२ पत्रुस् 1 - ल्होमी1 येशु ख्रीष्ट्की ॱयोक्पु धङ् ठीक्नल ङ शीमोन् पत्रुस्की ङीत्तङ् च्यीक्प छ्य स्योक्केल्ल झ्युङ्न यो़क्केन् घयेत्ल हीगो ढीन तोङ्गो़त्। ॱनी हीगी चा छ्यीम्मी़ छ्य स्यक्पे लेमु हीगो हज्यरङ्गी को़न्ज्योक् धङ् च्यप्को़न् येशु ख्रीष्ट् ढङ्बु हीम्बे लम्नी झ्युङ बेत्। 2 को़न्ज्योक् धङ् हज्यरङ्गी चोव ज्यीन्दक् येशु ख्रीष्ट् खीत्रङ्गी ङु ॱस्यीन यो़प्पे लम्नी खीत्रङ्ल थुज्यी धङ् ॱसीम् दीव ज्येबर् युङ्ज्ये यो़प्प तोङ्। को़न्ज्योक्की धो़र्रीक् धङ् खोङ्गी भो़ब ३-११ 3 को़न्ज्योक्ल धेप्प मो़ब झ्यीप्पल गो़बे लेमु धङ् हज्यरङ्गी छी हील गो़बे लेमु घयेत् को़न्ज्योक्की ॱस्यीक्की हज्यरङ्ल ॱनङ्न यो़क्केन् बेत्। हीगो तो़त्वङ्गी ओ़च्च्य धङ् खोङ्गी थु गव यो़स्सल भो़क्केन्, को़न्ज्योक् हज्यरङ्गी ङु ॱस्यीबे लम्नी थोप्न यो़क्केन् बेत्। 4 हुन्दुक् झ्यीन खोङ्गी हुगी छ्यो़त्तुम्ल यो़प्पे रीम्बुर् छ्यीये केच्च्य चा छ्यीम्मु घयेत् हुगो हज्यरङ् घयेत् धेत्मो़ आक्पागी ढङ्ल ॱस्योर्नरे जम्बुलीङ् अयेक्प हीगो ङो़नी भीन, को़न्ज्योक्तङ् डगेल्ल ज्युर्न युङ्ज्ये यो़प्पे ढीक्ल ॱनङ बेत्। 5 हीगो झ्यीनी खीत्रङ्गी छ्य स्यक्प दील ॱसीम् सङ्बु गो़गेन्, हुनी ॱसीम् सङ्बु दील को़न्ज्योक्की धो़र्रीक् गो़गेन्, 6 हुनी धो़र्रीक् दील ॱनो़जो़त् घङ्बु मत् झ्यीब, ॱसीम् सुङ् छुब गो़गेन्, हुनी ॱसीम् सुङ् छुब दील धु गो़गेन्, हुनी धु दील डीक्पे को़न्ज्योक्ल धेप्प मो़ब गो़गेन्, 7 हुनी धेप्प मो़ब दील चीदुङ् गो़गेन्, हुनी चीदुङ् दील झ्यम्ब गो़गेन् बेत्। 8 ॱनी हीन्दुक् झ्यीन खीत्रङ् नङ्दु हीगो ज्यीक्तु झ्यीन युङ्गो़त्न ॱनी, खीत्रङ् घो ॱमीत् छ्यो़त् डेबु मीप्प डस्सी मेम्ब, हज्यरङ्गी चोव ज्यीन्दक् येशु ख्रीष्ट्की धो़र्रीक् छ्यीदु थोगेल्ल डोगेन् बेत्। 9 ॱनी हीगो डस्सीगी लेमु ॱसुल मीन्दुक्क हुगो ॱमीक् ॱसेज्ये मीप्प धङ् स्यर्च्योक् डस्सी रोरङ्गी ॱङर्की दीक्प को़न्ज्योक्की धक्तु ची़प्प दी टोक् ज्यीप्न खुर युङ्गेन् बेत्। 10 हुगो झ्यीनी पी़न्ज्यासो, खीत्रङ् को़न्ज्योक्की भो़न दम्ब हीम्ब दी हरुङ् तेम्बर् युङ्ज्ये यो़प्प झ्यीत् छुब झ्यीज्यीत्। हीगो डस्सी झ्यीन युङ्न ॱनी, थर्वे लम्ल डोवल खीत्रङ्ल नम्ल अक् भर्च्येत् मीप्प युङ्गेन् बेत्। 