फीलेमोन् 1 - ल्होमी1 ख्रीष्ट् येशुगी ढीक्ल चो़ल्ल ॱस्योर्न यो़क्केन्, ङ पावल् धङ् पी़न्ज्या तीमोथीगी ङीक्की झ्यम्बे ले च्यीक्की छ्यीट्टो फीलेमोन् नीज्यरङ्, 2 हुनी भुमी़ पी़न्ज्या अप्फीया, हुनी ॱमक्मी डस्सी ङीक्की छ्यीट्टो अर्खीप्पस् धङ् हुनी नीज्यरङ्गी खीम्दु जोम्गेन् छ्यो़ छोल हीगो ढीन तोङ्गो़त्। 3 खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। 4 ङे ॱसुव तोबे यङ्ल नीज्यरङ् ढेन्सो़ झ्यीन को़न्ज्योक्ल छीगङ् थु छ्यी पु पुब झ्यीक्को़त्। 5 घन्ड हीन् सीन्न चोव ज्यीन्दक् येशुल नीज्यरङ्गी झ्यम्ब धङ् छ्य गस्सी स्योक्कुक् सीर धङ् को़न्ज्योक्की मी चङ्म घयेत्ल झ्यम्ब झ्यीक्कुक् सीरे केच्च्य ङे ॱह घोगुक्। 6 ख्रीष्ट्तङ् मत् ढेबल हज्यरङ्ल थोबे गये लेमी़ ढे घयेत् दी नीज्यरङ्गी धक्पोक्म ॱह घोज्ये यो़प्पल धङ् नीज्यरङ्गी छ्य स्यक्पे लेमु दी ॱयोङ्माल आक् तो़न्न ॱस्यो़च्च्ये यो़प्पल ङ ॱसुव तोप्को़त्। 7 पी़न्ज्या नीज्यरङ्गी को़न्ज्योक्की मी चङ्म घयेत्ल ॱसीम् गव युङे ॱलोप्स्यीक् टेप्प धङ् झ्यम्ब झ्यीबे लेगी ङल दो़न्दो़त् गेस धङ् ॱलोप्स्यीक् ॱङीच्च्युङ्। ओनेसीमस्की ढीक्ल फीलेमोन्ल स्युव ज्यब ८-२२ 8 ॱनी नीज्यरङ्गी हरुङ्द घन्ड झ्यीत् गोगेन् बेक्क हुगी ढीक्ल खक्को़ ज्यक्च्येमे ॱहक् ङल ख्रीष्ट् च्यानी झ्युङ्न यो़त्। 9 ॱनी यो़त्न अक्, ङ नीज्यरङ्ल खक्को़ मेम्ब, ख्रीष्ट् येशुगी ढीक्ल चो़ल्ल ॱस्योर्न यो़क्केन्, गेङ्गेन् ङ पावल्की नीज्यरङ्ल झ्यम्बे लम्नी स्युव ज्यक्केन्। 10 ङ चो़न्दु कीङ्न यो़प्पे यङ्ल ङ च्यानी कीबे ङे भु डस्सील झ्युङे ओनेसीमस्की ढीक्ल स्युव ज्यक्केन् हीनो। 11 हीगो नीज्यरङ्ल एल्ला घो ॱमीत् छ्यो़त् यो़क्केन् बेत्। ॱनी हुन्दो ह हीगो नीज्यरङ्ल अक्, ङल अक् घो छ्यो़क्केल्ल झ्युङ्न यो़क्केन् बेत्। 12 ॱनी हीगो ह नीज्यरङ् च्याल ॱलोक्न तोङ्गो़त्। हीगो ङे ॱङीङ्दङ् डवे मी हीनो। 13 केच्च्य ॱनेम्बी़ ढीक्ल ङ हीदु चो़ल्ल ॱस्योर्न यो़प्पे यङ्ल नीज्यरङ्गी छप्पुल हुगो स्येन् ङे दगुल स्योक्कीन् थेच्च्युङ्। 