MARK 1 - Masanbo Naga (Re-Edited) Bible (BSI)

John Baptist Niu Dinronbo

¹ Haise Tingwang Nahpiu Jesu Khrista lamga Kawibo Champao si-e.

² Haise phaimiukakung Isaiah niu raokhaibo kumjiu padbo-e: “Tingwang niu din-e, ‘Nangniu tadrabo npuise kaden khaira, Iniu agu ladlangtadmaitu nasuangga langkhai bine.’

³ Ramjing gase chakhuan khat senjiu bamme, Rapiu npuise kaden khailo; pagu npuise kam maji khailo!’”

⁴ Sichiujiu John Baptist niu ramjing gase, maidungtu tadui nphum khaijiu khatdi dinron wang-e. Paniu maidung khuga din-e, “Naliu nuan gasu marilujiu tadui nphum lulo, sichiusai Tingwang niu naliu nuanse kuak khai bine”.

⁵ Judaea ramluong khatdi Jerusalem namdi gasu chamai kengkha tadpadjiu John chamse nking-e. Sichiujiu paliuniu paliu nuanse din madu padde, siga paniu paliutu Jordan Giu gasu tadui nphumkhai bide.

⁶ John hai qontrao-giu fai piu-e, pakhen-ga chamigi khen-gak khek-e, khatdi takao nai makhuidui siniu pagu tatek thiu-e.

⁷ Paniu maidung khuga madujiu din-e, “ Asailam wangkinbo piu sira asuang di-nkiu-e. Ira kinkiujiu paphitop riangdi khira akaji makge.

⁸ Iniu naliutu tadui gasu nphum khaibo-e, chiudi para naliutu Masanbo Hiupuina gasu nphum khai rabo-e.”

Jesu Tu Tadui Nphumbo Khatdi Hiambo

⁹ Jesu niu Galilee ramluong Nazareth gasu tadpadbo pating watheng makbo lungga John niu patu Jordan gasu tadui nphum khai bide.

¹⁰ Sichiujiu Jesu niu tadui gasu npadgapda tinggen akhamse lepadbo khatdi Hiupuina siniu makhao kumjiu pariga lenkiu taobo paniu ngao-e.

¹¹ Siga tinggen lamsu chakhuan khat senkiu-e: “Nang hai Iniu kungbo Anahpiu si-e. Iniu nariga alung kimme.”

¹² Sichiujiu Hiupuina siniu patu ramjing lamse maluang khai mide.

¹³ Siga pah tingmik atai bamjiu, Satan siniu wangjiu patu hiam sude. Siga nkan khaoringdi bamme, chiudi mazadung siniu wangjiu patu akhi khaide.

Jesu Niu Chakha Minmai Khang Madaitu Kubo

¹⁴ John tu kavangkyga khai mibo sai, Jesu niu Galilee ga tadlujiu Tingwang gu Kawicham hai dinron sude.

¹⁵ Paniu din-e, “Pawanse wangtang mide, khatdi Tingwang gu Chawangdihse nawang mide! Naliu nuan gasu mari lujiu Kawicham haitu malum lulo!”

¹⁶ Sichiujiu Jesu niu Galilee Ajai mungga tadkiuboga chakha khamai khangnia, Simon nai pasai kariupiu Andrew niu alang thonkin niubo ngaode.

¹⁷ Jesu niu panai khuga din-e, “Wanglo, asai suilo, Iniu nanaitu chamai minmai pithiu khai bine.”

¹⁸ Siga panainiu panaigu alangse thondiak lujiu pasai suitadnuang mide.

¹⁹ Paniu sichiu tadpad lanboga, singna khangnia, Zebedee nahpiu, Jacob nai John tu ngaode. Panainiu aliam lunggase panaigu alang makhajiu bamniu-e.

²⁰ Jesu niu panaitu ngao gapboga panaitu kude, sichiujiu panainiu panaipiu, Zebedee khatdi tajengmai situ aliam lungga phutkhai lujiu Jesu sai suitad mide.

Rasa Phungbo Piu

²¹ Jesu khatdi pakhommaidungse Capernaum namdiga wangde, khatdi Tabamnaise Jesu niu maduikyga tadlujiu katikhai sude.

²² Paniu katikhaibose chiulubo mai hina paliu suang hamide; palamra paniu katikhaibo hai Tacheng-tajaigu katipaodung kum makjiu, pumtan jaojiu kati khai-e.

