᥇ ᤜᤠᤱ 1 - LIFOTNTᤀᤍᤥᤏᤡᤕᤠᤜᤴ ᤀᤠᤑᤣᤰ ᤜᤠᤱ ᤐᤥᤱ 1 ᤀᤠᤸᤗ ᤍᤠᤀᤢᤍ ᤜᤠᤱᤅᤡᤴ ᤂᤍᤠᤰᤔᤡ ᤋᤢᤶᤛᤧᤀᤠᤱ ᤕᤖᤡᤰ ᤋᤱᤒᤣ ᤁᤧᤖᤧᤔᤠᤖᤧᤀᤠᤱ ᤘᤕᤧ. ᤂᤢᤏᤧ᤹ ᤂᤠᤶᤔᤠᤍᤣᤳ ᤔᤧᤄᤠᤵᤋᤢᤛᤠᤱ ᤂᤢᤏᤧ᤹ ᤔᤧᤃᤥᤛᤧᤴ॥ 2 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤁᤵᤔᤠ ᤏᤢ ᤀᤠᤍᤠᤱᤒᤠ ᤀᤥᤔᤧᤵᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤁᤢᤓᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤎᤡᤰ ᤁᤥ᤺ᤳᤋᤢᤶᤒᤧ॥ ᤂᤧᤸᤗᤧ ᤀᤠᤍᤠᤱᤒᤠ ᤜᤠᤱᤅᤡᤴ ᤁᤢᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤍᤠᤱᤒᤠᤏᤢ ᤛᤥᤖᤡᤰ ᤀᤡᤶᤗ॥” 3 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤧᤖᤧᤰ ᤔᤧᤃᤥ᤺ᤳᤋᤢᤸᤗᤧ ᤗᤳᤇᤠ ᤏᤢᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤛᤢᤏᤶᤔᤡ ᤀᤒᤡᤛᤃᤧᤴ ᤔᤧᤄᤥᤛᤢ ᤜᤧᤰᤁᤩᤠᤱ ᤂᤧᤴ ᤜᤠᤱᤅᤧᤀᤥ ᤔᤧᤍᤠᤖᤢ॥ 4 ᤂᤧᤴ ᤛᤠ᤹ᤖᤡᤰ ᤏᤢᤔᤠ ᤆᤥᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤜᤠᤱᤅᤡᤴ ᤁᤵᤔᤠ ᤏᤢ ᤀᤥᤔᤧᤵᤔᤠ ᤕᤠ᤺ᤶᤒᤰ ᤆᤥᤃᤢ. ᤁᤖ ᤜᤠᤱᤅᤡᤸᤗᤧ ᤂᤧᤴ ᤔᤣ᤺ᤳ ᤔᤧᤔᤧᤳᤋᤢᤴᤗᤥ॥ 5 ᤀᤠᤸᤗ ᤍᤠᤀᤢᤍᤖᤧ ᤁᤢᤔᤣᤳ ᤜᤃ᤻ᤃᤡᤋᤖᤧ ᤁᤢᤛ᤻ᤛᤠ ᤀᤍᤥᤏᤡᤕᤠᤜᤴ “ᤀᤠᤸᤗᤀᤠᤱᤎᤥ ᤀᤠᤱᤃᤠ᤹ᤀᤣ ᤜᤠᤱᤀᤠ” ᤗ᤹ᤖᤧᤀᤠᤱ ᤋᤃᤡ ᤀᤠᤵᤑᤣᤰ ᤗᤠᤶᤗᤥᤛᤡᤱᤔᤠ ᤜᤣ᤺ᤰᤋᤧ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤅᤠᤒᤥᤱ ᤔᤏᤠᤜᤠ᤹. ᤀᤴᤃᤧᤕᤢᤰᤐᤠᤜᤠ᤹ ᤏᤢ ᤀᤴᤗᤠᤎᤠᤜᤠ᤹ ᤛᤥᤛᤥᤖᤡᤰ ᤂᤢᤏᤧ᤹ ᤁᤢᤍᤃᤡ ᤗᤥ᤺ᤱᤔᤠᤛᤡᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤛᤡ॥ 6 ᤂᤢᤏᤧ᤹ ᤁᤢᤶᤒᤠᤖᤧ “ᤂᤧᤏᤧ᤹ ᤌᤣᤀᤠᤱ ᤀᤰᤋᤱᤒᤠ ᤕᤠᤶᤒᤰ ᤁᤧᤈᤥᤃᤢᤒᤠᤒᤣ᥅” ᤔᤧᤳᤋᤢᤀᤠᤱ ᤀᤠᤓᤧᤸᤗᤧᤀᤠᤱ ᤔᤧᤓᤧ᤺ᤰᤋᤢᤴ. ᤀᤍᤥᤏᤡᤕᤠᤜ᤺ᤴᤏᤠᤱ ᤛᤠ᤹ᤖᤡᤰ ᤏᤢᤒᤠᤛᤧᤳᤇᤠ ᤔᤏᤠ ᤘᤕᤧ ᤜᤧᤰᤁᤩᤠᤱ ᤀᤍᤥᤏᤡᤕᤠᤜᤴ ᤀᤒ᤻ᤛᤠᤗᤥᤔᤏᤢ᤺ᤸᤗᤧ ᤐᤠ᤺ᤰᤐᤠ ᤘᤕᤧ॥ 7 ᤀᤍᤥᤏᤡᤕᤠᤜᤖᤧ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤧᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤧᤴ ᤛᤢᤈᤠ ᤏᤠ᤺ᤰᤋᤢᤛᤡ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤏᤧ᤹ ᤑᤠ᤹ᤖᤧᤳᤇᤢ॥ 8 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁ. ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏ. ᤛᤡᤔᤡ. ᤖᤣᤀᤡ ᤏᤢ ᤍᤠᤀᤢᤍᤖᤧ ᤁᤢᤳᤆᤡᤒᤠ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ ᤀᤍᤥᤏᤡᤕᤠᤜ ᤗᤧᤵᤔᤠᤱ ᤔᤧᤶᤒᤳᤇᤧᤴ॥ 9 ᤂᤧᤒᤩᤠᤱ ᤀᤍᤥᤏᤡᤕᤠᤜᤖᤧ ᤀᤣᤏ-ᤖᤥᤃᤣᤗᤖᤧ ᤁᤢᤒᤣᤛᤠᤱ ᤈᤥᤜᤣᤗᤣᤋ ᤔᤧᤵᤔᤏᤠᤒᤠ ᤗᤢᤱᤅᤥ ᤔᤧᤸᤗᤢᤰᤜᤠ᤹. ᤐᤡᤳᤜᤠ᤹ ᤏᤢ ᤁᤧᤔᤧ᤹ᤒᤠ ᤐᤡᤳᤛᤠᤳᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡ॥ ᤂᤢᤏᤧ᤹ ᤁᤢᤀᤠᤵᤑᤣᤰᤐᤠ ᤁᤧᤖᤧᤰ ᤜᤠᤱᤛᤠ ᤁᤢᤴᤛᤠ᤹ᤜᤠ᤹ ᤏᤢ ᤕᤜᤢᤍᤠᤒᤠ ᤁᤧᤖᤧᤰ ᤜᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤳᤋᤢᤛᤡ. 10 ᤁᤖ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏ ᤀᤡᤃᤪ ᤒᤏᤠᤕᤠᤜ ᤀᤡᤃᤪ ᤁᤢᤳᤆᤡᤒᤠ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤀᤡᤃᤪ ᤁᤢᤴᤛᤠ᤹ ᤛᤥᤗᤥᤔᤏᤧᤴ ᤔᤧᤀᤢ᤺ᤳᤋᤢᤴᤗᤥ॥ 11 ᤂᤧᤒᤩᤠᤱ ᤏᤠᤋᤠᤏᤖᤧ ᤛᤥᤗᤥᤔᤏᤖᤧ ᤁᤢᤶᤔᤠ ᤒᤋᤛᤣᤒᤠᤴ ᤛᤣ᤺ᤴᤍᤥᤛᤢ. “ᤀᤠᤏᤡ᤹ ᤍᤠᤱᤒᤠ ᤍᤠᤀᤢᤍᤖᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤜᤃ᤻ᤃᤡᤋᤖᤧ ᤁᤢᤛ᤻ᤛᤠ ᤀᤍᤥᤏᤡᤕᤠᤜᤴ ᤜᤠᤱ ᤐᤥ᤺ᤰᤂᤧ ᤑᤠ᤹ᤀᤠᤱ ᤌᤣ ᤂᤧᤏᤧ᤹ ᤔᤧᤶᤄᤧᤶᤔᤣ ᤁᤧᤘᤠ᤹ᤒᤡ᥅ 12 ᤀᤠᤸᤗ ᤂᤧᤵᤛᤧ᤹. ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤱᤔᤧᤴ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤛᤥᤗᤥᤔᤏᤖᤧ ᤁᤢᤜᤡᤱᤔᤧᤴ ᤀᤠᤰᤂᤣᤀᤠᤱ ᤛᤧ᤺ᤵᤔᤠ ᤛᤢᤰᤋᤧᤳ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤧᤏᤧ᤹ ᤛᤢᤈᤠ ᤐᤡᤏᤧᤖᤥ॥ 13 ᤐᤣᤃᤧ᤹ᤀᤠᤱ ᤍᤠᤀᤢᤍ ᤜᤠᤱᤅᤡᤴ ᤋᤢᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤧ᤹. ‘ᤀᤠᤍᤠᤱᤒᤣ. ᤀᤠᤜᤠᤱᤅᤣ. ᤌᤣ ᤀᤠᤍᤠᤱᤒᤠᤖᤧ ᤀᤠᤵᤑᤣᤰ ᤁᤧᤛᤧᤘᤠᤖᤥᤔᤧᤴᤏᤢ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤔᤠᤱᤜᤧᤰ ᤁᤧᤈᤥᤃᤢᤒᤠ ᤜᤥ᤺ᤵᤋᤧᤒᤡ᥅ “ᤛᤧᤰᤂᤠᤛᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤛᤥᤗᤥᤔᤏᤧᤴ ᤀᤠᤱᤃᤠ᤹ ᤀᤠᤀᤣᤃᤠᤱ ᤜᤠᤱ ᤐᤥᤱ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤜᤠᤱᤕᤢᤰᤏᤠᤀᤥ ᤕᤢᤱᤗᤥ” ᤁᤖ ᤌᤣᤀᤠᤱ ᤀᤍᤥᤏᤡᤕᤠᤜᤴ ᤜᤠᤱ ᤐᤥ᤺ᤰᤂᤧᤒᤣ᥅’ 14 ᤀᤠᤸᤗ ᤂᤧᤏᤧ᤹ ᤜᤠᤱᤅᤡᤴᤏᤢ ᤋᤠ᤹ᤃᤧᤈᤧᤱᤗ ᤁᤧᤕᤠᤰᤐᤠ ᤕᤧᤶᤔᤥᤀᤣ ᤀᤠᤱᤃᤠ᤹ ᤛᤡᤃᤠᤱ ᤑᤢᤖᤢᤳ ᤗᤠ᤺ᤳᤋᤠ ᤋᤠᤀᤠ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱ ᤐᤡᤏᤧᤖᤥ॥” 