Ифлеманаз 1 - Пак Калам

Саламар

¹ Иса Месигьдихъ иман авунай къазаматда авай Павелан ва гьакӀни ТӀиматӀей стхадин патай чахъ галаз санал са кар ийизвай играми Ифлеманаз,

² Афия вахаз ва чи женгинин юлдаш АрхипӀаз, гьакӀни ви кӀвале кӀватӀ жезвай иманийрин кӀватӀалдиз.

³ Аллагьдин, чи Бубадин, ва Ребби Иса Месигьдин патай берекатар ва саламатвал хьурай квез.

Ифлеманан иман ва муьгьуьббат

⁴ За датӀана ви гьакъиндай ийизвай дуьайра Аллагьдиз шукурдин гафар лугьузва, играми Ифлеман,

⁵ вучиз лагьайтӀа вуна Ребби Исадихъ иман авуникай ва Адаз талукь вирибурухъ ви патай авай муьгьуьббатдикай зав ванер агакьзава.

⁶ Вуна къизгъиндаказ масабурухъ галаз пайзавай иманди вун чна Месигьдивай къачузвай вири хъсанвал кьатӀунал гъун паталай за дуьаяр ийизва.

⁷ Ви муьгьуьббатди зун гзаф шадарзава ва заз теселли гузва, гьикӀ лагьайтӀа, я стха, Аллагьдиз талукьбурун рикӀер ваз килигна секин хьанва.

Павела Энесиман гьакъиндай тӀалаб ийизва

⁸ Гьавиляй, завай викӀегьдаказ вуна Иса Месигьдин ТӀварцӀелай ви буржи тамамарун тӀалабиз жезватӀани,

⁹ за муьгьуьббатвиливди икӀ ийизвач. За, Павела, агъсакъалди, Иса Месигьдихъ иман авурвиляй гила къазаматдани тунвайда,

¹⁰ ина къазаматда авай ва имандал атанвай, вични заз хва хьанвай Энесимаз регьим авунин гьакъиндай вавай тӀалаб ийизва.

¹¹ Виликдай адакай ваз са хийирни авачир жеди, амма исятда ам вазни, зазни гьакъикъатда «Хийир Авайди» я.

¹² За ам кьулухъди ви патав рахкурзава, и кар зун паталди жуван са пад атӀай мисал я.

¹³ Шад Хабардиз килигна зун тунвай къазаматда, ви чкадал заз куьмек гун патал ам жуван патав тунайтӀа заз гзаф кӀандай.

¹⁴ Амма ви разивал авачиз заз са затӀни ийиз кӀанзавач. Гьавиляй и кар вуна заз буржи вахгун яз ийизвайди ваъ, хушуналди тамамарзавайди хьун лазим я.

¹⁵ Ви лукӀ са кьадар вахтунда ви патав хьанач. Мумкин я, ам ви патав эбеди яз хтун паталди икӀ хьана.

¹⁶ Амма гила ам лукӀралай виневайди яз – играми стха яз хквезва. Ам заз гзаф играми я, ва ам ваз гьам инсан хьиз, гьамни Месигьдихъ иман ийизвайди хьиз, генани артух играми жеда.

¹⁷ Гьа икӀ, вуна зун ви амадаг яз гьисабзаватӀа, вуна ам зун гьикӀ кьабулдатӀа, гьакӀ кьабул ая.

¹⁸ Ада са квелди ваз зиян ганатӀа ва я адал ви бурж алатӀа – а бурж зиди яз гьисаба.

¹⁹ За, Павела, адан вири буржар вахгуда, – лагьана ваз жуван гъилелди кхьизва. Вал жувалди зи бурж хьуникай чун рахадач.

²⁰ Эхь, стха, заз Реббидин хатурдай куьмек це ва гьадалди зун Месигьдихъ иман ийизвай стхади хьиз шад ая.

²¹ За ваз вуна неинки зи тӀалабдиз жаваб гудайвилихъ, гьакӀни за тӀалабзавайдалай артухни ийидайвилихъ чӀалахъ яз кхьизва.

²² Ахпа мадни зун паталди кӀвал гьазура, вучиз лагьайтӀа куь дуьайриз килигна зун квев вахгудайдак за умуд кутазва.

Саламар ва хийир-дуьаяр

^23-24 Иса Месигьдихъ иман авунай гьакӀ къазаматда авай Эпафараса ва захъ галаз санал са кар ийизвайбур тир Марка, АристӀарха, Димаса ва ЛукӀади ваз саламар лугьузва.

²⁵ Къуй Ребби Иса Месигьдин берекат квехъ галаз хьурай.