Dutuuc 1 - Lek Jot de Jecu Kritho 1940

¹ An ci waragak kan gɔɔr, Yin Theopilo, ne ka eke ciɛk Yecu ke luɔi ku ka pioc yen ke kɔc,

² agut kol e jɔte ye nhial, cen welke yiɛn dutuuc ne Jɔŋdiit Lajik, kɔc ci lɔc ɣɔn.

³ Ɣɔn ye guɔmde ye ci thok, go rɔt nyuɔth ke ne piir piir en ne guɔt juec dɛ ci kut, tul enɔŋ keek ne nin thiɛrŋuan, ku luel ka ke ceŋ de Nhialic.

⁴ Te gueere kɔc enɔŋ en, go ke yɔɔk, Ye duɔka jiɛl ne Jeruthalem, tiɛtka wel ke Awa, wel cakke piŋ enɔŋ an:

⁵ Jɔn ee kɔc baptith ne piu; ku we bi baptith ne Jɔŋdiit Lajik aŋoot nin juec e ke ken thok.

⁶ Ɣɔn yi cik gueer, e ke thiec, Yi Bɛnydiit, ba Yithrael bɛr miɔc ne ceŋden emane?

⁷ Go jam, Ye runkeek bene ke ye ya loi e Nhialic aacakke bi nyic, aatɔ kene yen ne riɛldeic, ye Awa.

⁸ We bi riɛr loom te cii Jɔŋdiit Lajik bɛn enɔŋ week, ku we bi ya duleekcie ne Jeruthalem, ku Judaya, ku Thamaria ebɛn agut piny thok ebɛn.

⁹ Wen ye keewelke yi cik thok, aŋoot kɔc e ke daai e ye, ke jɛl laar nhial, ku mɛr piol ne kɔc nyin.

¹⁰ Ana yi ŋootki e ke ɣoi nhial te ler en, ŋem, ke kɔc keerou kaac e kelɔm kɔc ceŋ alath ɣer;

¹¹ ku thiecki, Yi kɔc ke Galili, yeŋo ye we kɔɔc ke we ɣoi nhial? Yecu, man ci laar nhial enɔŋ week, abi bɛr dhuk ci man ŋem we ye ne lɔ nhial.

¹² Goki dhuk Jeruthalem ne kuur cɔl Olip, kuur thiak ke Jeruthalem, cit cath de akol e thabath.

¹³ Na ɣɔn cik lɔ ɣot, e ke lɔ ɣon nhial te ceŋ kek thin, ye Petero, ku Jɔn, ku Jakob, ku Andereya, ku Pilip, ku Thoma, ku Bartholomayo, ku Mathayo, ku Jakob wen de Alapayo, ku Thimon Dhelote, ku Judath wen de Jakob.

¹⁴ Ku dhiacki e ke laŋ Nhialic areet etok kene diar ku kene Mari, man e Yecu, ku kene mithakɛcke.

¹⁵ Ku keeakolke aacii Petero ke rɔt jɔt ku kɛɛc ne mɛɛth yic, ku jiɛm (ku dun diit de kɔc ee ci gueer, yin ya thiɛrnyɛny ku thiɛrou),

¹⁶ Ye wɛɛt ke awa, kacigɔɔr aa roth dhiɛl aaya yith, ka ci Jɔŋdiit Lajik ke luel ne Dabid thok ne Judath, ran ci kɔc ŋɔɔr kɔc lɔ Yecu dɔm.

¹⁷ Ye ran de wɔyic, ye kake kap ci wɔɔk ne luɔi ye wɔ lui netok.

¹⁸ (Yerane ee dom lɔ ɣɔɔc ne weu eke riopeke ye ke kerɛɛcde; go lɔ yuik, go yic puɔk a bi ciin piɛi.

¹⁹ Go kɔc kedhia ceŋ Jeruthalem goki luɔide nyic; goki dom cak cɔkki ye Akeldama, cɔkki dom, Ye Dom de riɛm.)

²⁰ Ci man de gar de kitap de Diɛt yela, Ye cɔk pande riak, Ku cɔk cin ran beer ɣap thin: ku yela, Ye ne ran dɛ lok luɔide.

²¹ Cakka ran tok, ran de kɔc tɔ kene wɔɔk ne run kedhia ciɛthe Yecu Bɛnydit ke kene wɔɔk, cakka mɛt kene wɔɔk, bi kɔc ya lɛk jon cii Yecu rɔt bɛɛr jɔt,

²² ran e ye tɔ kene wɔɔk ɣɔn baptith Jɔn Yecu aɣet akol e leere ye nhial enɔŋ wɔɔk.

²³ Goki kɔc keerou cɔk kaac e kenhiim, ye Jothep ye kɔc cɔɔl Barthaba, ku cɔl Juthuto, ku Mathiath.

²⁴ Goki lɔŋ ku jamki, Ya yin, Bɛnydit, yin man nyic kɔc piɔth kedhia, nyuɔthe wɔɔk ran ca lɔc ne keekɔcke keerou,

²⁵ bi te de Judath, ran ci yuik ci jaal tede, bi look ne yeluɔine.

²⁶ Goki cɔɔr ne kɔc keerou, goki Mathiath yok, go Mathiath go mat ke dutuuc keethiɛr ku tok.