15 ᤂᤧᤒᤩᤠᤱ ᤒᤋᤛᤣᤒᤠᤴ ᤂᤍᤠᤰᤔᤡ ᤜᤠᤱᤅᤡᤸᤗᤧ ᤁᤢᤍᤢᤶᤛᤧ ᤕᤠᤰᤑᤠᤱᤅᤥ ᤐᤣ. ᤂᤧᤵᤔᤥ ᤛᤢᤏᤶᤔᤡ ᤀᤒᤡᤛᤃᤖᤧ ᤂᤢᤏᤧ᤹ ᤁᤳᤋᤢ ᤀᤥᤔᤧᤳᤋᤢᤖ ᤕᤠᤃᤧ॥ 16 ᤒᤋᤛᤣᤒᤠᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥ᤹ᤜᤈ᤹ ᤕᤢᤱᤛᤡᤱᤅᤠᤱ ᤛᤠᤒᤴ ᤜᤒᤳ ᤑᤴᤇᤡᤱ॥ ᤜᤠᤱᤅᤡᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤌᤣ ᤆᤠᤜᤠ ᤁᤧᤈᤥᤃᤧᤒᤣ᥅” 17 ᤂᤢᤏᤧ᤹ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤂᤧᤏᤧ᤹ ᤁᤧᤛᤧᤘᤠᤖᤥᤔᤧᤴᤏᤢ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤰᤋᤱᤒᤠ ᤔᤠᤱᤜᤧᤰ ᤁᤧᤈᤥᤃᤢᤀᤠᤱ ᤘᤕᤧ. ‘ᤀᤠᤱᤃᤠ᤹ ᤀᤠᤀᤣᤃᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤛᤥᤗᤥᤔᤏᤧᤴ ᤜᤠᤱ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤠᤜᤠᤱ ᤕᤢᤰᤏᤠᤀᤥ ᤕᤢᤱᤗᤥ॥’ 18 ᤁᤖ ᤀᤠᤸᤗᤥᤃ ᤀᤍᤥᤏᤡᤕᤠᤜᤴ ᤜᤠᤱ ᤐᤥ᤺ᤰᤂᤧ ᤆᤢᤖᤧᤖᤳᤇ॥ ᤁᤴ ᤐᤠ᤺ᤴᤏᤡᤴ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤀᤣ ᤔᤧᤱᤄᤥᤀᤣ ᤁᤧᤘᤠ᤹॥ 19 ᤂᤧᤸᤗᤧ ᤕᤖᤡᤰ ᤐᤡᤳᤌᤰᤛᤠᤜᤠ᤹ ᤏᤢ ᤁᤧᤔᤧ᤹ᤒᤠ ᤐᤡᤳᤛᤠᤳᤜᤠ᤹ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡᤀᤠᤱ ᤘᤠ᤹. ᤂᤶᤓᤩᤠᤱ ᤁᤧᤖᤧᤰ ᤜᤠᤱᤛᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤧᤴ ᤏᤢ ᤕᤥᤀᤠᤒᤧᤴ ᤀᤢ᤺ᤳᤋᤢᤛᤡᤖᤧᤳᤇ. ᤁᤖ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤛᤥᤗᤥᤔᤏᤧᤴᤃ ᤔᤧᤀᤢ᤺ᤳᤋᤢᤴᤖᤧᤳᤇ॥ 20 ᤀᤠᤸᤗ ᤀᤠᤍᤠᤱᤒᤠ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤀᤣᤃᤠᤱ ᤜᤠᤱᤕᤢᤰᤏᤠᤀᤥ ᤜᤠᤳ ᤕᤢᤱᤒᤠᤒᤣ ᤑᤠ᤹ᤀᤠᤱ ᤀᤠᤍᤠᤱᤒᤠᤗᤠᤶ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤍᤠᤱᤒᤠ ᤀᤥᤃᤧᤶᤔᤧᤳᤋᤠᤱ ᤔᤧᤕᤢᤱ॥ 21 ᤔᤣ᤺ᤴᤏᤧᤓᤃᤪ ᤀᤠᤸᤗ ᤀᤠᤍᤠᤱᤒᤠ ᤂᤧᤏᤧ᤹ ᤁᤧᤎᤠ᤺ᤰᤌᤧᤒᤠᤜᤠ᤹ᤀᤥ ᤁᤧᤒᤣ᤺ᤰ ᤁᤧᤄᤧᤳ. ᤂᤧᤒᤩᤠᤱ ᤀᤠᤱᤃᤠ᤹ ᤏᤢ ᤀᤠᤛ᤻ᤛᤠ ᤛᤥᤗᤥᤔᤏᤧᤴ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤀᤡᤛᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤇᤡᤃᤧ᤹॥” 22 ᤂᤢᤏᤧ᤹ ᤜᤠᤱᤅᤡᤴᤏᤢ ᤋᤠ᤹ᤈᤧᤰᤂᤧᤖ ᤕᤢᤅᤧᤒᤠ ᤕᤧᤶᤔᤥᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ ᤁᤧᤖᤧᤍᤩᤧ॥ 