YAKU 1 - Lacid Common Language Bible

¹ Phoo Mangsoo yo' Aseing Yesu Khristu da" dei zoo: nghoid nyid ngoo Yaku gi moug: gyab, goin" jang" moo byo sain" jo, da" Mangso byu yi jhang khyoo: jheddab dang: sang: kaid.

Loem" Jeing" Khyoo: Yo' Phajhi" Ju yi:

² Nga" mang: nga" nhung" yi we"- ca: jhu, phyo' da" khyoo: aja: ja: thoung" shau" nyid da" uri gau, yi cang boo bye" ein: myed nyid loo: ge'.

³ Khasu" wim gari houg: yhang: te" da" ca: jhu, phyo' yu" da" khyoo: ri nanu" loem" jeung" nheigloem: yo' oung: doid' lo" da" uri nanu" gi yo" kham, zeung" da" yoem: moo" yo" yu nyid bye: ziri nanu" se' nyid ago".

⁴ Nanu" gi ci: we' ca" yo khyoo: aboo loo sho' joeb, byeung" jo, baja" - nanu" da" kham, zeung: khyoo: gi nanu" rikhyoo: thang sho' moo oung: doid khyo" shu" vhu" goem nhang: nyid ge'.

⁵ Nghoid loug we' nanu" mo dayug yug gi Phajhi" juyi: thang byug nghoid rigi Mangso: jang" mo mho' ge' nyang: gi houg: su" mho' mo, ri nyain: phajhi" byid: wa zi nghoid. Khasu" wim gari Mangsoo: gi byu bain sho' mo, rigau ziyo' agoin ayu: da" phajhi" ri byid: nyid.

⁶ Nghoid loug we' nanu" gi loem shoid da" nheigloem: yo' anghoid loo: za: Mangsoo: ri loem: jeing" nheigloem: yo' mho' nyid ge, loem shoid lho: vhu" gyam, gyam nyid su: gi ug lid wigi doin: to lo da" panglai gyid thoem" being: mhoid yo" dadu nyid.

⁷ Houg: yhang: te" su: gi Mangso jhang mo daja: ja: shau" yu abe ein: lang" nyid cang aboo.

⁸ Nyang: gi nheigloem: eig pyam: boo su: nghoid yoomo moozoo" dangain" jang: moo geung: teung khyoo: aboo su: nghoid nyid.

Sho" Jhen: Khyoo Yo' Yo" De Khyoo:

⁹ Khristain mang nhung" dayug yug gi sho" jhen: nyid jang" mo Mangso wigi tu: to' kaid uri gau yi nyid baja".

¹⁰ Yoo" zoo: yoo" shug da" Khristain mang nhung" phoo gi nyang: ri Mangso wigi nyhoem: gyo" loo" nhang: da" uri gau yi cang bo nyid. Khasu" wim gari- yoo" zoo: yoo" shug mo, gi siyoo mo bain: boo" yhang: ti" doem shoem: loo" wa zi za: nghoid.

¹¹ Gye" nge" da" bid dug gi bain: gam ri lhab, nyhau" pyam' lho: aboo" ri shu: gyo" loo" nhang: pyam. Hougsu" nghoid yoomo hau: bo" young" to" da" bain: boo" byo, yoin" lo" yhang: ti" yoo" zoo: yoo" shug mo, gi nyang: nya: da" moozoo" zei: nyid uri shid: joem: byo, yoin" loo" goo" wa zi nghoid.

Ca: Yu" Ziyo' Jhu, Phyo, Da" Khyoo

¹² Jhu, phyo' khyoo: thoung" shau" nyid uri aleung loo" su: gi ngi lho, nyid. Khasu" wim gari houg: su" yo" kham: zeung: nghoid rigi Mangsoo ri jheddab mo, ri byid: wa ga: da" kangso' bidmug ri shau" zhoung" boem wa.

¹³ Jhu, phyo zi thoung" shau" nyid nghoid rigi ngoori jhu, phyo' zigi Mangsoo mo nghoid ein: atid nyid goo"- age zigi Mangsoo ri yo" jhu' phyo' wa zi anghoid. hau: tho' moo gootu: Mangsoo gi hang" ri we' ajhu, phyo' yu".

