᤹ ᤐᤠᤴ ᤐᤠ᤺ᤵᤔᤠ ᤌᤣᤀᤠᤱ ᤜᤥᤵ.

⁹ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤸᤗᤧ ᤕᤠᤵᤔᤡ ᤁᤧᤍᤠ᤺ᤰᤋᤡᤒᤠ ᤐᤠᤴ ᤏᤢ ᤏᤠᤘᤠᤀᤡᤳᤗᤠ ᤛᤧᤘᤠ ᤆᤥ᤺ᤰᤔᤥᤗᤠᤶ ᤁᤧᤏᤢ᤺ᤰᤂᤡᤀᤠᤱ ᤛᤧᤰᤂᤠ ᤏᤢ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤱᤃ ᤁᤠᤰ ᤔᤏᤠᤜᤠ᤹ᤖᤧᤀᤣ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢ᤹ᤖᤥ॥

¹⁰ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤄᤢᤒᤠ ᤁᤢᤛ᤻ᤛᤠ ᤕᤧᤛᤢᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤢᤕᤢᤔᤧᤴ ᤁᤧᤜᤠᤱᤄᤢᤶᤒᤠᤴ ᤔᤧᤔᤧᤳᤋᤡᤃᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤀᤣ ᤁᤧᤍᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤋᤠᤱᤀᤠᤛᤧ᤺ᤵᤗᤥ॥