1PETRU 1 - Lhaovo Common Language Bible

¹ Yesu Khristu nho: lagyo: pho" ngo Petru wa Puntiu mung"- Galati mung"- Kapadokia mung"- Asia mung" we' Bithunia mung" khaung: mae yekhug: na: byo: sin" qin" ko" ra" Mao"So: yang khyin: yu: ra" mo, re mugsug' tung" ke' ra".

² Yesu Khristu: mho dao: re tae" gyo: mung: yao" sa" yang kyang" san: pye' ru qhug' genae" qhid' mae" naonhaung" wa Pho" Mao"So: nho: myid: yaung: to" rure cao" yang: khyin: san: yu: ru qhug' ru we' yao" Byo: yang gyang" lho" ra" byu qe toe' yu: ru qhug' ra" mo, ngad: ako". Nhag' myan" ra" jeju we' ngaui pyo: yaug yo: ru naonhaung" mae byang" jo, vashao: wo".

Kaoso' Daui: Ra" Myid: Lao" Khyo

³ Ngonhaung" wa ngonhaung" Asang Yesu Khristu nho: yao: Pho" Mao"So re jeju caung:khin" gelang:- Yao" nho: qi" qhang: ra" nhag' khyag' shogu: ru mathao mae Yesu Khristu re shid: rumae" dam: daui: to" li" nhao: ra" khyo" yang ngonhaung" re kao so' daui khyo asag' byid' ra". Ceru wa ngonhaung" re kao so' daui: ra" myid: lao" khyo ke' pyang" byid' ra".

⁴ Airumung: ngonhaung" wa yao" byu qe: qhid' mae" Mao"So zam" to: byid' ra" mathao" magan: ra" shaman" jeju jo,nho" re qo" sang: yu nae" myid: lao" bam: ra". Mao"So wa ai jham re mabyo, maqeim masham lo: mug:gaung dao mae naonhaung" qhid' mae" zam" to: byid' ra".

⁵ Lo" thao" ra" ba na yo, khyin: mae yao: thug' li" nae" jin" jin" ngad: ra" khyad' yu: ra" khyo qo" khae: yu nae" qhid' mae" Mao"So: qam: so' khyo" yang naonhaung" lam: khug: ru mathao mae naonhaung" re gug: gam: to: byid' ra".

⁶ Naonhaung" wa ju" phyo' jham" qu" ru myo: sho' qhug' geyang: ana" au: dazab daso' nhag' kaug' nhag' ngai: na: jo, qo sho' ngadqere: ce: khyo: mathao mae ngaui bau: ge,.

⁷ Ai: ju phyo' jham" qu" ru jham wa naonhaung" nho: lam khug: myid agyang" ngad: rure sagse: qhu" byid: nae" qhid' mae" ngad: ra". Byo; qeim: lo" ba: ra" qhang re lhao" re:- myi" yang jham" qu" qhug' ra". Ai we' dakhyo: qhang tho' je: phug' de; ra" naonhaung" lam khug: myid re qo" khae: yu nae" qhid' mae" jham" qu" ru qhug' ca" ra". Ailao" za:- Yesu Khristu myao: thug' li" ra" ba na mae caung:khin" byid' ru- phungbao byid' ru we' phug' te' nga: yhe' byid' ru naonhaung" qo" khae: yu: li" genae".

⁸ Naonhaung" wa yao: re mamyao: qu" gesho' ngad yang: re: yao: re jhid'de; ako". Ana" naonhaung" wa ana" yao: re mathe' myao gesho' ngadqere: yao: re lam khug: ako". Airumung: naonhaung" wa qi" qhang: ru we' phungbao bo: ra" nhad' dao: thoe khyo" maqo" ta" thug' losho' gyai ngaui bau" ako".

⁹ Pe"mung:ga"re naonhaung" wa byo khyad' yu: rure qo" khae: yu: ako". Airu wa naonhaung" lam khug: myid mae" thug' li" ra" akyu" ngad: ra".

¹⁰ Lapa qe wa ce: khyad' yu: ru we' sin: yang: jhaug' za: qin: yang: qho: ako". Yao: bam wa Mao"So: yang naonhaung" re byid: nae" ra" ce: jeju jhaung qhu" khyo re lapa pa: ako".

¹¹ Yao: bam wa khoyo, mae khoru: boe" li" nae" rure qam: ke' yang: qho: lo: ako". Yao: bam: khug mae na: ra" Khristu nho: Byo wa- ce: ba na ayo, mae Khristu zang: qhao" kham zo: ca" ra" qug: khai: dayin dayo: jham rere:- thao re qo" kham: yu nae" ra" phungbao we' sin: yang: re: ceim" shid' yang: lapa pa: to" ako".

