Yuda 1 - Ibayibuli Ingwalaafu

Khusheesa

¹ Burume buno bwama isi ise Yuda, umwakaanisi uwa Yezu Kristu, nalundi nga ndi wandaaye uwa Yakobo. Imburonela abo beesi Wele alaanga, babamenya mu khukana khwa Wele Paapa ate nga babaalindibwa khulwa Yezu Kristu.

² Imbakanisa ndi khali shiisa, ni lukoosi, ni khukana bibabelekho mweesi mu bwitsufu.

Shitsiililwa she burume

³ Bakanwa baase, abe ise ishikhakakho naabi khubaronela inywe biwamba khu buwonesi bweesi fwesi khukabananakho, ne nashiboone nga shaakha khubaronela wangu. Ikhola shino nga imbakhupilisa ndi musoolanile naabi khufukiilila ukhwo khukhwawambisibwa bakhosefu ba Wele, kumulundi mutweela kwonyene nga khuli ni khuumala biilo ni biilo.

⁴ Khulwekhuba iliwo babaandu bababetubaasilemo mu mbola busa nga inywe si mumanya ta. Bibiwamba khu baandu bano mwafuna khubareewula makiboole, khubirira mu burone, nga ni baabakhalila nibo kumusaango. Khulwekhuba si barya Wele ta, nalundi bashuusaaŋana bubweela bwa Wele wefwe, babwikyesamo intsibirisa imbi. Nalundi bekaana Umuleekeli wefwe yenyene ate nga niye Umukasya wefwe, Yezu Kristu.

⁵ Ne akhaba nga bibiindu bino mwabimanya, ne ngana khubashebusa nga Umukasya khaale akho n'amusa babaandu ba Isiraeli khukhwaama mu liloba lye ba Misiri. Ne shitweela busa lwanyuma lwayo wonakisa abo abe babakhamufukiilisamo ta.

⁶ Shishilakho khayo imbashebuse khu bamalayika babaaba ni bunyala bwe angaaki naabi ne balekha khuliinda bukhulu bwaabwe ta, nga barura mu bifwo byabwe. Shino shakila Wele wababowela nibo mu shilima she makoombe, nga babowe ni kiminyololo kikikhakhalikha ta biilo ni biilo, khukhwolisa shifukhu shikhulu she khukhalilakho kimisaango ni shilyoola.

⁷ Isho shili busa nga babaandu be mu Sodoma ni mu Gomora, ni be mu biriimba bibibebotokheleele ni baakhola. Nabo beebirisa nga bamalayika abo, bakhola bibiindu bye buyeyani nalundi bewambila mu bikholwa bibikhali bya busheele ta. Babaandu bano bali mu shitaambiso she mu mulilo kukukhasima ta, nga she khubonelakho isi ifwe babaramile.

⁸ Ni babaandu beesi inganishilekho nabo boosi bali shitweela busa baryo. Khulwekhuba babaandu bano nga babirira mu byambaaso byabwe, bakhola bibiindu bye bubwonaki isi kimibili kyabwe, bafwotsola buwuli bwa Wele nalundi bakhomyaasa bakhosefu babaali mu ngaaki.

⁹ Akhaba ni malayika umukhulu ulaangibwa Mikayili, s'aakhola shino ta. Nga bakhaandisana ni Sitaani bari oba naanu ukane ayile kumulaambo kwa Musa, Mikayili s'araambisa lulimi lulukhomyaasa Sitaani ta. Ne aloma busa ari: “Khali Umukasya akhwikiitsile.”

¹⁰ Ne babaandu bano bakhomyaasa busa buli sheesi bakhamanyile ta. Ne bibiindu byeesi bamanya mu busaalikhana bwaawe, nga tsisolo tsye mwiirome, nibyo bibyeene ibyo bibikila bahela.

¹¹ Nga shili she kumutaambo isi bali! Khulwekhuba baloondelela intsibirisa ya Kayini. Khu lwe kumuluungo kwe kamapeesa, benyoola bari baakholile kumusaango nikwo mutweela kwe khukoraana nga Balamu n'akoraana. Nabo baminyaala nga Kora n'aminyaala, nabo baryo bahela.

