JOHN 1 - Masanbo Naga (Re-Edited) Bible (BSI)

Karingbo Ladkeng

¹ Kadihpiri dammak gasu Ladkengse bamniu-e, pahai Tingwang panai bamniu-e, khatdi pahai Tingwang panai nchamme.

² Paphibang gasu Ladkengse Tingwang panai bamniu-e.

³ Papen gasu Tingwang niu mania hina damkhai-e, gandam khatnagadi pakhu ganiu makjiu dambo ha-e.

⁴ Ladkengse karingbo phibang si-e khatdi karingbo haisiniu chamaina khuga kabenbo phungwang-e.

⁵ Kabenbo siniu tamiuboga thaoben khai-e, sichiujiu tamiubo siniu wadaodi kammid lanlu makge. copy

⁶ Tingwang niu paladlangtadmai khat pazanniu John kubo piutu langkhai-e.

⁷ Paniu kabenbo lamga maidung khuga paokhaijiu, paliuniu pagu champao situ chiulujiu malum lura leng-e.

⁸ Pasiakra kabenbo makge, chiudi kabenbo lamga dinkhaira wangbo-e.

⁹ Haise palingbo kabenbo si-e, palamra kabenbo siniu kadihpiriga wangjiu chamaina mathiu khuga thaoben khai-e.

¹⁰ Ladkengse kadihpiriga bamniu-e, khatdi Tingwang niu papen gasu kadihpiritu damkhai-e, chiudi kadihpiri niu patu silu makge.

¹¹ Paniu pagu kadihga wangbo-e, chiudi pamaidung siniu patu lukhai makge.

¹² Chiudi maidung khangsianiu patu lukhai-e, khatdi patu malum khai-e, sichiujiu paniu paliutu Tingwang nahdung pithiu khaira pumtan pikhai-e.

¹³ Paliuse chamaina lunlung gasu Tingwang nahdung thiubo makge, chiubora chamaina khat piu nahdung thiubo makge, chiudi Tingwang papum siakniu paliu piu thiubo-e.

¹⁴ Sichiujiu Ladkeng siniu chamaina lun thiuwangbo-e, khatdi lungsiat nai majiboniu phui lujiu aliu ruangga lungwang-e. Aliuniu pakendise ngaode, sibo kendise Papiu gu kamalibo Nahpiu si-e.

¹⁵ John niu palamga dinjiu haichiu sen-e, “Hainase Iniu dinbambo pah si-e, pahai asailam wangkin-e, chiudi para asuang di-e; palamra atu dammak gasu para bambo-e.”

¹⁶ Pakhuga lungsiatniu phuijiu bambo jengniu, paniu aliu mathiutu thoi khaide sichiujiu aliu khatniu khattu thoikhai raleng-e.

¹⁷ Tingwang niu Tacheng-tajaise Mose khuga pikhai-e, chiudi lungsiat nai majibo haira Jesu Khrista khuga suniu-e.

¹⁸ Mai khatniudi Tingwang tu ngao makge. Pumlibo Nahpiu, Tingwang tu maluang bambo paniu patu pisi khaibo-e.

John Baptist Gu Champao

¹⁹ Jerusalem ga bammai Jehudi maigu apaimaidungniu, singkudung nai Levi mai khangsiatu John khuga langkhaijiu maniu-e, “Nang hai saolo?”

²⁰ John niu paliutu paokak makbo thiumakjiu, haichiu dinkhai-e, “Ira Khrista se makge.”

²¹ Paliuniu maniu-e, “Sichiusai nang saolo? Nang hai Elijah sima?” John niu paokakge, “Chiumakge.” Siga paliuniu maniu-e, “Chiusai nang hai phaimiukakungse ma?” Paniu paokakge, “Chiumakge.”

²² “Sichiusai nang hai sao siaklo?” chiubo aliu khuga dinkhailo, aliutu langkhai mai khuga aliu pao malan wangra leng-e. “Nangniu nalamga dechiujiu dinralo?”

²³ 23 Phaimiukakung Isaiah niu dinkhai mibo chamkengse khoilujiu John niu din-e, “Ira ramjingga chakhuan senkinbo si-e: Rapiu niu tadrabo npuise kam maji khailo.”

²⁴ Pharisee maidunggu walang tadmai siniu John khuga maniu-e,

²⁵ “ Nang hai Khrista dimak, Elijah dimak, phaimiukakung dimak sai dekamjiu tadui nphumbo tien hai kambam jiulo?”

²⁶ John niu paokakge, “Ira taduiniu nphum khaibo-e, chiudi naliu ruangga chap bambo piutu naliuniu simakge.

²⁷ Para asailam wangkinne, chiudi Ira paphitop riangdi khira akaji makge.”

²⁸ Haidungse John niu Jordan Giu tingbanglam bambo Bethany ga, John niu tadui nphum bambo lon padmibo-e.