¹² Lapa qe yao: bam zaui: so" ra" mau" zo" wa yao: bam yao" akyu" qhid' mae" mangad:- naonhaung" qhid' mae" ngad: ra" khyo re Mao"So wa ai: lapa qere qhu" byid' ra". Yao: bam ta" lai: lo ko" ra" khyo jham re yao: mug: gaung mae" nhao: ke' ra" Gyang" Lho" Byo qam: so' khyo" yang lau dao: gai re ta" hau" qin" mo, ngad ko" ra" lagyo: qe: nhad' thoe mae" ana" naonhaung" the' gyo" yu: avako". Ai: khyo jham we' sin: yang: mug: lagyo: qe lhao" re: ba: gyo" yu nug: ako".

Gyang" Lho" Ra" Khyo" Kaoso' Daui Nae" Qhid' Mae" Khai: Yu: Ru

¹³ Airumung: ave, lo, mau" we' kao so' daui nae" qhid' mae" naonhaung" myid re jin" jin" seim" ci ge,- Yesu Khristu myao: thug' li" ra" ba na mae naonhaung" qo" khae: yu nae" ra" shaman" jeju re aung khug nhag' lam: alhab' we' lha" yang: myid: lao" na ge,-

¹⁴ Mao"So: mho dao: re phug' cao" ge,- Naonhaung" maba mabeim: shi" au:- kao so' daui: qu" ra" ai: kao bau myid o: ra" ja: jham: yang naonhaung" kao so' daui khyo re dakhang" nhao ge,-

¹⁵ Naonhaung" re khai: yu: ra" yaug Mao"So wa gyang" lho" yaug ngad: ru we' dakhyo:- naonhaung" zaui: so" ra" lo, mau" alhab' mae gyang" lho" ge,-

¹⁶ Ngo wa gyang" lho" yaug ngad yang: naonhaung" re: gyang" lho" ge,- ga: jham: mug sug' mae ta" to" ra".

¹⁷ Yaug khao: ngo" re myo, nho nga: lao: makhyin lo:- yao: yao" lo, mau" ave, re cao" yang: dao: kho' byid' ra" Mao"So re naonhaung" akyu" mho' gelao"- naonhaung" wa yao: re Pho" we"- ga: mho' yao: ako". Airu mung: ce: myid gaung dao mae kao so' daui: na qo shi" ra" ayo, gu: mae yao: re gyaug phug' ge,.

¹⁸ Pe"mung:ga"re naonhaung" phug' pho" qeyang to: byid: co' ra" aphug' made; ra" kao so' khyo lo, mau" mae" pe" aphug' yang naonhaung" re loe; beim nhao: ra" khyo re naonhaung" ba: ako". Airu wa ngaui qhang ru" ra" byo; qeim: lo" ba: ra" ja: mangad:

¹⁹ Aiwa pe" qo mabo no made; ra" Yao Nau" we' daui: ra" phug' de; ra" Khristu nho: kao so' sa: re xeim: ngaui" byid' ru ngad: ra".

²⁰ Yao: wa ce: mug:myid maphan" shimae" Mao"So: yang khyin: san: to: qhug' yaug ngad mung: ai: naonhaung" akyu" mathao mae ai: lo" thao" ra" ba na jham mae myao: thug' li" nhao: ra".

²¹ Naonhaung" wa yao: re shid: rumae" dam: daui: to" li" nhao mung:- phungbao ab byid' ra" Mao"So re yao: khyo" yang lam khug: ako". Airumung: naonhaung" lam khug: myid we' myid: lao" ru wa Mao"So mae zaug: jo; ra".

²² Ana" naonhaung" wa dangman" ra" khyo re phug' cao" ko" ruyang naonhaung" yao" gaung re kyang" san: pye' va" rumung: naonhaung" lam khug: ra" mao:nhaung: qere din:man" ra" jhid'de; myid naonhaung" aung khug myid alhab' we' qo" jhid'de; avako". Airumung: naonhaung" yao: cao: aung khug nhag' lam: alhab' we' kyid kyid ein: jho" jhid'de; ge.

²³ Pe"mung:ga"re shid ba: ra" yaug mangad:- shid maba: ra" yaug ngad: ra" Asang: yao" zo: dau qekhyo" naonhaung"kao so' daui: na mung: apyad ato dang: jo; ra" Mao"So: mungdao" yang dam: khau: li" va" mo, ngad: ako".

²⁴ Jham: mugsug' mae xao su byu qe alhab' wa mhin: zo: we' dau mung: yao: bam: phungbao alhab' re: seyo: bin: bu" we' dau: ako". Ai: mhin: zo: wa mai: jhoe' lo" mung: bin: bu" jham re: shu: gyo" lo" ako".

²⁵ Ngadqere: Asang: mungdao: wa apyad ato dang: jo; ra" ga: ta" ko" ru we' dakhyo: ngad: ra". Ai: mungdao: wa naonhaung" re kho" kyo" ra" ai: Lau Dao: Gai ngad: ra".