11 हुनी हज्यरङ्गी च्यप्को़न् चोव ज्यीन्दक् येशु ख्रीष्ट्की इगीगी फु तक्पे ज्यागक्ल स्युक्पे यङ्ल हज्यरङ्ल ॱसुमी़ थोप्केन् बेत्। ढेन्सो़ ॱलोङ्गेङ्गी तम् १२-१५ 12 हीगी केच्च्य घयेत् हीगो खीत्रङ्ल एल्ला ॱस्यो़च्च्ये झ्युङ्न, दीम्ब ङो़ल तेम्बोक्मरङ् यो़त्न अक्, हीगो यङ् ङे खीत्रङ्ल छीगङ् ढेन्सो़ ॱलोङ्गेन् हीनो। 13 ङे हीगी ली़ हीगो यो़स्स्यीङ् भोर्ल हीगो खीत्रङ्ल छीगङ् ढेन्सो़ ॱलङ्न ॱसीम्ल छ्यर्तु ची़त्न आक्, डीक्को़ट्टो ॱनो़गुक्। 14 हज्यरङ्गी चोव ज्यीन्दक् येशु ख्रीष्ट्की तो़म्बल ङे हीगी ली़ हीगो ह ज्योबा भोर् डोव ङल ॱस्यो़च्च्ये यो़त्। 15 ङे ली़ हीगो भोर्नी इक्, खीत्रङ्ल हीगो ज्यी़न्दु ढेन्सो़ युङ्ज्ये यो़प्पल ङे यीगी हीगो ढी छुब झ्यीक्को़त्। ख्रीष्ट्ल थोबे तो़त्वङ् छ्यीम्मी़ ओ़च्च्ये पङ्बु १६-२१ 16 ङीक्की खीत्रङ्ल हज्यरङ्गी चोव ज्यीन्दक् येशु ख्रीष्ट्की ॱस्यीक् दी छ्यीम्मु यो़क्केन् बेत्। ॱनी खोङ् फीच्च्य झ्यो़ङ्गेन् बेत् सीन्न ॱस्येप्पे केच्च्य हुगो मी खेबागी स्यङे यो़च्चो़त् मीच्चो़क्की केच्च्य कोक्न ॱस्येप्प मेन्। खोङ् घन्दुक्मे छ्यीय यो़प्प बेक्क हुगो ङीत्रङ्गी ॱमीक्की ॱङो़सल् थोङे केच्च्य हीन्। 17 इगीनी मल्ल तो़त्वङ्गी ओ़च्च्य छ्यीम्मु च्येम्मे ॱसुङे ॱसुङ्गेत् च्यीक्ल हीगो ङे झ्यम्बे भु हीन्। हील ङ गुव दुक् सीरे ॱसुङ्गेत् हीगो युङे यङ्ल यप् को़न्ज्योक्की खोङ्ल तो़त्वङ् छ्यीम्मी़ ओ़च्च्य धङ् तो़प्प छ्यीम्मु ॱनङ्न युङ थोङ्ज्युङ्। 18 हीगी ॱसुङ्गेत् हीगो को़न्ज्योक्ल तीम्बे लदोक्तु ङीत् येशुदङ् दल यो़प्पे यङ्ल इगी तेङ् यी़नी मल्ल युङ ङीक्की ॱह घोज्युङ्। 19 हुगो झ्युङ थोङ्नी धङ्बु कलुङ् ॱस्यो़क्केन् घयेक्की ॱङो़स्स्यीगी केच्च्य घयेत् हुगो दीम्बरङ् बेत् ॱनो़ब ङीक्की ॱह घोज्युङ्। हुगी ॱङो़स्स्यीगी केच्च्य घयेत् हुगो मेन्नक्ल पेक्केन् बत्तीदङ् छ्येत्मीत् झ्यीनी, थोरङ् कच्च्येन् ॱस्यर्न युङदङ् छ्येत्मीत् ख्रीष्ट् फीच्च्य झ्यो़न्न, नम् खीत्रङ्गी ॱसीम्ल नम् लोङ् लोङ् थुक्ल खीत्रङ् हुल धोनङ् झ्यीज्यीत्। हुन्दुक् झ्यीन खीत्रङ्गी धोनङ् झ्यीन ॱनी, हुगो फेन्सी युङ्गेन् बेत्। 20 ॱनी गो़स्योल हीगो ॱह घो गो़गेन् बेत्। ॱसुङ्रप्ल थो़ङ्गेन् ॱङो़स्स्यी घङ्गो दी इक् कलुङ् ॱस्यो़क्केन् हुगी रोरङ् रङ्स्यीगी धो़न् थोन तो़न्न ॱस्येप्प मेम्बेत्। 21 ॱङो़स्स्यी घङ्गो ओक् मी ॱसीम्नी ॱनो़न थो़म्ब मेम्ब, को़न्ज्योक्की ॱनङे केच्च्य घयेत् धम्बे थुगी झ्यीन कलुङ् ॱस्यो़क्केन् घयेत्ल ॱस्यो़त्तु ची़प्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.