२ साप्मुःन्धुम् 1 - लिम्बुसोलोमनरे़ सिक्कुम्निङ्वाॽ नाःक्तुॽ ( १ हाङ् ३:१-१५ ) 1 दाउदरे़ कुस्सा सोलोमन हाङ्ङिल्ले़ कुहाङ्जुम्मो युक्किन् के़धुम्बा चोगु, थेआङ्भे़ल्ले़ यहवे दाङ्बा खुने़ॽ कुनिङ्वाॽफुमाङ्ङिन् खुने़ॽनु सोरिक् वये़॥ निङ्वाॽफुमाङ्ङिल्ले़ खुने़ॽ साॽरिक् यम्बा चोगु॥ 2 खे़ब्याङ् सोलोमने़न् के़रे़क् इस्राइलिहाॽनु ताॽजे़क्खे़—हे़न्छिङ् हे़न्छिङ्बा लाम्लोबाहाॽ नु किप् थिक् किप् थिक्कोबा लाम्लोबाहाॽ, खासे़न्लोःम्बाहाॽ नु इस्राइलबा के़रे़क् लाम्लोबाहाॽ हे़क्क्याङ् हिम्सयङ् हिम्सयङ्ङोबा लाम्लोबाहाॽनु ताॽजे़क्खे़॥ 3 हे़क्क्याङ् खुने़ॽ नु के़रे़क् सङ्जुम्भोबा मनाहाॽ गिबोनओ के़ने़बा माङ्से़वा चोःक्मादे़न्नो मे़बे, थेआङ्भे़ल्ले़ निङ्वाॽफुमाङ्ङिल्ले़ कुसे़वारोबा मोसाःल्ले़ मुरे़क् खारे़क् थेआङ् के़होप्पादे़न्नो चोगुबा निङ्वाॽफुमाङ्ङिल्ले़ कुदुम्मादे़न् साःङ्गाहिम्मिन् हाबा खे़प्मो ने़स्से़॥ 4 आल्ल दाउदरे़ निङ्वाॽफुमाङ्ङिल्ले़ कुमाङ्हुप् सन्दोक्किन् किर्यत-यारिमलाम् खुने़ॽ खे़ल्ले़ लागि यारिप् चोगुबादे़न्नो थाक्तु, थेआङ्भे़ल्ले़ खुने़ॽ यरुसले़ःम्मोए खे़ल्ले़ लागि साःङ्गाहिम् खिङ्घुआङ् पत्छे़॥ 5 कर हुररे़ कुम्मे़न्छाॽ, उरिरे़ कुस्सा बजले़लरे़ चोगुबा कासाबा ले़त्ति तोःम्मादे़न्निन् गिबोनओए यहवे दाङ्बे़ल्ले़ कुसेसेदे़न् तगि युङे़॥ कल्ले़चोगुल्ले़ सोलोमन नु के़रे़क् सङ्जुम्भोहाॽ यहवे दाङ्बे़न् से़वा मे़त्छे़ आम्भा खे़प्मो मे़बे॥ 6 खे़प्मो तुम्मादे़न् साःङ्गाहिम्मो यहवे दाङ्बे़ल्ले़ कुदगि के़युङ्बा कासाबा ले़त्ति तोःम्मादे़न्नो थारिक् सोलोमने़न् पेआङ् हे़न्छिङ् थिक् मिधिङ्मनादेमनाबा वयागे़न् सिदुङ्जभाहाॽ तोःन्दु॥ 7 खे़न् से़न्दिक् निङ्वाॽफुमाङ्ङिन् सोलोमनओ ओसेःन्धाङ् चोःक्सिङ् हे़क्क्याङ् खुने़ॽ सोलोमने़न् मे़त्तु, “आङ्गाॽ थे़मा पिने़बाबे? आङ्गाॽ मे़त्ताङ्ङे़ॽ॥” 8 सोलोमनरे़ निङ्वाॽफुमाङ्ङिन् नुगप् पिरु, “आदाङ्बारे़ आङ्गाॽ पानुदिङ् आम्बा दाउदे़न् पयम् यम्बा के़जोगुआङ् साॽरिक् लुङ्माॽ के़दुक्तु, खम्भ्याङ् खुने़ॽ कुले़क्वाओ आङ्गाॽ हाङ् के़जोगाङ्ङाङ् वाॽ॥ 