हीब्रु 1 - ल्होमीतेङ् यी़गी भङ्ज्येम्बले येशु छ्यीया १-१४ 1 धङ्बु हज्यरङ्गी पुबु ॱमुमु घयेत्ल को़न्ज्योक्की खोङ् रोरङ्गी ॱसुङ्स्येत् घयेत् लेमु ॱनम्ब गज्येल्ल कलुङ् ॱस्यो़क्केन् घयेक्की लम्नी लेम्म गज्येन् ॱस्येप्प बेत्। 2 ॱनी दङ् हरीङ् स्युक् थमे धी़ हील खोङ्गी हज्यरङ्ल रोरङ्गी ॱरेबी़ लम्नी ॱसुङ्गेन् बेत्। खोङ्गी ॱरेबु छङ्म की़ङ्गी दक्पु युङ्ज्ये यो़प्पल खोङ्गी को़ब बेत्। ॱस धङ् ॱनम् हीगो जेङ् खोङ्गी छ्यक्नी को़न्ज्योक्की छ्यादु ची़प्प बेत्। 3 खोङ्ल को़न्ज्योक्ल यो़प्पे तो़त्वङ्गी ओ़च्च्य दी थोङ्गेन् बेत्। खोङ् को़न्ज्योक् ठोक् यो़क्केन् बेत्। खोङ्गी ॱस्यीक् छ्यीम्मी़ ॱसुङ्स्येक्की ॱस धङ् ॱनम् हीगो जेङ् सुङ्न यो़क्केन् बेत्। दीक्प धक्तु ची़क्केङ्गी ले खोङ्गी जेत् छर्नी, खोङ् हुन्दो इगी थोरी चीदु स्युगेन्, ॱवङ् की़न् च्येम्मे ज्याबी़ ॱये छ्योन स्युन यो़क्केन् बेत्। 4 खोङ्ल ताबे छेन् हुगो तेङ् यी़गी भङ्ज्येम्ब घयेक्की मीङ्ले गज्येङ्गी छ्यीया यो़क्केन् दी डस्सी खोङ् हुबले गज्येङ्गी छ्यीया यो़क्केन् बेत्। 5 घन्ड हीन् सीन्न खोङ्ल ॱसुङ डस्सी को़न्ज्योक्की रोरङ्गी तेङ् यी़गी भङ्ज्येम्ब घङ्गोल अक् नम् नम्ल अक् ॱमत् ॱसुङ बेत्। रङ् ङे ॱरेबु हीन्। हरीङ्नी रङ्गी यप् ङ झ्युङ्न यो़त् सीन्न यो़क्केन् बेत्। (ॱसुङ्रप्की गुल्लु २:७) ॱनी यङ् हरुङ् ङ खोङ्गी यप् धङ् खोङ् ङे भु हीन् सीर ॱसुङ्रप्ल यो़क्केन् बेत्। (२ सामुएल् ७:१४) 6 ॱनी हरुङ् यङ् को़न्ज्योक्की ॱरेबु छ्यीस्स्यो दी जम्बुलीङ्ल तोङे यङ्ल तेङ् यी़गी भङ्ज्येम्ब घयेत् खोङ्ल छ्यक् छो़ज्यीत् सीन्न ॱसुङ थो़ङ्गेन् बेत्। 7 ॱनी यङ् तेङ् यी़गी भङ्ज्येम्ब घयेक्की ढीक्ल ॱसुङ्रप्ल को़न्ज्योक्की रोरङ्गी तेङ् यी़गी भङ्ज्येम्ब घयेत् ॱलुङ्बु डस्सील धङ् रोरङ्ल स्यप्च्यी़ पुगेन् घयेत् मी बरे मीज्ये डस्सील सोगेन् बेत् सीर थो़ङ्गेन् बेत्। (ॱसुङ्रप्की गुल्लु १०४:४) 8 ॱनी ॱरेबी़ ढीक्ल ॱसुङ्रप्ल थो़ङ्गेन् को़न्ज्योक् नीज्यरङ् धी़ ज्यी़न्दु ॱवङ् च्येम्मे स्युडील स्युन ढङ्बु झ्यीन ज्यागक् च्योङ्गेन् बेत्। 9 ढङ्बी़ लेल नीज्यरङ् गस्सी छोर्न युङ बेत्। ॱनी छ्यो़डीम्ल ङीबे लेल मक्का लङ बेत्। हुगो झ्यीनी नीज्यरङ्गी को़न्ज्योक्की नीज्यरङ्ल गवे ॱनुम् ॱही़न्न ॱयोङ्म घयेत्ले नीज्यरङ् छ्यीस्स्योल को़न स्यक्न यो़क्केन् बेत्। (ॱसुङ्रप्की गुल्लु ४५:६-७) 10 हरुङ् ॱरेबी़ ढीक्लरङ् ॱसुङ्रप्ल थो़ङ्गेन् बेत्। ॱङो़न् धङ्बु ॱस जम्बुलीङ् धङ् तेङ् यी़ चव चुक्केन् दी चोव ज्यीन्दक् नीज्यरङ् बेत्। 11 ॱनी हुगो कुरीक् खरप्ल टप् डोगेन् बेत्। ॱनी नीज्यरङ्रङ् धी़ ज्यी़न्दु स्युगेन् बेत्। हुगो घो़दङ् छ्येत्मीत् घोक्पुल डोगेन् बेत्। 12 हुगो ली़ज्ये छ्यी घो़दङ् छ्येत्मीत् नीज्यरङ्गी ॱलप्ची कोप्ची ज्यक्केन् बेत्। घो़ घोक्पु पो़बदङ् छ्येत्मीत् नीज्यरङ्गी हुगो पो़क्केन् बेत्। ॱनी नीज्यरङ्रङ् धी़ ज्यी़न्दु ज्युरुव मीप्प स्युगेन् बेत्। नीज्यरङ्गी छीये थ नम्ल अक् ॱमीत् ॱलीक्केन् बेत्। (ॱसुङ्रप्की गुल्लु १०२:२५-२७) 13 ॱनी यङ् ॱरेबी़ धो़न्दु को़न्ज्योक्की ॱसुङ हीगो डस्सी रोरङ्गी तेङ् यी़गी भङ्ज्येम्ब घङ्गोल अक् नम्ल अक् ॱमत् ॱसुङ बेत्। ङे रङ्गी ड घयेत् रङ्गी कङ्बे होक्ल नम् ॱलुक्न स्योक् स्योक् थुक्ल रङ् ङे ॱये छ्योदु दो़त् सीर यो़क्केन् बेत्। (ॱसुङ्रप्की गुल्लु ११०:१) 14 को़न्ज्योक्ल स्यप्च्यी़ ज्युक्केन्, तेङ् यी़गी भङ्ज्येम्ब ॱस्यस्सी़ मीप्प हुब इगीनी मल्ल तङ्न युङ्न थर्वे लम्ल डोगेन् घयेत्ल स्यप्च्यी़ ज्युक्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.