¹⁴ Nghoidsho' loug we' jhu, phyo' da" khyoo: gi byu yi nyang: nya: da" akhoug: mo aco' ajhoid nheigloem: wigi lang: she: jang" khyoo: bo myi" lo" da" khyoo: nghoid.

¹⁵ Nyang: myed vhoo: myed ngei da" khyoo: gi gung lid: lo lho: yooboo ri khu: kaid bye- hau: yooboo yang" deung loo lang" gi shid: lo" ziri khu: kaid.

¹⁶ Jheddab da" mangnhung" yi we"-mhau' lho: jhu, phyo' nyid mo, yoomo khyoo: avhang: nyid goo"

¹⁷ Ge, da" joeb byeung" jeju" dangain" gi moug: khung: mo bidbang joem ri phain" to" da" Mangsoo jang" mo wigi we"- gyoo" lo zi nghoid. Mangsoo moo khanham we' athed loo" alid loo" atoug" ashu: aphug asi: wim yoomo nyang: moo bid shoem: yoeb, bui" nhang: zi ci" we' aboo.

¹⁸ Mangsoo gi nyang: phain" to" da" byu xang: su: yimoo- xang: shed" ri zei: lo da" ashi" yhang: ti" bui" wa shid re" deingmain" da" tarha" mo wigi nyang: myed vho: ziyo' dakhyoo" ti"- ngoonu" da" pyaid seig ri doem thid' byid: bye.

Tam" Gyo: Ziyo' Zei: Lo" Khyoo:

¹⁹ Jheddab da" mangnhung" yi we"- he: khyoo: ri xoem" too" ge'.Nanu" gi tam" gyoo: wa jang" moo myab, ge' dang: tid wa jang" moo nheig yoo: wa jang" moo gi ahain: goo".

²⁰ Byu yi da" nheig yo: khyoo: gi Mangso da" deing main" khyoo:- ngoonu" moo yo" ze" bui" wa zi anghoid.

²¹ Hougsu" nghoid yoomo nanu" gi aco' ajhoid da" aved asam" yo' akhyeing" ashoeb da" khyoo: bain sho' ri she: pyam ge'. Nanu" da" nheigloem: ung: khoug: moo Mangso wigi kaid' byid: to" da" yo" khyoid yu da" nya: mungdang: ri nu" nham, da" e" myed, yo' kham: yu nyid ge'.

²² Nya: mungdang: ri houg: yhang: ti" shau" gyo: yu" khyo" nyang: nya: gung ri amhau, nyid goo. Mungdang: ri cang nyang: cang loo" mo, bue" nyid ge'.

²³ Mungdang: ri acang loo: za: te: tam" gyo: yid sugi- nya: da" myonhoo: ri bang teing moo yu" myang su: yo" du nyid.

²⁴ Nyang hougsu" yu" myang lho thu lo" ziyo' dalheing: dam- nya: da" ayoeb, abang ri doem to" myhed pyam su: yo' du nyid.

²⁵ Nghoid loug we' byu yi ri yoobo wigi tei" to" da: jang" mo loid byoin loo" nhang: da" joeb byeung" da" tarha" ri goolhoo: jhau" yu yu" su: gi mungdang: ri gyoo: za: te: tam" gyo: lho: to" myhed' pyam su: anghoid loo: za: xo' zei: cang loo" su: nghoid nyid yoomo nyang: gi ce: ja: moozoo" ri zei: nyid nghoid loug we' Mangso mainkaid da" jeju" ri shau" kham: zoo: wa zi nghoid nyid.

²⁶ Nanu" mo byu dayug yug gi laloem lakhoug: byeung" su: nghoid ein: myid, nyid go" la". Nang gi nanya: da" yhoo: ri ayo" zei: ci: nghoid rigi re" da" laloem lakhoug: gi ce" phoug" we' adab ziyo' nang gi nanya: gung du: ri mhau' nyid su: nghoid.

²⁷ Phoo Mangso: da" shid khoin" moo gyeungshang: ziyo' gyeung" da" laloem, lakhoug: ein: zigi jam jau jam, khi" shau" nyid da" coug" zoo: yi yo' cougmoo" myhi, ri yu" coung: da" khyoo:- nyang: nya: da" gung du: ri we' moug: myed, da" anyhoin: athoung" da" khyoo:- abo dab, nhang: da" khyoo: nhgoid nyid.