²³ Siga rasa phungbo piu khatniu maduiky lung gase ngut lujiu marajiu sen-e,

²⁴ “Nazareth Jesu, nangniu aliutu degu kamkhaini jiulo? Nang aliutu kam maha mira haiga wang jiuma? Nang saolo chiubo I si-e; nangra Tingwang gu masanbo ladlangtadmai-e!”

²⁵ Jesu niu rasa situ chamtan pijiu din-e, “ Maliu tulo, khatdi sinapiu khugasu npad milo!”

²⁶ Rasa siniu maipiu situ kam mathiusui khai lujiu khatdi kam mara khai lujiu, pakhu gasu npad mide.

²⁷ Siga mai hinase paliu suang hachang hamide, khatdi paliu karai khat-khat khuga din-e, “Haise dechiubo gulo? Haise katambo khatdi kasanbo katikhai makma? Hainapiu hainiu rasatu chamtan pira pumtan bamme, khatdi paliuniu pacham majai-e!”

²⁸ Haichiujiu Jesu makense Galilee ramluong pakhiangna dinchia mide.

Jesu Niu Maidungtu Wikhaibo

²⁹ Jesu nai pakhommaidung, khatdi Jacob nai John jaojiu maduiky situ phut lujiu Simon nai Andrew kyga tad mide.

³⁰ Siga Simon naise kakhunjiu paziga jibambose, Jesu wangji-wangkari pakhuga paokhaide.

³¹ Siga paniu pakhuga tadlujiu paben jusu khaiboga, kakhunbose winuang mide; sichiujiu paniu buangsu lujiu paliutu akhikhai sude.

³² Naimik kiujiu, chawanse wang miboga maidung siniu Jesu khuga mara-sathiu maidung khatdi rasa phungmaidungtu maluang wangde.

³³ Sibo namdiga bammai hina, sibo ky kamaga wang madui sude.

³⁴ Siga Jesu niu mara sathiubo mai hinatu wikhai bide, khatdi rasa phungmaidung tudi hathonpad khaide. Paniu rasadung situ pijiu wadi dinpad khai makge, palamra paliuniu patu saolo chiubo sibamme.

Jesu Niu Galilee Ga Dinronbo

³⁵ Pasaibo nai nsuan-kalu, ting benpad makhaboga, Jesu niu buangsu lujiu sibo kyse phutlujiu tadmide. Sibo namdak gasu katingjingbo bamlam kakheng thiura tadmide.

³⁶ Siga Simon nai pakahmaidung siniu patu phiutad sude,

³⁷ sichiujiu paliuniu patu daoluboga, pakhuga din-e, “Mai hinaniu natu phiukinbo-e.”

³⁸ Chiudi Jesu niu paokakge, “Aliuniu haibo mungga bambo namdung gadi tadrabo-e, palamra haijengniu I wangbo-e.”

³⁹ Sichiujiu Galilee ramluong pakhiangnaga dinron tadjiu maduikyga katikhai-e , khatdi rasadungtu hathon pad khaide.

Jesu Niu Nphenmai Khattu Wikhaibo

⁴⁰ Nphenmai khatniu Jesu khuga wangjiu, khudung kiujiu patu nkha khaira khengjiu din-e, “Nangniu sui-e sai, atu kam masan khai ngamme.”

⁴¹ Jesu niu patu lungsaboniu phuilujiu, patu kaba khaijiu din-e, “Iniu natu suikhai-e, masan milo.” (Ka-nphenbo rapot haitu masan kamakbo gu-e chiujiu lubo-e).

⁴² Siga ka-nphenbo piuse masannuang mide.

⁴³ Sichiujiu Jesu niu pakhuga chamtan pikhai lujiu langkhai mide.

⁴⁴ Paniu pakhuga din-e, “ Kinglo, haise mai khat khugadi din mane. Chiudi singku khuga tadlujiu natu piphui khailo, sichiujiu Mose gu chamtan saisuijiu, mai hinaniu tuhoira nang masan mide chiubo silura rathak maniase kadkhai milo.”

⁴⁵ Chiudi sinapiu siniu sibo chamse pabam hinaga dinron-tad mide. Paniu din mathiuju kami jengniu Jesu se namdiga madujiu tad ngamlak mide. Sichiujiu tingjingbo bamga paronna bam mide, sigadi maidung siniu pabam hina lamsu pakhuga wangde.