9 आल्ल यहवे दाङ्बा निङ्वाॽफुमाङ्ङे, आदाङ्बारे़ आङ्गाॽ पानुदिङ् आम्बा दाउदे़न् के़मे़त्तुबा आदाङ्बारे़ के़माङ्हुप्पिन् से़क्खा चोगे़ॽओ, थेआङ्भे़ल्ले़ इक्सादिङ् खाम्बेःक्को खाम्हिःक् यारिक् यरिक् निःप्मे़न्दे़त् मनाहाॽओ आदाङ्बारे़ आङ्गाॽ हाङ् के़जोगाङ्ङाङ् वाॽआ॥ 10 आल्ल कन् मनाहाॽ लाम्लोमासिरे़ लागि आङ्गाॽ सिक्कुम्निङ्वाॽ नु ने़हिनिङ्वाॽ पिराङ्ङे़ॽओ, थेआङ्भे़ल्ले़ आदाङ्बारे़ कन् यारिक् के़मनाहाॽओ युक् चोःक्मा हाःत्ले़ सुक्तुआङ्बे?” 11 निङ्वाॽफुमाङ्ङिल्ले़ सोलोमने़न् मे़त्तु, “खे़ने़ॽ हाबा अक्तङ्बा निङ्वाॽ के़इःत्तुॽ हे़क्क्याङ् खे़ने़ॽ याङ्साकुन्धे, लाजेॽसिङ्बुङ्, मिङ्सो इङ्धाङ् के़न्नाःक्तुन् हे़क्क्याङ् के़निङ्मिहाॽ से़प्मासिआङ् खे़ने़ॽ के़लागि इरिक् हिङ्मा थाःक् के़न्नाःक्तुन् कर आङ्गाॽ खे़ने़ॽ हाङ् चोःक्ने़बा कन् मनाहाॽओ युक् चोःक्मा सिक्कुम्निङ्वाॽ नु ने़हिनिङ्वाॽ खे़ने़ॽ के़नाःक्तुबाल्ले़ चोगुल्ले़, 12 खे़ने़ॽ सिक्कुम्निङ्वाॽ नु ने़हिनिङ्वाॽ के़घोसुॽ॥ हे़क्क्याङ् आङ्गाॽ खे़ने़ॽ अक्तङ्बा याङ्साकुन्धे, लाजेॽसिङ्बुङ् नु मिङ्सो इङ्धाङ्ङाङ् पिने़रो, खे़ङ्ग खे़ने़ॽनुःल्ले़ तगिबा आत्तिन् हाङ्ङिल्ले़आङ् मे़ङ्घोए वये़, हे़क्क्याङ् एगाङ्बा हाङ्ङिल्ले़आङ् मे़घोसुन्लो॥” 13 खे़ब्याङ् सोलोमने़न् गिबोनबा माङ्से़वा चोःक्मादे़न्नोनु तुम्मादे़न् साःङ्गाहिम्मोलाम् यरुसले़ःम्मो नुःक्खे़ थाङे़, हे़क्क्याङ् इस्राइलओ हाङ्युक् चोःक्मा हेःक्तु॥ 14 सोलोमनरे़ यरिक् अन्लाधाहाॽ नु अन्हाॽ फुक्खुसि॥ खुने़ॽ १,४०० अन्लाधाहाॽ नु १२,००० अन्हाॽ कत्तुसि॥ कुभा खुने़ॽ अन्लाधा ये़म्मा ये़क्यक्हाॽओ नु कुभाग खुने़ॽनुए सोरिक् यरुसले़ःम्मो ये़प्सुसि॥ 15 हाङ्ङिल्ले़ यरुसले़ःम्मो साम्म्याङ् युप्पाहाॽ लुङ् यारिक् यरिक् नु साम्माङ्सिङ्हाॽ उःक्चम्जम्बादे़न्हाॽओबा पःत्छेॽहाॽ यारिक् वे़त्ते़सरे़ वये़र चोगु॥ 16 सोलोमनरे़ कुअन्हाॽ मिस्र लाजेॽ नु क्युएलाम् मे़लःत्तु मे़धाक्तुसि॥ हाङ्ङिल्ले़ कुले़ङ्हङ्बाहाॽरे़ खे़ङ्हाॽ क्युएलाम् मे़इङु मे़दारुसि॥ 17 अन्लाधा थिक्ले़ ६०० सेकेल युप्पा नु अन् थिक्ले़ १५० सेकेल युप्पाओ मिस्रलाम् मे़लःत्तु मे़धाक्तुसि॥ हाम्भलॽरिक्के खे़ङ्हाॽरे़ हित्ति नु अरामिहाॽरे़ खुन्छिॽ के़रे़क् हाङ्हाॽरे़ लागिआङ् लःप्मा थाक्मासि याःम्बक् मे़घोसुआङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.