23 ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤏᤠᤋᤠᤏᤧᤴ ᤁᤧᤖᤧᤍᤩᤧᤀᤠᤱ ᤘᤠ᤹॥” ᤂᤧᤒᤩᤠᤱ ᤏᤠᤋᤠᤏᤧᤴ ᤋᤩᤧᤀᤠᤱ ᤂᤠᤶᤒᤠᤱᤅᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢ॥ 24 ᤏᤠᤋᤠᤏᤖᤧ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤀᤣᤃᤠᤱ ᤀᤍᤥᤏᤡᤕᤠᤜᤴ ᤜᤠᤱ ᤐᤥᤱ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤜᤠᤱᤕᤢᤰᤏᤠᤀᤥ ᤂᤢᤏᤧ᤹ᤀᤣ ᤕᤢᤱ ᤑᤠ᤹ᤀᤠᤱ ᤌᤣ ᤀᤠᤍᤠᤱᤒᤠᤖᤧ ᤀᤢᤘᤠ ᤁᤧᤈᤥᤃᤢᤒᤠᤒᤡ᥅ 25 ᤂᤢᤏᤧ᤹ ᤀᤠᤀᤡᤴ ᤕᤥ ᤐᤣᤀᤠᤱ ᤕᤖᤡᤰ ᤐᤡᤳᤜᤠ᤹ ᤏᤢ ᤁᤧᤔᤧ᤹ᤒᤠ ᤐᤡᤳᤛᤠᤳᤜᤠ᤹ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡᤀᤠᤱ ᤘᤠ᤹॥ ᤂᤢᤏᤧ᤹ ᤁᤧᤖᤧᤰ ᤜᤠᤱᤛᤠᤜᤠ᤹. ᤌᤰᤔᤥᤒᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤧᤴ ᤛᤠᤓ᤺ᤱᤈᤠᤀᤥ ᤀᤢ᤺ᤳᤋᤢᤛᤡᤀᤠᤱ ᤘᤠ᤹॥ ᤜᤧᤰᤁᤩᤠᤱ ᤀᤠᤸᤗᤥ ᤀᤠᤶᤓᤠ ᤁᤴ ᤕᤧᤶᤔᤥ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤔᤧᤈ. ᤔᤧᤎᤢᤅᤢᤖ ᤀᤰᤂᤣ ᤔᤧᤗ᤹ᤖ ᤔᤧᤕᤠᤰ. ‘ᤜᤠᤱ ᤀᤍᤥᤏᤡᤕᤠᤜᤴ ᤁᤢᤎᤠ᤺ᤰ ᤆᤠ᤹ᤖᤖᤥ॥’ 26 ᤁᤖ ᤂᤢᤏᤧ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁᤧᤴ. ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤏᤢ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤛᤥᤗᤥᤔᤏᤧᤴ ᤔᤧᤀᤢ᤺ᤳᤋᤡᤃᤧᤴ॥ 27 ᤌᤣ ᤁᤴ ᤀᤠᤍᤠᤱᤒᤠᤖᤧ ᤁᤧᤀᤡᤱᤈᤠᤱᤗᤠᤶ ᤐᤥ᤺ᤰᤂᤧᤒᤠᤒᤡ᥅ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤁᤧᤛᤧᤘᤠᤖᤥᤒᤠᤜᤠ᤹ ᤜᤠᤱᤕᤢᤰᤏᤠᤀᤥ ᤜᤠᤳ ᤕᤢᤱᤒᤠ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤕᤠᤵᤔᤡ ᤔᤧᤶᤔᤧᤳᤋᤣ ᤁᤧᤘᤠ᤹ᤒᤠᤒᤡ᥅” ᤍᤠᤀᤢᤍᤖᤧ ᤛᤥᤗᤥᤔᤏᤧᤴ ᤜᤠᤱ ᤆᤥᤃᤢ 28 ᤂᤧᤒᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤔᤧᤳᤋᤢ. “ᤒᤋᤛᤣᤒᤠᤴ ᤛᤡᤃᤠᤱ ᤀᤢ᤺ᤳᤋᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤑᤧᤖᤧᤀᤠᤱ ᤕᤧᤶᤛᤡᤱ॥ 29 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱ. “ᤀᤠᤱᤃᤠ᤹ ᤁᤧᤖᤧᤰ ᤀᤠᤍᤢᤰᤂᤣᤜᤠ᤹ᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹॥ 