I vēstule tessalonikīšim. 1 - Svātī Roksti Jaunais Īstōdejums 1937 (Aloizijs Broks)

I.

¹ Pōvuls, Silvans un Timotejs Tessaloniku draudzei ikš Dīva Tāva un Kunga Jezus Kristus. Žēlesteiba jums un mīrs!

Īvods.

² Arvīnu pīmynādami jyusus sovōs lyugšonōs, mes pasateicam par jums Dīvam.

³ Mes arvīnu pīmynam pi Dīva, myusu Tāva par jyusu darbeigū ticeibu, jyusu uzaupurejūšū mīlesteibu un jyusu iztureigū cereibu uz myusu Kungu Jezu Kristu.

⁴ Mes zynom, Dīva nūmīļōtī brōli, par jyusu izlaseišonu,

⁵ jo myusu Evangelija sludynōšona pi jums nūtyka na tikai vōrdūs, bet arī spākā, Svātajā Gorā un vysā piļneibā, kai jyus poši zynot, ka jyusu dēļ mes storp jums uzastōjom.

⁶ Un jyus palykot par myusu un Kunga pakaļdareitōjim, jo jyus, nasaskotūt uz lelajim spaidim, ikš Svātō Gora ar prīcu pījēmet vōrdu.

⁷ Un tai jyus tōpot par pīmāru visim ticeigajim Makedonijā un Achajā.

⁸ Nu jums Kunga vōrds izaplateja tōļōk, un na tik vīn Makedonijā un Achajā, bet arī vysur jyusu ticeiba ikš Dīva ir topuse zynoma. Un par tū mums nimoz navajaga kaut kū stōsteit.

⁹ Tī, kas pi jums ir, poši stōsta par jums, kai jyus myusus uzjēmet, un kai jyus nu dīvaklim atsagrīzet pi Dīva, lai kolpōtu dzeivajam un eistajam Dīvam,

¹⁰ un lai nu dabasim sagaideitu Jō Dālu, kuru Jys pīcēle nu myrūnim — Jezu, kas myusus izglōb nu nōkamōs dusmes.