14 ॱनी नीज्यरङ्दङ् ॱमत् ती़म्बल स्यक्न नीज्यरङ्ल ङे खेरक् तङ्न गये ले झ्यीत्तु ची़प्पल डोयेत् ॱनो़ज्युङ्। ॱनी हीन्दुक् मत् झ्यीब, नीज्यरङ्गी ॱलो़लङ्गी झ्यीन गा युङेत् ॱनो़न ङे हीगो तोङ्गो़त्। 15 ॱनी नीज्यरङ्दङ् हुगो कप्तोक् च्यीक् भीन दो़च्च्येगी धो़न् दी ह हीनी झ्यीब दी धी़ ज्यी़न्दु हुगो नीज्यरङ्दङ् कङ्ज्यीक्ल दो़च्च्येगी ढीक्ल झ्युङ हीङ्गो़प्पेत्। 16 हुगो ह हीनी झ्यीब दी नीज्यरङ्गी रङ्मो़ मीप्पे ॱयोक्पु छ्युवक् मेम्ब, हुले गया नीज्यरङ्गी झ्यम्बे पी़न्ज्याल झ्युङ्न यो़क्केन् बेत्। ॱनी हुगो नीज्यरङ्गी लेस्स्यीङ्गी मी डस्सीरङ् ॱसम्, यङ् चोव ज्यीन्दक्तङ् मत् ढेबे मी डस्सी ॱसम्न आक्, हुगो ङे एक् झ्यम्बे मीरङ् हीन्। ॱनी हरुङ् हील ङले त नीज्यरङ्गी च्यीबा झ्यीच्च्ये ॱनो़ब युङ्गो़ट्टो। 17 नीज्यरङ्गी ङल दीम्बरङ् छ्यीट्टो हीम्ब ॱसम्गो़त्न, हीगो हुदु नीज्यरङ् च्येल्ल ॱलीबे ॱङेस्स्यो हीगोल ङ हीम्ब डस्सी ॱसम्न लेमु झ्यीत्रो झ्यी। 18 हीगी नीज्यरङ्ल ङीबरङ् झ्यीन यो़त्, यङ् चीदोङ् लीन्ज्येरङ् यो़त्न अक्, हुगी चीदोङ् दी ङे झ्यी योङ्। 19 म दीरङ् ङे जप् योङ् सीन्न हीगी यीगी हीगो ङरङ् पावल्की लक्ताम ढीगो़त्। नीज्यरङ् छी थर्वे ढीक्ल ङे नीज्यरङ्ल ढीन् छक्न यो़त् सीर् मीत् गो़ब यो़ट्टो। 20 ङे पी़न्ज्या नीज्यरङ्गी ङल चोव ज्यीन्दक्की लम्नी ख्रीष्ट्तङ् मत् ढेबल ङे ॱसीम्ल फेम्ब गव युङे लेमु झ्यीत्रो झ्यी। 21 ङे घन्ड ढीन तोङ्गुक्क हुल नीज्यरङ्गी नेन्न झ्यीक्केन् बेत् सीन्न ङ ॱलो खीन यो़त्। ॱनी हरुङ्द ङे स्युव ज्यबे केच्च्य हीले एक् ॱल्हक्मा झ्यीक्केन् बेत् ॱनो़बे देङ्जो़त् ङल यो़त्। 22 ॱनी स्योल्ल हुदु ङल अक् नीज्यरङ्गी दो़स्स च्यीक् ठोक्क झ्यीन स्योक्रो झ्यी। खीत्रङ्गी ॱसुव तबल पीब को़न्ज्योक्की ङ हुदु खीत्रङ् च्याल युङ् छुब सोगो़दङ् ॱनो़बे रीगो यो़त्। 23 ख्रीष्ट् येशुगी ढीक्ल ङदङ् दल हीन चो़ल्ल ॱस्योर्न यो़क्केन् इपाफ्रास्, 24 ॱनी ङे ले च्यीक्की छ्यीट्टो मर्कुस्, अरीसतार्खस्, डेमास् धङ् लुका झ्यीबे रङ्ल छ्यक्सुम् थेमु यो़दो सीन्न सीगुगो। 25 चोव ज्यीन्दक् येशु ख्रीष्ट्की थुज्यी खीत्रङ् घयेक्की ॱसीम्गी दगुल युङ् युङ युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.