DANIEL 1 - Masanbo Naga (Re-Edited) Bible (BSI)

Daniel Nai Pakamai Racham Nebuchadnezzar Gu Ladjankyga Chabon Maidung

¹ Jehoiakim niu Judah mai wang thiubo, pasumbo kumga Babylon mai wang Nebuchadnezzar niu Jerusalem tu aphenjiu namdi situ taoweng lude.

² Rapiu niu suikhaijiu chawang Jehoiakim tu paniu min lude khatdi charakygu chakhiu-chalandung kasiadi sutlude. Khangsia tudi paniu kavangleng minlujiu Babylon ga bambo paraky lam puiwang mide, khatdi sutlubo chakhiu-chalan hinase parakygu wakhaikiga phungwang khai mide.

³ Chawang siniu pagu chakampaodunggu papee Ashpenaz khuga chamtan pijiu kavang leng minwangbo Israel mai rong gasu chawang kikhunmai khatdi kadi-kathengmai kikhun gasu chabonmai khangsiatu kada raleng dinkhaide.

⁴ Paliu hai paliu zu, paliu lun wirabo-e, ningting-charak rabo-e, wa kati-mawi kalumai, wasinuang mai, khatdi paliu pumga pajam-para kahamai thiurabo-e, sichiujiu paliu hai chawanggu ladjankyga thinpiu kasuimai thiurabo-e. Ashpenaz niu paliutu Babylon mai lad kenra khatdi raora katikhai rabo-e.

⁵ Paliutu naimachangna chawanggu ladjankyga bammaitu katiu-kasak pibo kumjiu pirabo-e chiujiu chawangniu chamtan pikhai-e. Haichiujiu takum sum kati-alilubo sai paliuse chawang suangga wang chap rabo-e.

⁶ Paliu ruang gasu kadalumai sira Daniel, Hananiah, Mishael khatdi Azariah paliu-e, paliu mathiuse Judah kiphiu gasu-e.

⁷ Chakampaogu papee siniu paliu zan kasanbo, Belteshazzar, Shadrach, Meshach khatdi Abednego chiujiu mathak khaide.

⁸ Daniel niu chawanggu ladjan kyga katiu-kasak tiu-sakjiu chara-cheng gasu patu kam taniami makra chaplujiu, patu nkha khaira Ashpenaz khuga khengsude,

⁹ siga Tingwang niu Daniel tu lungsa khaira Ashpenaz khuga kamkhai bide.

¹⁰ Chiudi Ashpenaz niu chawangtu pingbo jengniu Daniel khuga din-e, “Naliuniu tiu-sakra chawangniu chapkhai mibo-e, sichiujiu naliuniu kakibo chabon maidung kumjiu naliu pum wibose ngaopad maksai, paniu atu kamshat mibo sui-e.”

¹¹ Siga Daniel niu patu khatdi pakamai khangsumtu khuanra Ashpenaz niu khai nbambopiu khuga tadlujiu dinsude.

¹² Paniu din-e, “Jengriu aliutu madiujiu, aliuniu tiura chapiuniw chaganniw khatdi sakra tadui nakha pikhailo.

¹³ Sichiujiu chawanggu ladjan kygu katiu-kasak, tiu-sak bammai chabon maidungtu nai aliutu kadajiu saoniu wi-nkiulo chiubo nang phui kada matailo.”

¹⁴ Jengriu leng paliutu madiura paniu suikhaide.

¹⁵ Pawanse tangjiu paliutu phuiboga paliu hai chawanggu ladjan kyga katiu-kasak, tiu-sak bammai suang, paliu pum wi-nkiubo khatdi tan-nkiubo ngao padle.

¹⁶ Sijengniu sibonai gasu paliuleng chawangniu pikhaibo sung chapiuniw chaganniw pikhaira paliutu khuanpiu siniu suikhaide.

¹⁷ Tingwang niu chabonmai khang madai situ ariakgu tasi-ningting khatdi wa makum kasibo khaoti pikhaide. Sibo riga paniu Daniel tu madungao nai chamang chalipadra ningting pikhai bide.

¹⁸ Chawangniu riatkhaibo takum sum sailam Ashpenaz niu chabonmai mathiu situ Nebuchadnezzar khuga puiwang khaide.

¹⁹ Chawangniu paliu mathiutu npao sude siga Daniel, Hananiah, Mishael khatdi Azariah paliuniu kakimai suang nkiujiu palung pikim khaide. Sijengniu paliu hai chawanggu ladjankyga bammai ruangga jaomide.

²⁰ Wajiukha kakungbo ladlui chawangniu maniuboga maksai kakung-kungbo padboga, haimai khang madai hainiu pagu kadihga kakibo sailad kasimai maksai chamik thao kadadmai suang silon kariu nkiu-e.

²¹ Daniel hai Babylon mai kadihtu Persia mai wangdipiu Cyrus niu ngamlubo katang chawanggu ladjankyga bamkhangbo-e.