¹² Babaandu bano babataambamo khuswala muntsibirisa yabwe ni beetsa khu mayiiya ke buhatweela bweenywe baliila atweela ni nanywe, ate nga bamenya bonyene, bali busa nga kamasaanda. Bali nga namufweeli isi imbewo ikyendisa ne nga s'areera ifula ta; nga kimisaala kikikhaama bibyaamo mu mbuka yeesi kyashiile khukhwaama ta. Bali busa nga kimisaala kyeesi tsiindi tsimalile khukhuulibwa, nashiryo kyoomela ilala.

¹³ Bikholwa byabwe bili bye tsisoni byayireka busa nga bunyaalu bweesi khukhwilyebula khwe inyaantsa khureera. Bali busa nga tsinieniesi tsitsiyiiya busa, tseesi Wele abiikhila shifwo she mu shilima she makoombe she biilo ni biilo.

¹⁴ Shaba khu lwe babeene abo kila Enoka, uli umukuuka uwe kumusaafu khukhwaama khu Adamu, akhola buŋoosi nga aloma ari, “Bona Umukasya aliitsa ni kimikaanda kye bamalayika beewe bakhosefu.

¹⁵ Aliitsa khukhalila buli shoosi shishiili ni bulamu kumusaango, khukhalila abo boosi kumusaango babakhola bikholwa bye tsisoni, ni bilomo byoosi byeesi baboonaki boosi babakharya Wele ta, bamukanikhakho.”

¹⁶ Babaandu bano buli busheele beŋuluŋuunya nalundi nga bekiitsa bashaabwe. Balondelela bye kameelu kabwe; bali babeniinisa angaaki nalundi bali babalomaka kimilomo kimikali nga babuyila babaandi nio banyalise khufuna kimikhoosi kyabwe.

Bye khureewula ni kamakaambila

¹⁷ Bakanwa baase, ne ni mushebulile byeesi baarume b'Omukasya weefwe Yezu Kristu bababoolela khuliindilila.

¹⁸ Bababoolela bari: “Nga bifukhu bimaliilisi byoolile, ilibonekhawo babaandu babaali batsekhelela, nalundi ilibawo babaandu babaloondelela bye kameelu kabwe.”

¹⁹ Babaandu bano nibo babarereera inywe khukhwawukhanamo nga benaanayo khu byeesi kimibili kyabwe kikana, nga si bali n'Umwoyo ta.

²⁰ Ne inywe bakanwa baase, ni mwiyombakhe mwabeene mu khufukiilila khwenywe khukhosefu naabi, nga muloombatsaka mu maani k'Omwoyo Umukhosefu.

²¹ Ne mwiyayisile mwabeene mu khukana khwa Wele; nga mulindiilila shiisa sh'Omukasya weefwe Yezu Kristu shishiiliboolisa inywe khu bulamu bubukhawawo ta.

²² Noola iliwo babaandu babekanakana, ni mubahandalase.

²³ Ni babaandi ni mubawonese nga mubayula khurura mu mulilo, ne babaandi ni bokesanise shiisa nga mwitsililisa, nga simwitiila ni khu bikwaaro byabwe ta, khulwekhuba bilikho kamasaanda ke bubwonaki bwe kimibili kyaabwe.

Khuloomba

²⁴ Ari shiriifwa ni buyiinga, ni bunyala, ni kamaani bibe isi Wele, uyo unyala khubaliinda inywe mulekhe khukwa mu byonako ta. Nalundi niye unyala khubawanayo inywe akhali likoondo lyosiitsana ta, isi shiriifwa sheewe ni kumwikhoyo.

²⁵ Shiriifwa shibe isi Wele uyo yenyene Umuwonesi weefwe, khubirira mu Mukasya weefwe Yezu Kristu, bibyeene ibyo byeesi niye aba ni nabyo khukhwaama mu miboolo kye khaale ni aluno ari, bibe bibyeewe, biilo ni biilo. Amiina.