30 ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤂᤧᤏᤧ᤹ ᤔᤧᤳᤏᤧᤀᤠᤱ ᤘᤕᤧ. ‘ᤂᤧᤏᤧ᤹ ᤁᤧᤛ᤻ᤛᤠ ᤛᤥᤗᤥᤔᤏᤧᤴᤏᤣ ᤀᤠᤱᤃᤠ᤹ ᤀᤠᤀᤣᤃᤠᤱ ᤜᤠᤱ ᤐᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤠᤱᤕᤢᤰᤏᤠᤀᤥ ᤀᤠᤱᤃᤠ᤹ ᤀᤠᤗᤧᤰᤘᤠᤀᤥ ᤕᤢᤱ᤹॥’ ᤀᤠᤀᤡᤴᤒᤠ ᤕᤧᤴᤏᤥ ᤀᤠᤱᤃᤠ᤹ ᤁᤴ ᤔᤠᤱᤜᤧᤰᤁᤡᤴ ᤁᤧᤳᤋᤢᤱ᤹॥” 31 ᤂᤧᤒᤩᤠᤱ ᤒᤋᤛᤣᤒᤠᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱ ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤛᤠᤒᤴ ᤜᤒᤳ ᤑᤴᤇᤡᤱᤅᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤠᤱ ᤍᤠᤀᤢᤍᤖᤧ ᤁᤢᤎᤠ᤺ᤰ ᤆᤠ᤹ᤖᤖᤥ॥” 32 ᤍᤠᤀᤢᤍ ᤜᤠᤱᤅᤡᤸᤗᤧ ᤔᤧᤳᤋᤢ. “ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁᤧᤴ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ ᤏᤢ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤛᤡᤃᤠᤱ ᤀᤢ᤺ᤳᤋᤧᤛᤧ᤹॥” ᤀᤠᤸᤗ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤧᤶᤛᤡᤱᤅᤡᤸᤗᤧ. 33 ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤂᤡᤏᤡ᤹ ᤋᤣ᤹ᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛ᤻ᤛᤠ ᤛᤥᤗᤥᤔᤏᤧᤴ ᤀᤠᤱᤃᤠ᤹ ᤀᤠᤀᤴᤕᤥᤰᤁᤥ ᤕᤢᤰᤂᤧᤶᤔᤧ᤹ᤀᤠᤱ ᤕᤥ ᤃᤡᤜᤥᤏ ᤘᤒᤢᤴᤍᤠᤰᤁᤥ ᤌᤠᤖᤡᤰ ᤛᤥᤖᤡᤰ ᤋᤣ᤹ᤖᤧᤶᤔᤧ᤹॥ 34 ᤂᤧ᤹ᤕᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤖᤧ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤜᤠᤱ ᤔᤠᤱᤌᤥ᤺ᤰᤏᤠ ᤐᤡᤛᤢᤖ॥ ᤛᤠᤍᤠᤱᤅᤡᤴ ᤔᤢ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤧᤶᤔᤧ᤹ᤀᤠᤱ ᤀ᤺ᤰᤋᤧᤶᤔᤧ᤹. ‘ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤎᤠ᤺ᤰ ᤆᤠ᤹ᤖᤖᤥ᥄’ 35 ᤂᤧᤒᤩᤠᤱ ᤂᤡᤏᤡ᤹ ᤌᤥ᤺ᤰᤁᤠᤛᤡᤶᤔᤧ ᤌᤠᤅᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤛᤡᤃᤠᤱ ᤗᤠ᤺ᤳᤋᤠᤱ ᤀᤠᤱᤃᤠ᤹ ᤀᤠᤜᤠᤱ ᤕᤢᤰᤏᤠᤀᤥ ᤕᤢᤱᤗ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤧᤰᤘᤠᤀᤥ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤖ॥ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤢᤏᤧ᤹ ᤛᤣ᤺ᤴᤍᤢᤱᤒᤠᤖᤥ॥” 36 ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤖᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤔᤡᤴ᥄ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤋᤱᤒᤠᤀᤣ ᤀᤢᤘᤠ ᤆᤥᤃᤢᤖᤖᤥ॥ 37 ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤠᤱᤅᤡᤴᤏᤢ ᤕᤜᤘᤣ ᤍᤠᤱᤒᤠᤴ ᤘᤕᤧᤒᤠ ᤁᤢᤀᤡᤛᤡ᤺ᤰᤁᤣ. ᤂᤢᤏᤧ᤹ ᤛᤥᤗᤥᤔᤏᤧᤴᤏᤢᤀᤠᤱ ᤘᤠ᤹ᤖ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤠᤱ ᤍᤠᤀᤢᤍᤖᤧ ᤁᤢᤜᤠᤱ ᤕᤢᤰᤏᤠᤴᤏᤢ᤺ᤸᤗᤧᤀᤠᤱ ᤌᤥᤎᤥᤰ ᤆᤥᤃᤢᤖ॥” 38 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏ. ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜ. ᤁᤖᤣᤋᤡ ᤏᤢ ᤐᤗᤣᤌᤡᤜᤠ᤹ ᤕᤥ ᤔᤧᤎᤠᤛᤡᤱ ᤜᤧᤰᤁᤩᤠᤱ ᤛᤥᤗᤥᤔᤏᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤀᤴᤕᤥᤰᤁᤥ ᤔᤧᤕᤢᤰᤂᤢᤀᤠᤱ ᤔᤧᤍᤣ᤹ᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤃᤡᤜᤥᤏ ᤌᤠᤖᤡᤰ ᤆᤢᤶ ᤔᤧᤔᤧᤳᤋᤢ ᤔᤧᤍᤣ᤹ᤖᤢ॥ 39 ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤏᤡ᤺ᤱᤃᤣ᤹ ᤕᤠᤱᤔᤠ ᤛᤠᤍᤠᤱᤅᤡᤴ ᤕᤠᤱᤛᤡᤱᤅᤠᤱ ᤛᤥᤗᤥᤔᤏᤧᤴ ᤏᤡ᤺ᤱᤃᤣ᤺ᤸᤗᤧ ᤜᤠᤱ ᤔᤠᤱᤌᤥ᤺ᤰᤏᤠ ᤐᤡᤖᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤔᤧᤀ᤺ᤰᤋᤧᤀᤠᤱ ᤔᤧᤒᤠ᤺ᤳᤋᤢ. “ᤛᤥᤗᤥᤔᤏ ᤜᤠᤱᤅᤡᤴ ᤁᤢᤎᤠ᤺ᤰ ᤆᤠ᤹ᤖᤖᤥ᥄” 40 ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ. ᤔᤢᤑᤪᤠᤔᤠ ᤔᤢᤱᤏᤢ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤌᤠ᤺ᤱ ᤔᤧᤎᤥ᤺ᤰᤛᤡᤱ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤕᤱ ᤁᤡᤸᤗᤡᤱᤅᤡᤸᤗᤧ ᤂᤠᤶᤒᤣ᤺ᤰᤔᤠᤴᤏᤣ ᤕᤰᤂᤢ॥ 41 ᤀᤍᤥᤏᤡᤕᤠᤜ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤍᤖᤣᤒᤠᤜᤠ᤹ᤖᤧ ᤛᤠᤓ᤺ᤱᤈᤠ ᤆᤠᤔᤠ ᤔᤧᤛᤢᤖᤢᤖᤖᤰ ᤔᤧᤕᤠᤃᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤜᤕᤱ ᤁᤡᤸᤗᤡᤱᤅᤡᤴ ᤔᤧᤄᤧᤵᤛᤢ॥ ᤛᤠᤍᤠᤱ ᤗᤠᤀᤡ᤺ᤰᤋᤧᤒᤧᤴ ᤂᤧᤵᤛᤢᤀᤠᤱ ᤕᤥᤀᤠᤒᤖᤧ ᤛᤣ᤺ᤴᤍᤥᤛᤢᤛᤡ. “ᤕᤧᤰᤕᤰᤁᤥ ᤌᤧᤔᤠ᤺ᤴ ᤜᤕᤱ ᤁᤡᤸᤗᤡᤱ ᤐᤥᤱᤗ ᤕᤠᤰᤐᤣ᥅” 42 ᤀᤠᤸᤗ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤠᤖᤧᤖ ᤕᤠᤃᤧᤸᤗᤧ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤖᤧ ᤁᤢᤛ᤻ᤛᤠ ᤈᤥᤏᤠᤌᤏᤧᤴ ᤁᤧᤖᤧᤎᤠᤅᤧ॥ ᤀᤍᤥᤏᤡᤕᤠᤜᤖᤧ ᤂᤧᤴ ᤔᤧᤳᤋᤢ. “ᤁᤳᤏᤠ ᤑᤧᤖᤧ᤹॥ ᤂᤧᤏᤧ᤹ ᤜᤧᤰᤋᤱᤒᤠ ᤁᤢᤔᤡᤱ ᤁᤧᤀᤡᤱᤒᤠ ᤔᤏᤠ᤺ᤸᤗᤧ ᤛᤢᤏᤠᤀᤡᤱ ᤁᤧᤍᤠᤖᤢᤀᤠᤱ ᤁᤧᤍᤩᤧᤒᤡᤗᤠ॥” 43 ᤈᤥᤏᤠᤌᤏᤖᤧ ᤏᤥᤃᤵ ᤐᤡᤖᤢ. “ᤔᤣ᤺ᤴ. ᤜᤥᤵᤗᤥ᥄ ᤛᤧᤰᤂᤠᤀᤣ. ᤀᤠᤏᤡ᤹ ᤍᤠᤱᤒᤠ ᤜᤠᤱ ᤍᤠᤀᤢᤍᤖᤧ ᤛᤥᤗᤥᤔᤏᤧᤴ ᤜᤠᤱ ᤆᤥᤃᤢᤀᤠᤱ ᤘᤠ᤹ᤖᤥ॥ 44 ᤂᤢᤏᤧ᤹ᤏᤢ ᤛᤥᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁᤧᤴ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ. ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ. ᤁᤖᤣᤋᤡ ᤏᤢ ᤐᤗᤣᤌᤡᤜᤠ᤹ ᤜᤠᤱᤅᤡᤸᤗᤧ ᤐᤠᤱᤄᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤥᤗᤥᤔᤏᤧᤴ ᤜᤠᤱᤅᤡᤸᤗᤧ ᤁᤢᤀᤴᤕᤥᤰᤁᤥ ᤔᤧᤕᤢᤰᤂᤢ. 45 ᤂᤶᤓᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤠᤍᤥᤁ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤖᤧ ᤂᤢᤏᤧ᤹ ᤃᤡᤜᤥᤏᤀᤥ ᤜᤠᤱ ᤔᤠᤱᤌᤥ᤺ᤰᤏᤠ ᤐᤡᤖᤧᤳᤇᤢᤀᤠᤱ ᤘᤠ᤹॥ ᤂᤧᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤠᤸᤗᤥ ᤛᤥᤛᤥᤳᤗᤖᤠᤱ ᤆᤥ᤺ᤰᤏᤢ ᤔᤧᤛ᤺ᤳᤋᤧᤖ ᤌᤥ ᤔᤧᤛᤔᤧᤎᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤧᤰᤕᤰᤁᤥ ᤜᤕᤱ ᤁᤡᤸᤗᤡᤱ ᤐᤥᤱᤗ ᤐᤳ॥ ᤜᤠᤒᤠ ᤁᤴ ᤀᤡᤰᤗᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤒᤠᤖᤥ॥ 46 ᤂᤧᤴᤏᤢ᤺ᤸᤗᤧ ᤀᤠᤖᤛᤠᤱ ᤕᤖᤡᤰᤁ ᤌᤣ ᤐᤥ᤺ᤰᤂᤧᤓᤧᤸᤗᤧ. ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤛᤥᤗᤥᤔᤏᤧᤴ ᤕᤢᤱᤛᤡᤱᤅᤠᤱ ᤕᤢᤱ᤹॥ 47 ᤜᤧᤰᤁᤩᤠᤱ ᤜᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤀᤠᤱ ᤀᤠᤏᤡ᤹ ᤍᤠᤱᤒᤠ ᤍᤠᤀᤢᤍ ᤜᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤛᤧ ᤔᤧᤒᤣᤀᤠᤱ ᤔᤧᤕᤠ᤺ᤰ. ‘ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠᤖᤧ ᤁᤧᤛ᤻ᤛᤠ ᤛᤥᤗᤥᤔᤏᤖᤧ ᤁᤢᤔᤡᤱᤅᤡᤴ ᤀᤠᤍᤠᤱᤒᤠᤖᤧᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤧᤀᤡᤱᤒᤠ ᤆᤥᤃᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤀᤠᤍᤠᤱᤒᤠᤖᤧᤴᤏᤢ᤺ᤸᤗᤧᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤆᤥᤃᤢᤖᤖᤥ॥’ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤴ ᤁᤢᤕᤢᤰᤏᤠᤀᤥᤀᤣ ᤕᤢᤅᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤢᤀᤠᤱ ᤐᤠ᤺ᤳᤋᤢ. 48 ‘ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤂᤢᤏᤧ᤹ ᤀᤠᤀᤡᤴ ᤀᤠᤱᤃᤠ᤹ ᤀᤠᤜᤠᤱ ᤕᤢᤰᤏᤠᤀᤥ ᤀᤠᤱᤃᤠ᤹ ᤀᤠᤔᤡᤰᤁᤡᤸᤗᤧ ᤗᤰᤂᤥᤒᤠᤎᤡᤰ ᤏᤡᤛᤢᤱᤗ ᤕᤠ᤺ᤴᤍᤠᤱᤗᤥ᥄’” 49 ᤁᤸᤗᤧᤆᤥᤃᤢᤸᤗᤧ ᤀᤍᤥᤏᤡᤕᤠᤜᤖᤧ ᤁᤢᤍᤖᤧᤒᤠᤜᤠ᤹ ᤁᤧᤖᤧᤰ ᤕᤱᤔᤠ ᤔᤧᤛᤩᤧ ᤜᤧᤰᤁᤩᤠᤱ ᤔᤢᤳᤌᤪᤡᤰ ᤘᤎᤡᤰ ᤔᤧᤒᤥᤃᤧᤀᤠᤱ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧ ᤔᤧᤒᤣ॥ 50 ᤁᤖ ᤀᤍᤥᤏᤡᤕᤠᤜᤴ ᤀᤠᤵᤑᤣᤰ ᤆᤤᤲ ᤛᤥᤗᤥᤔᤏᤧᤴᤏᤢ ᤁᤡᤛᤧᤀᤠᤱ ᤐᤥᤃᤧ. ᤜᤧᤰᤁᤩᤠᤱ ᤐᤣᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤠᤱᤜᤠ᤹ ᤋᤧᤶᤛᤢ॥ 51 ᤂᤧᤒᤩᤠᤱ ᤁᤢᤓᤠ ᤔᤧᤒᤣᤀᤠᤱ ᤁᤴ ᤀᤡᤱᤄᤱᤅᤡᤴ ᤛᤥᤗᤥᤔᤏᤧᤴ ᤔᤧᤔᤧᤳᤋᤢ. “ᤀᤍᤥᤏᤡᤕᤠᤜᤴ ᤛᤥᤗᤥᤔᤏ ᤜᤠᤱᤅᤡᤴᤏᤢ ᤁᤡᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤠᤱᤜᤠ᤹ ᤋᤧᤶᤛᤢᤀᤠᤱ ᤐᤳ॥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ᤹. ‘ᤛᤥᤗᤥᤔᤏ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤁᤢᤛᤧᤘᤠᤖᤥᤒᤧᤴ ᤋᤠᤓᤣ᤺ᤸᤗᤧ ᤔᤧᤛᤧᤳᤏᤧᤴ ᤑᤠ᤹ᤀᤠᤱ ᤔᤠᤱᤜᤧᤰᤛᤡᤱᤅᤠᤱ ᤔᤧᤳᤋᤠᤖ॥’” 52 ᤛᤥᤗᤥᤔᤏᤖᤧ ᤏᤥᤃᤵ ᤐᤡᤖᤢ. “ᤂᤢᤏᤧ᤹ ᤀᤠᤵᤑᤣᤰ ᤗᤳᤇᤠ ᤛᤢᤶᤒᤥᤎᤠᤛᤠᤒᤠ ᤔᤏᤠ ᤑᤠ᤹ᤀᤠᤱ ᤋᤛᤡ ᤐᤡᤔᤠ ᤛᤢᤰᤋᤢᤏᤧᤓᤃᤪ ᤂᤢᤏᤧ᤹ ᤁᤢᤎᤧᤃᤣᤰ ᤀᤡᤎᤡᤰᤁᤠᤱ ᤂᤠᤶᤒᤠᤱᤅᤥ ᤔᤧᤗᤢ᤺ᤰᤏᤧᤴ॥ ᤁᤖ ᤂᤢᤏᤧ᤹ ᤑᤧᤴᤕᤠ᤺ᤶᤒᤰ ᤆᤥᤃᤢᤒᤠ ᤂᤥᤍᤧᤳᤋᤧᤏᤧᤓᤃᤪ ᤂᤢᤏᤧ᤹ ᤛᤧᤰᤂᤠᤀᤣ ᤛᤧᤵᤔᤠ ᤐᤥᤱ᤹॥” 53 ᤂᤧᤒᤩᤠᤱ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤔᤏᤠᤜᤠ᤹ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤕᤥ ᤔᤧᤕᤢᤖᤢ॥ ᤜᤧᤰᤁᤩᤠᤱ ᤀᤍᤥᤏᤡᤕᤠᤜᤴ ᤕᤧᤀᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢ॥ ᤛᤥᤗᤥᤔᤏᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤡᤶᤔᤥ ᤐᤣᤃᤧ᤹ᤀᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.