Zefaniya 1 - Ibayibuli Ingwalaafu

¹ Ilomo y'omukasya yeetsa isi Zefaniya, umusooleli wa Kushi, umwitsukhulu wa Gedaliya, umwitsukhulu wa Hezekiya, mu bifukhu bya Yosiya, umusooleli wa Amoni, nga niye umuyiinga wa Yuda.

Shifukhu sh'Omukasya she kumusaango

² Umukasya waaloma ari, “Intsya khuuhesa buli shiindu shoosi shishiili khu shibala.”

³ Intsya khuhesa babaandu boosi atweela ni bisolo byoosi, indubaasekho binywiinywi bye mu ngaaki atweela ni tsinyeeni tse mu nyaantsa. Ni naabo boosi babaali bamoyaani, intsya khubeeyawo imbamalewo khu shibala, ilekhe khuramawo na mutweela ta. Bino byoosi Umukasya umweene niye ubilaangilila aryo.

⁴ Intsya khutsanuusa kumukhono kwase ikhupe babaandu ba Yuda, imbirise buubi babaandu babaamenya mu Yerusalemu. Intsya khuhesa imalewo babaandu babaaramawo abe babesaaya wele Bayaali, naluundi mbaawo na mutweela uulishebulila basaayi babaakhamanyile Wele, ni basaayi babesaaya bisaambwa ta.

⁵ Intsya khuhesa ni naabo babaaniina khu ntsu khu bisuli khu ngaaki baatsya besaaya inyaanga kumweesi ni tsinieniesi. Naluundi imbesele ilala babeenama aasi besaaya Umukasya ate ndi baatsya besaaya wele Moleki.

⁶ Ni naabo babaalekha khuuloondelela Umukasya, ni khuulekha khutsya khumuweentsa namwe khuumwiireebakho nga Umukasya ta.

⁷ Nashiryo sila busa isi Umukasya Wele Umunyali wa byoosi, lwekhuuba shifukhu sheewe she khuukhala kimisaango shili aambi. Umukasya umweene waarekekhile khuuwayo babaandu beewe nga isaayilo, naluundi umweene waalaangile baasiku khukhwiitsa bayaaye Yuda.

⁸ Khu shifukhu sh'Omukasya isi atsya khuuwaanilakho babaandu beewe nga isaayilo isho, Umukasya umweene aloma ari, “Intsya khuwa baakhulu be mu lubili boosi atweela ni babaana be bayiinga shitaambiso, ni khuutubaasakho babaandu boosi babaakwaara bikwaaro baaloondelela kimisilo kye kamanaambo kakaandi.

⁹ Khu shifukhu isho, ikhaawe shitaambiso isi babaandu boosi babesaaya nga banaambo ni bakhola, naluundi baatsya beeba luundi beeraka babaandi nio betsuse lisaayilo lye ba wele baabwe ni bibiindu byeesi bayaayile khuubirira mu bituluungu ni bubeeyi.”

¹⁰ Umukasya ashilaangilila luundi ari, “Khu shifukhu isho, muliwulila khuulila nga khwaamila lubeka lwe shilibwa sheesi balaanga bari Fishi Geti, khukhwiilootsa nga khwaamila khu lubeka lushaakha lwe shiriimba, ni kumuwuulo kumuboofu nga kwaamila mu ngoongo.

¹¹ Ni mwisaasale luundi mulile inywe babaamenya lubeka lwe mwaalo lwe shiriimba, lwekhuuba baasuubusi beenywe boosi batsya khuhela bawewo, abo boosi babaasuubula ifeetsa batsya khuhela.

¹² Khu mbuka iyo, indibukula itaala, intsye imeentselese mu Yerusalemu. Ikhaawe shitaambiso isi babaandu babaali ni bibiindu biikali nga bewulila busa, nga belomela babeene bari, ‘Mbaawo sheesi Umukasya anyala khuukhola ta, oba shiilayi oba shiibi ta.’

¹³ Bye buyiindifu byaabwe bikhaanuulibwe, ni tsiintsu tsaabwe tsikhoonakisibwe. Baryo bakhoombekhe tsiintsu balekhe khuutsikonamo ta, babyaale tsinimilo tse kimisabibu ne balekhe khunyalisa khuunywa iviini iyaamamwo ta.

¹⁴ Shifukhu sh'Omukasya shikhulu shili aambi naabi, shembiyile shilikho shiitsa khaangu naabi. Shifukhu sh'Omukasya isho shikhaabe she butsiina buukali naabi, abe yakhaba baselikhale babaafuura khuuba baarafu balilila kamasika nga baantsuwa.

¹⁵ Shifukhu isho shikhaabe she lirima liikali, shifukhu she butsiina ni ngunyi, shifukhu she khukhwoonakisibwa ni khuhaangahaanga, shifukhu she shishiilima ni khuunyilwaana, shifukhu she kamafuumbi kamakali ni khuumaliya tii,

¹⁶ shifukhu she khuufuura ikhoombi ni luwuungu lwe buusoolo, khuusoolanisa biriimba bibyesirira kamatikiiyi ke kamaani, ni kiminaala kye khukhwiliinda kimileeyi naabi.

¹⁷ Ingareere kumutaambo khu baandu, baryo bakyeende nga bafwaanile babaali baabofu be tsimoni, lwekhuuba boonakisile isi Umukasya. Kamafuki kaabwe kakhaatsutsukhe aasi nga n'ubona kameetsi, ni kimilaambo kyaabwe kikhaabolele aasi khwiloba nga kamasiisye.

¹⁸ Khu shifukhu she lirima ly'Omukasya isho, ifeetsa yaabwe namwe izaabu yaabwe sibikhaabaasikule namwe bibawonese ta. Mu mulilo kwe lirima lyeewe, shibala shoosi shikhaashe kumulilo shiwewo, lwekhuuba alikhola intsakamo iyo yoole mu khaangu naabi khuubo babaamenya mu shibala boosi.”