Tingwang gu Milypoi

²⁹ Pasaibo naise Jesu pakhuga wangkinbo ngaolujiu John niu din-e, “Phuilo, uise Tingwang gu Milypoi, kadihpirigu nuan phung maha khaibo piu si-e!

³⁰ Mai khat asailam wang kinne, chiudi para asuang di-e, palamra atu damkhai makha gasu para bambo-e, chiujiu Iniu dinbambo si-e.

³¹ Pase saokumbo mai thiu ralo chiubo simakge, chiudi Israel maidungtu pijiu patu silu raleng Ira tadui nphum khaibo-e.”

³² Sichiujiu John niu pagu jengdin thiujiu din-e, “Tinggen lamsu makhao kumjiu Hiupuina pariga kiu taokhaibo Iniu ngao-e.

³³ Haise pa-e chiubo Ira silu makge, chiudi atu tadui nphumra langkhaibo Tingwang siniu akhuga din-e, ‘Mai khat piriga Hiupuina kiubo nang ngaosune, pase Masanbo Hiupuina gasu nphum khai rabo piu si-e.”

³⁴ John niu din-e, “Haise Iniu ngao lubo-e khatdi naliu khuga dinbo-e, chiubora pase Tingwang Napiu si-e.”

Jesu Gu Karaibo Ladlangtadmai

³⁵ Pasaibo naise John niu pakhommai khangniatu maluang lujiu chap bamboga;

³⁶ paniu Jesu wangkinbo ngao lujiu din-e, “Phuilo, uise Tingwang gu Milypoi si-e!”

³⁷ Paniu dinbose pakhommai khangnia siniu chiulujiu Jesu sai suitad mide.

³⁸ Jesu niu mariwang paliutu ngao lujiu paliu khuga maniu-e, “Naliuniu degu phiukin gulo?” Paliuniu paokakge, “Rabbi yo, nang delam lungkin jiulo?” (Rabbi ladkeng rambaniu ‘Katipao’ chiubo-e).

³⁹ Paniu paokakge, “Wangjiu phuilulo?” (Haise n-nien wanchak madai ningga-e). Sichiujiu paliuniu pasai suilujiu paniu bambo bamse ngao lujiu sibo nai gasu pasai suitad mide.

⁴⁰ Khang khat sira Simon Peter saikariupiu Andrew si-e.

⁴¹ Paniu pasingna Simon tu ngao lujiu din-e, “Aliuniu Messiah tu daolude.” (Paramba siniu Khrista chiubo-e).

⁴² Sichiujiu paniu Simon tu Jesu khuga puiwang-e. Jesu niu patu phuilujiu din-e, “John nahpiu Simon yo, chiudi natuse Cephas chiujiu kumine.” (Cephas chiubo haise Peter chiubo panai nchambo-e, paramba siniu Tudi chiubo-e).

Jesu Niu Philip Nai Nathanael Tu Kubo

⁴³ Pasaibo naise Jesu niu Galilee lam tadraleng kaden lujiu tadpadboga, paniu Philip tu daolujiu pakhuga din-e, “Asai suilulo.”

⁴⁴ (Philip ra Andrew nai Peter niu lungbo bam Bethsaida gasu-e).

⁴⁵ Philip niu Nathanael tu daolujiu din-e, “Tacheng-tajai ga Mose niu raokhaibo khatdi phaimiukakung mainiu raokhaibo patu aliuniu daolude, para Nazareth ga bambo Joseph nahpiu Jesu si-e.

⁴⁶ Nathanael niu din-e, “Nazareth gasu wa kawibo padlu buima?” Philip niu paokakge, “Wanglo, phui matailo!”

⁴⁷ Nathanael niu pakhulam wangkinbo Jesu niu ngao lujiu din-e, “Haiga Israel mai masan siakbo piu bamme. Pakhuga kamaobo wa khatdi ha-e!”

⁴⁸ Nathanael niu pakhuga maniu-e, “Degasu nangniu atu silu jiulo?” Jesu niu paokakge, “Philip niu natu kubo masuang, nangniu ndutbang hangga chapjiu bambo gasu Iniu natu ngaokhai mibo-e.”

⁴⁹ Nathanael niu paokakge, “Katipao yo, nangra Tingwang Nahpiu, Israel mai Wangpiu si-e.”

⁵⁰ Jesu niu pakhuga din-e, “Nang ndutbang hangga chap bamme chiujiu Iniu dinbo donniu nang malum jiuma? Nangniu haisuang kadibo ngao sune!”

⁵¹ Sichiujiu paniu paliu khuga din-e, “Iniu naliu khuga pachang paling dinbo-e, Tinggen nkhamse lepadbo khatdi Tingwang mazadung siniu Nahpiu riga kiu-khangjiu bambo naliu ngao sune.”