JAMES 1 - Masanbo Naga (Re-Edited) Bible (BSI)

¹ Tingwang khatdi Rapiu Jesu Khrista vangpiu James niu, kadihpiriga lung mara tadmi maidung hinatu kahum khai-e.

Malumbo Nai Ningting

^2-3 Singnamai yo, naliu khuga madiubo pajat hina hai wangsai naliu sanwi-e chiu maning lulo, palamra naliugu malumbo siniu haikumbo madiubo hinatu ngam luboga, pumtanse wangbo-e.

⁴ Sichiujiu naliugu khengsibo siniu pi kaomi makra phui lulo, sichiusai wakhatnadi tangmakbo thiumakjiu tathui lubui-e.

⁵ Sichiujiu mai khat kumboniu ningting tang maksai, mai hinatu pikhai sibo khatdi paochali makjiu pikhaibo Tingwang khuga khenglulo, chiusai patu pikhai bine,

⁶ Chiudi nangniu khengbo tingga malum masa makjiu, malum siakjiu khenglulo, delosai malum masabo sira tingkainiu hunkhang hunkiujiu bambo duiliu tah kumbo-e.

⁷ Sikumbo mai siniu Rapiu khugasu wakhatnadi ngaolura agun tulo.

⁸ Palung chun nia phungbo para palung nchang mak mai-e.

Kaleksamai Nai Kalekwimai

⁹ Khristian mai kaleksamai situ Tingwang niu jukhang khai biboga chunwi lulo,

¹⁰ sichiujiu Khristian kalekwimai situ Tingwang niu jukiukhai biboga chunwi lulo. Palamra kalek wibose charapen kumjiu kuimi rabo-e.

¹¹ Naimik tankhangjiu tingthiu suboga, chapiubuan situ phu agui mijiu, papense nkai mi-e sikumjiu kalek wimaidi paliu lai padjiu matan kinbo sidi hami rabo-e.

Madiubo Nai Kahiambo

¹² Kamadiuboga kaomi makjiu khenglu maise padon wi-e, palamra patu madiubose ngamlu misai, Tingwang niu patu lungsa maitu ladriat khai nbambo ringbo tathuonse paniu daorabo-e.

¹³ Aliu khuga kahiambo wangboga, ‘Tingwang niu aliutu hiambo-e’ chiujiu din tulo, palamra Tingwang niu mai khattudi kasaboga hiamkhai makge,

¹⁴ Chiudi aliuniu wakhat masenbo gasu jupad miboga khatdi aliugu kasabo lungchun siniu aliutu hiamlubo-e.

¹⁵ Sichiujiu kasabo lungchun siniu pawon phungmiboga nuan mana padle, khatdi nuan siniu dikhangboga kashaibo padle.

¹⁶ Lungsabo singnamaidung, naliutu pijiu sonmi tulo.

¹⁷ Kawibo kalen khatdi tathuibo kalen hina tinggen lamsu kiubo-e; haise tinggen nbiutu Dampao, kalimakbo Tingwang maksai tamiu lanmakbo pakhu gasu wangbo-e.

¹⁸ Paniu aliutu pagu gandam ruangga raithubo rasy thiulu raleng pagu majibo ladkeng siniu pamaning saisuijiu aliutu damwangbo-e.

Chiubo Nai Kambo

¹⁹ Singna kakung maidung yo, mai hina nking silo, chiudi chalad dinnuang mane, khatdi chalung pomnuang mane chiubo hai maningtaolo.

²⁰ Palamra chamai lungpom siniu tacheng matipbo Tingwang chunning kamlu makge.

²¹ Sijengniu masan kamakbo lunlung khatdi kasabo nkhai-rili hina phut milo. Naliutu ranlura, naliu lungchun-ga paniu lingkhai mibo ladkeng situ lukhai lujiu Tingwang khuga wanglulo.

²² Naliuniu chalad situ ka-nkingbo mai thiu makjiu, kakam maise thiu lulo.

²³ Delosai mai khatniu tacham chiulujiu tatiense tenmak saira chahiubungga paronna pazu kaphuibose kumbo-e.

²⁴ Paronna pazu phuikhai lujiu tadpad miboga mangai mibose kumbo-e.

²⁵ Chiudi nangniu maidungtu khenrang thiukhai ngambo tacheng-tajai situ phuilujiu, khatdi nking lujiu mangai makjiu, tatien thiusai nangniu kambo hinaga Tingwang niu thoikhai birabo-e.

²⁶ Nangniu, naronna nacheng matip-e chiu maning jiuma? Nangniu naleetu thinman ngam maksai nacheng matipbose mathakubo-e, khatdi naronna natu sonmibo-e.

²⁷ Papiu Tingwang suangga masanbo khatdi nchangbo racheng sira: kami-magentu paliu magenthakga phuikhai sibo khatdi kadihpirigu kasabo lunlung gasu paronna maren lubo si-e.